Read Mundani 1 Kɔlìn 1 Bible Online

1 Kɔlìn 1 - Mundani bible

1 Kɔlìn 1

¹Letà Pɔ̂l wantu̧ Yesò Klistò, Mbɔ̧ɔ̧mà lè lȩ ane mènkɔ̀ŋke mi la, nè wanyɨ wa Sostènès,

²Abua bòt chɔsì Mbɔ̧ɔ̧mà wu a Kɔlìn la, bɔ̀ɔ wu bɔ̀ tsiꞋi àghɨ yeamɔꞋ nè Yesò Klistò, bɔ̀ tsiꞋi bòt Mbɔ̧ɔ̧mà la, nè bòt bu àdzìꞋ ègème bɔ̀ɔ ngùꞋtà èlen Yesò Klistò mbɨ̀Ꞌɨ̀ Lefɨ̀Ꞌ wɔb nè wa la.

³Maà shù̧ù̧ta nê Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ è nyɨꞋte a ntsɔ̧̀ wɔb abua yɨ̧ ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

⁴Maà nkɔ̀ŋkà Mbɔ̧ɔ̧mà àfɨ̀Ꞌ àgème ane àghɨa tà ghɨ ane yɨ̧ la. Tà nyɨꞋte a ntsɔ̧̀ vi abua yɨ̧, ndɨ̀ wu bɨ̀ tsiꞋi àghɨ yeamɔ̀Ꞌ nè Yesò Klistò la.

⁵Maà ndzèa àyaa ane èghɨ ntsɔ̧̀ bu ègème tà ghɨ̂ bɨ bɔŋ la, nè ndɨ̀ wu bɨ ko a màndaꞋa èngǎ̧ tò ane balu̧ bàgème mè nko àghɨ àgème a bɔ ndɨ àa ghɨ̀ nê Fo Mbɔ̧ɔ̧mà la.

⁶Mbɨ̀Ꞌɨ̀ èngà̧ waa ane ànəa Yesò e lâ shɨꞋɨ a mèntɨ̧ɨ̧ mɨ̧ la,

⁷bɨa bɔ èghɨ ègème Fo Mbɔ̧ɔ̧mà nàa ŋa la, mbɨ̀Ꞌɨ̀ bɨ̀a nchɨ̀Ꞌà Mbɔ̧ɔ̧mà naa ghɨ̌ Yesò Klistò Lefɨ̀Ꞌ wa naa pùùlà la.

⁸Taa ghɨ̌ èngǎ̧ waa aa shɨꞋɨ a mèntɨ̧ɨ̧ mɨ̧ te ghǎ e dzəâ ane àli yu tàa mě kɨꞋɨ la, tè wòt naa baka ye àghɨa tàa fèèlè àwɨ̧ adù̧ ane àlia ngaa la.

⁹Mbɔ̧ɔ̧mà naa lâ ghɨ̀ àyaa ane yɨ̧ nkàà nê tàà ngɨ̀à àghɨa tà shu la àfɨ̀Ꞌ àgème. Wu tòà tà tɔ àwɨ̧ nê bɨ̀ kɨꞋɨ ngu a èbem mèntsèke ntsɔ̧̀ nè waã vi Tǎt wa Yesò Klistò Lefɨ̀Ꞌ wa la.

¹⁰Bɔnyɨ bɔ̧, e ngua shù̧ù̧ta wɨ̧ ane èlen Yesò Klistò Lefɨ̀Ꞌ wa nê, bɨ̀ wu ane ètsəê wemɔꞋ, mbɨ̀Ꞌɨ̀ àyɔ̀ŋ a wu a kètsìà wɨ̧. Bɨ̀ wu àghɨ yeamɔꞋ ane ndɨ bɨ̀a nkwàꞋtà mènəè la.

¹¹Bòt lob Kloe e shu am nê àyɔ̀ŋ aa kètsìà wɨ̧.

¹²Ànəa e shua la wu nê, bɨ wu a mètsəê a mètsəê. Wòt wɨ̧ nàa ngɨ̀ tà nê, “E ngu wòt Pɔ̂l”, wekǒ nê, “E ngu wòt Àpolòs” wekǒ nê “E ngu wòt Pità”, ka nè è we tàa laꞋnê “E ngu wòt Yesò Klistò” la.

¹³Bɔ bakà ghabta Yesò Klistò a èdziꞋ èdziꞋ. Wu Pɔ̂l ka tà li mpfə a mbɨ̧̀ mbasa ane ànəa yɨ̧ la à? Bɔ li ngua ndzìà àwɨ̧ a èdzî ane èlen Pɔ̂l?

¹⁴Mâ kɔ̀ŋka Mbɔ̧ɔ̧mà nê e ndɨ è ka zì wòt kǒ tsa a èdzî ane yɨ̧ ka nè Klipùs bɔ̂ Gayɔ̀s.

¹⁵Ale, betsiꞋa wòt kà laꞋnê bɔ li ngua ndzìà àwɨ̧ a èdzî ane èlen laã.

¹⁶(Mâ ku̧u̧te àfɨ̀Ꞌ yaa nê e ndi ndzì Stefanàs bɔ̂ bòt lob zi a èdzî mɨ̧̂, ka è mbakà tsi nko wòt kǒ tsa e ndi ndzìa tò a èdzî la, ka nè bòt baa.)

¹⁷Yesò Klistò li tà kà wua ntsàà am nê è me zǐ bòt a èdzî, tà li ngua ntsàà am nê è nkɨꞋɨ me tsɔ̀te Ntu̧ Ntsɔ̧̀. È nka me làꞋa ane ndɨ bòt àa nɨa èyě bɔbȩ ndàꞋà la à, mbɨ̀Ꞌɨ̀ ka bɔ̀ ka tsi ndzè mètàŋ mu ane èvə Yesò Klistò a mbɨ̧̀ mbasa la.

¹⁸Èngǎ̧ ànəa èvə Yesò Klistò a mbɨ̧̀ mbasa e wu mbɨ̀Ꞌɨ̀ èngǎ̧ àkèghɨ̧̀ abua bòt bu nyɔ la; ka è me wu abua ya wu bàa pèma la, ko wu mètàŋ Mbɔ̧ɔ̧mà.

¹⁹Àkata Mbɔ̧ɔ̧mà a laꞋnê “Maa bukle ètsə bòt èyì, ntsòkè ètsə bòt bɔ ko nyaŋ la.”

²⁰Ale, wòt wu tà bɔ èyì la wu neŋàà? NyɨꞋtà mbɨ̧te Musì naa wa à? Bòt bu bɔ̀ɔ nkàànà mènəè àlia laane la bɔ̀ɔ wa à? Mbɔ̧ɔ̧mà nyɨꞋte nê, èyì ngɔ̀ŋ yaa wu àghɨ̧̀ɨ̧̀nè.

²¹Mbɔ̧ɔ̧mà li nɨ èyǐ vi ngɨ̀ a me kweele abua bɔbȩ bɔɔ nɨ èyǐ wɔb e ko atò. Tà li ntsìꞋi nɨ̀ èngǎ̧ vi wu bàa ndàꞋà bòt e tɔ nê wu èngǎ̧ àkèghɨ̧̀ la, ngɨ̀ bòt bɔ̀ɔ mbɨ̧̀ɨ̧̀nâ ane tò la e pema.

²²Bèjuê aa nkɨà ngɨŋa àghɨa ane àlȩê, bòt Glɨ̂k e me kɨ ngule èyì.

²³È me wu awa ba me làꞋa ndɨ bɔ wu̧u̧te a Yesò Klistò a mbɨ̧̀ mbasa la, è wu ànəa èbèm lu̧u̧me abua Bèjuê, mè ngu àghɨ̧̀ɨ̧̀nè abua bòt kà wu Bèjuê la.

²⁴Ka è me wu bòt Mbɔ̧ɔ̧mà tɔ la, Bèjuê nè bòt ka wu Bèjuê èngǎ̧ waa ba làꞋà la wu ànəa Yesò Klistò wu tà wù mètàŋ Mbɔ̧ɔ̧mà mè ngu èyǐ tò la.

²⁵Àghɨa bɔbȩ àa ndzea nê wu àghɨ̧ɨ̧na Mbɔ̧ɔ̧mà la a tsě èyǐ bɔbȩ, àyea bòt àa mè ndzea nê tàà njùa adù̧ la a mè ntsè mètàŋ bɔbȩ.

²⁶Bɔnyɨ bɔ̧, bɨ̀ ku̧u̧te ndɨ Mbɔ̧ɔ̧mà li me tɔ awɨ̧ bɨ wuê la. ÀbəèꞋ àyɨ̧ nyaŋ a li à ka bɔ èyì, à ka bɔ ètɨ̧̂, è kà wu bòt bɔ mbi àwɔb a èbem àndǎ̧ bòt bɔ bɔ àyɔb a ngɔ̀ŋ ŋaa la.

²⁷Ka Mbɔ̧ɔ̧mà tsiꞋi làà èghɨ bɔbȩ àa ndzea nê wu àghɨ̧̀ɨ̧̀nè la, mbɨ̀Ꞌɨ̀ ghɨ̌ bòt èyì aa bɔ àtsəa kɔꞋɔ, mè ndàà èghɨ bu bɔbȩ àa ndzea nê aa njùa la, mbɨ̀Ꞌɨ̀ ghɨ̌ bòt mètàŋ aa bɔ àtsəa kɔꞋɔ.

²⁸Mbɔ̧ɔ̧mà làà àghɨa bòt ngɔ̀ŋ àa ngwàa, bɔ̀ ka mê ngua ndzea mbɨ̀Ꞌɨ̀ àghɨ la, mbɨ̀Ꞌɨ̀ ghɨ̌ èghɨ bu bòt àa mɨ̀ɨ̀tà nê aa və la aa tsiꞋi èghɨ àku.

²⁹Tà li ngɨ̀ anè mbɨ̀Ꞌɨ̀ ka wɔ̀bȩ̂ kǒ me ŋeꞋe tèkwȩ ti a ègwet a mbì Mbɔ̧ɔ̧mà.

³⁰Wu Mbɔ̧ɔ̧mà ka tà ghɨ̂ ba tsiꞋi àghɨ yeamɔꞋ nè Yesò Klistò la. Yesò Klistò wu mbɨ̀Ꞌɨ̀ èyǐ Mbɔ̧ɔ̧mà abua ya. Tà ghɨ̂ ba tsiꞋi bòt mènəè ntsɔ̧̀ e mbì Mbɔ̧ɔ̧mà, mè ntsìꞋi bòt bɔ ŋa wɔb abua Mbɔ̧ɔ̧mà la. Wu tòa tà tsì àwa a èbem kàbɔ̀ŋ la mɨ̧̂.

³¹Àkata Mbɔ̧ɔ̧mà a laꞋnê, wòt me kɨ me ghàꞋtà vi, tà me ghàꞋtà ane àghɨa Mbɔ̧ɔ̧mà ghɨ ane tò la.