Read Mundani Lûm 9 Bible Online

Lûm 9 - Mundani bible

Lûm 9

¹Ànəa e shua la wu nkûŋ, ndɨ̀ wu è ntsiꞋi àghɨ yeamɔꞋ nè Yesò Klistò la. È nka laꞋà mèfà̧. Mèmɨ̀ɨ̀te mɔ̧ ane ndɨ Fo Kèfə nàa nyɨ̀Ꞌta la, è shu am nê è nka fɨta fɨte.

²Tèsȩ tea ndâ nkua am, èntɨ̧ɨ̧ am e mè ndù̧à àfɨ̀Ꞌ àgème ane ànəa bòt ba bòt Izəèlȩê.

³Ndɔ̀ Mbɔ̧ɔ̧mà ghɨ ale nɔ̀ŋke a ègwet laã, tè ntsì am ane Yesò Klistò mbɨ̀Ꞌɨ̀ e ghɨ̌ bɔnyɨ bɔ̧ bu, è wu bòt àndà̧ bɔ̧ la aa peme, ko a bakà bɨ am.

⁴Wu bòt Izəèlȩê, Mbɔ̧ɔ̧mà nɨ awɔb ane bɔ̧ bi la. Tà li nyɨ̀Ꞌte awɔb ènɨ̧ vi, ngɨ̀ mènkàꞋa kèkweelè mi bɔ̂ tò ba a ngo̧ a ngò̧, ŋa mbɨ̧ zi abua yɔb, nyɨ̀Ꞌte awɔb ndɨ bɔ̀ɔ me wùꞋtè àvi la, mè nkàꞋ àwɔb èghɨ nyaŋ.

⁵Bɔ mè dzəè àndǎ̧ Abàlàghâm bɔ̂ Asàk nè Jàkɔ̂b. Wu àndǎ̧ bɔ̀ li mbi a Fɔ̧̀ wu Mbɔ̧ɔ̧mà yɔꞋ ntsà mbɨ̀Ꞌɨ̀ wɔ̀bȩ̂ la. Tà wu Mbɔ̧ɔ̧mà wu tà wu a ègwet àghɨa àgème la. MèngùꞋte wu ane èlen to ane àlia nè àlia. Àmèn.

⁶Ka la, e ntsèa shua nê tà bakà ghɨ àghɨa èngǎ̧ tò e shu la, nkàà nê è ntsě wòt ègème bɔ bi atò àndǎ̧ bòt Izəèlȩê la, è wu wòt Mbɔ̧ɔ̧mà làà la.

⁷È kà mě ngu bòt bàgème bɔ li mbi àwɔb àndǎ̧ Abàlàghâm la, è wu bɔ̧ Mbɔ̧ɔ̧mà la. Mbɔ̧ɔ̧mà li shu abua Abàlàghâm nê, “Wu bòt bɔ̀ɔ li bi awɔb àndǎ̧ Asàk la, ka bɔ̀ɔ wu bɔ̧ bè la.”

⁸Tàà shua ale ngua nyɨ̀Ꞌta nê è ntsě bòt bu bàgème bɔ bi awɔb àndǎ̧ Abàlàghâm la ka wu bɔ̧ Mbɔ̧ɔ̧mà la, wu bòt bu bɔ bi awɔb mbɨ̀Ꞌɨ̀ Mbɔ̧ɔ̧mà li nkàꞋ la, ka bɔ̀ lâ ngu bòt àndǎ̧ Abàlàghâm la.

⁹Mbɔ̧ɔ̧mà li ngɨ̀ mènkàꞋa mi abua Abàlàghâm nê, “Naa me wu àfɨ̀Ꞌ yaa èŋubȩ̂ maa kɨꞋɨ ghɨ̌ Sàda naa bi wambâ̧.”

¹⁰È ntsě wuê ndàꞋ àyaa, Lèbekà li nkɔt bɔ̧ mbâ̧ babe ane mbâ̧ yemɔ̀Ꞌ, tǎt nyaꞋ wa Asàk.

¹¹Bɔ li bɔ̀ ka batè ndzìꞋi mbi àwɔb, bɔ̀ ka meè ndzìꞋì ngɨ̀ àghɨa ntsɔ̧̀ kò àyea kàbɔ̀ŋ leꞋ, ka mbɨ̀Ꞌɨ̀ aa nyɨꞋte nê Mbɔ̧ɔ̧mà li ndàà waã mbɔŋ ane mènkɔ̀ŋke mi mbɨ̀Ꞌɨ̀ tà li nɔ̀ŋè la,

¹²kà wu àfaꞋa ntsɔ̧̀ waã mbɔŋ è ghɨ̀ la, bɔ shu abua Lèbekà nê, “We jûŋ naa li wu wafàꞋ we tèchɨɨle.”

¹³A wu mbɨ̀Ꞌɨ̀ bɔ li shɨ a èbem Àkata Mbɔ̧ɔ̧mà la nê, “E ndi nkɔ̀ŋkà Jàkɔ̂b, mpààba Esaɔ̀.”

¹⁴Tè aà anè ngua nyɨ̀Ꞌta nê Mbɔ̧ɔ̧mà nàà kà ghɨ mènəè ndɨŋndɨ̀ŋ? A ntsě ale.

¹⁵Tà li shu abua Musì nê, “Maa tɨŋe wòt tà ghɨ̂ tà kà wu bɔ etɨŋe la, mbɨ̀Ꞌɨ̀ mâ kɔ̀ŋkè la, e mě ku tèsȩte wòt mâ kɔ̀ŋkè la.”

¹⁶Ale, kò Mbɔ̧ɔ̧mà làa wòt kò tà bakà là leꞋ, ko a ntsě mbɨ̀Ꞌɨ̀ wɔ̀bȩ̂ kɨa la, a wu wuê ane tèsȩte Mbɔ̧ɔ̧mà.

¹⁷Àkata Mbɔ̧ɔ̧mà a li shu abua Felɔ̀ nê, “E ndɨ ŋèꞋe awê a ègwet mbɨ̀Ꞌɨ̀ nɨ àwê nyɨꞋte mètàŋ mɔ̧, e mě ghɨ̌ waa waa a ngɔ̀ŋ naa ko wòt è ngu wùà la.”

¹⁸Ale, Mbɔ̧ɔ̧mà nàa nkɔ̀ŋkà e ku tèsȩte wòt, tà ku. Tà mèe tà me kɨ e ghɨ̌ wòt naa bɔ àkweela èntɨ̧ɨ̧, tà ghɨ̀.

¹⁹Bɨa shu abua am nê, “A wu ale Mbɔ̧ɔ̧mà ghɨ̀ nǎ ka mè me fèèlè àwa à? BetsiꞋa wàa tu̧u̧ ànəa Mbɔ̧ɔ̧mà kɨa la?”

²⁰Àwɔ̀ wɔ̀bȩ̂ àa shua anè nko nê yè wu wàa evəèəè èngà̧ a ètsəê Mbɔ̧ɔ̧mà à? Tè betsiꞋa àghɨa wòt ghɨ̀ ane èbu la a shu abua tò wu tà ghɨ̀ la nê, “À ghɨ̀ na ka ngɨ̀ am anè à?”

²¹Tè ntsě àdziꞋa wòt wu tàa ngɨ̀à bakɨ̀ŋ la tàa nɨ ambòꞋtsǎꞋ wemɔ̀Ꞌ e ghɨ bakɨ̀ŋ babe, è we bɔ̀ɔ mbà̧à̧ta wuê ane àlia nɨ̧ la, nè wê bɔ̀ɔ mbà̧à̧ta àlia àgème la a?

²²A bê ngu mbɨ̀Ꞌɨ̀ àghɨa Mbɔ̧ɔ̧mà ghɨ̀ la. Mbɔ̧ɔ̧mà nàà nkɨ e nyɨ̀Ꞌte ntsǒ zi, ka mbɔ̂ me kɨ nê bòt è ye mètàŋ mi, ale tà me tsèna nkùùla èntɨ̧ɨ̧ vi adù̧ bòt bu ntsǒ tò è nɔ̀ŋkè a ègwet lɔb, bɔ̀ tsiꞋi e be bɔ̀ɔ liime awɔb la.

²³Mbɔ̧ɔ̧mà li ngɨ̀ anè mbɨ̀Ꞌɨ̀ nyɨꞋte ènɨ̧ vi wu e ghe la abua bòt bu tàa nkua tèsȩ tɔb, è wû bòt bu tà li ndzaŋe taŋke nê bɔɔ li bɔ ènɨ̧ la.

²⁴Bòt mbɔŋ wu bàa wu tà tɔ awa la. E ntsě wuê ndàꞋa abua Bèjuê, e wu abua bòt kà wu Bèjuê mɨ̧̂.

²⁵A bê ngu wuê mbɨ̀Ꞌɨ̀ tà shua a èbem àkata Osìà la nê, “Maa tɔ bòt bu bɔ li bɔ̀ ka wu bòt bɔ̧ la, ane ‘Bòt bɔ̧.’ Maa tɔ àlaꞋ yu e ndɨ e nka wua nkɔ̀ŋkà la, ane ‘ÀlaꞋ a èkɔŋ am.’

²⁶KwàꞋ adziꞋ yu tà li shu awɔb nê ‘Bɨ ntsě bòt bɔ̧ la’, bɔɔ tɔ awɔb abot ane bɔ̧ Mbɔ̧ɔ̧mà yû̧.”

²⁷Àsayà li ŋȩ ndàꞋ ànəa bòt Izəèlȩê nê, “Bòt Izəèlȩê aa mbàta ndzaãaã mbɨ̀Ꞌɨ̀ těsoŋ tu a ngèt *èdzî la, ka wu wuê bòt mpiꞋ ka bɔ̀ɔ peme la,

²⁸nkàà nê Mbɔ̧ɔ̧mà naa bê paa saꞋa ngɔ̀ŋ kà lȩ̀ȩ̀tè.”

²⁹A wu mbɨ̀Ꞌɨ̀ Àsayà li ndzaŋe shu la: “Tǎt wa Àtsèàngɔ̀ŋ li ngɨ̀ ale tà kà ŋa awa bɔ̧, ko àya aa mî mbɨꞋɨ̀ Sodòm bɔ̂ Gòmolà.”

³⁰Tè bà wu anè e laꞋ nê ghàà? Nê bòt kà wu Bèjuê bu bɔ̀ le kaꞋa wua nùà nkɨà Mbɔ̧ɔ̧mà naa nɨ awɔb mbɨ̀Ꞌɨ̀ bòt bɔɔ tɨ̧ɨ̧ ndɨŋndɨ̀ŋ a mbì li la, e li ntsìꞋi bòt bɔ tɨ̧ɨ̧ ndɨŋndɨ̀ŋ a mbì tò la, nkàà èntɨ̧ɨ̧ wɔb wu bɔ zi ane Yesò la.

³¹Mbɔ̂ bòt Izəèlȩê bu bɔ̀ le wua nkɨà Mbɔ̧ɔ̧mà naa nɨ awɔb mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li, nkàà mbɨ̧ tu bɔ̀ɔ nɔ̀ŋà la, è le kaꞋa bɔ àghɨa bɔ kɨa la.

³²Lə bɔ li bɔ̀ ka bɔŋ la wu nê bɔ li bɔ̀ ka zi mèntɨ̧ɨ̧ mɔb ane Mbɔ̧ɔ̧mà ka me kɨ, bɔ li mɨ̀ɨ̀tè nê aa wu ale nkàà àfaꞋa ntsɔ̧̀ bɔ̀ɔ ngɨ̀à la. Bɔ li sèmnè a ègwet èti lu bòt àa sèmnà adù̧ la.

³³Àyaa a wu mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Bɨ̀ ye, e ngua nɔ̀ŋa èti a Zayɔ̀n, èti àa ghɨ̌ bòt aa sèmne adù̧ la, èwu àa ghɨ̌ bòt aa kwene la. Wòt tà zi èntɨ̧ɨ̧ vi ane tò la ka bɔ àtsəa kɔꞋɔ.”