Read Mundani 1 Kɔlìn 8 Bible Online

1 Kɔlìn 8 - Mundani bible

1 Kɔlìn 8

¹È wu ane ànəa èghɨjɨ bɔ nɨŋ njɨ̀a bènàmbəa la, ko baa ko nê, “Bàa gème e ko mènəè.” Wòt nàa nkoa mènəè è me ghɨ̌ tà me ŋeꞋe tèkwȩ ti a ègwet, ka èkɔŋ e me lɔktè mèntɨ̧ɨ̧ bòt.

²Wòt mɨ̀ɨ̀tà nê ye ko àghɨ, ko tà bakà ko mbɨ̀Ꞌɨ̀ tà wuê ko la.

³Ka wòt nàa me kɔ̀ŋka Mbɔ̧ɔ̧mà, Mbɔ̧ɔ̧mà ko a ŋut.

⁴Ale, è me wu ànəa mànjɨa èghɨ bɔ nɨŋ njɨ̀a bènàmbəa la, ko baà ko nê, “Àghɨa ko a mbê ndâ ntsě mbɨ̀Ꞌɨ̀ nàmbəa,” mè nko nê, “Mbɔ̧ɔ̧mà nàà ndàꞋ wemɔ̀Ꞌ.”

⁵Èghɨ ko nyaŋ e màà ngu a ègwet kò a sitsǎꞋ leꞋ bòt àa nkùkta nê wu bèmbɔ̧ɔ̧mà bɔb, mè ndzə awɔb wuê mbɨ̀Ꞌɨ̀ bèa la,

⁶ko abua ya, ba bɔ wuê a Mbɔ̧ɔ̧mà wemɔ̀Ꞌ, tà wu Tǎt wa la. Èghɨ ègème ghɨ̀à tòà, è mè ngu tòà ka tà ghɨ̀ àwa mbɨ̀Ꞌɨ̀ baa wu bòt tò la, ba mè mbɔ a Lefɨ̀Ꞌ wuê wemɔ̀Ꞌ, wù Yesò Klistò la. Tà wu wòt Mbɔ̧ɔ̧mà ghɨ̂ tà nɨ̀ èbu bi ngɨ̀ èghɨ ègème la, è mè ngu tòà ka tà ghɨ̂ baa me ko tseka mbɨ̀Ꞌɨ̀ bòt Mbɔ̧ɔ̧mà la.

⁷Ka è ntsě wòt ègème tà ko nkûŋ yaa la. Bòt ko e li ngua nkùkta bènàmbəa tè bɔ̀ɔ ngɨ̀ bɔ me kɔ̀ŋkè èjɨ èghɨjɨ bɔ nɨŋ njɨ̀a nàmbəa la. Bɔ̀ɔ ngɨ̀ bɔ̀ jɨ ale, mèntɨ̧ɨ̧ mɔb ka lem fèèlè àwɔb ndɨ̀ wu bɔ̀ɔ njùa la.

⁸Ba ko nê, èghɨjɨ ntsě àghɨa àa ghɨ̌ baa kùꞋu a mbì Mbɔ̧ɔ̧mà la. Ba bakà jɨ èghɨjɨ, àghɨa ko à ka bu ane ya, njɨ̀a àghɨa ko à ka kweꞋne ane ya.

⁹Ka bɨ̀ me ko awɨ̧ mbɨ̀Ꞌɨ̀ bɨ bela ngɨ̀à, ngɨ̀ bòt bɔ̀ɔ njùa la e fà̧ ànəê a mbì Mbɔ̧ɔ̧mà.

¹⁰Tè wòt yea wê, àwɔ̀ wu à bɔ èyì la, à tseke a lob nàmbəa me jɨ èghɨjɨ la, ko à yu à ka fɨte atò wu èntɨ̧ɨ̧ tò àa njùa la e ghɨ̌ taa jɨ èghɨ bɔ nɨŋ njɨ̀a bènàmbəa la à?

¹¹Èyǐ wè waa e ghɨ̂ à tsòkè wanyɨ wè wòt Mbɔ̧ɔ̧mà, Yesò Klistò li mpfə ambo tò la.

¹²Àà ngɨa kàbɔ̀ŋ ane wanyɨ wè, ndzìà fɨŋ a èntɨ̧ɨ̧ tò wu àa njùa la ale, ngua ngɨ̀à kàbɔ̀ŋ mbɔŋ ane Yesò Klistò.

¹³Ale, è wu nê e njɨ̀a èghɨjɨ ko aa ghɨ̌ wanɔ̧ naa ghɨ̌ a kàbɔ̀ŋ, ko è nka tsi lɔ̀Ꞌɔ̀ àlia e kwele nyà̧ a, mbɨ̀Ꞌɨ̀ ka e ngɨ̀ wanɔ̧ ghɨ a kàbɔ̀ŋ.