Read Mundani 1 Tɔ̀màtià 4 Bible Online

1 Tɔ̀màtià 4 - Mundani bible

1 Tɔ̀màtià 4

¹Fo Mbɔ̧ɔ̧mà nàà bê ndâ ndàꞋà shua nê, ngɔ̀ŋ naa li ngà me lìa, bòt ko e tsì mèntɨ̧ɨ̧ mɔb ane Yesò, ntsiꞋi me zə ànəa fote kàbɔ̀ŋ te fɨtà shua la, mè nkùŋà mènəè te nyɨꞋtà la.

²Bòt bu bɔ̀ɔ me nyɨꞋte èwuu mènəè maa la, wu bòt bu bɔ̀ɔ fɨta nê bɔ wu bòt Mbɔ̧ɔ̧mà la. Bɔ bakà tsi nko a ntsɔ̧̀, ngu nê Satàn ghɨ̂ mèntɨ̧ɨ̧ mɔb fene tê è kà tsi ngua fèèlè àwɔb.

³Èwuu bòt ngaa aà nyɨ̀Ꞌta bòt nê, bɔ̀ ka me yɔꞋɔ bèzi, mè nê bɔ̀ me shɨ̀kè èghɨjɨ ko. Ka ba ko nê, Mbɔ̧ɔ̧mà li ngɨ̀ èghɨjɨ abua bòt bu bɔ zì mèntɨ̧ɨ̧ mɔb ane zi, mè nko mènəè mi mu è wû nkûŋ la, nê bɔ̀ jɨ ŋǎ mènkɔ̀ŋke abua zi.

⁴Àghɨ àgème Mbɔ̧ɔ̧mà è ghɨ̀ la aà mbɔ̀, bà ka ntù̧ àyea ko. Wuê nê, baa wu bà me jɨ, ba ŋa mènkɔ̀ŋke abua Mbɔ̧ɔ̧mà.

⁵Aa mbɔ̀ abua Mbɔ̧ɔ̧mà nkàà nê wu ndɨ èngǎ̧ tò e shu la, ba mè nko nê ba tsàꞋta a Mbɔ̧ɔ̧mà adù̧.

⁶À nyɨ̀Ꞌta mènəè maa abua bɔnyɨ ba, ko aa wu ngule wɔ̀fàꞋ Yesò Klistò. À me ghɨ̀ anè, ko à wua nyɨ̀Ꞌta nê, à wu wòt tàa ndzəa wuê èngǎ̧ Mbɔ̧ɔ̧mà wu ba zǐ èntɨ̧ɨ̧ wa adù̧ la, mè me nèèta mbà̧aã mènəè mu à li mbɨ̧̀ɨ̧̀ne mbɨ̀Ꞌɨ̀ bɔ nyɨꞋte awê la.

⁷Ko mbɨ̀Ꞌɨ̀ à yute tèlete èkèghɨ̧̀ tu bòt àa ndzèa ngoꞋ ntsàà kà te bɔ ànəê ane èngǎ̧ Mbɔ̧ɔ̧mà la. Me taŋke awê ndɨ àa me tseke wuê mbɨ̀Ꞌɨ̀ Mbɔ̧ɔ̧mà è kɨa la.

⁸Wòt me nyàbtè ènyit zi, à ka bɨ, ka wòt me taŋke avi e me ghɨ̌ àfàꞋa Mbɔ̧ɔ̧mà, àyea ngaa a bɔ̀ŋ ntsè àghɨ àgème, nkàà nê betsiꞋa a tɨŋe a ŋut ane mèntsèke atò a ngɔ̀ŋ ŋaa, mè ngu etɨŋe atò taa bɔ mèmpème kàlìà.

⁹Eyaa wu èngǎ̧ nkûŋ ba wu nèète ebɨ̧ɨ̧ne e mě ezì mèntɨ̧ɨ̧ ma adù̧ la.

¹⁰Eyaa wu àghɨ a ghɨ̀ ba me nyɔ̀Ꞌta fàꞋà nyaŋ nkàà nê ba zǐ ntɨ̀ ya ane Mbɔ̧ɔ̧mà wu tà wu eyû̧ la. Tà wu Mpemnà wɔ̀bȩ̂ ègème, mbɔ̂ mèmpème mbɔŋ wu abua bòt bu bɔ zì mèntɨ̧ɨ̧ mɔb ane Yesò la.

¹¹NyɨꞋte awɔb nkɨ̀a tàa nè mènəè maa.

¹²Ko mbɨ̀Ꞌɨ̀ à sàŋ wòt kǒ tà me waa awê nê à bele watèchɨɨle. Ka me ghɨ̀ mènəè mê ane ndɨ bòt Yesò àa me kùŋè teka tè ane ndɨ àa ndàꞋà la, nè ndɨ àa ngɨ̀à mènəè mê la, nè ndɨ àa nkɔ̀ŋkà bòt la, ka nè ndɨ à zǐ èntɨ̧ɨ̧ wê ane Mbɔ̧ɔ̧mà e me fəə la.

¹³E bùꞋu àfɨ̀Ꞌ yaa e ghǎ wu àfɨꞋa màa kɨꞋɨ la, bɨ̀ me tseka ntɔ Àkata Mbɔ̧ɔ̧mà adzìꞋ àgème bòt e bù̧ù̧te la, mè ndàꞋà nyɨ̀Ꞌta èngǎ̧ Mbɔ̧ɔ̧mà.

¹⁴À ka ngwaꞋa àghɨ yu Fo Mbɔ̧ɔ̧mà è ŋa abua yê, à lè bɔ àfɨ̀Ꞌ yu bɔ li ndàꞋà àtɔŋ Mbɔ̧ɔ̧mà, bɔɔjuŋ ayɔɔ bòt tò e nɔ̀ŋè èbu bɔb adù̧ yê la.

¹⁵Me ghɨ̌ èghɨ bàagème mâ shu la nè èntɨ̧ɨ̧ wê ègème mbɨ̀Ꞌɨ̀ bòt bàgème aa ye ndɨ àa ngà nè mbì ane alu̧ Mbɔ̧ɔ̧mà la.

¹⁶Me nèèta mbààba awê mè mbààba èngà̧ wu àa nyɨ̀Ꞌta la. Me ghɨ̀ wuê èghɨ bàa nkàà nê, à ghɨ̀ ale, ko aa tɨŋe awê nè bòt bu bɔ̀ɔ njùtâ awê la, bɨa bɔ ngule mèmpème.