Read Mundani Gàlashìà 4 Bible Online

Gàlashìà 4 - Mundani bible

Gàlashìà 4

¹Ànəa e shua la wu nê njɨlob nàa mbèla watèchɨɨle, èghɨ tǎt tò e batè ngu a èten tò ka tà me ye ye mbɨ̀Ꞌɨ̀ àbùꞋ.

²Tàa ngɨ̀ tà bèle a èten bòt bu bɔ̀ɔ ndia tò la, nè bòt bɔ̀ɔ ndɨ̀ŋkà èghɨ to la, tè àfɨꞋa tǎt tò li nɔ̀ŋè la a kùꞋ.

³Ale, bàambɔŋ e li ngu mbɨ̀Ꞌɨ̀ èbùꞋ, àfɨꞋa ba li mbèle bɔtechɨɨle la, me ghɨ̀ àghɨa èyo̧o̧te fotsə a ègwet te kɨa la.

⁴Ka àfɨ̀Ꞌ a li ntsèke tè nkùꞋ, Mbɔ̧ɔ̧mà tsàà Waã vi a ngɔ̀ŋ. A tò li mbi àvi àfɨꞋa mbɨ̧te Musì tèa mbǎ̧ àlaꞋ la.

⁵Tà li ntsaa atò mbɨ̀Ꞌɨ̀ taa kɨꞋɨ echùꞋù ètsə bòt bu bɔ̀ wu mbɨ̀Ꞌɨ̀ èbùꞋ a èten mbɨ̧tsə la e ghɨ̌ baa tsiꞋi bɔ̧ Mbɔ̧ɔ̧mà.

⁶Ane èlɨ̀ wu bɨ̀ tsiꞋi bɔ̧ Mbɔ̧ɔ̧mà la, tà tsàà Fo waã vi a mèntɨ̧ɨ̧ ma, ŋȩ nê, “Abà! Tǎt wa!” [1]

⁷Ale, Mbɔ̧ɔ̧mà ghɨ̂ bɨ̀ ka tsi ngu èbùꞋ, bɨ tsiꞋi bɔ̧. Ndɨ̀ wu bɨ̀ tsiꞋi bɔ̧ la, bɨ wu bènjɨlob.

⁸È li ngu àfɨꞋa kà bɨ zìꞋ nko a Mbɔ̧ɔ̧mà, bɨ me wùꞋtè èghɨ ko tsa kà wu bèmbɔ̧ɔ̧mà.

⁹Ka àfɨ̀Ꞌ yaa bɨ koa Mbɔ̧ɔ̧mà la, kò è shu nê àfɨ̀Ꞌ yaa Mbɔ̧ɔ̧mà ko awɨ̧ la, ngulesi àghɨ yu a ghɨ̂ ka bɨ me kua akwèn nga abua èyo̧o̧te fotsə kà ye àfɨa la wu ghà à? Bɨ chɨɨmè ngɨ̀ nà ka mè me kɨ ewu èbùꞋ a èten tùà à?

¹⁰Bɨ làà èlibȩ ko me ku̧u̧te bùà, mè nku̧u̧ta mèŋu kǒ bɔ̂ èfɨ̀Ꞌ ko, nè mèngùꞋebȩ.

¹¹Bɨ ghɨ̀ tê e ntsiꞋa mbɔ̀ɔ bɔɔ nê kò àfaꞋa mâ fàꞋa ane yɨ̧ la a tsè àku leꞋ.

¹²Bɔnyɨ bɔ̧, mâ shu̧u̧te awɨ̧ nê bɨ̀ lem ngu mbɨ̀Ꞌɨ̀ mmɔ̌, nkàà nê mâ tsiꞋa yaã mbɨ̀Ꞌɨ̀ bɨ̀a mɨ̧̂. Bɨ bakà fâ̧ ànəa ko abua am.

¹³Bɨ ko nê e ndi me làꞋa èngǎ̧ Mbɔ̧ɔ̧mà abua yɨ̧ a ngo̧ mbì yu ale, è ghɨ̀ àghɔ̧ ka e nkɨ̀Ꞌɨ̂ abà ŋu.

¹⁴Ànəa àghɔ̧ am a li mbatê nkwèèle awɨ̧ ka bɨ̀ ka lem nyàŋke am, bɨ̀ ka fəè am. Bɨ li nɨ am mbɨ̀Ꞌɨ̀ wantu̧ Mbɔ̧ɔ̧mà, mbɨ̀Ꞌɨ̀ Yesò Klistò.

¹⁵Bɨ li ngùꞋtè àwɨ̧ ale eghǎ tseke tè ngɨ̀ à? Mâ bê ndâ nko nê è lè ghɨ̂ ale nguê àghɨa betsiꞋa wɔ̀bȩ̂ koê ngɨ̀ la ko bɨ tsɔꞋte àghɨ ayɨ̧ ŋa abua am.

¹⁶Tè maa anè ntsìꞋi wɔ̀mbù̧ wɨ̧ na mâ làꞋa nkûŋ abua yɨ̧ la à?

¹⁷Bòt ko bu aà ndzìà èntɨ̧ɨ̧ ane yɨ̧ ka è kà lem ngu ane ntsɔ̧̀. Àghɨa bɔ kɨà la wu a mà ntsì àwɨ̧ ane yaã mbɨ̀Ꞌɨ̀ bɨa tsiꞋi me zì àwɨ̧ ane yɔb.

¹⁸Aà mbɔ̀ a mà nda ezǐ èntɨ̧ɨ̧ ane ànəê na e wu ane ntsɔ̧̀ la àfɨꞋa àgème, è ka ngu wuê àfɨꞋa è ngu ba nɨ̧̀ ba la.

¹⁹Bɔ̧ bɔ̧, ànəa yɨ̧ aà saa am mbɨ̀Ꞌɨ̀ àvi nàa ngɨ̀ tà me lu̧u̧te nkɨ ebi la te eghǎ e wu àfɨꞋa bɔ̀ɔ ye nê Yesò Klistò naa ane mèntsèke mɨ̧ la.

²⁰Mâ ghɨ̀ ale nchɨɨme ngu ba nɨ̧̀ ba àfɨ̀Ꞌ yaa ko mâ tsiꞋi laꞋa abua yɨ̧ ane èlɨ tsa nkàà nê ànəa yɨ̧ a taꞋa saa am.

²¹Bɨ̀ tsiꞋ è mbiite awɨ̧ wu bɨ̀a nùà nkɨ ewu wuê a èten mbɨ̧tsə la, bɨà kà zə ànəa mbɨ̧te mbɔŋ te shuà la à?

²²Àkata Mbɔ̧ɔ̧mà a laꞋnê, Abàlàghâm li mbɔ̀ bɔ̧ babe, nyɨ̌ wekǒ wu àbùꞋ, nyɨ̌ wekǒ wu àvi yɔꞋɔ.

²³Tà li mbi waã ane àbùꞋ yu, mbɨ̀Ꞌɨ̀ bɔ̀ɔ mbia waã ègème la, è me wu waã wu ane àvi wu tà yɔꞋɔ la, è wû mènkàꞋa Mbɔ̧ɔ̧mà.

²⁴Ànəê yaa a fəə èngà̧teme. Bèzi bàa e nyɨꞋtà mènkàꞋa mâmbè. Wemɔ̀Ꞌ wu Agà tà dzə a ègwet èbȩ Sinȩ̀ la. Bɔ̧ tàa mbia la wu èbùꞋ.

²⁵Agà naa ale ngua nyɨ̀Ꞌta èbȩ Sinȩ̀ àlaꞋa Àlabìà, tà wu mbɨ̀Ꞌɨ̀ Jèlusalèm laane. Ngu nê bɔ̂ bɔ̧ bi e wu èbùꞋ.

²⁶Ka Jèlusalèm wu ègwet la ntsě àlaꞋ a èbùꞋ. Ta wu nyɨ̌ wa.

²⁷Àkata Mbɔ̧ɔ̧mà a laꞋnê: “WùꞋtè àwê àwɔ̀ àvi wu à wu yen kà wua mbia la. GhaꞋà ètsəê wê ŋȩ, àwɔ̀ àvi wu kà li te mè lu̧u̧te waã la, Nkàà nê bɔ̧ àvi wu bɔ waꞋa la be yaãaã tê ntsè èbe àvi wu kà lu̧ tò li mè sǎ atò la.”

²⁸Bɔnyɨ bɔ̧, ba wu bɔ̧ Mbɔ̧ɔ̧mà nkàà mènkàꞋa mu tà li ngɨ̀ la, wuê mbɨ̀Ꞌɨ̀ Asàk lè wu la.

²⁹È li ngu àfɨꞋa mbɔŋ waã wu bɔ bi atò mbɨ̀Ꞌɨ̀ bɔ̀ɔ mbia beko la, me ghɨ̧̀ɨ̧̀ne wu bɔ li mbia atò ane Fo Mbɔ̧ɔ̧mà la. Eyaa bê ngu wuê ndɨ aà àfɨ̀Ꞌ yaa la.

³⁰Àkata Mbɔ̧ɔ̧mà a laꞋnê ghà à? Nê “Fəèə àvi wu tà wu àbùꞋ la bɔ̂ waã vi nkàà nê waã àbùꞋ bakà bɔ ndɨ tàa fɔte ejɨ lob bɔ̂ waã àvi wu bɔ yɔꞋɔ la.”

³¹Ale, bɔnyɨ bɔ̧, baa ntsě bɔ̧ àbùꞋ, ba wu bɔ̧ àvi wu bɔ yɔꞋɔ la.