Read Mundani 1 Tèsàlonikà 1 Bible Online

1 Tèsàlonikà 1 - Mundani bible

1 Tèsàlonikà 1

¹Letà Pɔ̂l bɔ̂ Silvanùs nè Tɔ̀màtià, Abua bòt chɔsì wu a Tèsàlonikà, bɔ̀ wu bòt Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ la. Baa ntsàꞋtà nê Tǎt wa wu me nyɨꞋte a ntsɔ̧̀ vi abua yɨ̧ mè ngɨ̀ bɨ̀ bɔ àlàŋkè.

²Bàa ngɨ̀ bà me tsàꞋte a Tǎt wa Mbɔ̧ɔ̧mà àfɨ̀Ꞌ àgème, ba me ku̧u̧te awɨ̧, mè nkɔ̀ŋka tò ane ànəa yɨ̧ bɨ̀agème.

³Bàa ngɨ̀ baa me ku̧u̧te mènəè mu bɨ̀a ngɨ̀à ndɨ̀ wu bɨ zì mèntɨ̧ɨ̧ mɨ̧ ane Yesò la. Baa nkù̧ù̧ta mɨ̧̂ ndɨ bɨ taꞋa wua fàꞋà nkàà nê bɨ̀a nkɔ̀ŋkà tò la, mè me ku̧u̧te ndɨ bɨ nɔ̀ŋe ntɨ̀ yɨ̧ ane Yesò Klistò Lefɨ̀Ꞌ wa la.

⁴Bɔnyɨ ba, ba ko nê Mbɔ̧ɔ̧mà nàà nkɔ̀ŋkà àwɨ̧, mè ndàà àwɨ̧ nê bɨ̀ wu bòt bi.

⁵Ba li bàà ka nɨ Ntu̧ Ntsɔ̧̀ yu ekɨꞋɨ abua yɨ̧ wuê ane èngǎ̧ ètsəê. È li nkɨ̀Ꞌɨ̂ nè mètàŋ nè Fo Kèfə ndâ kùbte awɨ̧. Bɨ ko ndɨ ba li ngu ayɔɔ yɨ̧ ale me tseke la. Ba li ngua ngɨ̀à ale ane ntsɔ̧̀ wɨ̧.

⁶Bɨ li ngua fɨ̀ŋa mènəè ma, nè me Tè Yesò. Bɨ li mbàtè ntàꞋa ye ngoꞋ, a tèkitebu bòt, ka mbɔ̂ mbɨ̧̀ɨ̧̀nê wuê Ntu̧ Ntsɔ̧̀ yu nè mèngùꞋte mu Fo Kèfə nàa ŋǎ la.

⁷Bɨ li ngɨ̀ a èlɨ̀ waa ale a nyɨꞋte ndɨ bòt Yesò bàgème a Màsèdonìà bɔ̂ Akayà e bɔ ndɨ bɔ̀ɔ me tseke la.

⁸Ntu̧ Ntsɔ̧̀ Yesò yaa lè kaꞋa dzə abua yɨ̧ e ghà wuê ndaꞋa Màsèdonìà bɔ̂ Akayà. Bòt èdziꞋ ègème e zə fɔ̀ɔ̀le ndɨ bɨ zì mèntɨ̧ɨ̧ mɨ̧ ane Mbɔ̧ɔ̧mà la, tè ànəa ko à ka tsi ngu bàa mě shu awɔb la.

⁹Bòt ngaa bàgème aà ndàꞋà ndɨ bɨ li mbà̧à̧ àwa àfɨ̀Ꞌ yu ba li nkɨ̀Ꞌɨ̂ emù àwɨ̧ la, mè shua ndɨ bɨ sà bènàmbəa bɨ̧, tè ntsìꞋa ntsàꞋtà wuê ngule Mbɔ̧ɔ̧mà yû̧ la.

¹⁰Bɔ ko mɨ̧̂ nê, bɨà nchɨ̀Ꞌà Waã tò taa chu a ègwet. Waã tò waa wu Yesò Klistò wu Mbɔ̧ɔ̧mà lè yu̧u̧me atò la, è mè ngu tòà tà tsì àwa a èbem ntsǒ Mbɔ̧ɔ̧mà yu tàa li nɨ esaꞋa bòt kàbɔ̀ŋ la.