Read Mundani 1 Kɔlìn 5 Bible Online

1 Kɔlìn 5 - Mundani bible

1 Kɔlìn 5

¹Bɔ shu am èwuu ànəa ko nê bòt ko aa mpàꞋta àbɨ̧ a kètsìà wɨ̧, tè ngɨ̀ fɔɔle ane ndɨ bòt kà ko a Mbɔ̧ɔ̧mà àa ka ghɨ̀ la. Bɔ shu am nê wòt kǒ paꞋte vi tǎt vi.

²Bɨ bɔ̂ me ŋeꞋe tèkwȩ a ègwet nê bɨ wu bòt Mbɔ̧ɔ̧mà, è bɔ̂ ngu àghɨa bɨ wuê tseke ane tèsȩ me shùù mèsi la. Bɨ̀ tsǐ wòt tà ghɨ̀ èwuu ànəê yaa la ayɔɔ yɨ̧.

³Mâ batè è nka wu ba nɨ̧̀ ba ale, ka èntɨ̧ɨ̧ am e bɔ̂ ngu nè nɨ̧̀. Ndɨ̀ wu à wu mbɨ̀Ꞌɨ̀ è ngu ba nɨ̧̀ ba la, mâ saꞋa wòt wu tà ghɨ̀ èwuu ànəê ya la

⁴ane èlen Yesò Lefɨ̀Ꞌ tè ndɔ̀Ꞌ. Bɨa bù̧ù̧te, èntɨ̧ɨ̧ am è wu ne nɨ̧̀, nè mètàŋ Yesò Lefɨ̀Ꞌ wa,

⁵bɨ zì èwuu wòt waa a tèkitebu Satàn, mbɨ̀Ꞌɨ̀ tà ŋèꞋne mbɨ̧̀ ènyit tò ane kàbɔ̀ŋ tò, è wu ane àlia Yesò Lefɨ̀Ꞌ kɨꞋɨ la tà ghɨ̀ àlɨ̀ŋkè a ŋut a pem.

⁶È ntsě ànəa ntsɔ̧̀ bɨa me ŋeꞋe tèkwȩ tɨ̧ a ègwet. Bɨ bakà ko laꞋ nê betsiꞋa adziꞋi yis ghɨ̀ apfəèꞋ fàlawà kɔꞋ ndû̧ èpfəêꞋ?

⁷Ale, bɨ̀ tsia kàbɔ̀ŋ wu ayɔɔ yɨ̧, è wù mbɨ̀Ꞌɨ̀ yis nyǎꞋ la, mbɨ̀Ꞌɨ̀ tsiꞋi bòt fi nènkèm. Mâ ko nê wu ndɨ bɨ̀a la. Bɨ̀ ghɨ̀ ale, nkàà nê, Yesò Klistò pfə tê ndɔ̀Ꞌ nkàà bèkàbɔ̀ŋ bɨ̧ mbɔŋ. Tà wu mbɨ̀Ꞌɨ̀ wanjɨ̀ wu bɔ li ngua nkɨ̧̀ɨ̧̀ma ŋǎ abua Mbɔ̧ɔ̧mà àfɨꞋa èpǎ̧ Màntsea a ègwet la.

⁸Bɨ̀ ghɨa bà jɨ èpǎ̧ wu, ka bà ka njɨ̀ ne bled wu è bɔ a yis nyǎꞋ, yis mbɔŋ wu mèmɨ̀ɨ̀te kàbɔ̀ŋ nè èbɨꞋte ènəê la. Bà jɨ wuê nè bled kà ye a yis adù̧, è wu èntɨ̧ɨ̧ kèfə nè màndaꞋa nkûŋ la.

⁹E ndi shu awɨ̧ a èbem àkatè yu e ndi shɨ abua yɨ̧ la nê, bɨ̀ ka mbɔ̀ àghɨa ko a màngɨa ne bòt bu bɔ̀ɔ mpàꞋta àbɨ̧ la.

¹⁰E ndi è nka wua shua bòt ngɔ̀ŋ bɔ̀ɔ mpàꞋta àbɨ̧ la, kò bòt aghàbà, kò bètsɔŋ, kò bòt bɔɔ nkùkta bènàmbəa la leꞋ. E ndi ngua shua nê bɨ̀ ka mbɔ̀ àghɨa ko a màngɨa ne nɔ̀b, ko bɨ bɔ ndɨ bɨ̀a sǎ ngɔ̀ŋ yaa nènkèm la.

¹¹Ka e ndi ngua shɨa nê bɨ̀ ka mbɔ̀ àghɨa ko a màngɨa ne wòt tàa shua nê ye wu wanyɨ wa mbɔ̀ mbèla njɨ̀a ngò̧ò̧tètsə, kò ngɨa aghàbà, nkùkta bènàmbəa, njɨ̀a mènaŋ, nua mèlùꞋ mbea, kò ntsɔa la leꞋ. À ka mbê njɨ̀ àghɨ bɨ èwuu bòt mbɔŋ.

¹²Àghɨ yu mâ bɔ a màsaꞋa bòt bu kà zi mèntɨ̧ɨ̧ mɔb ane Yesò la wu ghà à? Tè è ntsě àdzìꞋa yɨ̧ e me saꞋa bòt chɔsì?

¹³Ale, Mbɔ̧ɔ̧mà ka tàa saꞋa bòt bu àbȩ la. “Bɨ̀ fəâ wòt kàbɔ̀ŋ wu ayɔɔ yɨ̧ la.”