Read Mundani 1 Kɔlìn 4 Bible Online

1 Kɔlìn 4 - Mundani bible

1 Kɔlìn 4

¹Bɨ̀ me nɨ awa mbɨ̀Ꞌɨ̀ bòt Yesò Klistò zì mènəè mi mu è li ngu mènəè ndò̧ la a tèkitebu tɔb nê bɔ̀ me nyɨꞋte la.

²Àghɨa mbì wòt nàa me kɨ ye ane wòt tà zǐ àfàꞋ tèkitebu tò la wu ndɨ ŋut nàà me baãaã àfàꞋa zi ntsɔ̧̀ la.

³Bɨ màà me bàŋe am, kò bòt ko tsa e bàŋe am leꞋ, ko à yu ntsě ànəa abua am. Maà kà lem mbàŋa am mmɔ̌ mbɔŋ.

⁴E mbakà ko ànəa ko mâ fà̧à̧ la, ka è nka wua shua nê mâ kuꞋu e mbì Mbɔ̧ɔ̧mà. Wu Yesò Klistò ka tàa bàŋe am la.

⁵È wu ale, bɨ̀ ka ndzìꞋ mbàŋè wòt kà àfɨ̀Ꞌ a zìꞋ nkùꞋ. Tè Yesò Klistò naa kɨꞋɨ kaa me bàŋe bòt. Taa li ghɨ̌ èghɨ ndò̧ bu bòt àa ngɨa a èbem ndzěm la aa pùùla ayaã, e ghɨ̌ bòt aa ye èghɨ waa waa nàa nkwaꞋta a èntɨ̧ɨ̧ vi la. ÀfɨꞋa mbɔŋ Mbɔ̧ɔ̧mà naa ŋa a waa waa mèngùꞋte è kuꞋu ane tò la.

⁶Bɔnyɨ bɔ̧, mâ fɨ̀Ꞌnè mènəè maa ane ya ba Àpolòs, mbɨ̀Ꞌɨ̀ bɨa ye ane ya lə ànəa èngǎ̧ Mbɔ̧ɔ̧mà àa shua la, “Bɨ̀ ghɨa mbɨ̀Ꞌɨ̀ mbɨ̧ shuà la.” Wòt ka me ŋeꞋe tèkwȩ ti a ègwet ane èlen wòt ngwaa wekǒ.

⁷Wòt wu tà ghɨ̀ àwɨ̧ bɨ tsè bòt ko la wu wàà? Àghɨ yu bɨ li mbɔ̀ ka wu Mbɔ̧ɔ̧mà tà ŋa abua yɨ̧ la wu ghàà? È wu nê èghɨ ègème bɨ bɔ la, e dzə abua Mbɔ̧ɔ̧mà ghǎ ghɨ̀ ka bɨ me ŋeꞋe tèkwȩ tɨ̧ a ègwet à?

⁸Bɨ bɔ èghɨ ègème bɨ̀a nkɨà la tê ndɔ̀Ꞌ! Bɨ jandèlè tè ndɔ̀Ꞌ? Ba ntsě àghɨ, ka bɨ tsiꞋi bèfɔ̧̀. A ghɨ̂ à ka ngu nê bɨ wu ndaŋa bèfɔ̧̀, ko baa wu bèfɔ̧̀ ba nɨ̧̀ ba.

⁹Mâ mɨɨtè nê Mbɔ̧ɔ̧mà ŋa wa bàa bɔntu̧ tò kwàꞋ àdziꞋa a lìa akwèn la, mbɨ̀Ꞌɨ̀ bòt bɔ̀ tsiꞋa nga bùŋè àwɔb a kètsìà bòt la. A tsiꞋi mbɨ̀Ꞌɨ̀ ba wu a mbì ngɔ̀ŋ nè bɔntu̧ Mbɔ̧ɔ̧mà bɔ̂ bɔbȩ bɔ ye awa.

¹⁰Bòt aa nɨa wa ane èkèghɨ̧̀ nkàà ndɨ bà wu bɔfàꞋ Yesò Klistò la, ka bɨ bɔ̂ me mɨ̀ɨ̀te nè bɨ bɔ èyì, ndɨ̀ wu bɨ̀ tsiꞋi àghɨ yeamɔꞋ nè Yesò Klistò la. Baà njùa àghɨ a bɔbȩ, ka è me wu awɨ̧ bɨ me kweele. Bòt e me kukte awɨ̧, ka è wu awa, bɔ me waa.

¹¹E kɨꞋɨ dzəâ àfɨ̀Ꞌ yaa bàa ntsèka kà jɨ àghɨ àtɔŋ ya a mè me yu̧; Baa kwaãaã wuê è ntɔ̀Ꞌte ndǐ; bòt e lene awa, baa me ghaãaã ntsèka ntsèà tsě,

¹²nɨa èbu ba fàꞋà mbɔ̌ tèbəꞋtsə mbɨ̀Ꞌɨ̀ bɔ ètsəèjɨ wa. Wòt tsɔ̧̀ɔ̧̀tà wa, ba nê Mbɔ̧ɔ̧mà lɔ̀ɔ̀lè atò, bòt è me kɨ àtsəa ya enɨ, ba me kuule mèntɨ̧ɨ̧ ma.

¹³Bòt è me tsǐ mpəè ta, ba me tsɔꞋɔ èngǎ̧ wɔb ane àlàŋkè. Bòt ngɔ̀ŋ yaa e tsiꞋa ndzea wa àfɨ̀Ꞌ yaa mbɨ̀Ꞌɨ̀ ndɔ̀tetsə, mè ndzea wa mbɨ̀Ꞌɨ̀ èghɨ waꞋa ekɨꞋɨ dzə àfɨ̀Ꞌ yaa.

¹⁴È nka shɨa èghɨ ba nkɨ ghɨ̌ bɨa bɔ àtsəa kɔꞋɔ, e shɨa ekɨɨte awɨ̧ mbɨ̀Ꞌɨ̀ bɔ̧ bɔ̧.

¹⁵Bòt bɔ̀ɔ nyɨ̀Ꞌta wɨ̧ mènəè Yesò Klistò la e batè ntaꞋa wu, ka bɨ̀ ka bɔ bètǎt nyaŋ. Wu mmɔ̌ e ndi ngu mbɨ̀Ꞌɨ̀ tǎt wɨ̧ a màntsɔta Ntu̧ Ntsɔ̧̀ abua yɨ̧, ka naa ghɨ̌ bɨa zì mèntɨ̧ɨ̧ mɨ̧ ane Yesò Klistò la.

¹⁶Ale, e ngua shù̧ù̧ta wɨ̧ nê bɨ̀ me kùŋè tèka taã.

¹⁷Eyaa wu lə e ntsàa Tɔ̀màtià la. Tà wu waã èkɔŋ am ndɨ̀ wu bà wu bòt Tè Yesò Klistò la. Tàà ngɨ̀à àfàꞋ àzi nè èntɨ̧ɨ̧ vi ègème. E ntsaa tò nê ta kɨꞋɨ nkù̧ù̧te awɨ̧ mènəè mɔ̧ ane Yesò Klistò. Wu mènəè maa nkùŋà mùà mè nyɨ̀Ꞌta a bèchɔsì a èdzìꞋ ègème la.

¹⁸ÀbəèꞋ àyɨ̧ aa ŋèꞋa tèkwȩ tɔb a ègwet mɨ̀ɨ̀tà nê è nka kɨꞋɨ e ye awɨ̧ a.

¹⁹Ka e mbele yàŋe kɨꞋɨ ye awɨ̧ na Tè Yesò bɨ̧̀ɨ̧̀na la. Maa kɨꞋɨ eye àghɨa bòt bu ŋèꞋa tèkwȩ tɔb la e ghɨ̀à la. È nka kɨꞋa ezə wuê ànəa bɔ làꞋà la.

²⁰Nkàà nê kèfɔ̧̀ Mbɔ̧ɔ̧mà è ntsě èngà̧ ètsəê, wu mètàŋ.

²¹Bɨà nkɨà nê è ngɨ̀ na à? Bɨ kɨa nê maa me kɨꞋɨ e mbèà ngot, kò bɨà nkɨà nê maa kɨꞋɨ e nyɨꞋtè èkɔŋ, mè me yu ane ndɨ màa mbà̧à̧ta wɨ̧ la à?