Read Mundani Efesɔ̀s 1 Bible Online

Efesɔ̀s 1 - Mundani bible

Efesɔ̀s 1

¹Letà Pɔ̂l wantu̧ Yesò Klistò Mbɔ̧ɔ̧mà è ghɨ̂ ane mènkɔ̀ŋke mi la. Abua bòt Mbɔ̧ɔ̧mà bu a Efesɔ̀s bɔ̀ tsiꞋi àghɨ yeamɔꞋ nè Yesò Klistò la.

²Maà ntsàꞋtà nê Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ è me nyɨꞋte a ntsɔ̧̀ wɔb abua yɨ̧ mè ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

³Bà kɔ̀ŋka Mbɔ̧ɔ̧mà wu tà wu Tǎt Yesò Klistò Lefɨ̀Ꞌ wa la. Ndɨ̀ wu bà tsiꞋi àghɨ yeamɔꞋ nè Yesò Klistò la, Mbɔ̧ɔ̧mà lɔ̀ɔ̀lè àwa, nè èghɨ ntsɔ̧̀ ègème e dzə a ègwet, è wu èghɨ e bɔ ndɨ àa ghɨ̀ ne mèntsèke ma ane Mbɔ̧ɔ̧mà la.

⁴Ngɔ̀ŋ li me laꞋ nê nàà mbùꞋà, Mbɔ̧ɔ̧mà lȩ̀a wa mbɨ̀Ꞌɨ̀ baa tsiꞋi àghɨ yeamɔꞋ nè Yesò Klistò, ngɨ̀ àwa ane bòt mènəè ntsɔ̧̀ kà ye àghɨa ko bɔ̀ɔ fèèlè àwa adù̧ la a mbì li.

⁵Mbɔ̧ɔ̧mà li nga ambo èkɔŋ wu tà bɔ ane ya la mbèla àfɨꞋa tsa ntàŋke ndɨ Yesò Klistò nàa li ghɨ̌ baa tsiꞋi bɔ̧ bi la. Tà li ngɨ̀ àyaa ndɨ tà kɔ̀ŋkè nê à wu la.

⁶Bà wùꞋte a Mbɔ̧ɔ̧mà ane taꞋà ntsɔ̧̀ tò waa tà tsě ane waã èkɔŋ vi nyɨ̀Ꞌte abua ya àku la.

⁷Wu Waã tò waa ka tà li nɨ̀ àlo̧ a zi nɨŋ chùꞋù ètsə ba ngɨ̀ Mbɔ̧ɔ̧mà waꞋa bèkàbɔ̀ŋ ba la. Wu taꞋà ntsɔ̧̀ tò wu tàa nyɨ̀Ꞌta abua bòt la,

⁸ka tà li nɨŋ ngɨ̀ èwuu ànəê yaa ane ya la.

⁹Tà gha ambo èlɨ̀ wu tà bɔ èyì mè nko àghɨ àgeme la, ngɨ̀ ba koê èghɨ ndò̧ tò bu bòt e li bɔ̀ ka ko la. Tà li ndzaŋe taŋke ndɨ Yesò Klistò nàa ghaꞋa èlu̧ bòt aa ko la.

¹⁰Tà li ngua ntàŋka nê àfɨꞋa ngaa aa ghɨ̌ nkùꞋ ye fète èghɨ ègème è wu a ègwet nè sitsǎꞋ la ndzi a èten Yesò Klistò.

¹¹Mbɔ̧ɔ̧mà nàà ngɨ̀à àghɨ àgème mbɨ̀Ꞌɨ̀ tà kwaꞋtè nê aa wu la. Tà li ndȩ̀ àwa nɨ a Yesò Klistò tà ghɨ̀ ba tsiꞋi bòt Mbɔ̧ɔ̧mà wu mbɨ̀Ꞌɨ̀ tà li ndzaŋe taŋke nê à wu la.

¹²Tà li ngɨ̀ anè mbɨ̀Ꞌɨ̀ bàa wu Mbɔ̧ɔ̧mà li ngɨ̀ ba wu bòt mbì e nɔ̀ŋe ntɨ̀ ya e me chɨ̀Ꞌɨ̀ a Yesò Klistò la, aa me tseke ndɨ bòt àa me wùꞋtè ènɨ̧ Mbɔ̧ɔ̧mà la.

¹³Bɨ̀a mbɔŋ e li ntsìꞋi bòt Mbɔ̧ɔ̧mà mɨ̧̂ àfɨ̀Ꞌ yu bɨ li ndzəâ èngǎ̧ nkûŋ la. Èngǎ̧ mbɔŋ wu Ntu̧ Ntsɔ̧̀ yu è li ngɨ̀ bɨ pem la. Bɨ li ndzə mbɨ̧̀ɨ̧̀ne, Mbɔ̧ɔ̧mà zì àlȩê àzi ane yɨ̧. Àlȩê yaa wu Fo Kèfə yu tà li nkàꞋ bòt bi la.

¹⁴Fo tò yaa wu àghɨa mbì tà nɨŋ nyɨ̀Ꞌte nê baa li bɔ èghɨ bu ye kàꞋà wa la. Baa li bɔ èghɨ bàa ane àli yu Mbɔ̧ɔ̧mà nàa li ghɨ̌ bàa wu bà wu bòt tò la aa peme la. Èghɨ baa tà ghɨ̀ la aa ghɨ̌ bòt aa me wùꞋtè ènɨ̧ tò.

¹⁵Èghɨ baa ègème Mbɔ̧ɔ̧mà lɔ̀ɔ̀là wa adù̧ la e ghɨ̂ e me tseke àfɨ̀Ꞌ àgeme nkɔ̀ŋkà Mbɔ̧ɔ̧mà ane ànəa yɨ̧, ebùꞋù tê àfɨ̀Ꞌ yu e ndi ndzə nê bɨa ndzìà mèntɨ̧ɨ̧ mɨ̧ ane Yesò Lefɨ̀Ꞌ mè nèètà nkɔ̀ŋkà bòt Mbɔ̧ɔ̧mà la.

¹⁶Màa ngɨ̀ è me tsàꞋte a Mbɔ̧ɔ̧mà àfɨ̀Ꞌ àgème, e me làꞋa ànəa yɨ̧ abua tò,

¹⁷shua nê Mbɔ̧ɔ̧mà Yesò Klistò Lefɨ̀Ꞌ wa, Tǎt wa wu tà ghe la ŋa awɨ̧ Fo zi, mbɨ̀Ꞌɨ̀ bɨa bɔ èyì a mànkoa mènəè Mbɔ̧ɔ̧mà, e mě nèète ko wòt Mbɔ̧ɔ̧mà wu wùà la.

¹⁸Maà ntsàꞋtà nê Fo tò neeta ngàꞋte ètsə bɨ̧, mbɨ̀Ꞌɨ̀ bɨa ko èghɨ bu Mbɔ̧ɔ̧mà tɔ awɨ̧ nê bɨ̀ me bɔ bɨ̀ wua nchɨ̀Ꞌà bùà la, mè nko ndɨ̀ èghɨ bu Mbɔ̧ɔ̧mà nàa ŋa abua bòt bu bɔ zì mèntɨ̧ɨ̧ mɔb ane Yesò la e ghe la.

¹⁹Mè nè èlɨ mètàŋ kèkweelè Mbɔ̧ɔ̧mà mu nàa ntɨ̀ŋa wa wu ba zì mèntɨ̧ɨ̧ ma ane Yesò la. Mètàŋ maa Mbɔ̧ɔ̧mà nàa nɨa ntɨ̀ŋa wa la, wu wuê mètàŋ mbɔŋ tà li nɨŋ

²⁰njù̧ù̧me a Yesò Klistò àfɨꞋa tà li mpfə la, ngɨ̀ tà tseke àbâ àbualu̧ a zi a ègwet la.

²¹Yesò Klistò wu a ègwet və àtsə àghɨ àgème àa mbà̧aã èlaꞋ mè ntsìta mènəè la, nè yea a bɔ àtɔŋ nè mètàŋ a ègwet la, mè ntsè èlen ègème bɔ̀ɔ ndzəa àfɨ̀Ꞌ yaa, nè àfɨ̀Ꞌ yu nga ekɨꞋɨ la.

²²Mbɔ̧ɔ̧mà zi èghɨ ègème a èten èka Yesò Klistò. Tà wu a ègwet àghɨ àgème, wuê mbɨ̀Ꞌɨ̀ tà wu àtsəa bòt chɔsì la mɨ̧̂.

²³Chɔsì wu mbɨ̧̀ ènyit Yesò Klistò, ale ngɨ̀ Yesò kùꞋ mbɨ̀Ꞌɨ̀ tà ghɨ̌ èghɨ ègème e kùꞋ àdzìꞋ àgème la.