Read Mundani Filìpȩ 3 Bible Online

Filìpȩ 3 - Mundani bible

Filìpȩ 3

¹Bɔnyɨ bɔ̧, ànəa e nkɨ lìa eshu awɨ̧ la wu nê, bɨ̀ wùꞋtè àwɨ̧ ndɨ̀ wu bɨ Yesò Klistò ba è tsiꞋi àghɨ yeamɔꞋ la. E màà me shɨ wuê mènəè mu e ndi shɨŋ abua yɨ̧ la, à ka lem sàà am. E mè shɨa mùà, ko nàà ngà ekele mbɨ̀Ꞌɨ̀ ànəa kàbɔ̀ŋ a ye awɨ̧.

²Bɨ̀ me ko awɨ̧ ane bòt kàbɔ̀ŋ bu bɔ̀ wu mbɨꞋɨ̀ babə bɔ̀ɔ ŋwèèla shua nê bɔ naŋe wòt mbɨ̀Ꞌɨ̀ mbɨ̧te Bèjuê tèa shua la, ka tà bɔ̂ ngu wòt Mbɔ̧ɔ̧mà la.

³Bàa ka bà wu ngule bòt Mbɔ̧ɔ̧mà la. Aa anè nkàà nê wu Fo Mbɔ̧ɔ̧mà ka è ŋa awa mètàŋ ba me tsàꞋte atò la, ba mè ngua ngùꞋtà àwa ndɨ̀ wu ba Yesò Klistò ba è tsiꞋi mbɨꞋɨ̀ àghɨ yeamɔꞋ la. Mèntɨ̧ɨ̧ ma ntsě ane èghɨ bu bɔbȩ àa ngɨa ane mɔb ne mètàŋ la.

⁴Èghɨ mbɔŋ wu èghɨ mâ ghɨ̀ ale ngua nkɨ ewu̧u̧ nkùꞋ yaã adù̧ ko maa ndâ ngù̧a la. Wòt kǒ mɨ̀ɨ̀tà nê betsiꞋa ye me ŋeꞋe avi a ègwet ane èghɨ mbɔŋ, tà ko nê mâ tse atò ane bùà.

⁵Bɔ li mbi am, è me wu kwàꞋ ane èli befà̧aã bɔ naŋe am. E ngu wòt Izəèlȩê mâ dzə àndǎ̧ Benjamèn la. E ngu wòt Ebùlù ane èbâ ègème. È wu nè, mànɔŋa mbɨ̧te Bèjuê, ko e ndi ngua ngɨ̀à mènəè mbɨ̀Ꞌɨ̀ Bèfalèsiì.

⁶Ànəa mbɨ̧te Bèjuê a li ngu àtsə am tè e me gheeba nkɨà àtsəa bòt chɔsì enɨ. È wu ànəa màntɨ̧a ndɨŋndɨ̀ŋ a mbì Mbɔ̧ɔ̧mà mbɨ̀Ꞌɨ̀ mbɨ̧te Bèjuê tèa nkɨà la, ko e ndi è nka ghɨ̂ àghɨa ko bòt àa fèèlè am adù̧ la.

⁷Ka èghɨ mbɔŋ bu e ndi ngua ndzèa mbɨ̀Ꞌɨ̀ àbȩ̀ la, e te ntsě èghɨ abua am àfɨ̀Ꞌ yaa, ndɨ̀ wu màa nkɨ eko a Yesò Klistò la.

⁸Ane nkûŋ, è ndem ntsě wuê ndàꞋ èbùà. Mâ ntsiꞋa ndzèa èghɨ ègème àfɨ̀Ꞌ yaa mbɨ̀Ꞌɨ̀ e te ntsě èghɨ, mbɨ̀Ꞌɨ̀ e lâ eko wòt Tǎt am Yesò Klistò wû wùà la. Àyaa a bɔ̀ tê ntsè èghɨ tsa bu ègème. Mâ sǎ èghɨ bu ègème e ndi ngua ngɨ̀à la nkaa atò. Mâ ntsiꞋa ndzèa èghɨ ngaa ègème mbɨ̀Ꞌɨ̀ tabtsə, mbɨ̀Ꞌɨ̀ è ngu e tsiꞋi wuê ba Yesò Klistò,

⁹e mě lâ etsiꞋi àghɨ yeamɔꞋ ba tò. Mmɔ̌ mbɔŋ e mbakà tsi ntɨ̧ɨ̧ ndɨŋndɨ̀ŋ e mbì Mbɔ̧ɔ̧mà nkàà mbɨ̧te Bèjuê tu màa nkùŋà la. Mâ tsiꞋi tɨ̧ɨ̧ ndɨŋndɨ̀ŋ a mbì Mbɔ̧ɔ̧mà àfɨ̀Ꞌ yaa nkàà nê mâ zǐ èntɨ̧ɨ̧ am ane Yesò Klistò.

¹⁰NdàꞋ àghɨa è ntsiꞋa nkɨ̀a la wu nê, è ndâ nko a Yesò Klistò, mè bɔ mètàŋ mu tà li mbɔ̀ mbɨꞋɨ̀ wòt tà yu̧u̧me la. Maà nkɨ kùŋe atò eye ngoꞋ mɨ̧̂, e mě pfə nkàà nê tà li mpfə mɨ̧̂.

¹¹Maà nkɨ e ghɨ̌ ale mbɨ̀Ꞌɨ̀ Mbɔ̧ɔ̧mà naa li eyu̧u̧me am ayɔɔ bèmpfəà eŋa am mèmpème.

¹²BetsiꞋa è nka shu nê mâ ghɨ àghɨa mâ bɔ ndɨ màa ghɨ̀ la tè ndɔ̀Ꞌ, è nka meè ngu eshu nê mâ kùꞋù àghɨa mâ bɔ ndɨ màa wu yùà la. Ka, maa ndùùlà ngà nè mbì mbɨ̀Ꞌɨ̀ ebɔ èghɨ bàa mâ nɔ̀ŋè èghɨ laã adù̧ la, è wù àghɨa a li ngɨ̀ ka Yesò Klistò zìambɔŋ tɔ am ane wòt vi la.

¹³Bɔnyɨ bɔ̧, mâ kwaꞋtè nê e mbakà luula te eghǎ ewu adzìꞋa màa bɔ èghɨ bàa la. NdàꞋ àghɨa màa ngɨ̀à la wu nê, maa kà tsi ndɨ̀ŋkè àghɨa a tsè tê ndɔ̀Ꞌ la, mâ tsiꞋa ndɨ̀ŋkà wuê àyea à wu ne mbì la.

¹⁴Maà ŋwèèlà ngà wuê nè mbì, mbɨ̀Ꞌɨ̀ à gha à me lìa, e mbɔ àghɨ yu, è wù mèmpème mu Mbɔ̧ɔ̧mà tɔ am nê è nkɨꞋɨ a ègwet mbɔŋ ndɨ̀ wu ba Yesò Klistò è tsiꞋi àghɨ yeamɔꞋ la.

¹⁵A bɔ̂ŋ nê, bàa wu ba tsə tê ntsìꞋi bɔɔjuŋ ane èngǎ̧ Mbɔ̧ɔ̧mà la è me kwàꞋtè mènəè ane èlɨ̀ waa. Mbə è wu nê bòt ko ane yɨ̧ aà nkwàꞋtà èlɨ tsa, ko Mbɔ̧ɔ̧mà naa ghaꞋte ètsə bɔb.

¹⁶A màà ngu wuê nà leꞋ, ko bɨ̀ tsiꞋ bà ghȩ̀ȩ̀nè wuê ane alu̧ wu baa wua ndzìà ngȩ̀ȩ̀nà te kɨꞋɨ ewu àfɨ̀Ꞌ yaa la.

¹⁷Bɔnyɨ bɔ̧, waa waa nɨ àka lèghȩ̀ȩ̀nè àzi ane yaã. Bɨ̀ me lɨ̀ŋke bòt bu bɔ̀ɔ ngɨ̀à ntsɔ̧̀ anè la, na ba tò ba e nyiꞋte awɨ̧ ndɨ bɨ wu me ghȩ̀ȩ̀nè la.

¹⁸Mâ taꞋa elàꞋa èngà̧ waa abua yɨ̧, mè ngu anè nkɨ me làꞋa ne mèsi àghɨ am. Nê, bòt ko aà və a kètsìà wɨ̧, bɔ̀ɔ ngɨ̀à mènəè mɔb mbɨ̀Ꞌɨ̀ bòt bɔ̀ɔ mpaaba ezə nê Yesò Klistò li mpfə a mbɨ̧̀ mbasa la.

¹⁹Bɔɔ li nyɔ, nkàà bɔ nɨ èghɨ mbɨ̧te ènyit tɔb tèa nkɔ̀ŋkà la ngɨ̀ e tsiꞋi mbɨ̀Ꞌɨ̀ mbɔ̧ɔ̧mà. Bɔɔ ngɨ̀à tè ngù̧a nkùꞋ tɔb ane àghɨa ètsə bɔb e wu me kɔꞋɔ adù̧ la. Bèŋût aà nkwàꞋtà wuê èghɨ ngɔ̀ŋ yaa.

²⁰Ka è wu awa, ko àpfəa ya a wu nè kèfɔ̧̀ Mbɔ̧ɔ̧mà. Baa nchɨ̀Ꞌà nê Yesò Klistò Lefɨ̀Ꞌ, Mpemnà wa chu a ègwet və nkwène ane ya.

²¹Taa li nkɨ̀Ꞌɨ̂, nɨ̀ mètàŋ kèkweelè mi mu tàa nɨ e ghɨ̌ àghɨ àgème aa tsiꞋi a èten tò la, enɨ ghɨ̌ mbɨ̧te ènyit ta tàa tèa fìà la, tea kubte etsiꞋi mbɨ̀Ꞌɨ̀ ngule ye tò.