Read Mundani 2 Kɔlìn 2 Bible Online

2 Kɔlìn 2 - Mundani bible

2 Kɔlìn 2

¹Ale, e ndi nkwàꞋtè nê e nka tsi kɨꞋa mbɨ̀Ꞌɨ̀ ka è nkɨ̀Ꞌɨ̂ mèntɨ̧ɨ̧ mɨ̧ mè me ghò̧ò̧ne.

²E ngu anè ngɨ̀ mèntɨ̧ɨ̧ mɨ̧ me ghò̧ò̧ne, ngule èsi bòt bu bɔ mè ngɨ̀ èntɨ̧ɨ̧ am e me bɔ̀ la wu wà ba à? Wu wuê bɨ̀a wàà mâ ghɨ̂ mèntɨ̧ɨ̧ mɨ̧ me ghò̧ò̧nè la.

³E ndi ngua shɨa àkata ngaa a èlɨ mbɔŋ mbɨ̀Ꞌɨ̀ è ngɨa è nkɨ̀Ꞌɨ̂, bɨ̀a wu bɨ wuê è ghɨ̌ èntɨ̧ɨ̧ am aa me bɔ̀ la è ka ghɨ̂ èntɨ̧ɨ̧ am aa me ghò̧ò̧ne. Mâ lâ nko nê èntɨ̧ɨ̧ am e me bɔ̌ ko èntɨ̧ɨ̧ wɨ̧ bɨ̀agème aa me bɔ̌ mɨ̧̂.

⁴E ndi me shɨ àkata ngaa, a taꞋa saa am a èntɨ̧ɨ̧ am tè mèsi chu àghɨ am kwàꞋ ànyaꞋne. E ndi me shɨ è nka wua nkɨà mèntɨ̧ɨ̧ mɨ̧ naa me ghò̧ò̧ne. E ndi ngua nkɨà bɨa ko ndɨ màa ndâ nkɔ̀ŋkà àwɨ̧ la.

⁵È wu nkûŋ nê wòt kǒ ghɨ a kàbɔ̀ŋ, ko tà bakà ghɨ̀ wuê abua am. Maà kà kɨ ŋwèèlè nyaŋ, ka tà li ngɨ̀ abua yɨ̧ bàgème.

⁶NgoꞋ yaa àbəèꞋ àyɨ̧ nyaŋ a ghɨ̂ èwuu wòt waa ye la è kuêꞋ.

⁷È wu ale, bɨ̀ tsiꞋi me kɨ ndɨ bɨ̀a waꞋa a kàbɔ̀ŋ tò ezǐ èntɨ̧ɨ̧ tò mbɨ̀Ꞌɨ̀ a saa tò nyaŋ tà màꞋà ànəê àgème a si la.

⁸Ale, mâ shu̧u̧ta wɨ̧ nê bɨ̀ ghɨa tà ko nê bɨ bela nkɔ̀ŋkà vi.

⁹E ndi me shɨ awɨ̧ ale ngua nkɨ enyɔ̀Ꞌtè àwɨ̧ eye nê kò bɨ bela ndzə am leꞋ.

¹⁰Bɨ waꞋa kàbɔ̀ŋ wòt ko maa waꞋa wùà mɨ̧̂. È wu nê mâ lèènè kàbɔ̀ŋ wòt, ko e ngɨ̀à a mbì Yesò Klistò, nkàà àwɨ̧.

¹¹Bà ghɨ̀ ale, mbɨ̀Ꞌɨ̀ ka Satàn jɨ̀ mèntɨ̧ɨ̧ ma nkàà nê ba ko àŋɔꞋta tò.

¹²E ndi nkɨ̀Ꞌɨ̂ a Tloas etsɔ̀te Ntu̧ Ntsɔ̧̀ Yesò Klistò. E me kɨꞋɨ ale, Tè Yesò Klistò ghaꞋa èlu̧ abua am.

¹³Mbàte ngàꞋa ale ka èntɨ̧ɨ̧ am è ka nɔ̀ŋke a èbèm laã ntsɔ̧̀ nkàà nê e ndi è nka ye wanɔ̧ Tȩtɔ̀s abàꞋ və. Ale, e ndàꞋnè àwɔb ntsiꞋi ghà ne Màsèdonìà.

¹⁴Ka mèngùꞋte wu abua Mbɔ̧ɔ̧mà. Tà gha ambo èlɨ̀ wu bà tsiꞋi àghɨ yeamɔꞋ nè Yesò Klistò la ntse a mbì la me ghaꞋa èlu̧ ba me nû a Satàn ntsèà. Tà ghɨ̂ ba wu mbɨ̀Ꞌɨ̀ mèwet àghaa ntsɔ̧̀ bàa ntsèà àdziꞋ àgème ngɨ̀à bòt e koa àghɨa Yesò Klistò wu yùà la.

¹⁵Baa anè ntsìꞋi mbɨ̀Ꞌɨ̀ mèwet àghaa ntsɔ̧̀ Yesò Klistò ŋa abua Mbɔ̧ɔ̧mà a kètsìà bòt pèma la nè èbe ndèma la.

¹⁶Abua bòt mpfəèꞋta la, àghaa yaa wu àghaa èvə àa bùŋè àwɔb la, è me wu abua bòt bu mpèma la, àghaa mbɔŋ wu àghaa àa ghɨ̌ bɔɔ peme la. Wòt wu tà kùꞋu ane àfàꞋ yaa la wu wàà?

¹⁷È me wu awa ko ba ntsě mbɨ̀Ꞌɨ̀ bòt ko bɔ̀ɔ ndàꞋà èngǎ̧ Mbɔ̧ɔ̧mà wuê ambo èkab la. Ka ndɨ̀ wu è wu Mbɔ̧ɔ̧mà ka tà tsàà àwa baa mè ngu a mbì tò la, baa ndàꞋà èngǎ̧ tò nè èntɨ̧ɨ̧ kèfə, mbɨ̀Ꞌɨ̀ bɔfàꞋ Yesò Klistò.