Read Mundani 2 Tèsàlonikà 2 Bible Online

2 Tèsàlonikà 2 - Mundani bible

2 Tèsàlonikà 2

¹È me wu ane ànəa Yesò Klistò Lefɨ̀Ꞌ wa, ndɨ tàa mèe gheble avi ekɨꞋɨ la, nè ndɨ bàa li ebù̧ù̧te ewu ne tò la, ko e ngua shù̧ù̧ta wɨ̧ à bɔnyɨ nê,

²bɨ̀ ka sàŋ ànəa ko a gheblè ètsə bɨ̧ ngɨ̀ bɨ yaŋe mbènte mbɨ̧̀ɨ̧̀ne nê, àli yu Lefɨ̀Ꞌ wa nàa mèe kɨꞋɨ la a kɨꞋɨ tê ndɔ̀Ꞌ. A teko wu ànəa wòt kǒ laꞋnê è shua Fo Mbɔ̧ɔ̧mà abua zi la, kò èngǎ̧ wòt kǒ laꞋnê e kɔꞋɔ àtsəa zi la leꞋ, kò wuê àkatè ako bɔ laꞋnê a dzə abua ya la leꞋ.

³Bɨ̀ ka mbɨ̧̀ɨ̧̀ne wòt kǒ fɨte awɨ̧ ka wuê ane alu̧ kǒ, ngu nê betsiꞋa àlia ngaa à ka kɨꞋɨ̀ tè àfɨ̀Ꞌ yu bòt nyaŋ àa me səèꞋtè àwɔb ane Mbɔ̧ɔ̧mà nè mènəè tò la a kùꞋ. Eyaa wu àfɨ̀Ꞌ yu wòt wu tàa ka bê nkɨ ezə ànəa Mbɔ̧ɔ̧mà ko tsa la nàa pùùlà la. Tà wu wòt wu Mbɔ̧ɔ̧mà nàa li e nyɔŋe atò a èbem èwet la.

⁴Taa kɨꞋɨ etu̧u̧ àghɨ àgème bòt àa ngùꞋtà nê wu mbɔ̧ɔ̧mà la, e me ŋeꞋe avi a ègwet shua nê ye tse bùà ègème. Taa ghǎ fɔɔle a èbem lob nɨ̧ Mbɔ̧ɔ̧mà, e tseke a èbem e me shu bòt nê zìambɔŋ ka ye wu Mbɔ̧ɔ̧mà la.

⁵E ndi shu awɨ̧ mènəè maa ègème àfɨꞋa e ndi mbèle ba nɨ̧̀ ba la kò bɨ leenè le è?

⁶Bɨ ko àghɨa nkèla atò nê tà ka nkɨ̀Ꞌɨ̂ àfɨ̀Ꞌ yaa la. A wu anè mbɨ̀Ꞌɨ̀ taa tsiꞋi ekɨꞋɨ àfɨꞋa tà bɔ ndɨ tàa kɨꞋɨ la.

⁷Bòt nyaŋ bɔ̀ɔ ka bê nkɨ ezə mènəè Mbɔ̧ɔ̧mà la e yaŋe ewu àbȩ tè ndɔ̀Ꞌ, ka ndàꞋ àghɨa àa ghɨ baa ko ayea mbɔŋ la, wu àghɨa Mbɔ̧ɔ̧mà ghɨ baa ko la. Ka betsiꞋa àghɨa e ndi nê aa ghɨ la à ka ghɨ tè Mbɔ̧ɔ̧mà ghɨ̀ ntsì wòt wu nkèla èlu̧ nê èghɨ ngaa ègème è ka ngɨ̀ la.

⁸Wu àfɨꞋa mbɔŋ ka wòt wu tàa ka bê nkɨ ezə ànəa Mbɔ̧ɔ̧mà la nàa pùùlà la. Ka Yesò Lefɨ̀Ꞌ naa me ghɨ̀ tê nkɨ̀Ꞌɨ̂ ane ènɨ̧ vi mbê foo atò, ngɨ̀ àyea tò a mì.

⁹Wòt wu kà bê ngua nkɨ ezə ànəa Mbɔ̧ɔ̧mà la naa me kɨꞋɨ, e kɨꞋɨ nê mètàŋ Satàn e me nɨa nyɨ̀Ꞌta nê ye bɔ tèwuute mètàŋ tègème, ngɨ̀à tèwuute ènəê kà ye fɨ̀Ꞌ, mè ndùta tèkaŋtsə nɨa fɨ̀ta bòt.

¹⁰Taa kɨꞋɨ enɨ àbɨꞋta èntɨ̧ɨ̧ efɨte bòt bu nga bê eleme la ane balu̧ bàgème. Bɔ gha eleme nkàà nê, bɔ li bɔ̀ ka wua nkɔ̀ŋkà nkûŋ yu nàa ghɨ̌ bɔɔ peme la.

¹¹Ale, Mbɔ̧ɔ̧mà wu ghɨ̌ bɔɔ bɔ mènkwàꞋte kàbɔ̀ŋ tè naa ghɨ bɔɔ bɨ̧ɨ̧ne mènəè fɨ̀te.

¹²Àfɨta mbɔŋ aa ghɨ ndɔ̀ Mbɔ̧ɔ̧mà naa nɔ̀ŋke àtsəa yɔb wu bàgème bɔ̀ɔ nkɔ̀ŋkà e me ghɨ a kàbɔ̀ŋ, mbɔ̂ ntù̧u̧ ebɨ̧ɨ̧ne èngǎ̧ nkûŋ la.

¹³Bɔnyɨ, bɨ̀a wu Mbɔ̧ɔ̧mà nàa nkɔ̀ŋkà àwɨ̧ la, ba bɔ ndɨ bàa me kɔ̀ŋka Mbɔ̧ɔ̧mà ane ànəa yɨ̧ àfɨ̀Ꞌ àgème la. Aa ale nkàà nê Mbɔ̧ɔ̧mà li me laꞋ nê yea ngɨ̀à ngɔ̀ŋ, ndàà àwɨ̧ tè ndɔ̀Ꞌ, mbɨ̀Ꞌɨ̀ e ghɨ̌ bɨa peme. Mbɔ̧ɔ̧mà li ngɨ̀ ayaa ane Fo zi yu tà li ngɨ̀ è ghɨ̀ àwɨ̧ bɨ tsiꞋi mbɨ̀Ꞌɨ̀ tòà la, mè nè ndɨ bɨ li ndzì èntɨ̧ɨ̧ ane èngà̧ wu è wu nkûŋ la.

¹⁴Tà li nɨ Ntu̧ Ntsɔ̧̀ zi yu ba li ndaꞋa abua yɨ̧ la, ntɔ awɨ̧ nê bɨ̀ wu bòt bi mbɨ̀Ꞌɨ̀ bɨa bɔ ènɨ̧ wu ane Yesò Klistò Lefɨ̀Ꞌ wa la.

¹⁵Bɔnyɨ, è wu ale bɨ̀ ka mbɨ̧̀ɨ̧̀nê àghɨa ko a tsì èntɨ̧ɨ̧ wɨ̧ ane mènəè Yesò. Bɨ̀ neeta mbà̧aã nkûŋ yu bɔ li nyɨ̀Ꞌte awa, bàambɔŋ e mè nyɨ̀Ꞌte àfɨ̀Ꞌ yu ba li ngua ndàꞋà èngǎ̧ Mbɔ̧ɔ̧mà abua yɨ̧, mè shu a èbem àkatè yu ba li shɨ abua yɨ̧ la.

¹⁶Maà ntsàꞋta Yesò Klistò Lefɨ̀Ꞌ wa zìambɔŋ bɔ̂ Tǎt wa Mbɔ̧ɔ̧mà ane ànəa yɨ̧. Mbɔ̧ɔ̧mà nàà nkɔ̀ŋkà wa, mè nɨa ntsɔ̧̀ vi ndzìà mèntɨ̧ɨ̧ ma àfɨ̀Ꞌ àgème, ngɨ̀à ba kuula mèntɨ̧ɨ̧ ma nchɨ̀Ꞌà àghɨ yu è wù àyea ntsɔ̧̀ la.

¹⁷E tsàꞋtà nê tà ghɨa bɨ̀ bɔ èntɨ̧ɨ̧ kekweelè, mè ngɨ̀ ndɨ bɨ̀a me ko ntsèka àfɨ̀Ꞌ àgème ngɨ̀à mè ndàꞋà wuê mènəè nàa mbɔ̀ la.