Read Mundani 1 Kɔlìn 9 Bible Online

1 Kɔlìn 9 - Mundani bible

1 Kɔlìn 9

¹Àghɨa ko a sèlà am a si la a ntsě. Bɨ bakà ko nê e ngu wantu̧ Yesò Klistò? Mâ ye a Yesò Klistò Lefɨ̀Ꞌ wa nè èghɨ laã. Wu mmɔ̌ ka mâ tsɔ̀te ntu̧ yu è ghɨ bɨ zì mèntɨ̧ɨ̧ mɨ̧ ane Yesò Klistò la. Ale, bɨ wu àbu àfàꞋ am.

²È wu nê bòt ko aa kà nɨ am mbɨ̀Ꞌɨ̀ wantu̧ Yesò, ko mâ ko nê bɨ̀a nɨ am mbɨ̀Ꞌɨ̀ wantu̧ tò, nkàà nê bɨ wu àghɨa àa nyɨ̀Ꞌta nê e ngu wantu̧ Yesò, ndɨ̀ wu bɨ̀ tsiꞋi àghɨa yeamɔꞋ nê tòà la.

³Eyaa wu àbɨ̀t màa ŋǎ abua bòt bu bɔ̀ɔ mbàŋè am la.

⁴Tè bà kâ njɨ̀ èghɨjɨ mè nu mèleb?

⁵Tè betsiꞋa bà ka yɔꞋɔ àvi mbɨ̀Ꞌɨ̀ bɔntu̧ Yesò ko, nè bɔnyɨ tò nè Pità?

⁶Kò wu wuê baà Bànabasì ba bɔ ndɨ bàa me fàꞋa ka mbɔ̌ èkab è me wu bɔntu̧ ko bɔ me nɨ nɨ la le è?

⁷Kò shujà kǒ nàà və tàa fàꞋà àfaꞋ kà bɔ wua ŋa èkab abua tò la à? Kò wòt kǒ nàà və tàa liꞋi èbaꞋa li e lɔ̀Ꞌɔ bakà jɨ èghɨ e dzə abàꞋ vəꞋ la leè? Kò wòt nàà və tàa mbààba mpɔ̀ŋtsə kà wua nua malɨ̂k è dzə ane mpɔ̀ŋte ngaa la à?

⁸Kò e ndàꞋà ane àtɔŋ bɔbȩ à? Ka wu ndɨ àa èbem mbɨ̧te Musì la à?

⁹Bɔ shɨ a èbem mbɨ̧te Musì nê, “À me nɨ mpɔ̀ŋ mùꞋtà ntsəètsə, à ka nkùùle ètsəê tò nê tà ka nkwèlè è te ko.” Tè bɨ ye nê èntɨ̧ɨ̧ Mbɔ̧ɔ̧mà e wu ale wuê ane mpɔ̀ŋtsə?

¹⁰Tè tà li tà kà wua ndàꞋà àyaa ŋǎ abua ya à? Tà li ngua ndàꞋà ŋǎ abua ya. Wòt me liꞋi mbȩ tà bɔ̌ ndɨ tàa bɔ ntɨ̀ nê yea ghɨ̌ fùꞋu, wòt fùꞋu la bɔ ntɨ̀ nê yea bɔ vi ne èghab la.

¹¹Tè ba tsɔ̀te Ntu̧ Ntsɔ̧̀ abua yɨ̧ ko wu ànəa nɨ̧ e laꞋ nê bɨ̀ me tɨŋe awa nè èghɨ bɨ bɔ la à?

¹²Tè bòt ko e wu me shu nê wu àdziꞋa yɨ̧ a màŋa wɔb èghɨ, è me wu awa bɨ̀ ka ŋa abua ya tê ntsè? Ka ba bakà ghɨ mbɨꞋɨ̀ ba wuê ghɨ̀ la, baa nɨa àghɨ àgème mbɨ̀Ꞌɨ̀ àa la, mbɨ̀Ꞌɨ̀ ka baa ghɨ̀ àghɨa àa kele bòt nê bɔ̀ ka mbɨ̧̀ɨ̧̀ne Ntu̧ Ntsɔ̧̀ Yesò Klistò la.

¹³Bɨ bakà ko nê bòt bu bɔ̀ɔ faꞋa a èbem lob nɨŋ Mbɔ̧ɔ̧mà la aa mbɔ̌ èghɨjɨ bɔb a èbem lob mbɔŋ, è bu bɔ̀ɔ faꞋa àdziꞋa bɔ̀ɔ ŋǎ èghɨ abua Mbɔ̧ɔ̧mà la e mè me bɔ èghab wɔb ane èghɨ mbɔŋ?

¹⁴Wu wuê ndɨ Mbɔ̧ɔ̧mà laꞋnê bòt bu bɔ̀ɔ ntsɔ̀tà Ntu̧ Ntsɔ̧̀ la e bɔ ndɨ bɔ̀ɔ me bɔ ètsəèjɨ wɔb ane ntu̧ mbɔŋ la.

¹⁵Ka e mbakà jɨ àbȩ̀ èghɨ bàa mbɨ̀Ꞌɨ̀ mâ wu ejɨ la, è nka mê ngua shɨa letà waa nkɨà nê bɔ̀ ŋa èghɨ ko abua am. Àghɨa a tsiꞋi tè e kele am nê è ngàꞋtà am, e mpfə.

¹⁶Lə kǒ ntsě màa me wùꞋtè am ambo na màa ntsɔ̀tà ntu̧ tsɔ̧̀ la. Wu àghɨa mâ bɔ ndɨ màa ghɨ̀ la. Aa li bɨɨ abà am na e mbakà tsɔte Ntu̧ Ntsɔ̧̀ la.

¹⁷Mâ ghɨ̀ ale, ngua ngɨ̀à àyaa ane mènkɔ̀ŋke mɔ̧, ko maa bɔ àbȩ̀, ka ndɨ̀ wu màa ka ghɨ ane mènkɔ̀ŋke mɔ̧ la, ko wu Mbɔ̧ɔ̧mà ka tà zǐ àfaꞋa mbɔŋ a tèkitebu taã nê è me ghɨ̀ la.

¹⁸Àbȩ̀ am nàa anè ngu ghàà? Àbȩ̀ am wu ndɨ màa ndàꞋà èngǎ̧ Mbɔ̧ɔ̧mà àku, è nka mê ngua nkɨà àghɨa è wù àyaã la ane Ntu̧ Ntsɔ̧̀ yu màa ndàꞋà la.

¹⁹Àghɨa ko a ntsě a kuule èbu bɔ̧ ŋa abua wòt ko la, e mbɔ̂ ngɨ̀ am mmɔ̌ mbɔŋ ane àbùꞋ abua wòt ègème, mbɨ̀Ꞌɨ̀ ghɨ̌ bòt bɔ̀ɔ ndzìà mèntɨ̧ɨ̧ mɔb ane Yesò Klistò la aa paa yaã.

²⁰Màa ngɨ̀ è ngu ba Bèjuê, e tsiꞋi me ntsèke mbɨꞋɨ̀ wòt Juê, màa nkɨà mbɨ̀Ꞌɨ̀ ghɨ̌ bɔɔ zì mèntɨ̧ɨ̧ mɔb ane Yesò la. Màa ngɨ̀ è ngu ba bòt bu mbɨ̧tsə te tsèm àwɔb nê mbɨ̀Ꞌɨ̀ bɔ me ghɨ̌ èghɨ ko la, e tsiꞋi me tseke mbɨꞋɨ̀ wòt mbɨ̧ te mbɔŋ tê tsem atò la, ka mmɔ̌ mbɔŋ è nka wua nɔ̀ŋà mbɨ̧tsə, màa ngɨ̀à ale mbɨ̀Ꞌɨ̀ ghɨ̌ bòt bu bɔ̀ɔ nɔ̀ŋà mbɨ̧tsə la aa zì mèntɨ̧ɨ̧ mɔb ane Yesò Klistò la.

²¹È ngu ba bòt kà wua nɔ̀ŋà mbɨ̧te Musì, e me tseke mbɨꞋɨ̀ wòt kà wua nɔ̀ŋà mbɨ̧te mbɔŋ. E ntsea shua nê maà kà nɔŋe mbɨ̧ Mbɔ̧ɔ̧mà, ka maà ntsèka mbɨ̀Ꞌɨ̀ mbɨ̧ Yesò Klistò nàa nkɨà la. Màa ngɨ̀à ale mbɨ̀Ꞌɨ̀ ghɨ̌ bòt kà wu Bèjuê baa aa zì mèntɨ̧ɨ̧ mɔb ane Yesò la.

²²Màa ngɨ̀ è ngu ba bòt bɔ̀ɔ njùa ane ànəa Mbɔ̧ɔ̧mà la, e ntsiꞋi me tseke mbɨ̀Ꞌɨ̀ wekǒ ane yɔb mbɨ̀Ꞌɨ̀ è ngu ghɨ̌ bɔɔ zì mèntɨ̧ɨ̧ mɔb ane Yesò. E ndi ntsìꞋi àghɨ àgème abua wòt ègème, mbɨ̀Ꞌɨ̀ è ngu nɨ balu̧ bàgème betsiꞋa e nko nɨŋ la e ghɨ̌ bòt ko aa peme.

²³E ngɨ̀à èghɨ bàagème mbɨ̀Ꞌɨ̀ ghɨ̌ Ntu̧ Ntsɔ̧̀ naa me ghà ne mbì, màa nkɨà mbɨ̀Ꞌɨ̀ è ngu bɔ wɔ̧ ne èghàb ane àbȩ̀ èngǎ̧ mbɔŋ la.

²⁴Bɨ bakà ko laꞋ nê bɔ̀ɔ ngɨ̀ bɔ̀ gha ane àlùùlà, waa waa me lùùla, ka è bɔ̂ ngu wuê wòt wemɔ̀Ꞌ tà jɨ bɔ tsɔꞋɔ atò la? Ale, luula mbɨ̀Ꞌɨ̀ jɨ bɔɔ tsɔꞋɔ awê.

²⁵Wòt ègème tàa ngɨ̀à àlùùlà la nàa ngɨ̀ tà me kuule èntɨ̧ɨ̧ vi ndàna. Bɔ̀ɔ ngɨ̀ bɔ wua ngɨ̀à ale mbɨ̀Ꞌɨ̀ bɔ àbȩ̀ kà wu tseke, ka è wu awa è wu àbȩ̀ àa wu ane àlia nè àlia la.

²⁶Mbɨ̀Ꞌɨ̀ àa ale la, maa kà luula ka ko àtsə, è nka mee ngua nùà mbɨ̀Ꞌɨ̀ wòt tàa ndèbà fo la.

²⁷Ka màa ngɨ̀ e me kuule mbɨ̧̀ ènyit yaã, ŋwèèlà èghɨ èntɨ̧ɨ̧ am e kɨa la ndzia a si, màa ngɨa ale mbɨ̀Ꞌɨ̀ ka e ndàꞋà èngǎ̧ Mbɔ̧ɔ̧mà abua bòt ko, a ghà me lìa Mbɔ̧ɔ̧mà nê e mbakà kùꞋ la.