Read Mundani 1 Kɔlìn 12 Bible Online

1 Kɔlìn 12 - Mundani bible

1 Kɔlìn 12

¹Bɔnyɨ bɔ̧, maà nkɨà bɨa ko nkûŋ ane ànəa mèghàb mu Fo Mbɔ̧ɔ̧mà nàa ŋǎ la.

²Bɨ ko nê è li ngu àfɨꞋa kà bɨ̀ ko a Mbɔ̧ɔ̧mà, bɨ fà̧à̧tè èka bɨ̧ ane balu̧ nyaŋ, me kukte bèmbɔ̧ɔ̧mà bu bèa ka làꞋ la.

³Ale, maà nkɨà bɨa ko nê, betsiꞋa wòt Fo Kèfə è ghɨ̂ tà me làꞋà la ka tsɔ̧ɔ̧ a Yesò, wòt kà mê ngu ko shu nê Yesò wu Tàt, kà wu wòt Fo Kèfə nàa èntɨ̧ɨ̧ tò la.

⁴Mèghàb Fo Kèfə nàa ŋǎ la nàà tsa tsa, è bɔ̂ ngu Fo mbɔŋ yemɔ̀Ꞌ ka nàa ŋǎ mùà ègème la.

⁵Balu̧ aa nyaŋ betsiꞋa bòt e fàꞋ la, bɔ bɔ̂ ngua fàꞋà wuê abua Tǎt wemɔ̀Ꞌ.

⁶Mèyì a mànɨa ghɨ èghɨ nàà tsa tsa, è bɔ̂ ngu wuê Mbɔ̧ɔ̧mà ka tà ŋa èyǐ waa waa nàa nɨa ngɨ̀à àzi ne àfàꞋ la.

⁷Wòt ègème nàà mbɔ èghab Fo Mbɔ̧ɔ̧mà ane ntsɔ̧̀ waa waa.

⁸Fo Mbɔ̧ɔ̧mà mbɔŋ nàa ngɨ̀ è ghɨ̀ wòt kǒ me koa nkɨ̀ɨ̀ta bòt ane mèngǎ̧ èyǐ Mbɔ̧ɔ̧mà, mè ngɨ̀ è wekǒ me ko mènəè Mbɔ̧ɔ̧mà ngàꞋta shua bòt,

⁹Fo yu mè ngɨ̀ wekǒ lâ mbɨ̧̀ɨ̧̀ne a Mbɔ̧ɔ̧mà ntsɔ̧̀, mè ngɨ̀ wekǒ nè wòt bɔ mètàŋ a màmbəa èghɔ̧.

¹⁰Fo mbɔŋ nàà ngɨ̀à wòt kǒ bɔ mètàŋ a màngɨa ngɨŋa ènəê, ngɨ̀à wekǒ làꞋà àtɔŋ Mbɔ̧ɔ̧mà, mè ngɨ̀à wekǒ nè wòt koa èghɨ e dzə abua Fo Mbɔ̧ɔ̧mà la, nè èbe kà dzə abua Fo mbɔŋ. Tàa ngɨ̀ tà gha abua wòt kǒ, tà ŋǎ tò mètàŋ a màndaꞋa ane ndɨ̧tsə tsa tsa, mè ŋǎ wekǒ mètàŋ a màngaꞋta mènəè maa bɔ làꞋa ane ndɨ̧ tàa tsa tsa la è shuà.

¹¹Èghɨ baa ègème nàà ŋǎ wuê Fo yaa yemɔ̀Ꞌ la mbɨ̀Ꞌɨ̀ tà kɔ̀ŋke la. Wòt ègème nàà mbɔ̌ è vi ne èghàb tsa.

¹²BetsiꞋa bɔ fɨ̀Ꞌnè èwuu mèghàb maa ane mbɨ̧̀ ènyit è bɔ èdziꞋ ènyit nyaŋ la. È batè mbɔ̀ èdziꞋi ènyit nyaŋ ale, mbɔ̂ mbèle wuê mbɨ̧̀ ènyit yemɔ̀Ꞌ, wu wuê ndɨ mbɨ̧̀ ènyit Yesò Klistò nàa la.

¹³Wu wuê ndɨ bàagème, kò ba wu Bèjuê, kò bòt kà wu Bèjuê, kò èbùꞋ, kò bòt kà wu èbùꞋ leꞋ, bɔ zì àwa a èdzî baa bɔ Fo ngaa yemɔ̀Ꞌ ntsìꞋi mbɨ̧̀ ènyit yemɔ̀Ꞌ la. Mbɔ̧ɔ̧mà mè ndzì Fo ngaa a mèntɨ̧ɨ̧ ma bàagème.

¹⁴Mbɨ̧̀ wɔ̀bȩ̂ bakà bɔ àdziꞋa ènyit yeamɔꞋ, è bɔ èdziꞋi ènyit nyaŋ.

¹⁵Tè àka a wu shu nê, “Ndɨ̀ wu e ntsě àbu la, e ntsě àdziꞋa mbɨ̧̀ ènyit,” ko àà ghɨa ko àà ghɨ̀ tê aa baka tsi ngu àdziꞋa mbɨ̧̀ ènyit la a ntsě.

¹⁶Àtû̧ a wu shu mɨ̧̂ nê “Ndɨ̀ wu e ntsě èghɨ la, e ntsě àdziꞋa mbɨ̧̀ ènyit”, ko àghɨa ko àa ghɨ̀ tê aa baka tsi ngu àdziꞋa mbɨ̧̀ ènyit la a ntsě.

¹⁷Mbɨ̧̀ ènyit ègème ghɨ̀ ale, ngu wuê èghɨ, ko nàa me ghɨ̀ na ka ndzəa èdziꞋ à? Mbɨ̧̀ ènyit ègème ghɨ̀ ale, mè ngu wuê àtû̧, ko nàa me ghɨ̀ na ka nuke èdziꞋ à?

¹⁸Ka mbɨ̀Ꞌɨ̀ àa la, Mbɔ̧ɔ̧mà li ngɨ̀ èdziꞋi ènyit ègème ntsìte bùà ane ndɨ àa me bɔ̌ atò la.

¹⁹ÈdziꞋi ènyit ngaa ègème e li ngɨ̀ ale ngu àdziꞋa ènyit yeamɔꞋ, ko mbɨ̧̀ ènyit nàa dzəè neŋàà?

²⁰Mbɨ̀Ꞌɨ̀ àa la, èdziꞋi ènyit aa nyaŋ, ka mbɨ̧̀ ènyit mbɔ̂ ngu yemɔ̀Ꞌ.

²¹BetsiꞋa èghɨ è ka shu abua àbu nê “BetsiꞋa e ntsèkè kà ye awê”, àtsə à ka mê ngu shu abua àka nê, “BetsiꞋa e ntsèkè kà ye awê.”

²²A batè ngu ale ka, betsiꞋa bà ka tseke kà ye èdziꞋi ènyit bu bàa ka ye mbɨꞋɨ̀ àghɨ la,

²³mbɔ̂ è bu nè èdziꞋi ènyit bàa mɨ̀ɨ̀tà nê è ntsě àghɨ la, wu èbe bàa mbà̧aã ntsɔ̧̀ la. Baa nèètà nkàbta èdziꞋi ènyit baa bu àa ka bɔ a mànyɨꞋta àbȩ la,

²⁴è wù àghɨa bàa ka ghɨ ane èdziꞋi ènyit bu àa mbɔa a mànyɨꞋta la. Ka Mbɔ̧ɔ̧mà ghɨ̌ mbɨ̧̀ ènyit ane ndɨ bɔ̀ɔ me kukte èdziꞋi ènyit bu bàa ka nɨ mbɨꞋɨ̀ àghɨ la,

²⁵mbɨ̀Ꞌɨ̀ àyɔ̀ŋ aa baka wu ane mbɨ̧̀ ènyit, èdziꞋi ènyit aa me kɔ̀ŋkè èbeko.

²⁶ÀdziꞋa mbɨ̧̀ ènyit yeamɔꞋ a me ye ngoꞋ, ko wu èdziꞋi mbɨ̧̀ ènyit ègème ndzea ngoꞋ la, bɔ mè me kuke àdziꞋa mbɨ̧̀ ènyit yeamɔꞋ, ko èdziꞋi mbɨ̧̀ ènyit ègème aa fɔte wùꞋtè àwɔb.

²⁷Bɨ̀agème bɨ wu mbɨ̧̀ ènyit Yesò Klistò, waa waa ane yɨ̧ wu àdziꞋa ènyit adù̧.

²⁸Mbɔ̧ɔ̧mà tsia waa waa àdziꞋa zi a èbem chɔsì vi. Bòt mbì tà tsia la wu bɔntu̧ Yesò Klistò, me tsɔꞋɔ ntsia bèndàꞋàtɔŋ Mbɔ̧ɔ̧mà, ndɔ̀Ꞌ ntsia bènyɨꞋtà, nè bòt bɔ̀ɔ ngɨ̀à ngɨŋa mènəè la, nè bòt bɔ̀ɔ mbəa bòt la, nè bòt bɔ̀ɔ ntɨ̀ŋa bòt la, nè bòt bɔ̀ɔ mbà̧aã bòt la, ndɔ̀Ꞌ nè èbe bɔ̀ɔ ndàꞋà ane èwuu ndɨ̧tsə tsa tsa la.

²⁹È ntsě bòt bàgème bɔ̀ wu bɔntu̧ Yesò Klistò la. È ntsě bòt bàgème bɔ̀ wu bèndàꞋàtɔŋ Mbɔ̧ɔ̧mà la. È kà wu bòt bàgème bɔ̀ wu bènyɨꞋtà la. È ntsě bòt bàgème bɔ̀ɔ ngɨ̀à ngɨŋa ènəê la?

³⁰È ntsě bòt bàgème bɔ̀ɔ nkoà mbəa bòt la. È kà wu bòt bàgème bɔ̀ɔ ndàꞋà ane ndɨ̧tsə tsa tsa la, è kà wu bòt bàgème bɔ̀ɔ nko ngàꞋta mènəè bɔ laꞋa ane ndɨ̧ tsa tsa la shua la.

³¹Ka bɨ̀ lâ nɔ̀ŋè mèntɨ̧ɨ̧ mɨ̧ me kɨ ngule mèghàb, mbɔ̂ maa nyɨꞋte awɨ̧ ngule èlu̧ ntsɔ̧̀.