Read Mundani Gàlashìà 2 Bible Online

Gàlashìà 2 - Mundani bible

Gàlashìà 2

¹ÈngùꞋebȩ e li ntsè ntsɔ̀b yekwì, e nga a Jèlusalèm bâ Bànabasì, me ghǎ ale nɨ̀a Tȩtɔ̀s.

²Maà ngà ale ngu ndɨ Mbɔ̧ɔ̧mà ghaꞋtè nyɨ̀Ꞌte am nê è nga la. Mâ ghǎ abàꞋ və ale ngàꞋte Ntu̧ Ntsɔ̧̀ yu màa ndaꞋa abua bòt bu bɔ̀ baka ko a Mbɔ̧ɔ̧mà la shu awɔb. Maà ngɨ̀à ale mbɔ̂ ndàꞋà wuê a ntsèm abua bɔɔjuŋ, màa mbɔ̀ɔ mbɨ̀Ꞌɨ̀ àfaꞋa e fàꞋà la, nè àyea e ndi ndzaŋe fàꞋà la a tsè àku la.

³Tȩtɔ̀s wu ba tò e li ngà nɔ̂ la li mbàte ngu wòt Glɨ̂k ale ka bɔ̀ ka lem ŋweele atò e ghɨ̌ bɔɔ naŋe tò mbɨ̀Ꞌɨ̀ taa tsiꞋi wòt Mbɔ̧ɔ̧mà.

⁴Ànəa mbɔŋ a li me lɔ̀Ꞌɔ a si ale ngu ndɨ bòt ko bɔ̀ɔ fɨ̀ta nê bɔ wu bòt Yesò la e li ndzɨ̧̀ɨ̧̀ma nyi ayɔɔ ya, me tsɔ ndɨ̀ŋkà mbɨ̀Ꞌɨ̀ eye ndɨ ba zì mèntɨ̧ɨ̧ ma ane Yesò Klistò ale bà ka tsi ngu èbùꞋ la, e mèe ghɨ̌ baa tsiꞋi èbùꞋ.

⁵Ka bɔ ghɨ̀ ale bà ka bê ŋa èlu̧ abua yɔb, ka wuê adzìꞋ, mbɨ̀Ꞌɨ̀ ghɨ̌ nkûŋ yu ane Ntu̧ Ntsɔ̧̀ Yesò Klistò la naa tèꞋa ane yɨ̧.

⁶Èbɔ è me wu ebu bɔ li ngu mbɨ̀Ꞌɨ̀ bɔɔjuŋ la, (kò bɔ li ngu ghà leꞋ, ko àyu a li à ka ye am, nkàà nê Mbɔ̧ɔ̧mà nàà kà lȩ mèsi bòt kà sàꞋ àwɔb.) Bɔɔjuŋ mbɔŋ e li bɔ̀ ka kweꞋnè ànəa fi ako ane èngǎ̧ am.

⁷Ka bɔ li ndzè na Mbɔ̧ɔ̧mà zi ànəa màndaꞋa Ntu̧ Ntsɔ̧̀ zi abua bòt kà wu Bèjuê a tèkitebu taã wuê mbɨ̀Ꞌɨ̀ tà li ndzì ànəa màndaꞋa èngǎ̧ vi abua Bèjuê a tèkitebu Pità la.

⁸Mbɔ̧ɔ̧mà li ngɨ̀ e ntsiꞋi wantu̧ tò a màndaꞋa èngǎ̧ tò abua bòt kà wu Bèjuê, wuê mbɨ̀Ꞌɨ̀ tà li ngɨ̀ Pità tsìꞋi wantu̧ tò a màndaꞋa èngǎ̧ tò abua Bèjuê la.

⁹ÀfɨꞋa Jimsì bɔ̂ Pità, nè Jɔ̌n wu bɔ̀ tɔ̀ke bòt Yesò la e ye a ntsɔ̧̀ wu Mbɔ̧ɔ̧mà nyɨꞋtè am la, bɔ zi èbu abua ya baa Bànabasì, mbɔ̂ ndàŋkè nê, bà ghǎ abua bòt kà ko a Mbɔ̧ɔ̧mà, bɔ̀ɔmbɔŋ è ghǎ abua Bèjuê.

¹⁰NdàꞋ ànəa bɔ li shu la wu nê, bà me ku̧u̧te bòt ntseb àfɨ̀Ꞌ àgème, è wù àghɨa e ndi ngua mɨɨta è ghɨ̀ la.

¹¹AfɨꞋa Pità e kɨꞋɨ a Antìɔ̀k la, Pɔ̂l tu̧ ànəa Pità è ghɨ̀à la a ètsəê tò a mbì banɔ̧̀, nkàà nê tà fǎ̧ ànəê.

¹²A li me wu ale ngu nê bòt ko Jimsì li ntsà la e li me laꞋ nê bɔɔ̀ nkɨ̀Ꞌa abàꞋ və, tà ko nê yea njɨ̀a èghɨjɨ bɔ̂ bòt kà ko a Mbɔ̧ɔ̧mà, ka àfɨꞋa bɔ kɨꞋɨ la tà tsì àvi ayɔɔ, ntsìꞋa nkua kwèn kwèn. Tàà ngɨa ale nko nê ye bɔɔ bòt bu bɔ li ngua shua nê bɔ̀ me naŋe bòt Yesò bàgème la.

¹³Bèjuê ko bu e ye ale, mbɔɔ̀ àyɔb mɨ̧̂ tè ntsìꞋi me kua kwèn kwèn mbɨ̀Ꞌɨ̀ tòa, tè Bànabasì fà̧ nyi ayɔɔ yɔb ntsìꞋa ngɨ̀à mbɨ̀Ꞌɨ̀ bɔ̀ɔ ngɨ̀à la.

¹⁴Ka àfɨꞋa mâ ye nê bɔɔ̀ kà ghȩȩne ndɨŋndɨ̀ŋ mbɨ̀Ꞌɨ̀ Ntu̧ Ntsɔ̧̀ Yesò kɨa la, e mbììte a Pità a mbì lɔb bàgème nê, “Àwɔ̀ waa à wu wòt Juê la, àa ntsìꞋa ngɨ̀à mbɨ̀Ꞌɨ̀ wòt kà wu wòt Juê anè tè ngu e ghɨ̀ na ka ŋwèèle bòt kà wu Bèjuê bɔɔ tsiꞋi Bèjuê à?”

¹⁵Baà nɨ̧̀ bàa wu Bèjuê ane membǐ, bà kà wua ngɨ̀à mènəè kàbɔ̀ŋ mbɨ̀Ꞌɨ̀ bòt kà ko a Mbɔ̧ɔ̧mà la,

¹⁶e ko nê, betsiꞋa wòt kà tɨ̧ɨ̧ ndɨŋndɨ̀ŋ a mbì Mbɔ̧ɔ̧mà nkàà wuê na tàa nkùŋà mbɨ̧te Musì la. Wu èntɨ̧ɨ̧ wu wòt zi ane Yesò Klistò la ka àa ngɨ̀à Mbɔ̧ɔ̧mà nɨ̀a ŋut mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la. Bàa mbɔŋ e bɨ̧ɨ̧nè ane Yesò Klistò. Ba ghɨ̀ ale, mbɨ̀Ꞌɨ̀ Mbɔ̧ɔ̧mà naa nɨa wa ane bòt bɔ tɨ̧ɨ̧ ndɨŋndɨ̀ŋ a mbì li nkàà èntɨ̧ɨ̧ wu ba zi ane Yesò Klistò la. E ntsě mbɨ̧te Bèjuê wòt nàa nkùŋà la ka betsiꞋa te ghɨa tò ale la, nkàà nê betsiꞋa wòt kà tɨ̧ɨ̧ ndɨŋndɨ̀ŋ e mbì Mbɔ̧ɔ̧mà wuê ambo na tàa nkùŋà mbɨ̧tsə la.

¹⁷Baa me kɨ nê Mbɔ̧ɔ̧mà nɨa wa mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ ndɨ̀ wu ba zì mèntɨ̧ɨ̧ ma ane Yesò Klistò la, ka bɔ ye nê ba wu bòt kàbɔ̀ŋ, ko a wua nyɨ̀Ꞌta nê Yesò Klistò nàa ngɨ̀à bàa ghɨa kàbɔ̀ŋ? ChaꞋ, Mbɔ̧ɔ̧mà è tu̧.

¹⁸Ka e ngu anè mè me kùŋe mènəè mu e ndi ntu̧, (mbɨ̀Ꞌɨ̀ etɨ̧ɨ̧ ndɨŋndɨ̀ŋ e mbì Mbɔ̧ɔ̧mà la), ko e ntsiꞋi wòt tàa mpààtà mbɨ̧te mbɔŋ la.

¹⁹Aa anè nkàà nê è wu mbɨ̀Ꞌɨ̀ mbɨ̧te Musì tèa nkɨà la ko mâ pfə te ndɔ̀Ꞌ, nkàà nê betsiꞋa è nka tɨ̧ɨ̧ ndɨŋndɨ̀ŋ a mbì Mbɔ̧ɔ̧mà nkàà mbɨ̧tsə màa nkùŋà la. A wu anè mbɨ̀Ꞌɨ̀ maa tsiꞋi me lɨ̀ŋkè wuê a Mbɔ̧ɔ̧mà wu tàa nkùa tèsȩ taã la.

²⁰Bɔ li ngù̧ù̧te a Yesò Klistò a mbɨ̧̀ mbasa ale nko nê bɔ wu̧u̧te am mɨ̧̂. Mâ tseke anè è nka tsi ngu mmɔ̌, è tsìꞋi Yesò Klistò ntsèka ane yaã la. Mèntsèke màa e ntsèka àfɨ̀Ꞌ yaa la, e ntsiꞋa ntsèka nkàà èntɨ̧ɨ̧ wu mâ zi ane Waã Mbɔ̧ɔ̧mà wu tà li nkɔ̀ŋkè am kwat tè mpfə ambo yaã la.

²¹E mbakà tu̧u̧ ntsɔ̧̀ wu Mbɔ̧ɔ̧mà nyɨꞋte am nkàà a Yesò Klistò la. Wòt ghɨ̀ ale, ngua ntɨ̧a ndɨŋndɨ̀ŋ a mbì Mbɔ̧ɔ̧mà nkàà na tàa ngɨ̀à mbɨ̀Ꞌɨ̀ mbɨ̧tsə te kɨa la, ko a nyɨꞋtè nê Yesò Klistò li mpfə kwàꞋ àku.