Read Mundani 2 Kɔlìn 6 Bible Online

2 Kɔlìn 6 - Mundani bible

2 Kɔlìn 6

¹Ba nɨ̧̀ ba e wu bòt bàa faꞋa abua Mbɔ̧ɔ̧mà nɔ̂ la, ale ba me shu̧u̧te awɨ̧ nê bɨ ka nɨ ntsɔ̧̀ Mbɔ̧ɔ̧mà wu tà nyɨꞋte abua yɨ̧ la mbɨ̀Ꞌɨ̀ àghɨa àku.

²Mbɔ̧ɔ̧mà laꞋnê, “Mâ zə àtɔŋ dɨ̀ ayɨ̧ àfɨꞋa ntsɔ̧̀, È li ngu àfɨꞋa mâ ghɨ̂ bòt aa peme la, e ntɨ̀ŋe àwɨ̧. Bɨ̀ zə, eyaa wu àfɨꞋa ntsɔ̧̀; bɨ̀ zə, eyaa wu àfɨꞋa Mbɔ̧ɔ̧mà nàa ghɨ̌ bɨa peme la.”

³Baa kà tɨ̧ɨ̧ alu̧ wòt, mbɨ̀Ꞌɨ̀ wòt kǒ fèèlè awa ane àfàꞋ àya mbɨ̀Ꞌɨ̀ bɔntu̧ Mbɔ̧ɔ̧mà.

⁴Ka baa nyɨ̀Ꞌta àghɨa bà wu yùà la mbɨ̀Ꞌɨ̀ bɔfàꞋ Mbɔ̧ɔ̧mà ane balu̧ bàgème. Baa nkùùla mèntɨ̧ɨ̧ ma ane ngoꞋtsə tègème, ka te màà ngu wuê nà leꞋ.

⁵Bɔ shu̧a wa, ndzì awa a tèfȩ, banɔ̧̀ e lɔ̀kè mèbet ambo ya, ba fàꞋà nkà̧aã, ndia àtatsi, mè ntsèka ndzìtsə.

⁶Ba fàꞋ nè mèntɨ̧ɨ̧ kèfə, Mbɔ̧ɔ̧mà ghɨ̀ ba bɔ èyì, ba nkùùla mèntɨ̧ɨ̧ ma ndɔ̀Ꞌ ngɨa ntsɔ̧̀ abua bòt, mbɔ Fo Kèfə ane ya, nè èkɔŋ kà ye àfɨte adù̧

⁷mè ndàꞋà èngǎ̧ nkûŋ ane mètàŋ mu Mbɔ̧ɔ̧mà ŋa abua ya la. Mènəè ntsɔ̧̀ ma wu èghɨ èbet ba bèà me nɨa nua èbet Mbɔ̧ɔ̧mà mè nkèla bɔmbù̧ la.

⁸Bòt ko aa nkùkta wa, èbeko e ghɨ̀à ba bɔ àtsəa kɔꞋɔ, èbeko elaꞋa kàbɔ̀ŋ ane èlen la. Bòt ko aa nɨa wa nê ba wu bòt mèfà̧. Mbɔ̂ ba me làꞋà nkûŋ àfɨ̀Ꞌ àgème,

⁹Aa ane àbâ ko, bòt è ka ko awa, nga ane ayea ko bòt Mbɔ̧ɔ̧mà e ko bòt bà wu bùà la ntsɔ̧̀. Bòt aa ndzea wa nê ba tsiꞋa mpfəa pfə, ka bɨ̀ ye, ba bele bòt yu̧, mè ndzea ngoꞋ ka bà ka pfə.

¹⁰Ènyit ya aa ntsèka àfɨ̀Ꞌ àgème mbɔ̀ ka wuê àfɨꞋa bà wu ane tèsȩ la, ntsèka mbɨ̀Ꞌɨ̀ bòt ntseb, ka mbɔ̂ me ghɨ̌ bòt nyaŋ e zəa ntsɔ̧̀, mè ntsèka mbɨ̀Ꞌɨ̀ bòt kà bɔ àghɨ, mbɔ̂ mbɔ àghɨ àgème.

¹¹Bòt Kɔlìn, ba làꞋa abua yɨ̧ kà lò̧ ànəa ko, mè me ghaꞋa mèntɨ̧ɨ̧ ma nɨa wɨ̧ nè èkɔŋ wu ba bɔ ane yɨ̧ la.

¹²Èkɔŋ wu ba bɔ ane yɨ̧ la e bakà fi a mèntɨ̧ɨ̧ ma, wu bɨ̀a ka bɨ ghɨ̂ èkɔŋ wu bɨ bɔ ane ya la e fi a mèntɨ̧ɨ̧ mɨ̧ la.

¹³E ngua ndaꞋa abua yɨ̧ àfɨ̀Ꞌ yaa wuê mbɨ̀Ꞌɨ̀ bɨ wu bɔ̧ bɔ̧, nê bɨ̀ ghaꞋa mèntɨ̧ɨ̧ mɨ̧ nɨ̀ àwa nè èkɔŋ, wuê mbɨ̀Ꞌɨ̀ ba ghɨ ane yɨ̧ la mɨ̧̂.

¹⁴Bɨ̀ ka tèm àka nè bòt kà zi mèntɨ̧ɨ̧ mɔb ane Mbɔ̧ɔ̧mà. Kàbɔ̀ŋ bɔ̂ ntsɔ̧̀ nàà kà fɔte àdziꞋ, èkaꞋà bɔ̂ ndzěm è ka wua fɔta àdziꞋ.

¹⁵Àghɨ yu Yesò Klistò è bɔ bɔ̂ Satàn la wu ghàà? Àghɨ yu wòt kà zi èntɨ̧ɨ̧ ane Mbɔ̧ɔ̧mà mè mbɔ̀ bɔ̂ wòt tà zǐ èntɨ̧ɨ̧ vi ane Mbɔ̧ɔ̧mà la wu ghàà?

¹⁶Lob Mbɔ̧ɔ̧mà bakà bɔ àghɨa ko nàa ghɨ̀ ne èghɨ bu bòt àa nɨ̀a nê wu bèmbɔ̧ɔ̧mà la. Ba wu lob Mbɔ̧ɔ̧mà yû̧, wuê mbɨ̀Ꞌɨ̀ tà shu la nê, “Maa me tseke ane yɔb, mè ngȩȩna ayɔɔ yɔb. Maa li ewu Mbɔ̧ɔ̧mà wɔb, bɔɔ wu bòt bɔ̧.”

¹⁷“Ale Lefɨ̀Ꞌ laꞋnê, bɨ dzə ayɔɔ yɔb me tsèke tsa ane yɔb, bɨ̀ ka mbà̧à̧te àghɨa àa tsòkè àwɨ̧ la ko maa nɨ awɨ̧,

¹⁸Ewu tǎt wɨ̧, bɨa mě ewu bɔ̧ bɔ̧, mbâ̧tsə nè bèzi. È làꞋà mmɔ̌ Tǎt wɨ̧ Mbɔ̧ɔ̧mà Àtsèàngɔ̀ŋ.”