Read Mundani Gàlashìà 3 Bible Online

Gàlashìà 3 - Mundani bible

Gàlashìà 3

¹Bɨ̀a bòt Gàlashìà bàa bɨ wu kwàꞋ èkèghɨ̧̀. Wàa chɨɨmè nɨ̀ èbə nɨŋ ngèble ètsə bɨ̧ nê bɨ̀ ka mbɨ̧̀ɨ̧̀ne nkûŋ à? Ka bɔ li ngàꞋte kwàꞋ a mbì lɨ̧ nyɨ̀Ꞌte ndɨ bɔ li ngù̧ù̧te Yesò Klistò a mbɨ̧̀ mbasa la à?

²TsiꞋ e mbììte awɨ̧ ànəê yeamɔꞋ. Bɨ li me bɔ Fo Mbɔ̧ɔ̧mà ale ngu ndɨ bɨ̀a ngɨ̀à àghɨa mbɨ̧tsə te shu la kò wuê ndɨ̀ wu bɨ li ndzì mèntɨ̧ɨ̧ mɨ̧ ane Yesò la à?

³Bɨ chɨɨmè ngu ale wu ndâ èkèghɨ̧̀? Bɨ li mbùꞋ ànəê yaa ane Fo Mbɔ̧ɔ̧mà ale ghǎ a ghɨ̀ ka bɨ tsiꞋa nkɨ̌ etɨ̧ɨ̧ ane mɨ̧ ne mètàŋ à?

⁴Bɨ li ngua ndzèa taꞋà ngoꞋ yu ale wuê àku? Mâ mɨɨtè nê è li è kà wu àku.

⁵Tè bɨ ye nê Mbɔ̧ɔ̧mà li me ŋa Fo zi abua yɨ̧, e mèe ghɨ̀ tèwuute ènəê kà ye fɨ̀Ꞌ a kètsìà wɨ̧ ale, è wu ndɨ bɨ̀a ngɨ̀à àghɨa mbɨ̧tsə te kɨa la, kò wu ndɨ bɨ li ndzəâ èngǎ̧ Mbɔ̧ɔ̧mà ane ànəa Yesò mbɨ̧̀ɨ̧̀ne la à?

⁶Bɨ̀ ye ndɨ Abàlàghâm li ngɨ̀ la. Bɔ shɨ a si nê, “Tà li ndɔ̀Ꞌ mbɨ̧̀ɨ̧̀ne èngǎ̧ Mbɔ̧ɔ̧mà ale, Mbɔ̧ɔ̧mà gha ambo èntɨ̧ɨ̧ wu tà zi ane zi la, nɨ̀a tò mbɨ̀Ꞌɨ̀ wòt tàa ngɨ̀à àghɨa yèa nkɨà la.”

⁷Bɨ̀ ko na bòt bɔ bɨ̧ɨ̧ne èngǎ̧ Mbɔ̧ɔ̧mà la, ka bɔ̀ wu bɔ̧ Abàlàghâm la.

⁸Bɔ li ndɔ̀Ꞌ shu a èbem Àkata Mbɔ̧ɔ̧mà nê, Mbɔ̧ɔ̧mà naa li ghɨ̌ bòt kà wu Bèjuê aa tɨ̧ɨ̧ ndɨŋndɨ̀ŋ a mbì li nkàà èntɨ̧ɨ̧ wɔb bɔ zi ane tò la. Ale, tà bèle àfɨꞋa tsa ntsɔ̀tè Ntu̧ Ntsɔ̧̀ zi abua Abàlàghâm nê, “ÈlaꞋ ègème aa li eghǎ ambo yè ebɔ èlɔ̂t.”

⁹Mbɨ̀Ꞌɨ̀ Abàlàghâm li ndzì èntɨ̧ɨ̧ vi ane Mbɔ̧ɔ̧mà mbɔ̌ èlɔ̂t mbɨ̀Ꞌɨ̀ wòt tò la, wu wuê a èlɨ mbɔŋ wòt ègème tà zi èntɨ̧ɨ̧ vi ane Mbɔ̧ɔ̧mà la nàa bɔ èlɔ̂t la.

¹⁰Ndɔ̀ wu àtsəa bòt bu àtsəa ànəa yɔb wu màngɨa wuê mbɨ̀Ꞌɨ̀ mbɨ̧te kà ekùꞋu abua Mbɔ̧ɔ̧mà te kɨà la, nkàà nê, bɔ shɨŋ a èbem Àkata Mbɔ̧ɔ̧mà nê, “Ndɔ̀ wu àtsəa waa waa tàa ka ghɨ èghɨ bu ègème bɔ shɨŋ a èbem àkatè mbɨ̧tsə la.”

¹¹Ba ye àfɨ̀Ꞌ yaa nê è ntsě mbɨ̧ Musì ka naa ngɨ̀à wòt tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la, nkàà nê àkata Mbɔ̧ɔ̧mà a laꞋnê, “Wòt tà tɨ̧ɨ̧ ndɨŋndɨ̀ŋ a mbì Mbɔ̧ɔ̧mà nkàà na tà zì èntɨ̧ɨ̧ vi ane Yesò la naa li ebɔ mèmpème.”

¹²Ka mbɨ̧te Musì teà ngà tsa, màndzia èntɨ̧ɨ̧ ane Yesò me gha tsa nkàà nê Àkata Mbɔ̧ɔ̧mà a laꞋnê, “Waa waa tàa ngɨ̀à àghɨ àgème mbɨ̧te Mbɔ̧ɔ̧mà tèa nkɨà la naa bɔ mèmpème nkàà tùà.”

¹³Yesò Klistò li nɨ̀ àtsəa zi nchùꞋ ètsə ba a èbem ndɔ̀ mbɨ̧tsə, ndɨ̀ wu tà li ntsìꞋi ŋeꞋe ndɔ̀ ngaa zìambɔŋ àdziꞋa ya la. Aa anè nkàà nê Àkata Mbɔ̧ɔ̧mà a laꞋnê, “Ànyem a wu àtsəa waa waa tà tɨŋne a ègwet àyɨt la.”

¹⁴Yesò Klistò li ngɨ̀ àyaa anè mbɨ̀Ꞌɨ̀ e ghɨ̌ èlɔ̂t wu Mbɔ̧ɔ̧mà li nkaꞋa Abàlàghâm la aa tsě ane tò e kɨꞋɨ abua bòt kà ko a Mbɔ̧ɔ̧mà. A li ngu ane mbɨ̀Ꞌɨ̀ e ghɨ̌ èntɨ̧ɨ̧ wu ba zi ane Yesò la aa ghɨ baa bɔ Fo yu tà li nkàꞋ la.

¹⁵Bɔnyɨ bɔ̧, tsiꞋ è fɨ̀Ꞌne ànəê yaa ane àghɨa bɨ̀a ndzèa àli àgème la. Bòt babe àa ngɨ̀ bɔ̀ tsia ànəê tè bɔ̀ shɨ a si, wòt kà tsi nko nkùbte.

¹⁶Mbɔ̧ɔ̧mà li ndɔ̀Ꞌ nkàꞋ mènəè mi abua Abàlàghâm bɔ̂ wòt àndà̧ vi. Èngǎ̧ Mbɔ̧ɔ̧mà e bakà laꞋnê, tà li nkàꞋ mènəè “Abua bɔbȩ”, è wu bòt nyaŋ la, ka e shu wuê nê, “Abua waã wê”, ngua ndàꞋà ànəa wòt wemɔ̀Ꞌ, è wu Yesò Klistò la.

¹⁷E ngua anè shua nê Mbɔ̧ɔ̧mà li ngɨ̀ mènkàꞋa kèkweelè mi, mbɔ̂ nê yea ghɨ mbɨ̀Ꞌɨ̀ ye shu la. Ndɨ̀ wu èngùꞋebȩ ènkɨ̀ yekwì nè èghem yetat e li ntsè ka mbɨ̧ tu te kɨꞋɨ̀ la betsiꞋa tè ka tsokè mènkàꞋa kèkweelè mu, eliime ànəa Mbɔ̧ɔ̧mà li nkàꞋ la.

¹⁸Ba ghɨ̀ ale ngua mbɔ àghɨa Mbɔ̧ɔ̧mà nàa ŋǎ la nkàà na bàa nkùŋa mbɨ̧tsə la, ko betsiꞋa bà ka tsi mbɔ̌ yùà nkàà wuê mènkàꞋa. Ka Mbɔ̧ɔ̧mà li ŋà àghɨa mbɔŋ abua Abàlàghâm na tà li nkàꞋ atò la.

¹⁹Mbɨ̀Ꞌɨ̀ àa anè la, àfaꞋa mbɨ̧tsə mèe ngu ghà à? Mbɔ̧ɔ̧mà li ŋa mbɨ̧tsə e nɨ nyɨꞋte awa àghɨa kàbɔ̀ŋ wu yùà la tè tea tsiꞋi lìa àfɨꞋa waã wu Mbɔ̧ɔ̧mà li nkàꞋ ànəê yu abua tò la è kɨꞋɨ la. Bɔntu̧ Mbɔ̧ɔ̧mà e li ntsè ane wòt tà tɨ̧ a kètsìà la ŋa mbɨ̧te mbɔŋ abua bɔbȩ.

²⁰Bɔ̀ɔ ngɨ̀ bɔ̀ me laꞋnê wòt wu a kètsìà, a wu nê tà wu a kètsìà bòt babe, ka è me wu mènkàꞋa mu ko Mbɔ̧ɔ̧mà li nkàꞋ zìa ndziꞋne.

²¹Tè àyaa a nyɨꞋtè nê mbɨ̧tsə te tsòke ànəa Mbɔ̧ɔ̧mà li nkàꞋ la à? ChaꞋ, a ntsě ale. Mbɨ̧tsə te ghɨ̀ ale ngua nkɨ̀Ꞌa mbɨ̀Ꞌɨ̀ eŋa mèmpème abua bɔbȩ, ko bòt aà ntɨ̧a ndɨŋndɨ̀ŋ e mbì Mbɔ̧ɔ̧mà nkàà na bɔ̀ɔ ngɨ̀à àghɨa mbɨ̧tsə te kɨa la.

²²Ka Àkata Mbɔ̧ɔ̧mà a laꞋnê bòt sitsǎꞋ bàgème e wu mbɨ̀Ꞌɨ̀ èbùꞋ abua mènəè kàbɔ̀ŋ. A wu ale mbɨ̀Ꞌɨ̀ bòt bu bɔ zì mèntɨ̧ɨ̧ mɔb ane Yesò Klistò la aa bɔŋ àghɨa Mbɔ̧ɔ̧mà li nkàꞋ nê bɔ bɨ̧ɨ̧ne a Yesò ko bɔɔ bɔ la.

²³Àfɨ̀Ꞌ yu ba li mbɔ̌ ndɨ bàa zì mèntɨ̧ɨ̧ ma ane Yesò la a li mbèle kà zìꞋ nkɨ̀Ꞌɨ̂, ba wu a èten mbɨ̧tsə bɔ kȩ̀ awa mbɨ̀Ꞌɨ̀ bòt tèfȩ la. A li mbɔ̌ ndɨ àa wu ale te eghǎ wu àfɨꞋa Mbɔ̧ɔ̧mà naa ghaꞋte àghɨ aya ndɨ bàa zì mèntɨ̧ɨ̧ ma ane Yesò la.

²⁴Ale, mbɨ̧tsə te li ngu àghɨa àa me baabe awa la te egha wu àfɨ̀Ꞌ yu Yesò Klistò li nkɨ̀Ꞌɨ̂ la, mbɨ̀Ꞌɨ̀ baa tɨ̧ɨ̧ ndɨŋndɨ̀ŋ e mbì Mbɔ̧ɔ̧mà nkàà èntɨ̧ɨ̧ wu ba zi ane Yesò Klistò la.

²⁵Ndɨ̀ wu eyaa tsiꞋi àfɨꞋa bàa ndzìà mèntɨ̧ɨ̧ ma ane Yesò la, baa te ntsě a èten mbɨ̧te Musì.

²⁶Èntɨ̧ɨ̧ wu bɨ zi ane Yesò Klistò la è ghɨ bɨ tsiꞋi bɔ̧ Mbɔ̧ɔ̧mà.

²⁷Bɨ̀a wu bɨ̀agème bɔ li ndzì àwɨ̧ a èdzî la bɨ tsiꞋi àghɨ yeamɔꞋ nè Yesò Klistò, mè ntsìꞋa nkùŋà èka tò.

²⁸BetsiꞋa bɔ̀ ka tsi nê wòt Juê è kubte ane wòt Glɨ̂k, àbùꞋ à ka kubte ane wòt ka wu àbùꞋ, mbâ̧ kà kubte ane àvi, nkàà nê bɨ̀agème e tsiꞋi àghɨ yeamɔꞋ ane Yesò Klistò.

²⁹Ale, bɨ wu anè ngu bòt Yesò Klistò, ko bɨ wu bɔ̧ Abàlàghâm, mbɨ̀Ꞌɨ̀ Mbɔ̧ɔ̧mà li nkàꞋ la.