Read Mundani 2 Kɔlìn 1 Bible Online

2 Kɔlìn 1 - Mundani bible

2 Kɔlìn 1

¹Letà Pɔ̂l wantu̧ Yesò Klistò, Mbɔ̧ɔ̧mà è ghɨ ane mènkɔ̀ŋke mi la, nè wanyɨ waa Tɔ̀màtià, Abua chɔsì Mbɔ̧ɔ̧mà wu a Kɔlìn la, bɔ̂ bòt Mbɔ̧ɔ̧mà ko bu bàgème a Akayà la.

²Maà shù̧ù̧ta Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ nê bɔ̀ nyɨꞋte a ntsɔ̧̀ wɔb abua yɨ̧, ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

³Bà kɔ̀ŋke a Mbɔ̧ɔ̧mà, Tǎt Yesò Klistò Lefɨ̀Ꞌ wa. Tà wu Tǎt tàa nkua tèsȩ la, mè ngu Mbɔ̧ɔ̧mà tàa ndzìà mèntɨ̧ɨ̧ bòt la.

⁴Tàà ndzìà mèntɨ̧ɨ̧ ma àfɨ̀Ꞌ àgème bà ndzea ngoꞋ la, mbɨ̀Ꞌɨ̀ bàambɔŋ aa me koa nɨa mèntɨ̧ɨ̧ kèfi màa Mbɔ̧ɔ̧mà ŋa abua ya la ndzìà mèntɨ̧ɨ̧ bòt bu ngoꞋ kwene ane yɔb la mɨ̧̂.

⁵Èlɨ bàa ndzea ngoꞋ kwàꞋ ànyaꞋne ane ànəa Yesò Klistò la, wu wuê èlɨ Yesò Klistò wu nàa ngɨ̀à Mbɔ̧ɔ̧mà zìà mèntɨ̧ɨ̧ ma la mɨ̧̂.

⁶Ba me ye ngoꞋ ko naa me zì mèntɨ̧ɨ̧ mɨ̧, mèntsèke mɨ̧ nè Mbɔ̧ɔ̧mà mè ngu ntsɔ̧̀. Bɔ mè ndzìà mèntɨ̧ɨ̧ ma ko aa wu nê bɔ zi mɨ̧ mɨ̧̂, mbɨ̀Ꞌɨ̀ aa tɨŋe awɨ̧ bɨa kuule mèntɨ̧ɨ̧ ekìi ngoꞋtsə mbɨ̀Ꞌɨ̀ bàa nkìa la.

⁷Ntɨ̀ ya ane yɨ̧ nàà nkwèèlâ. Ba koê nê bɨ yea ngoꞋ mbɨ̀Ꞌɨ̀ ba li ndze la, ko Mbɔ̧ɔ̧mà naa zì mèntɨ̧ɨ̧ mɨ̧ wuê mbɨ̀Ꞌɨ̀ tà zǐ ma la.

⁸Bɔnyɨ ba, baa nkɨà bɨa ko ndɨ ba li ndzě ngoꞋ àbâ àlaꞋ a Esìà la. Ba li ndzě ngoꞋ è ghɔ̀ɔ̀ àwa tè ba tsiꞋa mɨ̀ɨ̀tà nê ba lem.

⁹Ba li mbê mɨ̀ɨ̀tè nê àyaa ne àlia a kuêꞋ. Lə ngoꞋ yaa li ngu mbɨ̀Ꞌɨ̀ ba ko nê, ba bakà bɔ ndɨ bàa lɨ̀Ꞌà wa ane ya bàambɔŋ la, ba bɔ ndɨ bàa lɨ̀Ꞌà wa wuê ane Mbɔ̧ɔ̧mà wu tàa njù̧ù̧ma bòt bɔ pfəꞋte la.

¹⁰Tà li fàà àwa abua ngoꞋ èvə, mè ngu efàà àwa. Ba lâ nko nê taa mě efàà àwa.

¹¹Bɨ̀a mbɔŋ è me tɨŋe awa mɨ̧̂ ntsàꞋta Mbɔ̧ɔ̧mà. Bɨ̀ ghɨ̀ ale, mbɨ̀Ꞌɨ̀ bòt nyaŋ è dɨ̂ abua Mbɔ̧ɔ̧mà ane ànəa ya, Mbɔ̧ɔ̧mà zəè àtɔŋ èdɨ̂ àyɔb ngɨ̀ ba zə a ntsɔ̧̀. Tà ghɨ̀ ale, bòt nyaŋ e kɔ̀ŋkè atò ane àghɨa tà ghɨ ane ya la.

¹²Àghɨa betsiꞋa ba me ghàꞋtè àwa adù̧ la wu nê, mèntɨ̧ɨ̧ ma nàà shua wa nê baa ngɨ̀à mènəè ma a sitsǎꞋ ŋàa fɔɔle a mbì lɨ̧ àfɨ̀Ꞌ àgème mbɨ̀Ꞌɨ̀ bòt Mbɔ̧ɔ̧mà nè nkûŋ. È ntsě èyǐ wɔ̀bȩ̂ ka ba nɨŋ me ghɨ̀ mènəè maa la. Ba ghɨa ane ntsɔ̧̀ Mbɔ̧ɔ̧mà wu tà nyɨꞋte abua ya la.

¹³Ale, àghɨa bɨ tɔ a èbem àkatè ya ndzə la bê ngu wuê àghɨa à wu a èbem mèntɨ̧ɨ̧ ma la. Àghɨa ko tsa a ntsě a èntɨ̧ɨ̧ am. Mbɔ̂ mâ mɨɨtè nê bɨa paa eko awa ntsɔ̧̀

¹⁴te tsě ndɨ bɨ yaã nko la, mbɨ̀Ꞌɨ̀ Yesò Lefɨ̀Ꞌ ghɨa tà kɨꞋɨ, bɨ me ghàꞋtè àwɨ̧ ambo ya wuê mbɨ̀Ꞌɨ̀ bàambɔŋ àa me ghàꞋtè àwa ambo yɨ̧ la.

¹⁵Mâ ko nê bɨ bele nèète eko am. Eyaa wu lə e ndi ngua nkɨ bɨ̌ kɨꞋɨ eye awɨ̧ la, mbɨ̀Ꞌɨ̀ bɨ̀ ye am a paà mbê bɔ̀ŋ awɨ̧.

¹⁶E ndi ntàŋke nê maa me tsea nga a Màsèdonìà eye awɨ̧, è me kua e mè ndzè àwɨ̧, mbɨ̀Ꞌɨ̀ è me gha a Jùdià bɨ tɨŋe am.

¹⁷Bɨ mɨɨtè nê e ndi me taŋke a lèghȩ̀ȩ̀nè waa ale è nka kwaꞋtè ntsɔ̧̀? Maa kà tàŋke mènəè mɔ̧ mbɨ̀Ꞌɨ̀ bòt sitsǎꞋ, e shu laꞋnê maa ghɨ àghɨ e mě tu̧u̧.

¹⁸Mbɔ̧ɔ̧mà zìambɔŋ è ko nê màa ngɨ̀ e ndàꞋa ànəê tè è nka tsi nkùbtê.

¹⁹Yesò Klistò Waã Mbɔ̧ɔ̧mà wu ba Tɔ̀màtià nè Silvanùs àa ndàꞋà ànəa tò a kètsìà wɨ̧ la nàà kà laꞋa èngà̧ yebe, e bɨ̧ɨ̧ne ànəê e mě tu̧u̧. Tàa ngɨ̀ tà shu ànəê tà bê ngɨ̀ wuê mbɨ̀Ꞌɨ̀ tà shu la.

²⁰Ale, wu tòà ka tàa ngɨ̀à àghɨ àgème Mbɔ̧ɔ̧mà kàꞋà la a wua wuê mbɨ̀Ꞌɨ̀ tà kàꞋà la. Eyaa wu lə bàa ngɨ̀ bà me ŋa kènuke abua Mbɔ̧ɔ̧mà bà laꞋnê “Àmèn” ba shu ane èlen Yesò Klistò la.

²¹Wu Mbɔ̧ɔ̧mà ka tàa ngɨ̀à ba nɨ̧̀ ba e kweela ane mènəè tò ndɨ̀ wu bà tsiꞋi àghɨ yeamɔꞋ nè Yesò Klistò la. Wu tòà ka tà zì àwa ane bɔfàꞋ bi la.

²²Tà zǐ àlȩê a zi ane ya, enɨ nyɨꞋte nê ba wu bòt bi, mè ndzì Fo Kèfə a mèntɨ̧ɨ̧ ma enɨ nyɨꞋte nê baa li ebɔ èghɨ tà nɔ̀ŋe abua ya la.

²³E ndi me tu̧u̧ e kɨꞋɨ a Kɔlìn ale ngua mbɔ̀ɔ̀ mbɨ̀Ꞌɨ̀ mèntɨ̧ɨ̧ mɨ̧ paà me ghò̧ò̧ne. Tè e me làꞋa anè ngua fɨ̀ta fɨte Mbɔ̧ɔ̧mà ghɨ̀ e ndze ngoꞋ.

²⁴Ba ntsea ŋwèèlà wɨ̧ shua wɨ̧ ndɨ bɨ̀a me kùŋe a Mbɔ̧ɔ̧mà la. Ba wua fàꞋà ba nɨ̧̀ ba mbɨ̀Ꞌɨ̀ èghɨ mèntɨ̧ɨ̧ mɨ̧ naa me bɔ̌, nkàà nê ba ko nê bɨa nkwèèla ane ànəa Mbɔ̧ɔ̧mà.