Read Mundani Kɔ̀losìà 1 Bible Online

Kɔ̀losìà 1 - Mundani bible

Kɔ̀losìà 1

¹Letà Pɔ̂l wantu̧ Yesò Klistò, Mbɔ̧ɔ̧mà ghɨ̂ ane mènkɔ̀ŋke mi la, bɔ̂ wanyɨ wa Tɔ̀màtià,

²Abua bɔnyɨ ba bòt Mbɔ̧ɔ̧mà bu a Kɔ̀losìà, bɔ zì mèntɨ̧ɨ̧ mɔb ane Yesò Klistò, ntsiꞋi àghɨ yeamɔꞋ nè tò. Baa ntsàꞋtà nê Tǎt wa Mbɔ̧ɔ̧mà è me nyɨꞋte a ntsɔ̧̀ vi abua yɨ̧, mè ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

³Bàa ngɨ̀ bà me tsàꞋte a Mbɔ̧ɔ̧mà wu tà wu Tǎt Yesò Klistò Lefɨ̀Ꞌ wa la ane ànəa yɨ̧ àfɨ̀Ꞌ àgème, ba me kɔ̀ŋke atò.

⁴Bàa ngɨ̀ ba wua ngɨ̀à ale nkàà nê ba zə ndɨ bɨ zi èntɨ̧ɨ̧ wɨ̧ ane Yesò Klistò, mè me kɔ̀ŋkè bòt Mbɔ̧ɔ̧mà bàgème la.

⁵È li ngu àfɨꞋa bɔ li mbɨ̀ ntsɔ̀tè èngǎ̧ nkûŋ wu è wu Ntu̧ Ntsɔ̧̀ Mbɔ̧ɔ̧mà, abua yɨ̧ la, bɨ zə ànəa ntu̧ mbɔŋ shua la. È li ngua ndàꞋà ànəa ntsɔ̧̀ wu betsiꞋa bɨ bɔŋ mbɨ̀Ꞌɨ̀ bɨ nɔ̀ŋè mèntɨ̧ɨ̧ mɨ̧ adù̧ me chɨ̀Ꞌɨ̀ la. Wu ànəa ntsɔ̧̀ waa Mbɔ̧ɔ̧mà neetè nɔŋe abua yɨ̧ a ègwet bɨ mè me chɨ̀Ꞌɨ̀ la, ka a ghɨ̂ bɨ zì mèntɨ̧ɨ̧ mɨ̧ ane Yesò mè me kɔ̀ŋkè bòt Mbɔ̧ɔ̧mà la.

⁶Ntu̧ Ntsɔ̧̀ yaa bɔ tsɔte abua yɨ̧ la nàà ngà̧aã a èdzìꞋ ègème a ngɔ̀ŋ ŋaa mɨ̧̂, ngɨ̀à bòt e zəa ntsɔ̧̀, wuê mbɨ̀Ꞌɨ̀ nàa ngɨ̀à èghɨ ngaa ègème a kètsìà wɨ̧ la. E li ngua ngɨ̀à anè e bùꞋù tê ane àlia mbì yu bɨ li ndzə ànəa ntsɔ̧̀ Mbɔ̧ɔ̧mà ndɔ̀Ꞌ a me lìa bɨ mè ndâ nko ndɨ nàa la.

⁷Bɨ li mbɨ ndzə ànəa ntsɔ̧̀ Mbɔ̧ɔ̧mà mbɔŋ abua Èpaflàs, shu̧ ya wafàꞋ Yesò Klistò wu tà ŋà avi abua Yesò me tɨŋa awa la.

⁸Tà li shu awa ndɨ Fo Mbɔ̧ɔ̧mà ghɨ̂ bɨ me kɔ̀ŋkè bòt la.

⁹Mènəè maa ègème ghɨ̂ ba me tseka ntsàꞋta Mbɔ̧ɔ̧mà ane yɨ̧ àfɨ̀Ꞌ àgème, ebùꞋù tê ane àlia mbì yu ba li ndzə ànəa yɨ̧ la. Baa ndzìa ntsàꞋta Mbɔ̧ɔ̧mà nê Fo tò ghɨa bɨ̀ bɔ èyì, mè nko mènəè, mbɨ̀Ꞌɨ̀ eko àghɨa Mbɔ̧ɔ̧mà nàa nkɨà nê bɨ̀ me ghɨ̀ la.

¹⁰Bɨ ko ale ko bɨa me tseke mbɨꞋɨ̀ Mbɔ̧ɔ̧mà nàa nkɨà la, mè ngɨ̀à àghɨa àa mbɔ̀ abua tò la àfɨ̀Ꞌ àgème. Ko bɨa mèe me ghɨa ntsɔ̧̀ ane balu̧ bàgème, mè nkoa Mbɔ̧ɔ̧mà ngà nè mbì.

¹¹Maà ntsàꞋtà nê Mbɔ̧ɔ̧mà nɨ mètàŋ mi mu è ghe la ngɨ̀ mèntɨ̧ɨ̧ mɨ̧ neeta nkwèèlê, mbɨ̀Ꞌɨ̀ bɨa me kuule mèntɨ̧ɨ̧ mɨ̧ nkìà mènəè ègème nè mèngùꞋte,

¹²mè nkɔ̀ŋkà a Tǎt wa Mbɔ̧ɔ̧mà. Tà ghɨ̂ bɨ kùꞋù bòt bɔ̀ɔ nɨ ayɔb ne àghɨ ayɔɔ èghɨ bu tà nɔŋe abua bòt bi bu bɔ̀ɔ ngȩȩna a èbem kèfɔ̧̀ èkaꞋà tò la.

¹³Tà li ntsì àwa a èbem ndzěm yu è li mbɔ̀ mètàŋ a ègwet la la, nèètè ndzì àwa a èbem kèfɔ̧̀ Waã vi wu tà taꞋa wua nkɔ̀ŋkà la.

¹⁴Wu Waã tò waa ka tà li nchùꞋ ètsə ba la. Àyaa a wua shua nê, Mbɔ̧ɔ̧mà è waꞋa a kàbɔ̀ŋ wa.

¹⁵Yesò Klistò wu bà le wua ndzèa tò la nàà mbɨ̀Ꞌɨ̀ Mbɔ̧ɔ̧mà wu bàa ka ye atò la. Tà lè wuê ka bɔɔ ghɨ̌ èghɨ ègème, tà mè ngu àtsə àghɨ àgème bɔ li ngɨ̀ la.

¹⁶Mbɔ̧ɔ̧mà li ntsè ane tò ka ngɨ̀ èghɨ ègème. Tà li ngɨ̀ èghɨ àa a ègwet la, nè èbe àa a sitsǎꞋ la, èbe bɔ̀ɔ ndzea la nè èbe kà bɔ wua ndzea. Tà li ngɨ̀ fɔ̀ɔ̀le fo tu a ègwet te bɔ mètàŋ nyaŋ, ngû àtsəa bòt, mbɔ̀ àtɔŋ, mè ntsìta mènəè la. Mbɔ̧ɔ̧mà li ntsè ane Yesò ngɨ̀ èghɨ ègème, èghɨ ngaa ègème e wu abua to.

¹⁷Yesò li nguê ka àghɨ àgème aa li lɔ̀Ꞌɔ ewu, è mè ngu tòà ka tàa fèta àghɨ àgème ngɨ̀à a wu adzìꞋa zi la.

¹⁸Tà mè ngu àtsəa chɔsì wu è wu mbɨ̀Ꞌɨ̀ mbɨ̧̀ ènyit Yesò Klistò zìambɔŋ la. Wu tòà tà li ngɨ̀ bɔ bɔ mèmpème la. Tà wu wòt mbì Mbɔ̧ɔ̧mà li njù̧ù̧me mbɨ̀Ꞌɨ̀ e ghɨ̌ taa wu àtsəa èghɨ ègème la.

¹⁹Aa ale nkàà nê, Mbɔ̧ɔ̧mà li nkɔ̀ŋkè e ghɨ̌ Waã vi naa bê wu wuê mbɨ̀Ꞌɨ̀ zia zìambɔŋ ane èghɨ ègème.

²⁰Mbɔ̧ɔ̧mà li ntse ane Waã vi mbɔŋ ka ngɨ̀ èghɨ ègème e mè ngwènè a èten Mbɔ̧ɔ̧mà wu. Èvə Waã Mbɔ̧ɔ̧mà a mbɨ̧̀ mbasa ka e li ngɨ̀ Mbɔ̧ɔ̧mà ghɨ̀ àlàŋkè, èghɨ ègème a ègwet nè sitsǎꞋ e mè ngwènè a èten tò la.

²¹È lè wu àfɨ̀Ꞌ àko, bɨ teme kwen tɨ̧ ŋǎ abua Mbɔ̧ɔ̧mà tè ntsìꞋi bɔmbù̧ tò, nkàà mènəè kàbɔ̀ŋ mu bɨ̀ le wua ngɨ̀à mè nkwàꞋtà la.

²²Ka àfɨ̀Ꞌ yaa Waã tò kɨꞋɨ ntsìꞋi wɔ̀bȩ̂ mpfə la, Mbɔ̧ɔ̧mà nɨ èvə Waã vi mbɔŋ ngɨ̀ bɨ tsiꞋi bèshu̧ tò, mbɨ̀Ꞌɨ̀ taa nɨ awɨ̧ enɨ kɨꞋɨ a mbì li mbɨ̀Ꞌɨ̀ ngule bòt bi, kà ye àlɔꞋ nè àghɨa ko bɔ̀ɔ fèèlè àwɨ̧ adù̧ la.

²³Aa wu anè, ane yɨ̧ na bɨ me zì mèntɨ̧ɨ̧ mɨ̧ ane Ntu̧ Ntsɔ̧̀ yu, me kweele mbɨꞋɨ̀ àtetsi àkekweelè, mè mbakà sàŋ àghɨa ko aa nyìꞋì ntɨ̀ yu bɨ li mbɔŋ àfɨ̀Ꞌ yu bɨ li mbɨ̀ ndzəâ Ntu̧ Ntsɔ̧̀ yu la. Bɔ li ntsɔ̀tè Ntu̧ Ntsɔ̧̀ ya abua waa waa a sitsǎꞋ ŋàa. Mmɔ̌ Pɔ̂l e ndi ntsìꞋi wafàꞋ Yesò Klistò mbɨ̀Ꞌɨ̀ me tsɔ̀te Ntu̧ Ntsɔ̧̀ yaa, abua waa waa.

²⁴Maà ngùꞋtà am àfɨ̀Ꞌ yaa nê betsiꞋa e ndze ngoꞋ nkàà wɨ̧. NgoꞋ yaa e dzea àfɨ̀Ꞌ yaa la wua ntɨ̀ŋa epaa ngoꞋ tu Yesò Klistò li ndze ambo mbɨ̧̀ zi yu è wu chɔsì la.

²⁵Wu Mbɔ̧ɔ̧mà ka tà li ndzì am ane wɔ̀fàꞋ bòt Yesò nê è me fàꞋa ntɨ̀ŋa wɔb la. ÀfaꞋa mbɔŋ wu ndɨ màa me tsɔ̀te Ntu̧ Mbɔ̧ɔ̧mà yu mbɨ̀Ꞌɨ̀ bòt aa paa eko la.

²⁶Ntu̧ mbɔŋ wu ànəa ndò̧ yu tà li ndò̧ abua bòt bàgème ebùꞋù tê a mèngùꞋu mbì la. Ka àfɨ̀Ꞌ yaa, tà tùꞋu yùà abua bòt bi.

²⁷Mbɔ̧ɔ̧mà kɔ̀ŋkè nê yea tùꞋu ànəa ndò̧ zi yu abua yɔb mbɨ̀Ꞌɨ̀ nɨ enyɨꞋte ndɨ yea mbà̧aã bòt èlaꞋ ègème ntsɔ̧̀, ngɨ̀à bɔ bɔ èghɨ ntsɔ̧̀ bu ègème àa ndzəa ane ntsèm yaa la. Ntsèm mbɔŋ wu nê, Yesò Klistò wu a mèntɨ̧ɨ̧ mɨ̧. Àyaa a wua shua nê, bɨà li ewu ne Mbɔ̧ɔ̧mà a èbem ènɨ̧ tò.

²⁸Baà shua waa waa ànəa Yesò, nɨa èyì nyɨ̀Ꞌta waa waa, mè səèŋkà ètû̧ bɔb mbɨ̀Ꞌɨ̀ bà me nɨ wòt ègème tà tsiꞋi àghɨ yeamɔꞋ nè Yesò Klistò la nkɨ̀Ꞌa a mbì Mbɔ̧ɔ̧mà, ŋut kuꞋu ane ebà ègème.

²⁹Maa ndâ fàꞋà ànyaꞋne nè mètàŋ mu è ghe Yesò Klistò e ŋǎ abua am la, mbɨ̀Ꞌɨ̀ eye nê mâ ghɨ èghɨ bàagème.