Read Mundani Efesɔ̀s 6 Bible Online

Efesɔ̀s 6 - Mundani bible

Efesɔ̀s 6

¹Bɔ̧, ndɨ̀ wu bɨ̀ wu bòt Tè Yesò la, bɨ̀ me zə bètǎt bɨ̧ bɔ̂ bènyɨ̌ bɨ̧, nkàà nê wu àghɨa bɨ bɔ ndɨ bɨ̀a me ghɨ̀ la.

²Mbɨ̧ mbì è bɔ mènkàꞋa adù̧ la wu nê, “Bɨ̀ me zə bètǎt bɨ̧ nè bènyɨ̌ bɨ̧.”

³MènkàꞋa mbɔŋ wu nê “Aa bɔ̌ àbâ yê, aa mě tseke a sitsǎꞋ ane àfɨ̀Ꞌ à seè.”

⁴Bètǎt, bɨ̀ ka me ghɨ̀ àghɨa bɔ̧ bɨ̧ àa me tsoo la, mbɔ̂ bɨ̀ me baãaã awɔb ntsɔ̧̀ mè shua wɔb àghɨa Tè Yesò è laꞋa nê bòt è me ghɨ̀ la.

⁵ÈbùꞋ, bɨ̀ me zə bòt bu bɔ bɔ awɨ̧ a sitsǎꞋ ŋàa la nè kèbɔɔ, mèntɨ̧ɨ̧ mɨ̧ mèe me bente. Bɨ̀ me ghɨ̀ ne èntɨ̧ɨ̧ kèfə mbɨ̀Ꞌɨ̀ bɨ wua ngɨa abua Yesò Klistò.

⁶Bɨ̀ ka me fàꞋa abua yɔb wuê àfɨꞋa bɔ̀ɔ ndzea wɨ̧ la, nɨa nkɨà nê bɔ̀ me kɔ̀ŋkè àwɨ̧. Bɨ̀ me fàꞋà abua yɔb mbɨ̀Ꞌɨ̀ bɔfàꞋ Yesò Klistò, ngɨ̀à àghɨa Mbɔ̧ɔ̧mà nàa nkɨà la nè èntɨ̧ɨ̧ wɨ̧ wemɔꞋ.

⁷Bɨa me fàꞋà abua yɔb mbɨ̀Ꞌɨ̀ èbùꞋ bɨ tsiꞋ mèntɨ̧ɨ̧ mɨ̧ me bɔ̌ mbɨ̀Ꞌɨ̀ bɨ wua faꞋa abua Lefɨ̀Ꞌ kà wu abua bɔbȩ.

⁸Kò wòt wu àbùꞋ kò tà ntse àbùꞋ leꞋ, ko bɨa me ghɨ̌ bɨ ko nê Tè Yesò naa li eŋa àbȩ̀ a waa waa wuê mbɨ̀Ꞌɨ̀ àfaꞋa ntsɔ̧̀ atò a nyɨꞋte la.

⁹Bɨ̀a wu bɨ bɔ èbùꞋ la, bɨ̀ me baãaã wɔb ntsɔ̧̀ mɨ̧̂, bɨ̀ ka me kàà wɔb, nko nê tǎt wu tà bɔ awɨ̧ bàgème la wu a ègwet. Tàà saꞋa bòt kà lȩ mèsi.

¹⁰Enɨ lìa, bɨ̀ me kweele ndɨ̀ wu bɨ̀ tsiꞋi àghɨ yeamɔꞋ nè Tè Yesò la, mè tsiꞋ tà ŋa awɨ̧ mètàŋ kèkweelè mi.

¹¹Bɨ̀ wèè àwɨ̧ nè èghɨ èbet bu ègème Mbɔ̧ɔ̧mà nàa ŋǎ la, mbɨ̀Ꞌɨ̀ me ko nùà nkèla àghɨa Satàn nàa nkɨ e ghɨ̀ ne nɨ̧̀ la.

¹²Baa ntsea nùà bɔbȩ. Ba wua nùà fote kàbɔ̀ŋ tu tèa mbà̧aã èlaꞋ, mè ntsìta mènəè la, nè bènàmbəa bu a ngɔ̀ŋ ŋaa bòt àa ngùꞋtà la, ndɔ̀Ꞌ nè fo tu a ègwet tèa ngɨa kàbɔ̀ŋ la.

¹³Bɨ̀ ŋeꞋe èghɨ èbet Mbɔ̧ɔ̧mà àfɨ̀Ꞌ yaa, mbɨ̀Ꞌɨ̀ è wu ane àlia kàbɔ̀ŋ kɨꞋɨ la, bɨ koê nù wùà tè è me lìa bɨ bela nkwèèla wuê kweele.

¹⁴Ale, bɨ̀ tɨ̧ɨ̧ ntsɔ̧̀, ngɨ̀ mènəè nkûŋ mɨ̧̂ wuê mbɨ̀Ꞌɨ̀ àleb bɨ kuule a èloŋ lɨ̧ la, mè nɨ̀ mènəè è kùꞋù la mbɨ̀Ꞌɨ̀ àbǎ àtɨ̧ɨ̧na a kaba ghàmnà wɨ̧ la.

¹⁵Bɨ̀ mèe ntàŋke awɨ̧ a màntsɔta Ntu̧ Ntsɔ̧̀ àlàŋkà èntɨ̧ɨ̧ yu Mbɔ̧ɔ̧mà nàa ŋǎ la. Naa wu mbɨ̀Ꞌɨ̀ gùbtsə bɨ kwaãaã la.

¹⁶Bɨ̀ me zì mèntɨ̧ɨ̧ mɨ̧ ane Yesò Klistò àfɨ̀Ꞌ àgème, è wu mbɨ̀Ꞌɨ̀ àbǎ àghɨ yu bèshujà àa ngɨ̀ bɔ bea a èbu bɔb me nɨa ndòꞋa àti a èwet la. Àghɨ yaa aa tɨŋa wɨ̧ e ghɨ̌ bɨa me koa nkèla tèghɔŋke Satàn tu nè èwet adù̧ la.

¹⁷Mèmpème mu Mbɔ̧ɔ̧mà ŋa abua yɨ̧ la bɔ ndɨ nàa wu mbɨ̀Ꞌɨ̀ ntà̧ èbet yu bèshujà àa nɨa nkàbta ètsə bɔb la. Bɨ̀ mèe nɨ èngǎ̧ Mbɔ̧ɔ̧mà wu Fo tò nàa ŋǎ la è wu mbɨꞋɨ̀ nyi èbet abua yɨ̧.

¹⁸Bɨ̀ me tsàꞋte a Mbɔ̧ɔ̧mà mbɨ̀Ꞌɨ̀ Fo tò nàà ŋwèta àwɨ̧ la, ndò̧a ètɨŋe abua tò. Bɨ̀ me tsàꞋta Mbɔ̧ɔ̧mà ane èghɨ ègème bɨ baãaã me ghɨ̀ la. Bɨ̀ ka ngwàꞋà ndo̧o̧na bɨ̀ ka nkaã. Bɨ̀ me tsaꞋta Mbɔ̧ɔ̧mà àfɨ̀Ꞌ àgème ane bòt tò bàgème.

¹⁹Bɨ̀ me tsàꞋta Mbɔ̧ɔ̧mà ane yaã mɨ̧̂, nê àfɨ̀Ꞌ àgème màa ndàꞋà la Mbɔ̧ɔ̧mà me shu am àghɨa màa me làꞋà la, mbɨ̀Ꞌɨ̀ maa làꞋà kà ye kèbɔɔ e ghɨ̌ bòt aa ko ànəê ndò̧ yu ane Ntu̧ Ntsɔ̧̀ Yesò Klistò la.

²⁰Mâ tɨ̧ɨ̧ ane èlen Yesò, mbɔ̂ ngu a tèfȩ nkàà ànəa Ntu̧ Ntsɔ̧̀ yaa. Bɨ̀ tsàꞋta Mbɔ̧ɔ̧mà nê tà tsì kèbɔɔ ane yaã mbɨ̀Ꞌɨ̀ maa tsɔ̀te Ntu̧ Ntsɔ̧̀ yaa ane ndɨ mâ bɔ ndɨ màa tsɔ̀tè la.

²¹Tȩ̀kɨkùs, wanyɨ wa wu ba taꞋa wua nkɔ̀ŋkà tò, tà mè ngu ngule wɔ̀fàꞋ Tè Yesò Klistò la naa shu awɨ̧ ànəê am àgème, mbɨ̀Ꞌɨ̀ bɨa ko ndɨ màa la e mě ko àghɨ màa ngɨ̀à la.

²²Eyaa wu lə è ngua ntsaa tò abua yɨ̧ la, mbɨ̀Ꞌɨ̀ taa ghɨ̌ bɨa ko ndɨ bàa la, e ghɨ̌ àyea mbɔŋ aa zì mèntɨ̧ɨ̧ mɨ̧.

²³Maà ntsàꞋtà nê, Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ è ghɨa bɔnyɨ ba è me tseke ane àlàŋkè, nkɔ̀ŋkà wɔb bɔ̀ɔ mbɔŋ, mè ndzìà mèntɨ̧ɨ̧ mɔb ane Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ.

²⁴Maà ntsàꞋtà nê, Tǎt wa Mbɔ̧ɔ̧mà nyɨꞋte a ntsɔ̧̀ vi ane bòt bàgème bɔ̀ɔ nkɔ̀ŋkà Yesò Klistò Lefɨ̀Ꞌ wa nè èkɔŋ kà wu lìa la.