Read Mundani 1 Tèsàlonikà 5 Bible Online

1 Tèsàlonikà 5 - Mundani bible

1 Tèsàlonikà 5

¹Bɔnyɨ, ba bakà tsi ndzè lə bàa eshɨ e shu awɨ̧ àfɨꞋa èghɨ bàa àa li me ghɨ̀ la.

²Bɨ̀a mbɔŋ e neetè nko nê, Tǎt wa Yesò naa li kɨꞋɨ ka bòt e koê, mbɨ̀Ꞌɨ̀ tsɔŋ nàa ngɨ̀ tà kɨꞋɨ ètsəꞋ kà bòt e koê la.

³Naa li ngu àfɨꞋa bòt e buêꞋ me shu nê èdziꞋ ègème e nɔ̀ŋke ntsɔ̧̀ tè àghɨ à ka tsi ngu e ghɨ̀ la, ka ngoꞋ kèkweelè bê nkwène adù̧ yɔb mbɨ̀Ꞌɨ̀ waã nàa ngɨ̀ è lɔꞋɔ ane àvi la, tè bɔ̀ ka tsi nkoê ndùùlà.

⁴Ka bɨ̀a bɔnyɨ bɔ̧ aa kà tseke mbɨꞋɨ̀ bòt bu bɔ̀ wu a èbem ndzěm la. È wu ale, àlia mbɔŋ à kâ kɨ̀Ꞌɨ̂ kà bɨ koê mbɨ̀Ꞌɨ̀ tsɔŋ nàa ngɨ̀ tà kɨ̀Ꞌɨ̂ bəèꞋəè lob wòt kà tà koê la a.

⁵Bɨ̀agème wu bòt bɔ̀ɔ ntsèka a èbem èkaꞋà, ngȩ̀ȩ̀nà a èbem àbȩ nèngû̧ la. Baa kà tseke mbɨꞋɨ̀ bòt bɔ̀ɔ ngɨ̀à mènəè mɔb ètsəꞋ a èbem ndzěm la.

⁶È wu ale, bà ka me li mbɨꞋɨ̀ bòt bu kà zi mèntɨ̧ɨ̧ mɔb ane Yesò àa ndìa la. Bà tseka àtatsi me chɨ̀Ꞌɨ.

⁷Wu ètsəꞋ ka bòt àa ndìa la, è mè ngu ètsəꞋ ka bòt àa nua mbèa la.

⁸Ka è me wu awa wu bàa ngȩ̀ȩ̀nà nèngû̧ la, bà me kuule ènyit ya, ndzì mèntɨ̧ɨ̧ ma ane Yesò mè mbɔ èkɔŋ. Màngɨa ale naa wu mbɨ̀Ꞌɨ̀ ba kwaãaã ndǐ àtɨ̧ɨ̧na yu bèshujà àa nkwà̧aã nɨa nkàbta bèghèmnà bɔb ka nga èbet la. Mèe nɔ̀ŋè ntɨ̀ ya me chɨ̀Ꞌɨ̀ àli yu Yesò Klistò nàa li kɨꞋɨ e ghɨ̌ baa peme la, è wu mbɨ̀Ꞌɨ̀ ntà̧ bɔ ghɨ ane àtɨ̧ɨ̧na baa kwaãaã la.

⁹Mbɔ̧ɔ̧mà li tà kà wua ndàà wa nê ntsǒ zi li nɔ̀ŋke àtsəa ya bà ye ngoꞋ. Tà li ngua ndàà wa mbɨ̀Ꞌɨ̀ e ghɨ̌ Yesò Klistò Lefɨ̀Ꞌ wa naa ŋa awa mèmpème kàlìà.

¹⁰Tà li mpfə ane ànəa ya mbɨ̀Ꞌɨ̀ tà li tà kɨꞋɨ, è maa è wu nê ba bele èbe yu̧ kò ba pfəꞋtè leꞋ, ba tò ba e wu nɔ̂.

¹¹È wu ale, waa waa ane yɨ̧ me zǐ èntɨ̧ɨ̧ wanyɨ vi mè ntɨ̀ŋe atò wuê mbɨ̀Ꞌɨ̀ bɨ̀a ngɨ̀à àfɨ̀Ꞌ yaa la.

¹²Bɔnyɨ ba, baa shù̧ù̧ta awɨ̧ nê bɨ̀ me ŋa kènuke abua bòt bu bɔ̀ɔ ndâ faꞋa ayɔɔ yɨ̧ la. Baa shua bòt bu Mbɔ̧ɔ̧mà tsia àtsəa yɨ̧ nê bɔ̀ me kɨɨte awɨ̧ ndɨ bɨ̀a me tseke la.

¹³Bɨ̀ la me kukte awɔb mè nkɔ̀ŋkà àwɔb ntsɔ̧̀ ane àfàꞋ yu bɔ̀ɔ fàꞋà la. Bɨ̀a mbɔŋ è me tseke ane àlàŋkè bɨ bɔnyɨ bɨ̧.

¹⁴Bɔnyɨ, baa shù̧ù̧ta awɨ̧ nê bɨ̀ səèŋke ètû̧ bèlɔŋ, ndzì mèntɨ̧ɨ̧ bòt bu bɔ̀ɔ mbɔ̀ɔ la, ntɨ̀ŋe bòt bu bɔ bɔ̀ɔ njùa la, mè me bɔɔle awɨ̧ ka ngɨ̀à mènəè nè waa waa.

¹⁵Ko mbɨ̀Ꞌɨ̀ bɨ bɨ̧ɨ̧nè wòt kǒ vəə a kàbɔ̀ŋ ane kàbɔ̀ŋ, ka bɨ̀ me nyɔ̀Ꞌte àfɨ̀Ꞌ àgème ngɨ̀à a ntsɔ̧̀ a kètsìà wɨ̧ fɔɔle abua waa waa.

¹⁶Bɨ̀ me wùꞋtè àwɨ̧ àfɨ̀Ꞌ àgème,

¹⁷mè ntsàꞋta a Mbɔ̧ɔ̧mà àfɨ̀Ꞌ àgème.

¹⁸Bɨ̀ me kɔ̀ŋkè a Mbɔ̧ɔ̧mà ane àghɨ àgème, ka ghǎ e màà ngɨ̀à leꞋ. Eyaa wu ndɨ Mbɔ̧ɔ̧mà nàa nkɨà nê bɨ̀a wu bɨ̀ tsiꞋi àghɨ yeamɔꞋ nè Yesò Klistò la è me ghɨ̀ la.

¹⁹Bɨ̀ ka nkàle àfaꞋa Fo Mbɔ̧ɔ̧mà.

²⁰Bɨ̀ ka me waa ànəa wòt làꞋa ane àtɔŋ Mbɔ̧ɔ̧mà la.

²¹Bɨ̀ lȩ̂ èngà̧ ègème waa waa làꞋà la, ndze nê tè e dzə abua Mbɔ̧ɔ̧mà leꞋ, mbɔ̂ mbɨ̧̀ɨ̧̀nê èwe àa mbɔ̀ la.

²²Bɨ̀ tsì àbu ayɨ̧ ane kàbɔ̀ŋ ègème.

²³TsiꞋ Tǎt wa Mbɔ̧ɔ̧mà wu tàa ngɨ̀à ba bɔ àlàŋkà èntɨ̧ɨ̧ la ghɨa bɨ̀ tsiꞋi mbɨꞋɨ̀ tòà ane balu̧ bàgème. TsiꞋ mèntsèke mɨ̧ nènkèm, nè mèmɨ̀ɨ̀te mɨ̧, nè mbɨ̧̀ ènyit yɨ̧ è wu ka ye àghɨa wòt nàa fèèlè àwɨ̧ adù̧ la, tè ndɨ Yesò Klistò Lefɨ̀Ꞌ wa nàa li mèe ekɨꞋɨ la.

²⁴Tòà wu tà làà àwɨ̧ ane bòt bi la naa ghɨ̌ ale, ngu nê tàa ngɨ̀ tà kaꞋa ànəê, tè tà ghɨ̀.

²⁵Bɔnyɨ ba, bɨ̀ me tsàꞋte a Mbɔ̧ɔ̧mà ane ya.

²⁶Bɨ̀ taꞋa bɔnyɨ bɨ̧ bàgème ntsàꞋtè àwɔb mbɨ̀Ꞌɨ̀ bòt Mbɔ̧ɔ̧mà.

²⁷E ngua shua wɨ̧ ane èlen Tè Yesò nê, bɨ̀ tɔ letà waa abua bɔnyɨ ba bàgème.

²⁸Maà ntsàꞋtà nê, tsiꞋ Yesò Klistò Lefɨ̀Ꞌ wa me kɔ̀ŋkè àwɨ̧ mè nyɨ̀Ꞌta a ntsɔ̧̀ vi abua yɨ̧.