Read Mundani 1 Tɔ̀màtià 2 Bible Online

1 Tɔ̀màtià 2 - Mundani bible

1 Tɔ̀màtià 2

¹Ànəê a mbì e nkɨ enɔ̀ŋe adù̧ bòt Yesò la wu nê bɔ̀ me tsàꞋte a Mbɔ̧ɔ̧mà àtsəa waa waa. Bɔ̀ me shu̧u̧te a Mbɔ̧ɔ̧mà nê, tà me tɨŋe awɔb, ŋà àwɔb àghɨa bɔ̀ɔ nkɨ̀ŋkà la, ndɔ̀Ꞌ mè kɔ̀ŋkè a Mbɔ̧ɔ̧mà ane wòt ègème.

²Bɔ mè tsàꞋte a Mbɔ̧ɔ̧mà àtsəa bèfɔ̧̀, nè waa waa tàa mbà̧aã àlaꞋ la, mbɨ̀Ꞌɨ̀ baa me tseke ane àlàŋkè kà ye ànəa kàbɔ̀ŋ. À wu anè mbɨ̀Ꞌɨ̀ baa me nèèta ndzəèa a Mbɔ̧ɔ̧mà, mènəè ma naa mě me tsě ndɨŋndɨ̀ŋ.

³Àyaa aà mbɔ̀ a Mbɔ̧ɔ̧mà wu tà wu Mpemnà wa la,

⁴tà mè me kɔ̀ŋkè nê, bòt bàgème è pem nko èngǎ̧ tò wu è wû nkûŋ la.

⁵Aa ale nkàà nê Mbɔ̧ɔ̧mà nàà wemɔ̀Ꞌ, wòt tàa ntsəèꞋna àyɔ̀ŋ a kètsìà Mbɔ̧ɔ̧mà bɔ̂ bɔbȩ la mè ngu wemɔ̀Ꞌ. Ŋut wu Yesò Klistò à.

⁶Tà li ŋà àtsəa azi nɨŋ ngɨ̀ bòt bàgème e pem. Àyaa a li ngɨ̀ àfɨꞋa ntsɔ̧̀ nɨŋ nyɨ̀Ꞌte nê, Mbɔ̧ɔ̧mà nàà nkɨ etsǐ wòt ègème a èbem mènəè kàbɔ̀ŋ tò.

⁷Eyaa wu lə Mbɔ̧ɔ̧mà li ndzì am ane wantu̧ vi nê, è me tsɔ̀te ntu̧ yaa abua bòt kà wu Bèjuê la. Tà li nê, è nyɨꞋte èngǎ̧ vi wu è wû nkûŋ la abua bòt, mbɨ̀Ꞌɨ̀ bɔɔ la ebɨ̧ɨ̧ne. È nka laꞋà mèfà̧. E shua nkûŋ.

⁸Maà nkɨà nê, àdzìꞋ àgème bòt e bù̧ù̧te etsàꞋte a Mbɔ̧ɔ̧mà la, mbâ̧tsə tè lɔ̀kè èbu bɔb ntsà a ègwet ntsàꞋtè a Mbɔ̧ɔ̧mà. Bɔ bɔ ndɨ bɔ̀ɔ wu mbaãte mènəè mɔb tɨ̧ɨ̧ ndɨŋndɨ̀ŋ e mbì Mbɔ̧ɔ̧mà bɔ̀ ka meè ngua ntsòa kò ndzɔ̀ nè bòt la.

⁹È me wu bèzi e me kɨ nê bɔ̀ me kwaãaã ndǐ tɔb ane èlɨ ntsɔ̧̀. Bɔ ka me kwaãaã ndǐ tɔb mbɨ̀Ꞌɨ̀ bòt bɔ̀ɔ ŋeꞋe awɔb a ègwet la. Bɔ̀ ka me baꞋa ètsə bɔb ane ngwȩ̀tsə. Bɔ̀ ka me kwaãaã mèkù nè ndìte tèa ntsoa èkab la.

¹⁰Ka bɔ me ghɨ̌ wuê mènəè ntsɔ̧̀ nàa nyɨ̀Ꞌte nê bɔ wu bèzi bɔ̀ɔ ngùꞋtà a Mbɔ̧ɔ̧mà la.

¹¹Bèzi e buŋ nɨ̀ awɔb a si, bɔ̀ nyɨꞋte awɔb.

¹²Maà kà kɨ nê bèzi è me nyɨꞋte mbâ̧tsə, bɔ̀ ka ntsèkê àtsə ayɔb, bɔ me yute awɔb.

¹³Bɔ̀ ko nê, Mbɔ̧ɔ̧mà li mbɨ̀ ngɨa Adàm, ka ndɔ̀Ꞌ ngɨ̀ a Ive.

¹⁴È li è kà wu Adàm Satàn è fɨte la. È lè wu àvi bɔ li fɨ̀te atò tà pààtè mbɨ̧te Mbɔ̧ɔ̧mà la.

¹⁵A batè ngu anè, ka Mbɔ̧ɔ̧mà bɔ̂ ngu e ghɨ̌ bèzi aa ghǎ a èlɨ̀ wu bɔ̀ɔ mbia la e peme. Bɔɔ peme na bɔ zì mèntɨ̧ɨ̧ mɔb ane tò, me kɔ̀ŋkè bòt, mènəè mɔb mè ntɨ̧ɨ̧ ndɨŋndɨ̀ŋ a mbì tò, bɔ mè me ghɨ̀ mènəè mbɨ̀Ꞌɨ̀ bòt tò la.