Read Mundani Gàlashìà 1 Bible Online

Gàlashìà 1 - Mundani bible

Gàlashìà 1

¹Letà Pɔ̂l wantu̧ Yesò ane mèngɨ̌ Yesò Klistò bɔ̂ Tǎt wa Mbɔ̧ɔ̧mà wu Yesò lè pfə tà yù̧ù̧me atò la. È li è kà ghɨ̂ wɔ̀bȩ̂ tà kà mê ntsè ane wɔ̀bȩ̂ ka nguê wantu̧.

²Nè bɔnyɨ ba bu bàgème bɔ̀ wu ba tò ba la, Abua bèchɔsì bu a Gàlashìà la.

³Maà shù̧ù̧ta Tǎt wa Mbɔ̧ɔ̧mà bɔ̂ Yesò Klistò nê bɔ̀ ŋa awɨ̧ a ntsɔ̧̀ bɔ̂ àlàŋkè.

⁴Yesò waa li ŋa àtsəa zi ane mènəè kàbɔ̀ŋ ma mbɨ̀Ꞌɨ̀ etsì àwa a èbem mènəè kàbɔ̀ŋ ngɔ̀ŋ laane, mbɨ̀Ꞌɨ̀ Mbɔ̧ɔ̧mà li ntsia nê aa li wu la.

⁵TsiꞋ mèngùꞋte wu abua Mbɔ̧ɔ̧mà àlia nè àlia. Àmèn.

⁶A taꞋa tsě am ndɨ bɨ bê ntsìꞋa sà Mbɔ̧ɔ̧mà wu tà li ntsè ane tèsȩte Yesò Klistò ka ntɔ awɨ̧ la, ntsìꞋa mbɨ̧̀ɨ̧̀na Ntu̧ Ntsɔ̧̀ kǒ tsa la.

⁷È ka lema shua nê èngǎ̧ Mbɔ̧ɔ̧mà ko tsa aà və, ka bòt ko aà və bɔ̀ɔ ŋǎ wɨ̧ ngoꞋ nkɨ etsòke Ntu̧ Ntsɔ̧̀ Yesò Klistò la.

⁸Ka wòt ane ya, kò wuê wantu̧ Mbɔ̧ɔ̧mà tà chu a ègwet la leꞋ, kɨꞋà ndàꞋà èngǎ̧ ko tsa abua yɨ̧ e kubte ane ewu ba li ndàꞋ abua yɨ̧ la, ndɔ̀ nɔ̀ŋkè àtsəa ŋut.

⁹Mbɨ̀Ꞌɨ̀ ba yaŋe shu la, tsiꞋ è mèe shu àfɨ̀Ꞌ yaa nê, wòt mèà ndàꞋà èngǎ̧ ko tsa abua yɨ̧ e kubte ane ewu bɨ li ndzə la, ndɔ̀ nɔ̀ŋkè àtsəa ŋut.

¹⁰Tè e ngua àfɨ̀Ꞌ yaa nkɨ èghɨ àghɨa bɔbȩ àa nkɨà la, kò wuê àyea Mbɔ̧ɔ̧mà nàa nkɨà la à? Kò e ngua nkɨ e ghɨ̀ àyea àa bɔ̌ abua wɔ̀bȩ̂ la leè? E ngua ngɨ̀à àghɨa àa mbɔ̀ bɔbȩ la, ko e nte ntsě wafàꞋ Yesò Klistò.

¹¹TsiꞋ è shu abua yɨ̧ bɨ̀a bɔnyɨ bɔ̧ nê, Ntu̧ Ntsɔ̧̀ yu e ndi ndàꞋ la li è ka wu Ntu̧ Ntsɔ̧̀ wɔ̀bȩ̂ ghɨ̀ la.

¹²E ndi e ka nɨ èngǎ̧ mbɔŋ abua wɔ̀bȩ̂, è ka mèe ngu wɔ̀bȩ̂ ka tà nyɨꞋte am la. Yesò Klistò zìambɔŋ ka tà li ngàꞋte èngǎ̧ mbɔŋ nyɨ̀Ꞌte am la.

¹³Bɨ zə mènəè e ndi ngua ngɨ̀à àfɨꞋa mbì ane èlɨ Bèjuê e li ngua nkɨ̀à nɨ̀a nkùŋa Mbɔ̧ɔ̧mà la. E ndi ngua nùà chɔsì Mbɔ̧ɔ̧mà ndâ nkɨ eliime awɔb kwàꞋ ane ètɨ̧̂, kà ku tèsȩ.

¹⁴E ndi ngɨ̀ mènəè mbɨ̧te Bèjuê tèa nkɨà la tè ntɨ̧ a mbì nkàŋè taã ko nyaŋ àlaꞋ a ya. E ndi mbê nge màa nkùŋà mènəè bètǎt nyaꞋ ba la.

¹⁵Ka àfɨꞋa a li mbɔ a Mbɔ̧ɔ̧mà wu tà li ndàà am ka bɔɔ li ebi am la, tà nɨ̀ tèsȩ ti ntɔ am ane èkɔŋ vi,

¹⁶nyɨ̀Ꞌte waã vi abua am mbɨ̀Ꞌɨ̀ maa tsɔ̀te Ntu̧ Ntsɔ̧̀ tò ayɔɔ bòt kà ko a Mbɔ̧ɔ̧mà. ÀfɨꞋa mbɔŋ, è nka gha enɨ nkɨ̀a abua wɔ̀bȩ̂ kǒ,

¹⁷è nka lem nkɔ̀Ꞌɔ ghǎ a Jèlusalèm abua bòt bu bɔ li mbɨ̀ ngu bɔntu̧ Yesò ka maa wu. E ngà wuê nè Àlabìà, ndɔ̀Ꞌ abot mè ngèble am nkɨ̀Ꞌɨ̂ a Dàmaskɔ̀s.

¹⁸ÈngùꞋebȩ yetat e li ntsè, e nkɔꞋ nga a Jèlusalèm eyea Pità, ntsèke ba tò ane èlibȩ ntsɔ̀b betà̧â̧.

¹⁹Mâ ghà ale, e nka ye wantu̧ Yesò kǒ tsa ka nè Jimsì wanyɨ Tè Yesò.

²⁰Ane nkûŋ, a mbì Mbɔ̧ɔ̧mà, ànəê yaa e shɨa abua yɨ̧ la, ntsě àfɨte.

²¹Àfɨ̀Ꞌ a li ntsèke tè me wu, e nga àbâ Silìà bɔ̂ Sìlisìà.

²²È me wu àfɨꞋa mbɔŋ ale, bòt bèchɔsì Yesò bu a Jùdià la è ka lem nko am ane èsi.

²³Bɔ li ndzə wuê nê, “Wòt wu tà li ndâ ngua nkɨa àtsə ya enɨ la è tsiꞋa ndàꞋà sèntà èngǎ̧ Mbɔ̧ɔ̧mà wu tà li ngua nkɨà èlu̧ eliime la.”

²⁴Mbɨ̀Ꞌɨ̀ bɔ zə ale la, bɔ wuꞋta Mbɔ̧ɔ̧mà nkàà am.