Read Mundani 1 Tɔ̀màtià 1 Bible Online

1 Tɔ̀màtià 1 - Mundani bible

1 Tɔ̀màtià 1

¹Letà Pɔ̂l wantu̧ Yesò Klistò ane mengɨ̌ Mbɔ̧ɔ̧mà Mpemnà wa bɔ̂ Yesò Klistò wu ntɨ̀ ya wu ane tò la,

²Abua Tɔ̀màtià, ngule waã am ane Yesò. Maà shù̧ù̧ta nê Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ wa è me nyɨꞋte a ntsɔ̧̀ wɔb abua yê, nkua tèsȩ tê, mè ngɨ̀ à bɔ àlàŋkè a èntɨ̧ɨ̧ wê.

³Maà nkɨà nê, à tseke a Efesɔ̀s wuê mbɨ̀Ꞌɨ̀ e ndi shu awê àfɨ̀Ꞌ yu e ndi ngu alu̧ ngà a Màsèdonìà la. Tseke abàꞋ və mbɨ̀Ꞌɨ̀ e kele bòt bu bɔ̀ɔ nyɨ̀Ꞌta bòt mènəè fɨ̀te la.

⁴Shu abua yɔb nê, bɔ̀ sà tèlète kà ye àtsə, nè ànyaꞋne tèlente bètǎt nyaꞋ ba tu bɔ̀ɔ ndzìa ntɔ̀ la. ÀfaꞋa èghɨ baa a ntsě ane èngǎ̧ Mbɔ̧ɔ̧mà wu ba wu ko, na ba zìà mèntɨ̧ɨ̧ ma ane tò la. Aà ngɨ̀à bòt e kàànà wuê mènəè a kètsìà wɔb.

⁵E shua nê kele awɔb anè mbɨ̀Ꞌɨ̀ bɔɔ me kɔ̀ŋkè bɔnyɨ bɔb nè èntɨ̧ɨ̧ kà wua fèèlè àwɔb, mè me ghɨ̀ wuê èghɨ bɔ ko nê e kùꞋù la, mè me nèèta ndzìà mèntɨ̧ɨ̧ mɔb ane Mbɔ̧ɔ̧mà.

⁶Bòt ko e lùùlà mènəè ntsɔ̧̀ maa, ngà nyɔ a èbem mèngǎ̧ èkèghɨ̧̀.

⁷Bɔɔ̀ nkɨ̀ ewu bènyɨꞋtà mbɨ̧te Mbɔ̧ɔ̧mà, ka bɔ̀ ka ko mèngà̧ mu bɔ nyɨꞋtà la, nè èghɨ bu bɔ̀ɔ ngù̧a nkùꞋ tɔb ndàꞋà la.

⁸Ba ko nê mbɨ̧tsə teà mbɔ̀, na bòt e me paŋe mbɨ̀Ꞌɨ̀ bɔ wu me paŋe la.

⁹Ba chɨɨme nko ntsɔ̧̀ nê, Mbɔ̧ɔ̧mà li tà kà wua ngɨ̀à mbɨ̧ taa abua bòt bɔ tɨ̧ɨ̧ ndɨŋndɨ̀ŋ la. Tà li ngùa ngɨ̀à mbɨ̧tsə abua bòt bɔ̀ɔ mpààtà mbɨ̧tsə la, nè bòt àtsə àkekweelè. Mbɨ̧tsə te wu abua bòt bu bɔ̀ɔ ntsò̧ò̧ta a Mbɔ̧ɔ̧mà, mè ngɨ̀à mènəè kàbɔ̀ŋ la. Mè ngu abua bòt bu mènəè mɔb bakà tɨ̧ɨ̧ ndɨŋndɨ̀ŋ a mbì tò la, mè nè bòt bu bɔ̀ɔ ntsòꞋa èngǎ̧ tò la. Mbɔ̧ɔ̧mà li mèe ngɨ̀ mbɨ̧ taa abua bòt bu bɔ̀ɔ mbùŋà bètǎt bɔb nè bènyɨ̌ bɔb la, nè waa waa tàa mbùŋa bɔbȩ la.

¹⁰Mbɨ̧ taa te wu abua bòt bu bɔ̀ɔ nɔ̀ŋkà nè bèzi kà wu ebɔb la, nè mbâ̧ tu tèa mpàꞋta teko la. Mbɔ̧ɔ̧mà li ngɨ̀ mbɨ̧ taa abua bòt bu bɔ̀ɔ mbà̧aã bɔbȩ efɨ̧̀ɨ̧̀nà la. Mè ngɨ̀ abua bòt mèfà̧, nè bòt bu bɔ̀ɔ ndàꞋà mèfà̧ àtsəa bòt ko la, nè bòt bu bɔ̀ɔ ngɨ̀à mènəè kà kuꞋ ane èlɨ wu Mbɔ̧ɔ̧mà è nyɨꞋte awa nê bà me ghɨ̌ la.

¹¹Mènəè maa e dzə a èbem Ntu̧ Ntsɔ̧̀ yu Mbɔ̧ɔ̧mà li ndzì a tèkitebu taã nê è me tsɔ̀tè la. Ntu̧ mbɔŋ nàà nyɨ̀Ꞌta ènɨ̧ Mbɔ̧ɔ̧mà wu, tà wû ndàꞋ wòt bòt àa ngùꞋtà la.

¹²Maà ŋàa mènkɔ̀ŋke abua Yesò Klistò Lefɨ̀Ꞌ wa wu tà ŋa am mètàŋ ane àfàꞋ am la. Mâ kɔ̀ŋke atò ane ndɨ̀ wu tà ye nê, e ngu ngule wòt, mè ndȩ̀ am nê è me ghɨ̌ àfàꞋ àzi la.

¹³È li mbàte ngu àfɨꞋa mbì, e me làꞋa mènəè kàbɔ̀ŋ ane tò nkɨà àtsəa bòt tò enɨ, mè ntsò̧ò̧ta atò, tà bɔ̂ nkù tèsȩ taã. Me ku tèsȩ taã ale ngu nê e ndi è nka ko àghɨa e ngɨ̀à la, nkàà ndɨ̀ è baka zìꞋ ndzì èntɨ̧ɨ̧ am ane tò la.

¹⁴Yesò Klistò Lefɨ̀Ꞌ wa li nèètè ndɔ̀ɔ̀lè am, ngɨ̀ e ndzì èntɨ̧ɨ̧ am ane tò, mè me kɔ̀ŋkè atò, è wù àghɨa tàa ngɨa ane bòt bu bɔ̂ tò ba e tsiꞋi mbɨ̀Ꞌɨ̀ àghɨ yeamɔꞋ la.

¹⁵Èngà̧ waa e shua la wu ngule èngǎ̧ bòt e wu ebɨ̧ɨ̧ne, e mě zì mèntɨ̧ɨ̧ mɔb ègème adù̧ la. Yesò Klistò li nkɨ̀Ꞌɨ̂ a ngɔ̀ŋ ŋaa etsǐ bòt a èbem ndɔ̀ kàbɔ̀ŋ wɔb, e mbɔ̂ ngɨ̀a a kàbɔ̀ŋ tè ntsè bòt bàgème.

¹⁶Ka Yesò Klistò li nkù tèsȩ taã, è ngu wòt kàbɔ̀ŋ mbì la, mbɨ̀Ꞌɨ̀ enɨ e nyɨꞋte bɔbȩ ndɨ ye wu mbɔɔlà wòt ane àlia nè àlia la. Tà li ngùa nyɨ̀Ꞌta àyaa ane àlȩê enɨ elɔ̀ktè àtsəa bòt bu bɔ̀ɔ zì mèntɨ̧ɨ̧ mɔb ane tò, taa ŋa awɔb mèmpème kàlìà la.

¹⁷TsiꞋ bòt è wùꞋte a Mbɔ̧ɔ̧mà wu tà wu Fɔ̧̀ mè ngu wòt tàa mbà̧aã ngɔ̀ŋ àfɨ̀Ꞌ àgème la. Tà wu ndàꞋ Mbɔ̧ɔ̧mà wu tàa ka pfə, bɔ ka meè ngua dzea tò la. TsiꞋ mèngùꞋte wu abua tò ane àlia nè àlia. Àmèn.

¹⁸Waã am Tɔ̀màtià, mâ zì mènəè maa ègème a tèkitebu tê. Me ku̧u̧te mènəè mu bɔ li ndzaŋe elàꞋa ane yê ane àtɔŋ Mbɔ̧ɔ̧mà la, nɨ̀ mènəè ngaa nɨŋ nù èbele Mbɔ̧ɔ̧mà adù̧.

¹⁹Me zi èntɨ̧ɨ̧ wê wuê ane Mbɔ̧ɔ̧mà, mè ngɨ̀ èntɨ̧ɨ̧ wê è ka me fèèlè àwê a mbì tò. Bòt ko aà və bɔ tu̧u̧ e ghɨ̀ mènəè bɔ ko nê è kùꞋù la, tè ntsì mèntɨ̧ɨ̧ mɔb ane Yesò Klistò la.

²⁰Èbeko ane bòt ngaa wu Ghɨ̀menɔ̀s bɔ̂ Àlèkzandà. Mâ zì àwɔb wàa a tèkitebu Satàn. Àyaa aa nyɨꞋte awɔb nê, bɔ̀ ka ndi ndɔ̀Ꞌɔ̀ ane àli ako mè ndàꞋà a kàbɔ̀ŋ adù̧ èlen Mbɔ̧ɔ̧mà.