Read Mundani Filìpȩ 4 Bible Online

Filìpȩ 4 - Mundani bible

Filìpȩ 4

¹Mbɨ̀Ꞌɨ̀ àa anè la à bɔnyɨ bɔ̧, maà nkɔ̀ŋkà àwɨ̧, mè ndâ me kɨ eye awɨ̧. Bɨà ngɨ̀à èntɨ̧ɨ̧ am e bɔ̀, e mè me wu̧u̧ nkùꞋ yaã nkàà wɨ̧. Ngule bèshu̧ bɔ̧, mbɨ̀Ꞌɨ̀ àa anè la, bɨ̀ baãaã ànəa Tè Yesò me kweele.

²Maà shù̧ù̧ta awê à Èyodià bɨ Sintichè nê, bɨ̀ wu ane ètsəê wemɔꞋ ndɨ̀ wu bɨ̀ wu bòt Yesò la.

³Mè me shu abua yê, shu̧ yaã wafàꞋ ba nè àa fàꞋà nɔ̂ la nê, à tɨŋe bèzi baa mpaâ nèètè ànəa yɔb. Ba tò ba nè Klemin, nè bòt ko bu bàgème bɔ li ngua nkùŋà àwa la e li ntaꞋa fàꞋà a màntsɔta Ntu̧ Ntsɔ̧̀. Mbɔ̧ɔ̧mà shɨ tèlen tɔb bɔ̀ɔgème a èbem àkata mèmpème.

⁴Bɨ̀a wu bɨ̀ wu bòt Tè Yesò la, bɨ̀ me wùꞋtè àwɨ̧ àfɨ̀Ꞌ àgème. TsiꞋ è mèe shu awɨ̧ nê, bɨ̀ wùꞋtè àwɨ̧.

⁵Bɨ̀ me yu ane mènəè mɨ̧ a mbì waa waa mbɨ̀Ꞌɨ̀ nê Tǎt wa bele yàŋe ekɨꞋɨ.

⁶Ko mbɨ̀Ꞌɨ̀ èntɨ̧ɨ̧ wòt e bentè ane ànəa ko. Ka bɨ̀ me tsàꞋte a Mbɔ̧ɔ̧mà àfɨ̀Ꞌ àgème, ŋǎ mènkɔ̀ŋke abua tò mè ndò̧a àghɨ àgème bɨ̀a nkɨ̀a la abua to.

⁷Bɨ ghɨ̀ ale ko Mbɔ̧ɔ̧mà naa ŋa awɨ̧ àlàŋkè a tsè ayea betsiꞋa wɔ̀bȩ̂ koê la, aa kaba mèntɨ̧ɨ̧ mɨ̧, nè mèmɨ̀ɨ̀te mɨ̧ mbɨ̀Ꞌɨ̀ àghɨa ko a ghɨ̀ adù̧, ndɨ̀ wu bɨ Yesò Klistò ba è tsiꞋi àghɨ yeamɔꞋ la.

⁸Bɔnyɨ bɔ̧, ànəa e nkɨ elìa eshu awɨ̧ la wu nê, bɨ̀ me mɨ̀ɨ̀tè wuê mènəè è wû nkûŋ la, nè mènəè bòt àa nkùkta la, mè nè mènəè è kùꞋù la. Bɨ̀ me mɨ̀ɨ̀te mènəè kà ye àŋɔꞋte adù̧, nè mènəè nàa mbɔ̀, bòt e mè me kɔ̀ŋke la. Èghɨ bu e taꞋa wua mbɔ̀, bòt e mè me wùꞋte bùà la wu èbe bɨ̀a me mɨ̀ɨ̀tè la.

⁹Bɨ̀ me ghɨ̀ mènəè mu mâ nyɨꞋte awɨ̧ mè ndzì à tèkitebu tɨ̧ la, nè mènəè mu bɨ li ndzə a ètsəê am mè ndzě ndɨ e ngɨ̀à la. Bɨ ghɨ̀ ale, ko Mbɔ̧ɔ̧mà wu tàa ŋàa awa àlàŋkè la naa wu ne nɨ̧̀.

¹⁰Maà ngùꞋtà am ànyaꞋne mè nkɔ̀ŋkà Tè Yesò Klistò nkàà nê, bɨ mee mbùꞋ tè me tɨŋe am mbɨ̀Ꞌɨ̀ bɨ li ndâ ngua ngɨ̀à la. È nka shua nê, bɨ li ndèènè am, wu nê èlu̧ e li è ka wuê bɨ̀a tɨŋe am la.

¹¹Ko mbɨ̀Ꞌɨ̀ e me shu anè, wòt kǒ mɨ̀ɨ̀tè nê maà mbùa àghɨa ko. A nyi àtsə am nê, àghɨa mâ bɔ la à kùꞋ am.

¹²Mâ ko ndɨ betsiꞋa e ntsèke àfɨꞋa è mbaka bɔ àghɨ la, mè nko ndɨ betsiꞋa e ntsekè àfɨꞋa mâ bɔ nyaŋ la. Mâ ko ntsèm yaa mbɨ̀Ꞌɨ̀ è maa è ngà wuê a ka àdziꞋa, ka wuê a ka àfɨ̀Ꞌ leꞋ, mâ bɔ àghɨ kò è mbaka bɔŋ la, e nko ntsèkê. Kò ndzì taã teà nkua, kò teà kà ku leꞋ, ko maa tseke ale.

¹³BetsiꞋa e nko ngɨ̀ àghɨ àgème, nkàà mètàŋ mu Yesò Klistò nàa ŋǎ abua am la.

¹⁴Mâ batè ndàꞋ anè, mbɔ̂ ntaꞋa kɔ̀ŋkè àwɨ̧ ndɨ̀ wu bɨ tɨŋe am àfɨ̀Ꞌ yaa è ngu a ngoꞋ la.

¹⁵Bɨ̀a bòt Filìpȩ e ko nê, e ndi sà àbâ àlaꞋ a Màsèdonìà ane èli mbì bu màa ntsɔ̀tà Ntu̧ Ntsɔ̧̀ yu la ale, bɨ wu ndàꞋà chɔsì è li ntɨ̀ŋe am la. Wu wuê ba nɨ̧̀ ba, ba li ngua ngàbtà èghɨ bàa nkɨ̀ŋkà la.

¹⁶È li nguê fɔ̀ɔ̀le àfɨ̀Ꞌ yu e ndi ngua Tèsàlonikà la, bɨ me ntsàà èghɨ màa nkɨ̀ŋkà la abua am a ngo̧ a ngò̧.

¹⁷È ntsě wuê èghɨ bu bɨ li ntsaa abua am la ka èntɨ̧ɨ̧ am àa adù̧ la. Àghɨa àa ngɨ̀à èntɨ̧ɨ̧ am e bɔ̀ kwàꞋ ànyaꞋne la wu èghɨ bu bɨ̀a ngɨ̀à, àa ghɨ̌ Mbɔ̧ɔ̧mà naa kwèꞋne àbȩ̀ a yɨ̧ la.

¹⁸E ngu anè nkɨ eshu awɨ̧ nê, mâ ye èghɨ bu ègème bɨ tsàà Èpaflɔ̀ditùs tà nɨŋ nkɨ̀Ꞌɨ̂ la, e bɔ̂ ndzà̧ tê me bəèꞋtè am. Èghɨ ngaa bu aà mbɨ̀Ꞌɨ̀ àghɨa àa mbɔ̀ bɔ tô̧ a me nəꞋə àghaa ntsɔ̧̀ nkɔꞋɔ nga a ègwet Mbɔ̧ɔ̧mà naa nɨ la.

¹⁹Mbɔ̧ɔ̧mà am naa nɨ èghɨ kèfɔ̧̀ vi eŋa èghɨ ègème bɨ̀a nkɨ̀ŋkà la kà kuꞋte àbu, ndɨ̀ wu bɨ Yesò Klistò ba è tsiꞋi àghɨ yeamɔꞋ la.

²⁰TsiꞋ mèngùꞋte wu abua Tǎt wa Mbɔ̧ɔ̧mà ane àlia nè àlia. Àmèn.

²¹Bɨ̀ tsàꞋte bòt Mbɔ̧ɔ̧mà bu bàgème bɔ̀ tsiꞋi àghɨ yeamɔꞋ bɔ̂ Yesò Klistò ba la. Bɔnyɨ ba bòt Yesò bu bɔ̀ wu a si ŋàa nè nà̧ la aà ntsàꞋtà wɨ̧.

²²Bòt Mbɔ̧ɔ̧mà bu a si ŋàa la bàgème e tsàꞋtè àwɨ̧ mɨ̧̂, tè mpàâ ngu èbu a ntɔꞋɔ empelɔ̀ la.

²³Maà ntsàꞋtà nê, Yesò Klistò Lefɨ̀Ꞌ è me nyɨꞋte a ntsɔ̧̀ vi abua yɨ̧ bɨ̀agème mè ngu nè nɨ̧̀.