Read Mundani Efesɔ̀s 5 Bible Online

Efesɔ̀s 5 - Mundani bible

Efesɔ̀s 5

¹Ndɨ̀ wu bɨ̀ wu bɔ̧ Mbɔ̧ɔ̧mà tàa ndâ nkɔ̀ŋkà àwɨ̧ la, bɨ̀ nyɔꞋta ngu mbɨ̀Ꞌɨ̀ tàa la.

²Bɨ̀ me ghɨ̀ mènəè mɨ̧ nè èkɔŋ wuê mbɨ̀Ꞌɨ̀ Yesò Klistò li nkɔ̀ŋkà wa mpfə ambo ya la. Tà li ŋà àtsəa zi ambo ya, ale a wu mbɨ̀Ꞌɨ̀ àghɨ bɔ [3] tô̧ ŋǎ abua Mbɔ̧ɔ̧mà a me nəꞋə àghaa ntsɔ̧̀ nkɔ̀Ꞌɔ nga a ègwet mbɔ̀ a Mbɔ̧ɔ̧mà la.

³Bɨ wu bòt Mbɔ̧ɔ̧mà, è wu ale bɨ̀ ka mbê nkèm ànəa mànkuŋa bèzi kò mbâ̧tsə leꞋ a kètsìà wɨ̧, bɔ̀ ka mè ndàꞋà ànəa kàbɔ̀ŋ kò aghàbà leꞋ a kètsìà la.

⁴Bɨ̀ ka me làꞋà mèngǎ̧ àtsəa kɔꞋɔ, nè mèngǎ̧ àkèghɨ̧̀, nè èbɨꞋte mèngǎ̧. Eyaa wu mèngǎ̧ kà kùꞋ. Ka bɨ̀ me kɔ̀ŋka Mbɔ̧ɔ̧mà ane àghɨa tà ghɨ ane yɨ̧ la.

⁵Bɨ̀ ko ayaa nê wòt me kùŋè bèzi kò mbâ̧tsə leꞋ, ngɨ̀à èbɨꞋte èghɨ, kò ngu wòt aghàbà leꞋ, (na àyaa à wua nyɨ̀Ꞌta nê wòt nɨ èghɨ mbɔŋ ane mbɔ̧ɔ̧mà vi la) ko tà ka bɔ àdziꞋ a èbem kèfɔ̧̀ wu Yesò Klistò bɔ̂ Mbɔ̧ɔ̧mà àa bà̧aã la.

⁶Bɨ̀ ka mbɨ̧̀ɨ̧̀ne wòt fɨ̀te awɨ̧ ngɨ̀ bɨ bɨ̧ɨ̧ne mèngǎ̧ èkèghɨ̧̀. Ntsǒ Mbɔ̧ɔ̧mà nàà ènkɨ̀Ꞌa enɔ̀ŋke àtsəa bòt bu bɔ̀ɔ ngɨ̀à èghɨ bàa ntu̧ me zə atò la.

⁷È wu ale, bɨ̀ ka fɔ̀te àka nè èwuu bòt baa.

⁸Bɨ̀a mbɔŋ bɨ li ngu mbɨ̀Ꞌɨ̀ ndzěm, ka àfɨ̀Ꞌ yaa bɨ̀ tsiꞋi bòt Tè Yesò la, bɨ tsiꞋi mbɨ̀Ꞌɨ̀ èkaꞋà. Ale, bɨ̀ me tseke mbɨ̀Ꞌɨ̀ bòt bɔ̀ wu a èbem èkaꞋà la.

⁹Wu èkaꞋà waa ka àa ngɨ̀à bòt e ghɨ̀à àghɨ àgème è wù àyea ntsɔ̧̀ la, nè àyea a kùꞋù la, nè àyea è wû nkûŋ la.

¹⁰Bɨ̀ nyɔꞋta nko àghɨa Mbɔ̧ɔ̧mà nàa nkɔ̀ŋkà la, me ghɨ̌ yùà.

¹¹Bɨ̀ ka ntèm àka nè bòt me ghɨ̌ èghɨ ndzěm bu kà wua ntɨ̀ŋa wòt, bòt àa ngɨ̀à la, ka bɨ̀ ghɨa bòt è ko nê èghɨ mbɔŋ aa mbɨ̀a.

¹²Wu kwàꞋ ànəa àtsəa kɔꞋɔ a màndaꞋa ànəa èghɨ bu bòt àa ndò̧ò̧tà ngɨ̀à la.

¹³Àghɨ àa ngɨ̀ à wu a èbem èkaꞋà ka bɔ lâ nko ndɨ àghɨa ngaa àa la,

¹⁴nkàà nê, àghɨ àa ngɨ̀ à wu a èbem èkaꞋà àghɨa mbɔŋ a tsiꞋi mbɨ̀Ꞌɨ̀ èkaꞋà mɨ̧̂. Eyaa wu lə bɔ̀ɔ shua nê, “Àwɔ̀ wu ndia la, lɔ̀Ꞌɔ a si a èbem èvə! Ko Yesò Klistò naa ghɨ̌ èkaꞋà aa beꞋe a ègwet lè.”

¹⁵Ale, bɨ̀ me ko awɨ̧ ane ndɨ bɨ̀a ngɨ̀à mènəè mɨ̧ la. Bɨ̀ ka me ghɨ̀ mènəè mɨ̧ mbɨ̀Ꞌɨ̀ bòt kà bɔ èyì, bɨ̀ me ghɨ̀ mbɨ̀Ꞌɨ̀ bòt bɔ bɔ èyì la.

¹⁶Bɨ̀ me ghɨ a ntsɔ̧̀ àfɨ̀Ꞌ àgème èlu̧ e dzə a si la, nkàà nê kàbɔ̀ŋ ghe àbȩ àfɨ̀Ꞌ yaa.

¹⁷È wu ale, bɨ̀ ka me ghɨ̀ mènəè mbɨ̀Ꞌɨ̀ èkèghɨ̧̀, ka bɨ̀ nyɔꞋta nko àghɨa Tè Yesò nàa nkɨà nê bɨ̀ me ghɨ̀ la.

¹⁸Bɨ̀ ka tsi mbè mèlùꞋ, è wù àghɨa àa ngɨ̀à bɨ ghɨ̀à mènəè mbɨ̀Ꞌɨ̀ èkèghɨ̧̀ la, ka bɨ̀ tsiꞋ Fo Mbɔ̧ɔ̧mà lu̧u̧ a mèntɨ̧ɨ̧ mɨ̧.

¹⁹Bɨa me làꞋa abua bɔnyɨ bɨ̧, bɨ me kɔ̧ɔ̧ mètsəkû̧ è dzə a èbem Àkata Mbɔ̧ɔ̧mà la, nkɔ̧̂ mètsəkû̧ Yesò, mè nkɔ̧̂ mètsəkû̧ Fo Mbɔ̧ɔ̧mà zi a mèntɨ̧ɨ̧ mɨ̧ la. Bɨa me kɔ̧ɔ̧ bɨ me kɔ̧ɔ̧ ne èntɨ̧ɨ̧ wɨ̧ ègème, ŋǎ mèngùꞋte abua Yesò Klistò.

²⁰Bɨ̀ me kɔ̀ŋka Tǎt wa Mbɔ̧ɔ̧mà àfɨ̀Ꞌ àgème ane àghɨ àgème a ghɨ̀ la ane èlen Yesò Klistò Lefɨ̀Ꞌ wa.

²¹Bɨ̀ me zə bɔnyɨ bɨ̧ nkàà nê bɨa nkùkta Yesò Klistò.

²²Bèzi, bɨ̀ me zə bèlu̧ bɨ̧ mbɨ̀Ꞌɨ̀ bɨ zə a Lefɨ̀Ꞌ.

²³Ngu nê, mbâ̧ wu àtsəa àvi wuê mbɨ̀Ꞌɨ̀ Yesò Klistò wu àtsəa chɔsì la. Yesò zìambɔŋ wu Mpemnà chɔsì, è wu mbɨꞋɨ̀ mbɨ̧̀ ènyit tò la.

²⁴Ale, bèzi è me zə bèlu̧ bɔb ane balu̧ bàgème wuê mbɨ̀Ꞌɨ̀ chɔsì nàa ndzəa Yesò Klistò la.

²⁵Bèlu̧, bɨ̀ me kɔ̀ŋkè bèzi bɨ̧ wuê mbɨ̀Ꞌɨ̀ Yesò Klistò li nkɔ̀ŋkè chɔsì tè mpfə ambo wùà la.

²⁶Tà li mpfə mbɨ̀Ꞌɨ̀ e zi a chɔsì a tèkitebu Mbɔ̧ɔ̧mà ane èngǎ̧ vi àfɨꞋa tà shùu a chɔsì ane mèleb è fə la.

²⁷Tà li ngɨ̀ anè mbɨ̀Ꞌɨ̀ enɨ a chɔsì waa ane ndzà zi è ghe nàa mbɔ̀ la, kà ye a kàbɔ̀ŋ adù̧, àghɨ à ka wuê betsiꞋa bɔ fèèle atò adù̧ la. Bɔɔ mbɨ̀Ꞌɨ̀ wòt kà ye àlɔꞋ ane zi, kà ye ka wuê adziꞋi kàbɔ̀ŋ ane zi nè àghɨa ko tsa betsiꞋa a tsòkè wòt la.

²⁸Eyaa wu ndɨ bèlu̧ be bɔ ndɨ bɔ̀ɔ me kɔ̀ŋkè bèzi bɔb mbɨ̀Ꞌɨ̀ bɔ̀ɔ nkɔ̀ŋkà mbɨ̧te ènyit tɔb la. Wòt tàa nkɔ̀ŋkà vi vi la nàà nkɔ̀ŋkà àvi zìambɔŋ.

²⁹Wòt nàà kà paabe mbɨ̧̀ zi zìambɔŋ, ka tàa ngɨ̀ tà me jɨa mè nàŋa yùà, mbɨ̀Ꞌɨ̀ Yesò Klistò nàa ngɨa ane chɔsì la.

³⁰Ba wu èdziꞋi ènyit tò.

³¹“Eyaa wu lə bɔ shɨŋ nê, mbâ̧ bɔ ndɨ tàa sǎ tǎt vi bɔ̂ nyɨ̌ vi eghǎ tsəꞋne ane vi vi, bɔ̂ tò aa tsiꞋi àghɨ yeamɔꞋ la.”

³²Bɔ ghaꞋa taꞋà nkûŋ shu a èbem èngà̧ waa, mâ ko nê e wua ndàꞋà ànəa Yesò Klistò bɔ̂ chɔsì.

³³Ka a wua ndaꞋa abua yɨ̧ mɨ̧̂, nê waa waa ane yɨ̧ bɔ ndɨ tàa me kɔ̀ŋkè vi vi mbɨ̀Ꞌɨ̀ tàa nkɔ̀ŋkà àvi zìambɔŋ la, bèzi mɨ̧̂ è ye nê bɔɔ ndzəa bèlu̧ bɔb.