Read Mundani Kɔ̀losìà 3 Bible Online

Kɔ̀losìà 3 - Mundani bible

Kɔ̀losìà 3

¹Mbɔ̧ɔ̧mà li njù̧ù̧me awɨ̧ nè Yesò, è wu ale bɨ̀ nɔ̀ŋè mèntɨ̧ɨ̧ mɨ̧ ane èghɨ è wu a ègwet adzìꞋa Yesò Klistò è tseke adù̧ àtɨ̧a kèfɔ̧̀ vi, àbâ àbualu̧ a Tǎt vi Mbɔ̧ɔ̧mà la.

²Bɨ̀ me mɨ̀ɨ̀te mè nkɨ̀a wuê èghɨ bu a ègwet la, bɨ̀ ka ndzì mèntɨ̧ɨ̧ mɨ̧ ane èghɨ ba a sitsǎꞋ ŋàa la.

³Bɨ li mpfəèꞋte mèntsèke mbì mu è lìà, tè mèntsèke mɨ̧ tsiꞋi a tèkitebu Yesò Klistò mbɨ̀Ꞌɨ̀ Mbɔ̧ɔ̧mà nɔ̀ŋè la.

⁴Wu Yesò Klistò ka betsiꞋa tà ghɨ̀ mèntsèke ma lâ ngu àghɨ la. Naa li ngu àfɨꞋa tà mê mpuula a sitsǎꞋ ŋàa la, bɨ̀ambɔŋ e wu nè tò, mè mbɔ̀ èwuu ènɨ̧ wu tà bɔ la.

⁵Ale, bɨ̀ waꞋa èghɨ sitsǎꞋ bu ègème mbɨ̧te ènyit tɨ̧ tèa nkɨà la. Èghɨ mbɔŋ wu mànkuŋa bèzi kò mbâ̧tsə leꞋ ane balu̧ bàgème, nè mèmɨ̀ɨ̀te kàbɔ̀ŋ, nè mànkɨa nê ye wu me nɨ nɨ, na àyaa à wua nyɨ̀Ꞌta nê wòt kɔ̀ŋke èghɨ mbɔŋ tè e tsiꞋi mbɨ̀Ꞌɨ̀ a mbɔ̧ɔ̧mà tò la.

⁶Ntsǒ Mbɔ̧ɔ̧mà nàà nkɨ̀Ꞌa [enɔ̀ŋke àtsəa bòt bu bɔ̀ɔ ka zə atò la, nkàà èghɨ bàa bɔ̀ɔ ngɨ̀a la.]

⁷È lè wu àfɨ̀Ꞌ àko mèntsèke mɨ̧ bê ndù̧ ne èwuu mènəè kàbɔ̀ŋ mbɔŋ.

⁸Ka bɨ bɔ ndɨ bɨ̀a waꞋa èwuu èghɨ bàagème àfɨ̀Ꞌ yaa la. Èghɨ mbɔŋ wu ntsǒtsə, nè èntɨ̧ɨ̧ nendu̧, nè màmbɔ mèmɨ̀ɨ̀te kàbɔ̀ŋ adù̧ bòt, nè màndaꞋa kàbɔ̀ŋ adù̧ bòt, kò màndaꞋa mèngǎ̧ àtsəa kɔꞋɔ leꞋ. Èwuu mèngà̧ maa ka ndɔ̀Ꞌ ane àlia ndzə a ètsəê wòt kǒ ane yɨ̧.

⁹Bɨ̀ ka me fɨte bɔnyɨ bɨ̧ ndɨ̀ wu bɨ te ntsě àghɨa bɨ̀ le wu yùà afɨꞋa mbì la, bɨ̀ ka tsi ngua ngɨ̀à àghɨa bɨ̀ le wua ngɨ̀à la.

¹⁰Bɨ tsiꞋi bòt fi. Mbɔ̧ɔ̧mà wu tà ghɨ̀ àwɨ̧ ale la nàà ntsèka àfɨ̀Ꞌ àgème ngɨ̀à a èlɨ bɨ̀a tsiꞋi mbɨꞋɨ̀ zìambɔŋ, mbɨ̀Ꞌɨ̀ eko avi te paa la.

¹¹Mbɔ̧ɔ̧mà ghɨ a èlɨ̀ waa ale, Bèjuê è ka tsi ngu tsa, bòt kà wu Bèjuê aa wu tsa. Bòt bɔ naŋè àwɔb la è ka wu tsa, èbe kà bɔ naŋè àwɔb aa wu tsa. Bòt Sintìà è ka mê ngu tsa, bòt tèbemtebàꞋ aa wu tsa, èbùꞋ è ka wu tsa, bòt kà wu èbùꞋ aa wu tsa. Wòt bɔ yea àfɨ̀Ꞌ yaa la wu ndàꞋ Yesò Klistò, è mè ngu tòà tà wu ane yɨ̧ bɨ̀agème la.

¹²Ale, ndɨ̀ wu bɨ̀ wu bòt Mbɔ̧ɔ̧mà tà kɔ̀ŋkà wɨ̧ ndàà àwɨ̧ la, bɨ̀ me ku tèsȩte bòt, mè ngɨa ntsɔ̧̀ abua bòt ko. Bɨ̀ me nɨ awɨ̧ a si, njùa ane mènəè mɨ̧, bɨ̀ ka mè me yàŋa ntsòa ane bòt.

¹³Bɨ̀ me baãaã mèntɨ̧ɨ̧ mɨ̧, mè ngwaꞋà bèkàbɔ̀ŋ bɔnyɨ bɨ̧ ane àghɨ àgème bɔ ghɨ̂ bɨ me fèèlè àwɔb adù̧ la. Bɨ̀ me waꞋa bèkàbɔ̀ŋ bɔnyɨ bɨ̧ wuê mbɨ̀Ꞌɨ̀ Yesò Klistò Lefɨ̀Ꞌ waꞋa è bɨ̧ la.

¹⁴Waa waa me kɔ̀ŋkè wanyɨ vi nɨ̀a nkweꞋna ane èghɨ bàa ègème, nkàà nê èkɔŋ aa fèta bòt ngɨ̀à bɔ tsiꞋa àghɨ yeamɔꞋ, wuê mbɨ̀Ꞌɨ̀ a wu ewu la.

¹⁵Bɨ me kɨ èghɨ àghɨ, bɨ ye nê bɨ ghɨ̀ ne àlàŋkè yu a kètsìà wɨ̧ a dzə abua Yesò Klistò la. Mbɔ̧ɔ̧mà lâ ntɔ awɨ̧ nê bɨ̀ kɨꞋɨ ntsìꞋi mbɨ̧̀ ènyit yemɔ̀Ꞌ mbɨ̀Ꞌɨ̀ ebɔ èwuu àlàŋkè yaa. È wu ale bɨ me ŋa mènkɔ̀ŋke abua Mbɔ̧ɔ̧mà.

¹⁶Bɨ̀ tsiꞋ èngǎ̧ Yesò Klistò è ghe a mèntɨ̧ɨ̧ mɨ̧. Bɨ̀ me nɨ èyì ègème ndàꞋà èngǎ̧ mbɔŋ abua bɔnyɨ bɨ̧ nkɨ̀ɨ̀ta awɔb. Bɨ̀ me kɔ̧ɔ̧ mètsəkû̧ è dzəâ a èbem àkata Mbɔ̧ɔ̧mà la, nkɔ̧̂ mètsəkû̧ Yesò, mè nkɔ̧̂ mètsəkû̧ Fo Mbɔ̧ɔ̧mà ghɨ̀ la. Bɨa me kɔ̧ɔ̧, bɨ me ŋa mènkɔ̀ŋke abua Mbɔ̧ɔ̧mà a èbem mèntɨ̧ɨ̧ mɨ̧.

¹⁷Bɨ̀ me ghɨ̌ àghɨ àgème, mè ndàꞋà ànəê àgème wuê ane èlen Yesò Lefɨ̀Ꞌ, mbɨ̀Ꞌɨ̀ bɨ̀a ntsea ane tò ŋǎ mènkɔ̀ŋke abua Tǎt wa Mbɔ̧ɔ̧mà la.

¹⁸Bèzi, bɨ̀ me zə bèlu̧ bɨ̧ nkàà nê wu àghɨa bɨ̀a bòt Tè Yesò ebɔ ndɨ bɨ̀a me ghɨ̀ la.

¹⁹Bèlu̧, bɨ̀ me kɔ̀ŋkè bèzi bɨ̧, bɨ̀ ka me tsoote ane yɔb.

²⁰Bɔ̧, bɨ̀ me zə bètǎt bɨ̧ bɔ̂ bènyɨ̀ bɨ̧ ane àghɨ àgème, nkàà nê wu àghɨa Mbɔ̧ɔ̧mà nàa nkɔ̀ŋkà nê bòt Yesò è me ghɨ̀ la.

²¹Bètǎt, bɨ̀ ka me ghɨ̌ bɔ̧ bɨ̧ e me tsoo, mbɨ̀Ꞌɨ̀ mèntɨ̧ɨ̧ mɔb dzə ane mènəè.

²²ÈbùꞋ, bɨ̀ me zə bòt bu bɔ bɔ awɨ̧ la ane mènəè ègème. Bɨ̀ ka me fàꞋa abua yɔb wuê àfɨꞋa bɔ̀ɔ ndzèa wɨ̧ la nɨa nkɨà nê bɔ̀ me kɔ̀ŋkè àwɨ̧. Ka bɨ̀ me fàꞋa abua yɔb nè èntɨ̧ɨ̧ kèfə nkàà nê bɨa nkùkta Tè Yesò.

²³Bɨ̀ baãaã àghɨ àgème bɨ̀a ngɨ̀à la nè èntɨ̧ɨ̧ wɨ̧ wemɔꞋ, fàꞋà mbɨ̀Ꞌɨ̀ bɨ faꞋa abua Tè Yesò, kà wua faꞋa abua wɔ̀bȩ̂.

²⁴Bɨ̀ me ghɨ ale ndɨ̀ wu bɨ ko nê, Tè Yesò naa li eŋa wɨ̧ àghɨa tà paŋe abua bòt bi la ane àbȩ̀ a yɨ̧, nkàà nê wu Tè Yesò Klistò ka tà wu ngule wòt bɨ faꞋa abua tò la.

²⁵Waa Waa tàa ngɨa kàbɔ̀ŋ la naa li ye ngoꞋ nkàà kàbɔ̀ŋ vi, ka ŋut màà ngu wu wà leꞋ, nkàà nê Mbɔ̧ɔ̧mà nàà sàꞋa bòt kà lȩ mèsi.