Read Mundani Filìpȩ 2 Bible Online

Filìpȩ 2 - Mundani bible

Filìpȩ 2

¹Mâ ko nê ndɨ̀ wu bɨ Yesò Klistò ba è tsiꞋi àghɨ yeamɔꞋ la, tàà ndɔ̀ktà mèntɨ̧ɨ̧ mɨ̧, mèntɨ̧ɨ̧ mɨ̧ mè me fi nkàà nê tàà nkɔ̀ŋkà àwɨ̧. Mâ ko mɨ̧̂ nê bɨ Fo Mbɔ̧ɔ̧mà ba e tsiꞋi àghɨ yeamɔꞋ, bɨ mè me kɔ̀ŋkè bɔnyɨ bɨ̧ ndɔ̀Ꞌ nkua tèsȩte waa waa.

²Ale, bɨ ghɨa èntɨ̧ɨ̧ am è paa me bɔ̌ a màngɨa mènəè mɨ̧ nè èntɨ̧ɨ̧ wemɔꞋ, nè mànkɔŋka waa waa ndɨŋndɨ̀ŋ, mè nè màndaŋka mènəè nè ètsəê wemɔꞋ.

³Wòt ka me ghɨ̌ àghɨ nkɨà nê bɔ̀ me ye wuê avi kò shua nè ye ghe leꞋ. Ka waa waa nɨ avi a si a mbì bɔnyɨ bi, mè me nɨ awɔb mbɨ̀Ꞌɨ̀ bòt bɔ tsè àvi la.

⁴Wòt ka me ghɨ̀ wuê àghɨa betsiꞋa a tɨŋe avi zìa ndziꞋne la, bɨ̀ me mɨ̀ɨ̀tè wuê àghɨa betsiꞋa a tɨŋe bòt ko mɨ̧̂ la.

⁵Bɨ̀ me ghɨ̀ mènəè wuê mbɨ̀Ꞌɨ̀ Yesò Klistò li ngua ngɨ̀à la.

⁶Tà li mbàte ngu àzi Mbɔ̧ɔ̧mà mɨ̧̂, ka tà kà ŋweele laꞋnê yea wu wuê ane akɔ̀Ꞌ wemɔ̀Ꞌ bɔ̂ Mbɔ̧ɔ̧mà.

⁷Tà sà àdziꞋa mbɔŋ ntsiꞋi nɨ ayea àbùꞋ bɔ bi atò, tà tsiꞋi mbɨ̀Ꞌɨ̀ wɔ̀bȩ̂.

⁸Tà ghɨ̀ ale, nɨ̀ àvi a si, ndzə ànəa Mbɔ̧ɔ̧mà shu la, mbɨ̧̀ɨ̧̀ne epfə, tè mpfəè èwuu èvə lu bɔ̀ɔ ngù̧ù̧ta wòt a mbɨ̧̀ mbasa la.

⁹Mbɨ̀Ꞌɨ̀ tà ghɨ̀ ale la, Mbɔ̧ɔ̧mà è lɔke atò ntsàà àdziꞋa a tsě èdziꞋ ègème la, ŋǎ atò èlen e tsè tèlen tègème la.

¹⁰Enɨ ŋa mèngùꞋte ane èlen Yesò lu, Mbɔ̧ɔ̧mà wu nê, àghɨ àgème à wu a ègwet, nè àyea à wu a sitsǎꞋ la, ndɔ̀Ꞌ nè àyea à wu a èbem ngɔ̀ŋ yu a si la, a bɔ ndɨ àa teme tènjûŋ ti a si a mbì Yesò Klistò la.

¹¹Èghɨ baa ègème e mè ngu elàꞋa ane mètsəê mɔb nê, Yesò Klistò wu Tǎt a ègwet àghɨ àgème, mbɨ̀Ꞌɨ̀ àghɨ àgème aa wùꞋtè èlen Tǎt tò Mbɔ̧ɔ̧mà.

¹²Ngule bèshu̧ bɔ̧, mbɨ̀Ꞌɨ̀ àa anè la, ndɨ̀ wu bɨ li ngua ndzəèa am àfɨ̀Ꞌ yu e ndi ngu ba nɨ̧̀ ba la, a bɔ̂ŋ nê bɨ̀ paa me zə am àfɨ̀Ꞌ yaa e nte ntsě a ngèt yɨ̧ la. Bɨ̀ me ghɨ̀ mènəè mɨ̧ mbɔ̀ɔ a Mbɔ̧ɔ̧mà, mèntɨ̧ɨ̧ mɨ̧ mě me bente mbɨ̀Ꞌɨ̀ bɨa paa bɔ mèmpème.

¹³Bɨ̀ me ghɨ̀ ale, nkàà nê wu Mbɔ̧ɔ̧mà ka tàa ŋa awɨ̧ mètàŋ mè ngɨ̀à bɨ kɔ̀ŋka a màngɨa èghɨ ntsɔ̧̀ bu tàa nkɨà la.

¹⁴Bɨ̀ me ghɨ̀ mènəè ègème kà wua nkùùla mèsi mɨ̧, bɨ̀ ka mè me kààne ànəê.

¹⁵Bɨ ghɨ ale, ko bɨa tsiꞋi bòt kà fâ̧ ànəê a mbì Mbɔ̧ɔ̧mà, bòt è ka meè ngu ye àghɨa bɔ̀ɔ nɨ efèèlè àwɨ̧ la, bɨ mè ngu etsiꞋi ngule bɔ̧ Mbɔ̧ɔ̧mà kà ye àlɔꞋ a èbem ngɔ̀ŋ yaa, è lu̧u̧ ne bòt mènəè mɔb è toŋke la, nè bòt kàbɔ̀ŋ la. Bɨ̀ me beꞋe ayɔɔ yɔb mbɨ̀Ꞌɨ̀ těnto̧tsə tèa nkaꞋa a èbem ndzěm la,

¹⁶mbɨ̀Ꞌɨ̀ bɨ̀a ngɨ̀à mènəè mɨ̧ ane ndɨ èngà̧ wu àa ŋǎ mèmpème la àa nkɨà la. Bɨ ghɨ̀ ale, ko naa li ngu ane àlia Yesò Klistò è mê nkɨ̀Ꞌɨ̂ la, e me wu̧u̧ nkùꞋ yaã ngùꞋtè am, nkàà nê àfàꞋ yu e ndi ngua ndèmnà ngɨ̀à la a bakà tse àku.

¹⁷Mèntɨ̧ɨ̧ mɨ̧ mu bɨ zǐ ane Yesò Klistò la nàà mbɨ̀Ꞌɨ̀ àghɨa bɨ̀ wua ŋǎ abua Mbɔ̧ɔ̧mà ngùꞋtà wɨ̧ la. Tà bɨ̧̀ɨ̧̀na nê bɔ̀ bùŋè am àfɨ̀Ꞌ yaa, ko maa me wùꞋtè wuê am, e mě fɔte awɨ̧ ane mèngùꞋte mɨ̧.

¹⁸È wu ale, bɨ̀ambɔŋ è wùꞋtè àwɨ̧ mè fɔ̀te am ba nɨ̧̀ ba è me wùꞋtè awa nɔ̂.

¹⁹Yesò Lefɨ̀Ꞌ bɨ̧̀ɨ̧̀na mbɨ̀Ꞌɨ̀ màa mɨ̀ɨ̀tà la, ko maa tsàa a Tɔ̀màtià kwàla taa kɨꞋɨ eye awɨ̧ mbɨ̀Ꞌɨ̀ tà kua tà shu am ndɨ bɨ̀a la, èntɨ̧ɨ̧ am e me bɔ̌.

²⁰Tà wu ndàꞋà wòt tàa nkwàꞋtà mènəè mbɨ̀Ꞌɨ̀ mmɔ̌, mè ntaꞋa wua mɨ̀ɨ̀tè àwɨ̧ la.

²¹Bòt ko nyaŋ mâ ye la bɔɔ ndzəèa wuê mɔb nè mènəè, wòt kà wuê ane yɔb tàa nkwàꞋtà ànəa Yesò Klistò la.

²²È me wu Tɔ̀màtià, ko tà nyɨꞋte mènəè ntsɔ̧̀ mi tè bɨ̀ambɔŋ e ye. Ba tò e li ngua fàꞋà nɔ̂ wuê mbɨ̀Ꞌɨ̀ wòt bɔ̂ waã vi a màntsɔta Ntu̧ Ntsɔ̧̀ Yesò.

²³Maa mɨɨta etsàa atò abua yɨ̧ kwàꞋ àfɨꞋa mâ ko ndɨ ànəê am àa ghɨ̌ ewu la.

²⁴Mâ lâ nkoê nê, Tǎt wa Yesò Klistò naa tɨŋe am maa yàŋe ekɨꞋɨ eye awɨ̧ mɨ̧̂.

²⁵Mâ kwaꞋtè nê, a wu ntsɔ̧̀ nê, è mvəèəè wanyɨ wa Èpaflɔ̀ditùs tà kɨꞋɨ ndzè àwɨ̧ mɨ̧̂. Ba tò aa fàꞋà nɔ̂ mè me fɔta nùà ànəa Yesò nɔ̂. Wu tòà wu bɨ li ntsà nê, tà kɨꞋɨ me tɨŋe am la.

²⁶Èntɨ̧ɨ̧ tò aà ŋweele atò nê, tà kɨꞋɨ mè ndzè àwɨ̧ bɨ̀agème. A li à ka bɔ atò ndɨ̀ wu bɨ li ndzə nê tàà ngò̧ò̧nà la.

²⁷Ane nkûŋ, tà li mbɔ̂ ntaꞋa ghɔ̧̀ɔ̧̀nè tê ndǎ epfə. Ka Mbɔ̧ɔ̧mà li nkù tèsȩte tò, mè nkù ètaã mɨ̧̂, mbɨ̀Ꞌɨ̀ ngoꞋ kèkweelè kǒ mè ndzè am.

²⁸Mbɨ̀Ꞌɨ̀ àa anè la, e ngua ntsaa atò kwàla taa kɨꞋɨ ekwene ane yɨ̧, mbɨ̀Ꞌɨ̀ bɨ̀ mee bɨ̀ ye atò bɨ wùꞋtè àwɨ̧, mè ndzɔ̀ mèsi mu àghɨ am la.

²⁹È wu ale, taa kɨꞋɨ, bɨ taꞋa sèe atò nè mèngùꞋte, ndɨ̀ wu bɨ tò ba è wu bòt Yesò Klistò la. Bɨ ye a wòt mbɨ̀Ꞌɨ̀ tòà ale, bɨ ŋa kènuke abua tò,

³⁰nkàà nê tà li ndaa epfə ane àghɨa tà li ngua ngɨ̀à ane yaã ane èlen Yesò Klistò la. Tà li ngua ngɨ̀à ale mbɨ̀Ꞌɨ̀ eŋa am ètɨŋe wu bɨ̀ambɔŋ e li ngu eŋa ka bɨ̀ ka wu a si ŋaa la.