Read Mundani Gàlashìà 5 Bible Online

Gàlashìà 5 - Mundani bible

Gàlashìà 5

¹Yesò Klistò li ndzà àwa ntsì a èbem mbɨ̧te Musì, è wu ale bɨ̀ ŋwètè èka bɨ̧ a si ntsɔ̧̀, bɨ̀ ka mbɨ̧̀ɨ̧̀ne àghɨa ko a mè ngɨ̀ bɨ tsiꞋi èbùꞋ.

²Bɨ̀ zə, mmɔ̌ Pɔ̂l, mâ shua wɨ̧ nê, bɨ wua anè mbɨ̧ɨ̧nà nê bɔ̀ naŋe awɨ̧, ko aa nyɨꞋte nê Yesò Klistò ntsě àghɨa ko abua yɨ̧.

³TsiꞋ e mèe shu abua wòt ègème tà bɨ̧ɨ̧nè bɔ naŋe tò la nê, ŋut bɔ ndɨ tàa me nɔ̀ŋe àghɨ àgème mbɨ̧te Musì te shu la.

⁴Bɨ̀a wu bɨ̀a nyɔ̀Ꞌtà nkɨ etɨ̧ɨ̧ ndɨŋndɨ̀ŋ a mbì Mbɔ̧ɔ̧mà nkàà na bɨ̀a ngɨ̀à mbɨ̀Ꞌɨ̀ mbɨ̧tsə te kɨa la, bɨ tsì àwɨ̧ ane Yesò Klistò. Bɨ tu̧ àghɨa Mbɔ̧ɔ̧mà ŋa abua yɨ̧ àku la.

⁵È wu nè nà ko ba ko nê, Mbɔ̧ɔ̧mà nàà ŋa wa Fo zi ngɨ̀à ba ghɨ̀à àghɨa tàa nkɨà la. Eyaa wu àghɨa bà wua nchɨ̀Ꞌà la, nkàà ntɨ̀ yu ba bɔ ane Yesò Klistò la.

⁶Ndɨ̀ wu bà wu bòt Yesò Klistò la, ba bakà tsi mbɔ̌ ndɨ bàa me lȩ̂ nê bɔ naŋe wòt kò bɔ bakà nàŋe atò leꞋ la. Àghɨa bɔ kɨa la wu èntɨ̧ɨ̧ wu wòt zi ane Yesò Klistò la, e wu bɔ̀ɔ ndzèa ane èkɔŋ wu ŋut bɔ ane bɔbȩ la.

⁷Bɨa yǎ̧ ngua ngȩ̀ȩ̀nà ane alu̧ ntsɔ̧̀ ale wǎ tseke tè nkèlè àwɨ̧ nê bɨ̀ ka tsi ngɨ̀ mbɨ̀Ꞌɨ̀ nkûŋ nàa shua la à?

⁸E ntsě Mbɔ̧ɔ̧mà wu tà tɔ awɨ̧ la ka ŋwèèlè àwɨ̧ ale la.

⁹Mbɨ̀Ꞌɨ̀ bɔ̀ɔ shua la, “AdzìꞋ yis nàà ngɨ̀à èpfəèꞋ bled bɔ tɔbte la e kɔꞋa.”

¹⁰Mâ bê ndâ nko nê, ndɨ̀ wu ba nɨ̧̀ ba è tsìꞋi àghɨ yeamɔꞋ ane Yesò la, betsiꞋa bɨ̀ ka tsi mɨ̀ɨ̀te a èlɨ̀ ko tsa. Wòt wu ntsòkà àtsəa yɨ̧ la nàà bɔ àbȩ̀ àzi abua Mbɔ̧ɔ̧mà ka tà màa ngu wuê wà leꞋ.

¹¹Bɔnyɨ bɔ̧, mâ ghɨ̀ ale mbèla ndàꞋà shua nê, bɔ̀ me naŋe bòt ko bɔɔ̀ kà tsi nkɨ àtsə am enɨ. Mâ ghɨ̀ ale mbèla ndaꞋa a èlɨ mbɔŋ, ko èngà̧ waa màa ndàꞋà ndɨ bɔ li ngù̧ù̧te a Yesò a mbɨ̧̀ mbasa la aà kà tsi sɔ̀ɔ̀bè èntɨ̧ɨ̧ wòt.

¹²Ànəê yaa a me saa bòt bu ŋǎ wɨ̧ ngoꞋ nê bɔ̀ naŋe awɨ̧ la, bɔ ghà ngɨ̀ bɔ bê mpàa ndzàꞋ àwɔb.

¹³Bɔnyɨ bɔ̧, Fo Mbɔ̧ɔ̧mà tɔ awɨ̧ nê bɨ̀ ka tsi mbɨ̧̀ɨ̧̀ne èbùꞋ abua mbɨ̧te Musì, wuê nê bɨ̀ ka nɨ àyea mbɔŋ mbɨ̀Ꞌɨ̀ alu̧ a màngɨa àghɨa mbɨ̧te ènyit tɨ̧ tèa nkɨà la, ka bɨ̀ me kɔ̀ŋkè bɔnyɨ bɨ̧ mbɔ̂ ntɨ̀ŋe awɔb.

¹⁴Bɔ fete mbɨ̧tsə tègème a èbem èngà̧ waa wemɔꞋ la nê, “Me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ.”

¹⁵È wu nê bɨa ndù̧a bɔnyɨ bɨ nkwèla, bɨ me ko awɨ̧, mbɨ̀Ꞌɨ̀ ka bɨ bela ngɨ̀à ndììme awɨ̧ bɨ̀ambɔŋ.

¹⁶TsiꞋ è shua wɨ̧ nê, bɨ̀ me ghɨ̀ mbɨ̀Ꞌɨ̀ Fo Mbɔ̧ɔ̧mà nàa nkɨà la, bɨ̀ ka me ghɨ̀ mbɨꞋɨ̀ mbɨ̧te ènyit tɨ̧ te kɨa la.

¹⁷Aa ale nkàà nê, àghɨa mbɨ̧̀ ènyit nàa nkɨà la ntsě àghɨa Fo Mbɔ̧ɔ̧mà nàa nkɨà la, àyea Fo Mbɔ̧ɔ̧mà nàa nkɨà la è kà wu àyea mbɨ̧̀ ènyit nàa nkɨà la. Èghɨ baa aà ngà èlu̧ tsa tsa, mbɨ̀Ꞌɨ̀ ka bɨ ghɨ̀ àghɨa bɨ ghɨ̂ mbɔ ndɨ bɨ̀a ghɨ̀ la.

¹⁸Ka è wu nê bɨa ngɨ̀à àghɨa Fo Mbɔ̧ɔ̧mà nàa nkɨà la, ko bɨ te ntsě a èten mbɨ̧tsə.

¹⁹Èghɨ mbɨ̧̀ ènyit nàa nkɨà la aà kà lò̧ò̧tè: MàmpaꞋta wòt kà bɨ tò eyɔꞋ, mèmɨ̀ɨ̀te kàbɔ̀ŋ, màngɨa kàbɔ̀ŋ,

²⁰mànguꞋta èghɨ tsa kà wu Mbɔ̧ɔ̧mà, nè tèbətsə, nè mpàb, nè àyɔ̀ŋ, nè ghòꞋnà, nè èntɨ̧ɨ̧ bɨ̌, nè èghoꞋ, nè màntsiꞋa ane mètsəê tsa tsa, ndɔ̀Ꞌ nè màngabta etseke tsa tsa.

²¹MàngoꞋna bòt, màmbuŋa wòt, màmbea mèlùꞋ, nè màngɨa àghɨ àgème èntɨ̧ɨ̧ wê àa nkɨà la, fɔ̀ɔ̀lè ne èghɨ ko tsa. TsiꞋ e mèe səèŋkè ètû̧ bɨ̧ mbɨ̀Ꞌɨ̀ e ndi ndzii ghɨ̀ la, nê bòt bu bɔ̀ɔ ngɨ̀à èwuu èghɨ mbɔŋ la è ka li nyi a kèfɔ̧̀ Mbɔ̧ɔ̧mà a.

²²Ka èghɨ Fo Mbɔ̧ɔ̧mà nàa ŋǎ la wu èkɔŋ, nè mèngùꞋte, nè àlàŋkè, nè màmbɔɔla èntɨ̧ɨ̧, mànkua tèsȩ nè màngɨa ntsɔ̧̀, nè màndaꞋa nkûŋ,

²³nè màshuke awê a si, ndɔ̀Ꞌ nè màmbaãaã ènyit yê. Wòt ghɨà èghɨ bàa, ko tà bakà bəꞋ mbɨ̧.

²⁴Bòt bu bɔ zì mèntɨ̧ɨ̧ mɔb ane Yesò Klistò la e tu̧u̧ e me ghɨ̌ èghɨ bu mbɨ̧te ènyit tèa nkɨà la.

²⁵Ndɨ̀ wu Fo Mbɔ̧ɔ̧mà ŋa awa mèmpème la, ba bɔ ndɨ bàa me ghɨ̀ mbɨꞋɨ̀ nàa nkɨà la.

²⁶Bà ka me ŋeꞋe tèkwȩ ta a ègwet è shua nê baa wu àghɨa kà wu yùà, ngwȩ̀ȩ̀tà bɔnyɨ ba, mè ngòꞋnà èghɨ bɔnyɨ ba nkɨà nê è wu tsiꞋi eba.