Read Mundani 1 Tèsàlonikà 3 Bible Online

1 Tèsàlonikà 3 - Mundani bible

1 Tèsàlonikà 3

¹Mbɨ̀Ꞌɨ̀ ba nyɔꞋtè nê ba kɨ eye awɨ̧ ngɨ̀ kekaŋ a me saa wa la, ba ye nê a bɔ̂ŋ nê bà tseke Atèns,

²bà tsàa wanyɨ wa Tɔ̀màtià, wɔ̀fàꞋ Mbɔ̧ɔ̧mà abua yɨ̧. Ba tò ba aà fàꞋà nɔ̂, a màntsɔta Ntu̧ Ntsɔ̧̀ Yesò Klistò. Ba li ntsà atò nê tà kɨꞋɨ ndɔ̀ktè mèntɨ̧ɨ̧ mɨ̧, ngɨ̀ bɨ̀ me kweele ane èntɨ̧ɨ̧ wɨ̧ wu bɨ zi ane Yesò Klistò la.

³Ba li ngua ngɨ̀à ale mbɨ̀Ꞌɨ̀ ngoꞋ tu bòt e ghɨ̂ bɨ ye la te ghɨ̀ wòt kǒ ane yɨ̧ tsì èntɨ̧ɨ̧ vi ane Yesò. Bɨ̀a mbɔŋ bɨ ko nê èwuu ngoꞋ tàa wu àbəꞋa èghɨ e bɔ ndɨ àa ye awa bàa bòt Mbɔ̧ɔ̧mà la.

⁴Ba li mbèle ba nɨ̧̀ ba ale ndzaŋe shu awɨ̧, nê bòt aa li me kɨ àtsəa ya ba nɨ̧̀ ba enɨ. Mènəè maa bê ntè wuê mbɨ̀Ꞌɨ̀ bɨ ko la.

⁵Mbɨ̀Ꞌɨ̀ à yaa a ghɨ̀ e ntsiꞋa mbà̧aã èntɨ̧ɨ̧ am kekaŋ la, e tsàa a Tɔ̀màtià nê tà kɨꞋɨ ndzě ndɨ bɨ̀a mbà̧aã ànəa Yesò la. Me ghɨ̀ ale ngua mbɔ̀ɔ̂ mbɨ̀Ꞌɨ̀ ateko Satàn è kubte mèntɨ̧ɨ̧ mɨ̧ tè ngɨ̀ àfàꞋa ya yu ba li nkɨ̀Ꞌɨ̂ abàꞋ ŋu ngɨ̀ la a tsè àku.

⁶Ka nè àfɨ̀Ꞌ yaa, Tɔ̀màtià è kua àpfəè ayɨ̧ tè shu awa ànəa ntsɔ̧̀ a ghɨ̀ mèntɨ̧ɨ̧ ma me bɔ̀ la. Tà shu awa nê mèntɨ̧ɨ̧ mɨ̧ bele ane Yesò, bɨ mè mbèla nkɔ̀ŋkà bɔnyɨ bɨ̧ mè shu nê bɨà ntsèka mɨ̀ɨ̀tà àwa ntsɔ̧̀, mè nkɨ eye awa wuê mbɨ̀Ꞌɨ̀ bàa nkɨà àwɨ̧ eye mɨ̧̂ la.

⁷Bɔnyɨ ba, mbɨ̀Ꞌɨ̀ ba zə àfɨ̀Ꞌ yaa nê mèntɨ̧ɨ̧ mɨ̧ bela nkwèèla ane Yesò la, a taꞋa zì mèntɨ̧ɨ̧ ma a èbem ngoꞋ ta nè ngɨ̧̀ɨ̧̀nè yaa ba yea àdzìꞋ yaa la.

⁸Mèntɨ̧ɨ̧ ma fi àfɨ̀Ꞌ yaa na bɨ bele àghɨ yeamɔꞋ nè Tè Yesò la.

⁹BetsiꞋa ba ŋa mènkɔ̀ŋke abua Mbɔ̧ɔ̧mà àfɨ̀Ꞌ yaa nkàà wɨ̧. Ba kɔ̀ŋka Mbɔ̧ɔ̧mà nkàà mèngùꞋte mu bɨ ghɨ̂ ba bɔ a mbì tò la.

¹⁰Baa shù̧ù̧ta Mbɔ̧ɔ̧mà ètsəꞋ nè nèngû̧ nè èntɨ̧ɨ̧ wa ègème nê, tà ŋa awa èlu̧ bàambɔŋ è kɨꞋɨ mè ngu nè nɨ̧̀, mbɨ̀Ꞌɨ̀ enyɨꞋte awɨ̧ ndɨ bɨ̀a paa me nèèta ndzìà mèntɨ̧ɨ̧ mɨ̧ ane Mbɔ̧ɔ̧mà la.

¹¹Baa ntsàꞋtà nê, Tǎt wa Mbɔ̧ɔ̧mà zìambɔŋ bɔ̂ Yesò Lefɨ̀Ꞌ wa è ghaꞋa alu̧ bà kɨꞋɨ ndzè àwɨ̧.

¹²Ba mè ntsàꞋtà nê Lefɨ̀Ꞌ ghɨa èkɔŋ wɨ̧ ane bɔnyɨ bɨ̧ è me kweela ngà nè mbì, bɨ̀ mèe me nèèta nkɔ̀ŋkà waa waa wuê mbɨ̀Ꞌɨ̀ bàa nkɔ̀ŋkà àwɨ̧ la.

¹³Bɨ me ghɨ̀ ane ko Mbɔ̧ɔ̧mà naa zì mèntɨ̧ɨ̧ mɨ̧ e mě ghɨ̌ bɨa tsiꞋi bòt tò nènkèm mbɨ̀Ꞌɨ̀ è li e wu ane àli yu Yesò Lefɨ̀Ꞌ wa nàa kɨꞋɨ ne bòt bi bàgème la, bɨ tɨ̧ɨ̧ a mbì Tǎt wa Mbɔ̧ɔ̧mà kà ye àghɨa wòt nàa fèèlè àwɨ̧ adù̧ la.