Read Mundani Efesɔ̀s 4 Bible Online

Efesɔ̀s 4 - Mundani bible

Efesɔ̀s 4

¹Ale, mmɔ̌ wu è ngu wɔ̀tèfȩ nkàà ànəa Yesò Klistò la, e ngua shù̧ù̧ta wɨ̧ nê, bɨ̀ me tseke a èlɨ̀ wu Mbɔ̧ɔ̧mà li me tɔ awɨ̧ ane bòt bi nê bɨ me tseke la.

²Bɨ̀ me nɨ awɨ̧ a si àfɨ̀Ꞌ àgème, njùa ane mènəè mɨ̧, nkùùla mèntɨ̧ɨ̧ mɨ̧, bɨ̀ ka mè yaŋa ntsòa ane wòt. Bɨ̀ me nkɔ̀ŋkà bɔnyɨ bɨ̧ nɨa wɔb mbɨ̀Ꞌɨ̀ bɔ̀ɔ la.

³Fo Mbɔ̧ɔ̧mà ghɨ̂ bɨ tsiꞋi ane ètsəê wemɔꞋ, è wu ale bɨ̀ la ndze nê bɨa ntsèka ane àlàŋkè yu a fete awɨ̧ ngɨ̀ bɨ tsiꞋi àghɨ yeamɔꞋ la.

⁴Mbɨ̧̀ ènyit nàà yemɔ̀Ꞌ, Fo Mbɔ̧ɔ̧mà mè ngu yemɔ̀Ꞌ, wuê mbɨꞋɨ̀ àghɨ yu Mbɔ̧ɔ̧mà tɔ awa ba me chɨ̀Ꞌà la àa yeamɔꞋ la.

⁵Lefɨ̀Ꞌ nàà wemɔ̀Ꞌ, alu̧ màndzia èntɨ̧ɨ̧ ane Yesò e wu wemɔꞋ, èlɨ màndzia a èdzî e wu wemɔꞋ.

⁶Mbɔ̧ɔ̧mà nàà wemɔ̀Ꞌ, Tǎt wa bàgème, tà wu àtsə wòt ègème, ngɨ̀à bòt bàgème e ghɨ̀à àghɨa tàa nkɨà la, tà mè me tseke ane bòt bàgème.

⁷Waa waa ane ya è bɔ azi ne àghɨ Yesò Klistò nàà nɨa ntsɔ̧̀ vi ŋǎ àyea wòt ègème mbɨ̀Ꞌɨ̀ tà ye nê a kùꞋù la.

⁸Eyaa wu àghɨa Àkata Mbɔ̧ɔ̧mà a shu la, nê, “Tà li me kɔꞋa ngà a ègwet Nɨ bòt nyaŋ tà baãaã la nɨŋ ngà nè bùà Mè ŋà mèghàb abua bòt.”

⁹Èngà̧ wàa nê, “Tà li nkɔꞋ nga a ègwet la,” è shua nê ghàà? E wua shua nê, tà li mbɨ̀ nchu nga a èbem sitsǎꞋ.

¹⁰Wòt wu tà li nchu a sitsǎꞋ la è bèle wu tòà tà li nkɔꞋ ngà tè ntsè ègwet la, mbɨ̀Ꞌɨ̀ ewu àdzìꞋ àgème.

¹¹Wu tòà tà li ŋà mèghàb abua bòt la. Tà li ngɨ̀ bòt ko ane bɔntu̧ Yesò, ngɨ̀ èbeko ane bèndàꞋàtɔŋ Mbɔ̧ɔ̧mà, ngɨ̀ èbeko ane bòt bɔ̀ɔ ntsɔ̀tà Ntu̧ Ntsɔ̧̀ Yesò la, ngɨ̀ èbeko ane bèmbaabà bòt Mbɔ̧ɔ̧mà, nè bènyɨꞋta èngǎ̧ Mbɔ̧ɔ̧mà.

¹²Tà li ngɨ̀ àyaa mbɨ̀Ꞌɨ̀ e ghɨ̌ bòt Mbɔ̧ɔ̧mà bàgème aa kùꞋu a màngɨa àfaꞋa bɔ bɔ ndɨ bɔ̀ɔ ghɨ̀ la, ngɨ̀à bòt bu bɔ̀ wu mbɨ̧̀ ènyit Yesò Klistò la e kweelà.

¹³Bɔɔ me ghɨ̀ ale, tè waa waa ane ya naa tsiꞋi bɨ̧ɨ̧ne àghɨ yeamɔꞋ, e zǐ mèntɨ̧ɨ̧ ma ane Yesò Klistò ane èlɨ̀ wemɔꞋ mè nè ndɨ baa neetè nko Waã Mbɔ̧ɔ̧mà la. Èghɨ ba ègème aa ghɨ̌ baa tsiꞋi mbɨ̀Ꞌɨ̀ bòt bɔ tsə tê nkùꞋ tè ntsìꞋi mbɨ̀Ꞌɨ̀ Yesò Klistò nàa la ane balu̧ bàgème.

¹⁴Ba tsiꞋi anè ko bà ka tsi ewu mbɨ̀Ꞌɨ̀ bɔtechɨɨle, bòt mèfà̧ àa nɨa kèghebte fɨ̀ta wɔb mpàà wɔb mbɨ̀Ꞌɨ̀ àfeme maꞋa àbâ abà, ngɨ̀à èbeko ane yɨ̧ e bɨ̧̀ɨ̧̀nà mènəè fɨ̀te la a.

¹⁵Baa tsiꞋi me nɨ èkɔŋ ndàꞋà mènəè nkûŋ, etsə ane balu̧ bàgème te tsiꞋi mbɨ̀Ꞌɨ̀ Yesò Klistò wu tà wu àtsə la.

¹⁶Wu tòà ka tàa ngɨ̀à èdziꞋi ènyit ègème e tsəꞋnà ntsìꞋa àghɨ yeamɔꞋ la, è mè ngu mbɔ̀ɔ̀la ègème a mbɨ̧̀ ènyit nàa fèta mbɨ̧̀ ènyit mbɔŋ nènkèm mbà̧aã la. Ale, àdziꞋa ènyit àgème a me ghɨ̀ àghɨa a bɔ ndɨ àa ghɨ̀ la, ko bòt aa me kɔ̀ŋkè bɔnyɨ bɔb, mbɨ̧̀ ènyit ègème naa me tsəa nkwèèla.

¹⁷Ale, e ngua səèŋkà ètû̧ bɨ̧ ane àtɔŋ yu Yesò Klistò ŋa abua am la shua nê, bɨ̀ ka tsi me ghɨ̀ mènəè mɨ̧ mbɨ̀Ꞌɨ̀ bòt bu kà ko a Mbɔ̧ɔ̧mà la. Mèmɨ̀ɨ̀te mɔb wu àku.

¹⁸ÀkwàꞋte àyɔb a kwene ndzěm. Bɔ bakà bɔ mèntsèke fi mu Mbɔ̧ɔ̧mà nàa ŋǎ abua bòt la, nkàà nê bɔɔ ngɨ̀à mèntɨ̧ɨ̧ mɔb kweelà, bɔ̀ ka ko àghɨ, bɔ̀ ka mê ngua nkɨ eyute ànəa Mbɔ̧ɔ̧mà shua la.

¹⁹Àghɨa ko a te ntsě àa mè ngɨ̀à bɔ bɔ àtsəa kɔꞋɔ la. Bɔɔ ngɨ̀à wuê èghɨ mbɨ̧te ènyit tɔb tèa nkɨà la, nè èwuu èbɨꞋte ènəê ègème, tè àghɨa ko à ka tsi nguê àa nkèla wɔb la.

²⁰Èwuu mèntsèke màà ntsě àghɨa bɔ li nyɨ̀Ꞌte awɨ̧ ane ànəa Yesò Klistò la.

²¹Mâ ko nê bɔ li shu awɨ̧ ànəa tò, mè nko nê ndɨ̀ wu bɨ̀ wu bòt tò la bɔ li nyɨ̀Ꞌte awɨ̧ nkûŋ yu adù̧ Yesò la.

²²Ale, bɨ̀ waꞋa mènəè nyǎꞋ mu bɨ̀ le yaã ngua ntsèka ngɨ̀à la. Wu mèntsèke nyǎꞋ màa bɨ li ngua ntsèka la ka è li ngua ntsòkà wɨ̧, fɨ̀ta wɨ̧ bɨ ghɨ̀à mènəè kà kùꞋ la.

²³Mèntɨ̧ɨ̧ mɨ̧ nè mènkwàꞋte mɨ̧ è bɔ ndɨ nàa tsiꞋi me fi la.

²⁴Bɨ̀ bɔ mè ntsìꞋi bòt fi Mbɔ̧ɔ̧mà ghɨ̀ àwɔb nê bɔ̀ wu mbɨꞋɨ̀ zia, me kùŋè alu̧ nkûŋ, è wû ndɨŋndɨ̀ŋ nè màmbɔ mèntɨ̧ɨ̧ kèfə la.

²⁵Bà ka tsi ndàꞋà mèfà̧. Waa waa me làꞋa nkûŋ abua wanyɨ vi, nkàà nê, bàagème etsiꞋi bòt mbɨ̧̀ ènyit yemɔ̀Ꞌ ane Yesò.

²⁶À me tsoo ane wanyɨ wè, à ka mbɨ̧̀ɨ̧̀ne ntsǒ mbɔŋ ŋwèèlè awê à ghɨa kàbɔ̀ŋ. A ka ngɨ̀ ndzěm kwen ane ntsǒ a èntɨ̧ɨ̧ wê. À ka ŋà èlu̧ abua Satàn.

²⁷À ka ŋà èlu̧ abua Satàn tà ghɨ̀ à ghɨa kàbɔ̀ŋ.

²⁸Wòt tàa ntsɔa la ka te ntsɔŋ, ka tà me nɨ èbu bi fàꞋà àfaꞋa àa tɨŋe atò, taa mèe ko etɨŋe bòt bu bɔ̀ɔ nkɨ̀ŋkà la.

²⁹Wòt ka me làꞋa èbɨꞋte mèngǎ̧, wòt me làꞋà wuê mèngǎ̧ nàa me tɨŋe bòt ane mènəè ndzea wɔb la. Eyaa wu ndɨ bɨ̀a ghɨa ntsɔ̧̀ ane bòt bu bɨ laꞋa abua yɔb la.

³⁰Bɨ̀ ka ngɨ̀ àghɨa àa me saa Fo Kèfə Mbɔ̧ɔ̧mà la. Fo ya wu àlȩê yu Mbɔ̧ɔ̧mà li ndzi ane yɨ̧ nê bɨ wu bòt bi la. Fo mbɔŋ wua nyɨ̀Ꞌta nê àli yu aa li nkɨ̀Ꞌɨ̂ Mbɔ̧ɔ̧mà ghɨ̀ bɨ pem.

³¹Bɨ̀ ka mbèà bòt a mèntɨ̧ɨ̧ mɨ̧, bɨ̀ ka me bɔ èntɨ̧ɨ̧ nendu̧ nè ntsootsə, bɨ̀ ka ntsi me ŋȩte bòt, bɨ̀ ka ntsi me làꞋa kàbɔ̀ŋ ane bòt, bɨ̀ waꞋa mèmɨ̀ɨ̀te kàbɔ̀ŋ ègème.

³²Ka bɨ̀ me ghɨa ntsɔ̧̀ ane bɔnyɨ bɨ̧, njùa ane mènəè mɨ̧ mè ngwaꞋà bèkàbɔ̀ŋ bɔnyɨ bɨ̧ wuê mbɨ̀Ꞌɨ̀ Yesò Klistò ghɨ̂ Mbɔ̧ɔ̧mà me waꞋa bɨ̧ la.