Read Mundani 2 Tèsàlonikà 3 Bible Online

2 Tèsàlonikà 3 - Mundani bible

2 Tèsàlonikà 3

¹Bɔnyɨ, enɨ lìa, bɨ̀ me tsàꞋte a Mbɔ̧ɔ̧mà ane ya nê, èngǎ̧ Tǎt wa Yesò è gha àdzìꞋ àgème, bòt è me bɨ̧ɨ̧ne wùà nè mèngùꞋte, mbà̧aã mbɨ̀Ꞌɨ̀ bɔ bɔ ndɨ bɔ̀ɔ baãaã la, mbɨ̀Ꞌɨ̀ e li nkɨ̀Ꞌɨ̂ abua yɨ̧ ngu la.

²Bɨ̀ mèe me tsàꞋte nê, Mbɔ̧ɔ̧mà ka mbɨ̧̀ɨ̧̀ne bòt kàbɔ̀ŋ e ghɨ̀ baa ye ngoꞋ, ngu nê è ntsě waa waa tà bɨ̧ɨ̧ne èngǎ̧ Mbɔ̧ɔ̧mà la.

³Tǎt wa Yesò wu wòt betsiꞋa bɨ lɨ̀Ꞌà wɨ̧ ane tò la. Tàà ghɨ̌ mèntɨ̧ɨ̧ mɨ̧ na me kweele e mèe me baabe awɨ̧ abua Satàn wòt kàbɔ̀ŋ.

⁴Yesò ghɨ̂ ba lâ nko nê, bɨa me ghɨ èghɨ bu ègème bàa shua wɨ̧ la, nɨa ngà nè mbì.

⁵Baa tsàꞋtà nê, Yesò Klistò ghɨa bɨ̀ kuule mèntɨ̧ɨ̧ mɨ̧ me kweele ane mènəè tò, mè nko ndɨ Mbɔ̧ɔ̧mà nàa ndâ nkɔ̀ŋkà àwɨ̧ la.

⁶Bɔnyɨ, ba wua shua wɨ̧ ane èlen Yesò Klistò Lefɨ̀Ꞌ wa nê, bɨ̀ ka mbɔ̀ àghɨa ko a màngɨa ne bɔnyɨ ba bòt Yesò bu bɔ̀ɔ ndȩȩta a màfaꞋa, bɔ̀ ka wua ngɨ̀à mbɨ̀Ꞌɨ̀ ba li nyɨ̀Ꞌte awɨ̧ nê bɨ̀ me ghɨ̀ la.

⁷Bɨ̀a mbɔŋ e lâ nko nê, bɨ bɔ ndɨ bɨ̀a me ghɨ̀ mbɨ̀Ꞌɨ̀ ba li ngua ngɨ̀à a kètsìà wɨ̧ la. Ba li bà ka wua ndȩ̀ȩ̀ta ane àfàꞋ.

⁸Bà le kaꞋa wua njɨ̀a àghɨ àku. Ka ba li ngua fàꞋà mbɔ tèbəꞋtsə, ètsəꞋ bɔ̂ nèngû̧, mbɨ̀Ꞌɨ̀ ka ba me ŋa ngoꞋ abua wòt kǒ ane yɨ̧.

⁹È li ngu àdziꞋa ya e shu nê bɨ̀ me tɨŋe awa, ka ba li bà ka ghɨ ale. Ba li ngua ntsèka fàꞋà àfɨ̀Ꞌ àgème mbɨ̀Ꞌɨ̀ bɨa ye ndɨ ba ghɨa la e me ghɨ̀ àyɨ̧ a èlɨ mbɔŋ.

¹⁰È li ngu àfɨꞋa bà bele ba nɨ̧̀ ba la ba shu abua yɨ̧ nê, “Wòt bakà wua nkɨ me fàꞋà, tà ka njɨ àghɨ.”

¹¹Ba làꞋà anè nkàà nê, bɔ shu awa nê bòt ko ayɔɔ yɨ̧ aa ndȩȩta a màfaꞋa, bɔ̀ ka wua ngɨ̀à àghɨ, me ŋeꞋe wuê awɔb nchɨ̧̀a a èbem mènəè bòt tsa.

¹²Ba wua shua mè ŋwèèlà bòt baa ane àtɔŋ yu Yesò Klistò Lefɨ̀Ꞌ ŋa abua ya la nê, bɔ bɔɔle awɔb me fàꞋa mbɨ̀Ꞌɨ̀ ebɔ ètsəèjɨ wɔb.

¹³Ka è me wu awɨ̧ à bɔnyɨ ba, bɨ̀ ka nkà̧aã a màngɨa ntsɔ̧̀.

¹⁴Wòt kǒ ayɔɔ yɨ̧ tu̧u̧ e ghɨ̀ mbɨ̀Ꞌɨ̀ ba shu a èbem àkatè ya la, bɨ nɔ̀ŋè èghɨ ane ŋut, bɨ̀ ka mbɔ̀ àghɨa ko e ghɨ̀ ne ŋut, mbɨ̀Ꞌɨ̀ taa bɔ àtsəa kɔꞋɔ.

¹⁵Mbɔ̂ bɨ̀ ka nɨ atò mbɨ̀Ꞌɨ̀ wɔ̀mbù̧, ka bɨ̀ me ŋa atò nkɨà mbɨ̀Ꞌɨ̀ wanyɨ wɨ̧ wòt Yesò.

¹⁶Baa ntsàꞋtà nê, Tǎt wa Yesò zìambɔŋ, wu tàa ngɨ̀à bòt e bɔ àlàŋkè la, ghɨa bɨ̀ bɔ àlàŋkè a mèntɨ̧ɨ̧ mɨ̧ ane balu̧ bàgème àfɨ̀Ꞌ àgeme. Baa ntsàꞋtà nê, Tè Yesò wu ne nɨ̧̀ bɨ̀agème.

¹⁷Wu mmɔ̌ Pɔ̂l mâ nɨ àbu am mmɔ̌ mbɔŋ ka shɨ àdziꞋ ya la: “Maà ntsàꞋtà wɨ̧.” Eyaa wu ndɨ màa nchɨ̀Ꞌà kèti fɔ̧̀ ane èkatè bɔ̧ ègème la; wu ndɨ màa shɨa la.

¹⁸Baa ntsàꞋtà nê, Yesò Klistò Lefɨ̀Ꞌ wa me nyɨꞋte a ntsɔ̧̀ vi abua yɨ̧ bɨ̀agème.