Read Mundani 1 Tɔ̀màtià 3 Bible Online

1 Tɔ̀màtià 3 - Mundani bible

1 Tɔ̀màtià 3

¹Ànəa e shua la wu nkûŋ. Wòt me kɨ ewu àtsəa bòt Yesò, ko wu àfaꞋa ntsɔ̧̀.

²Wòt àtsəa bòt Yesò kâ ngu wòt bòt àa ndàꞋà kàbɔ̀ŋ adù̧ tò la. Tà bɔ̂ ndɨ tàa bɔ wuê àvi wemɔ̀Ꞌ, mè me baãaã èntɨ̧ɨ̧ vi ka ngɨ̀à mènəè la. Ŋut me ghɨ̌ mènəè wuê ane èlɨ bòt àa me zə atò la, nko a màsea bègɨ̧̀ ntsɔ̧̀, nko a mànyɨꞋte mènəè ntsɔ̧̀ mɨ̧̂.

³Wòt àtsəa bòt Yesò ka ngu àbaala mèlùꞋ, tà ka ngu wòt tàa nkàà mèntɨ̧̀ la. A nyɨꞋte nê, tà wu mbɔɔlè wòt tàa ndàŋkà mènəè la, tà ka me zǐ èntɨ̧ɨ̧ vi ane èkab.

⁴Ŋut è bɔ̂ ndɨ tàa me koa mbà̧aã lob zi ntsɔ̧̀, mè ngɨ̀ ndɨ bɔ̧ tò àa me nèèta ndzəèa atò la.

⁵Wòt bakà wu ko ebaãaã lob zi, tà ghɨ̀ na ka nko mbà̧aã bòt Mbɔ̧ɔ̧mà à?

⁶Ko mbɨ̀Ꞌɨ̀ bɨ nɨ wòt tà bèla ndzìà èntɨ̧ɨ̧ vi zǐ ane Yesò la ndzì àtsəa bòt Yesò, mbɨ̀Ꞌɨ̀ tà me ŋeꞋe avi a ègwet Mbɔ̧ɔ̧mà tsǐ mpəəte tò, mbɨ̀Ꞌɨ̀ tà li ngɨ̀ nè Satàn la.

⁷Wòt àtsəa bòt Yesò è bɔ̂ ndɨ tàa wu wòt bòt nàbȩ̂ àa ka laꞋa kàbɔ̀ŋ adù̧ tò la, mbɨ̀Ꞌɨ̀ ka tà lòo èku vi, nkwene a èbem àtaã Satàn.

⁸Bèdikɨ̀n mɨ̧̂ e bɔ̂ ndɨ bɔ̀ɔ wu bòt mènəè ntsɔ̧̀ la, bɔ̀ ka me fible bòt. Bɔ̀ ka me nu mèlùꞋ nyaŋ, bɔ̀ ka me kɨ nê àghɨ àgème wu ayɔb.

⁹Bɔ bɔ̂ ndɨ bɔ̀ɔ wu bòt bɔ neetè mbà̧aã èngà̧ wu Mbɔ̧ɔ̧mà è nyɨꞋte abua ya ka ba ko atò la, nè èntɨ̧ɨ̧ kà wua fèèlè àwɔb la.

¹⁰Bɨ me kɨ ezǐ bòt ane bèdikɨ̀n, bɨ bàŋè àwɔb, bɨ̀ ye nê bɔ kuêꞋ, ka bɨ zì àwɔb.

¹¹Bèzi bɔb e bɔ̂ ndɨ bɔ̀ɔ bɔ mènəè ntsɔ̧̀ la, bɔ̀ ka me ghɨ̀ mènàŋ. Bɔ̀ ka me nu mèlùꞋ nyaŋ. Bɔ̀ me ghɨ̀ wuê mènəè è kùꞋu ane balu̧ bàgème la.

¹²Dikɨ̀n è bɔ̂ ndɨ tàa bɔ wu àvi wemɔ̀Ꞌ, e mě me koa mbà̧aã bɔ̧ bi nè lob zi ntsɔ̧̀ la.

¹³Bòt e me fàꞋà ntsɔ̧̀ mbɨ̀Ꞌɨ̀ bèdikɨ̀n, ko bòt aa me zə awɔb, bɔ mè ngu me koa ndàꞋà ndɨ bɔ zì mèntɨ̧ɨ̧ mɔb ane Yesò Klistò la kà ye àtsəa kɔꞋɔ.

¹⁴Mbɨ̀Ꞌɨ̀ e shɨa letà waa abua yɨ̧ la, maà nkwàꞋtà nê, e mbele eyàŋe ekɨꞋɨ eye awɨ̧.

¹⁵Ka e mbakà yàŋè nkɨ̀Ꞌɨ̂, ko letà waa naa nyɨꞋte awɨ̧ ndɨ bàa bòt àndǎ̧ Mbɔ̧ɔ̧mà e bɔ ndɨ bàa me ghɨ̀ mènəè ma la. Eyaa wu àndǎ̧ bòt chɔsì Mbɔ̧ɔ̧mà wu tà wu yû̧ la. Bɔ wu èntɔ̧ nè àtetsi yu a baãaã èngǎ̧ Mbɔ̧ɔ̧mà wu è wû nkûŋ la.

¹⁶Ànəa ndò̧ yu ba ko ane èngǎ̧ Mbɔ̧ɔ̧mà la aà nkwèèla tè betsiꞋa wòt kà ko ntu̧. Yesò Klistò li mpùùlà ntsìꞋi wɔ̀bȩ̂. Fo Mbɔ̧ɔ̧mà è nyɨꞋte wòt tà wu wùà la, Bɔntu̧ Mbɔ̧ɔ̧mà e mè ndzě atò. Bòt e li ndàꞋà èngǎ̧ tò abua bòt èlaꞋ tsa, Bòt èdzìꞋ ègème a ngɔ̀ŋ ŋaa e zì mèntɨ̧ɨ̧ mɔb ane tò, Mbɔ̧ɔ̧mà nɨ atò a ègwet ntsìa a ègwet àtɨ̧a kèfɔ̧̀ àzi.