Read Mundani Filìpȩ 1 Bible Online

Filìpȩ 1 - Mundani bible

Filìpȩ 1

¹Letà Pɔ̂l bɔ̂ Tɔ̀màtià bɔfàꞋ Yesò Klistò, Abua bòt Mbɔ̧ɔ̧mà bu bàgème a Filìpȩ bɔ̂ Yesò Klistò ba è tsiꞋi àghɨ yeamɔꞋ la. Ba shɨa fɔ̀ɔ̀le abua bɔɔjuŋ nè bèdikɨ̀n bu ayɔɔ yɨ̧ la.

²Baa shù̧ù̧ta Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ nê bɔ̀ me nyɨꞋte a ntsɔ̧̀ wɔb abua yɨ̧ mè ngɨ̀ bɨ̀ bɔ àlàŋkè.

³Màa ngɨ̀ è mɨ̀ɨ̀tè àwɨ̧ àfɨ̀Ꞌ àgème, e ntaꞋa kɔ̀ŋke a Mbɔ̧ɔ̧mà am.

⁴Màa ngɨ̀ è me tsàꞋte a Mbɔ̧ɔ̧mà àtsəa yɨ̧ bɨ̀agème, èntɨ̧ɨ̧ am e lu̧u̧ ne kèŋwaŋ,

⁵nkàà nê bɨ li ndzaŋe wua ntɨ̀ŋa am a màntsɔta Ntu̧ Ntsɔ̧̀ Yesò Klistò, e bùꞋu àfɨꞋa bɨ li mbɨ̧̀ɨ̧̀ne èngǎ̧ tò la, ekɨꞋɨ edzəè laane waa.

⁶Mâ lâ nkoê nkûŋ nkûŋ nê, Mbɔ̧ɔ̧mà wu tà li mbùꞋ àfàꞋa ntsɔ̧̀ àzi a èbem mèntɨ̧ɨ̧ mɨ̧ la, naa me ghɨa nɨa ngà nè mbì te tsiꞋi epaate ane àli yu Yesò Klistò nàa li mě ekɨꞋɨ la.

⁷Mâ bɔ̂ ndɨ màa me tseka mɨ̀ɨ̀tà àwɨ̧ wuê anè la, nkàà nê bɨ wu èntɨ̧ɨ̧ am. Aa ale, nkàà nê ba nɨ̧̀ ba e ye a ntsɔ̧̀ wu Mbɔ̧ɔ̧mà è ghɨ abua ya la. Ba ye a ntsɔ̧̀ mbɔŋ àfɨ̀Ꞌ yaa è ngu a tèfȩ la, fɔ̀ɔ̀le ne àfɨ̀Ꞌ yu e ndi ngua ngèèba ntsɔ̀tà Ntu̧ Ntsɔ̧̀ Yesò Klistò nyɨ̀Ꞌta ndɨ è wû nkûŋ la.

⁸Mbɔ̧ɔ̧mà è ko nkûŋ nkûŋ nê, maa ndâ nkɔ̀ŋkà àwɨ̧ nè èkɔŋ wu e dzəa abua Yesò Klistò zìa mbɔŋ la.

⁹Maà ntsàꞋtà Mbɔ̧ɔ̧mà àtsəa yɨ̧ nê, èkɔŋ wɨ̧ è me tsəa ngà wuê nè mbì, a màmbɔ èyì, e mě lâ eko ndɨ bɨ̀a me ghɨ̌ àghɨ àgème la.

¹⁰A wu ale, ko bɨa me ntsèka nkoa àghɨa è wù àyea ntsɔ̧̀ la. Ko bɨa tsiꞋi bòt mèntɨ̧ɨ̧ kèfə, kà wòt wuê ko eshu nê bɨ ghɨa kàbɔ̀ŋ te eghǎ edzə ane àli yu Yesò Klistò nàa li e mě ekɨꞋɨ la.

¹¹A wu anè, ko bɨa tsiꞋa ngɨ̀à wuê mènəè Mbɔ̧ɔ̧mà nàa nkɨà la, ye mu Yesò Klistò nàa ŋǎ bòt bi mètàŋ bɔ ghɨ̀à la. Bɨ me ghɨ̌ ko bòt aa lɔ̀kè èlen Mbɔ̧ɔ̧mà etsàa ègwet e mě ewùꞋte atò.

¹²Bɔnyɨ bɔ̧, maa nkɨ̀a bɨa ko nê, mènəè maa ndze am la è paà ntsiꞋi ghaꞋa èlu̧ bòt e me zə Ntu̧ Ntsɔ̧̀ Yesò Klistò nɨa ngà nè mbì.

¹³Àghɨa a ghɨ̀ la wu nê, mbɨ̀Ꞌɨ̀ è ngu a tèfȩ a èbem ntɔꞋ anè la, a ghɨ̂ bèshujà bu mbààba ntɔꞋ mbɔŋ la, nè wòt ègème a si ŋàa e ko nê bɔ kȩ̀ am nkàà ànəa Yesò Klistò.

¹⁴Ànəa ko yeamɔꞋ wu nê, tèfȩ tàa è ngu a èbèm la, te ghɨ̂ bɔnyɨ ba nyaŋ e paà nkweele ane ànəa Lefɨ̀Ꞌ, tè ntsìꞋa ndàꞋà èngǎ̧ tò kà bɔ̀ɔ̂.

¹⁵Wu nkûŋ nê, bòt ko ane yɔb aà ntsɔ̀tà Ntu̧ Ntsɔ̧̀ Yesò Klistò nè ghòꞋnà nùà nkɨ enɨ àdziꞋa am ka bòt ko e bɔ̂ nguê bɔ̀ɔ ntsɔ̀tà ntu̧ yu nè èntɨ̧ɨ̧ kèfə,

¹⁶nkàà nê bɔ̀ɔ nkɔ̀ŋkà am la. Bɔ ko nê wu Mbɔ̧ɔ̧mà ka tà tsàà am a si ŋàa nê è nyɨꞋte ndɨ Ntu̧ Ntsɔ̧̀ yu wu nkûŋ la.

¹⁷Bòt ghòꞋnà bu è ka laꞋà èngǎ̧ Yesò Klistò nè èntɨ̧ɨ̧ kèfə. Bɔɔ mɨ̀ɨ̀tà nê betsiꞋa bɔ kwèꞋne ngoꞋ adù̧ yaã mbɨ̀Ꞌɨ̀ è ngu a tèfȩ anè la.

¹⁸ÈsaꞋa e ntsě. Kò mèmɨ̀ɨ̀te mɔb wu me ntsɔ̧̀ kò me kàbɔ̀ŋ leꞋ, ko ndɨ̀ wu bɔ̀ wua ndàꞋà wuê mènəè Yesò Klistò ane balu̧ bàgème la, ànəa ngaa aà mbɔ̀ am. Ane nkûŋ, maa me wùꞋtè am ngà wuê nè mbì,

¹⁹nkàà nê mâ ko nê, maa peme ngoꞋ ndɨ̀ wu bɨ̀a ntsàꞋtà Mbɔ̧ɔ̧mà àtsəa am, Fo Yesò Klistò mè me ŋa etɨŋe la.

²⁰Maa nchɨ̀ɨ̀mâ nkɨ̀a, mè mbɔ ntɨ̀ nê, è nka bê lɔ̀Ꞌɔ ebɔ àtsəa kɔꞋɔ ane ànəa Yesò a. Ka maa lɔ̀kè èlen Yesò Klistò etsaa ègwet àfɨ̀Ꞌ yaa mbɨ̀Ꞌɨ̀ màa ndzìà ngɨ̀à la, kà bɔ̀a. E màà ngu bele wuê a sitsǎꞋ ŋàa, kò mpfə leꞋ, ko maa me lɔ̀kè wuê èlen tò.

²¹Ale, abua am, e ntsekè a sitsǎꞋ ŋàa ko àtsəa ànəê am wu màngua àghɨ yeamɔꞋ nè Yesò Klistò, mbə è mpfə a bɔ̀ŋ tè ntsè.

²²Ka è wu nê, e ntsèke a sitsǎꞋ ŋàa ko maa ghɨ àfaꞋa betsiꞋa a tɨŋe bòt la, ko e mbakà tsi nko àbâ màa ghà la.

²³A baãaã am ebà bebe. Maa nchɨ̀ɨ̀ma nkɨ esǎ ngɔ̀ŋ yaa eghǎ kwene ane Yesò Klistò è wû kwàꞋ ànəa ntsɔ̧̀ la.

²⁴Ka, aà mbɔ̀ nyaŋ nê e mě tseke a sitsǎꞋ ŋàa nkàà awɨ̧.

²⁵Mâ ko nê, àyaa wu nkûŋ, è wu ale, e ngu tseke a sitsǎꞋ ba nɨ̧̀ ba mbɨ̀Ꞌɨ̀ etɨŋe awɨ̧ bɨa me zì mèntɨ̧ɨ̧ mɨ̧ ane Yesò Klistò ngà wuê nè mbì, e mě bɔ mèngùꞋte.

²⁶Naa li ngu ane àlia mâ kɨꞋɨ̀ ba mè ndzè awa la, bɨ taꞋa wùꞋte a Yesò Klistò nkàà am.

²⁷Ànəa nɨ̧ àfɨ̀Ꞌ yaa wu nê, bɨ̀ me ghɨ̀ mènəè mɨ̧ ègème wuê mbɨ̀Ꞌɨ̀ Ntu̧ Ntsɔ̧̀ Yesò Klistò nàa nkɨà la. Bɨ̀ ghɨ̀ ale, mbɨ̀Ꞌɨ̀ è nkɨꞋɨ e ndze awɨ̧, kò è mbaka nkɨ̀Ꞌɨ̂ leꞋ, e ndzə ndɨ bɨ̀a nèètà mbǎ̧ èngǎ̧ Yesò Klistò nè èntɨ̧ɨ̧ wɨ̧ wemɔꞋ la. Mè ndzəâ ndɨ bɨ̀a fàꞋà nè ètsəê wemɔꞋ mbɨ̀Ꞌɨ̀ bɨ fɔtà nùà nê Ntu̧ Ntsɔ̧̀ Yesò Klistò me ghà nê mbì la.

²⁸Ko mbɨ̀Ꞌɨ̀ bɨ bê mbɔ̀ɔ bɔmbù̧ bɨ̧. Bɨ bakà bɔɔ̀, ko àyaa aa nyɨꞋte awɔb nê, bɔɔ leme, ka bɨ bɔ̂ ngu epeme, nkàà nê wu Mbɔ̧ɔ̧mà ka tàa ŋǎ mèmpème mbɔŋ abua yɨ̧ la.

²⁹Aa ale nkàà nê, Mbɔ̧ɔ̧mà è ŋa awɨ̧ èlu̧ a màfaꞋa abua Yesò Klistò nê bɨ̀ ka me zì wuê ndàꞋ mèntɨ̧ɨ̧ mɨ̧ ane tò, tà ŋǎ nê bɨ̀ me ye ngoꞋ ambo ànəa tò mɨ̧̂.

³⁰Tà ŋǎ èlu̧ wàa mɨ̧̂ nê, bɨ̀ zì àbu ba nɨ̧̀ ba è nù èbet waa àfɨ̀Ꞌ yaa. Eyaa bele wuê èbet wu bɨ li ndzè am nùà la, mbɨ̀Ꞌɨ̀ bɨ ko nê è bèle wùà è ngua nua àfɨ̀Ꞌ yaa la.