Read Mundani 1 Tɔ̀màtià 5 Bible Online

1 Tɔ̀màtià 5 - Mundani bible

1 Tɔ̀màtià 5

¹À ka ŋȩ̂ ndènè wòt. LàꞋa abua tò mbɨ̀Ꞌɨ̀ tǎt wè. Baãaã bɔkèsà mbɨ̀Ꞌɨ̀ bɔnyɨ bè,

²mbà̧aã bèzi juŋ mbɨ̀Ꞌɨ̀ bènyɨ̌ bê, mbà̧à̧ bɔɔ̀zi techɨɨle mbɨ̀Ꞌɨ̀ bɔnyɨ bè, à kà bɔ mèmɨ̀ɨ̀te ko tsa.

³Me baãaã bènempfə bu bɔ̀ wu ndâ bènempfə la ntsɔ̧̀.

⁴Ka nempfə bɔ bɔ̧ bi, kò bɔ̧ bɔ̧ tò e bi la leꞋ, bɔ̧ ngaa e bɨ̀ me tɨŋe bòt bɔb, mbɨ̀Ꞌɨ̀ bòt bɔ̀ɔ nkùŋà a Mbɔ̧ɔ̧mà la e wu me ghɨ̀ la. Bɔ ghɨ èlɨ̀ waa, bɔ ko nê bɔ wua mvəèà èsiꞋ lu bètǎt bɔb nè bètǎt nyaꞋ bɔb è li ndzì a èbem lɔb la. Eyaa wu àghɨa àa mbɔ̀ abua Mbɔ̧ɔ̧mà la.

⁵Àvi wu tà wu ngule nempfə kà ye wòt tàa tɨŋe atò la, nàa ngɨ̀ tà me zì wuê ntɨ̀ zi ane Mbɔ̧ɔ̧mà, ntsèke ntsàꞋtà àli àgème ndò̧a ètɨŋe abua tò.

⁶Ka nempfə wu tà zǐ èntɨ̧ɨ̧ vi ane èghɨ ngɔ̀ŋ la, batè mbèle kà pfə, ka mbɔ̂ ntsìꞋi mbɨ̀Ꞌɨ̀ wòt tà pfə te ndɔ̀Ꞌ la.

⁷Shu abua bòt Yesò nê, bɔ̀ me ghɨ̀ a èlɨ̀ waa mâ shu la, mbɨ̀Ꞌɨ̀ bòt tsa e me làꞋa kàbɔ̀ŋ adù̧ yɔb.

⁸Wòt bakà wua ndɨ̀ŋkà bòt àndà̧ àzi, tè ngwaꞋ fɔ̀ɔ̀le bòt èbem lob zi, ŋut ko nê ye tu̧ alu̧ Yesò. Tà ghɨ̀ ale, tà ko nê ye bɨɨ te ntsè wòt kà zì èntɨ̧ɨ̧ vi ane Yesò.

⁹Nempfə bele kà tse èngùꞋ èghem yentùa, à ka shɨ̀ èlen tò ayɔɔ ète bènempfə bu bɔ bɔ ndɨ bɔ̀ɔ me tɨŋe awɔb la. À me shɨ èlen nempfə, à mè ndze nê, tà li me yɔꞋɔ wuê lu̧ wemɔ̀Ꞌ,

¹⁰mè ngu àvi bòt e neetè nko nê tà lè wua ngɨ̀à mènəè ntsɔ̧̀ la. Shɨ wuê èlen àvi tà li ngùa nèètà ndìà bɔ̧ bi, mè sèà bègɨ̧̀ a lob zi, shùà èka bòt Mbɔ̧ɔ̧mà, ntɨ̀ŋa bòt ngoꞋ, mè ŋǎ èntɨ̧ɨ̧ vi a màngɨa èfàꞋ ntsɔ̧̀ ègème la.

¹¹Ka à ka shɨ̀ tèlente bènempfə techɨɨle a si, nkàà nê naa wu àfɨꞋa ètsə bɔb e lɔ̀Ꞌtè la bɔ lèènè àghɨa bɔ li nkaꞋa Yesò Klistò la, ntsiꞋi me kɨ bèlu̧ eyɔꞋɔ.

¹²Bɔ ghɨ̀ ale, bɔ wua ngɨ̀à kàbɔ̀ŋ ndɨ̀ wu bɔ bəꞋə mènkàꞋa mbì mu bɔ̀ li nkàꞋ a mbì tò la.

¹³Lə kǒ kà à wu shɨ tèlen tɔb wu nê, bɔɔ tsiꞋa nkua èlɔŋ, mè me nyi a lob a lob ndzəèà. Ànəa ko a mê mbɨ ntsè la wu nê, bɔɔ tseke tê mbùꞋ me ghɨ̀ mènàŋ, ndzìà mètsəê mɔb ane mènəè kà wu mɔb, mèà ndàꞋà mènəè bɔɔ bɔ̀ ka wu làꞋà la.

¹⁴Mbɨ̀Ꞌɨ̀ àa ale la, è wu nè mmɔ̌, ko bènempfə bu bɔ̀ bele bɔɔ̀zi techɨɨle la e mě ndzɔ̀Ꞌɔ bèlu̧, mbì bɔ̧ bɔb, mè ntsèke a si me taŋke lob tɔb. Bɔ ghɨ̀ ale, ko bɔmbù̧ ba è ka ye èlu̧ elàꞋa mènəè kàbɔ̀ŋ adù̧ ya a.

¹⁵Ko nê, bènempfə ko e sà alu̧ Yesò tè ntsìꞋa kùŋe a Satàn.

¹⁶Ka àvi tà zì èntɨ̧ɨ̧ vi ane Yesò la, è bɔ bènempfə a èbem ləlob zi, tà me lɨ̀ŋke àwɔb. Tà ka mɨ̀ɨ̀tè nê yea zǐ àbòꞋà adù̧ chɔsì, mbɨ̀Ꞌɨ̀ bɔɔ tsiꞋi me tɨŋe wuê ndâ bènempfə.

¹⁷Bɨ̀ me nèèta mbà̧aã bɔɔjuŋ bu bɔ̀ɔ fàꞋà àfaꞋa Yesò la ntsɔ̧̀. È me wu èbu bɔ̀ɔ fàꞋà nyaŋ, ndàꞋà mè nyɨ̀Ꞌta èngǎ̧ Mbɔ̧ɔ̧mà la, bɨ baãaã awɔb ntsɔ̧̀ tè ntsè bòt bàgème.

¹⁸Àkata Mbɔ̧ɔ̧mà a laꞋnê, “Wòt ka nkùùle ètsəê mpɔ̀ŋ àfɨꞋa tàa mbùꞋa mèku̧ la.” A mèe nê, “Wɔ̀fàꞋ ègème è bɔ ndɨ tàa bɔ àbȩ̀ àfàꞋ àzi la.”

¹⁹Wòt wemɔ̀Ꞌ è shu ànəê àtsəa wajûŋ kǒ ayɔɔ bòt Yesò, à ka ndzə. TsiꞋ bòt mbɔ̀ŋè babe kò batat leꞋ è shu ànəa ngaa, ka à yùte.

²⁰È me wu bòt bu bɔ̀ɔ ngɨ̀à mènəè kàbɔ̀ŋ nɨa ngà wuê nè mbì la, à me tsia wɔb a kètsìà bòt ŋȩ̀te awɔb, mbɨ̀Ꞌɨ̀ bòt ko aa ye e bɔɔ.

²¹Mâ chɨɨme shù̧ù̧te awê a mbì Mbɔ̧ɔ̧mà nè Yesò Klistò nè bɔntu̧ bu tà làà la nê, yute nkɨ̀a tàa e ŋa la ntsɔ̧̀. Me ghɨ̌ àghɨ àgème kà wua ndɨ̀ŋkà mèsi, à ka mè ngɨ̀ ànəê nê ye kɨ efɨte etɨŋe wòt kǒ.

²²Ko mbɨ̀Ꞌɨ̀ à tèmnê, a mànɔŋa èbu bê àtsəa wòt kǒ nê, tà me fàꞋa àfàꞋ ako ayɔɔ bòt Yesò. Ko mbɨ̀Ꞌɨ̀ à zì àbu ayê a èbem mènəè kàbɔ̀ŋ wòt. Tsì awê a èbem mènəè kàbɔ̀ŋ.

²³Ka tsi nu wuê mèleb mùà mùà. Me nu adzìꞋ mèlùꞋ nkàà èbèm lê lu àa ŋǎ wê ngoꞋ la, nè ndɨ̀ wu àa ntsèka ngɔ̧ɔ̧̀nà la.

²⁴Bɔɔ ndzàŋà ndzea bèkàbɔ̀ŋ bòt ko àa ngɨ̀à la. Bɔ̀ɔ ngɨ̀ bɔ̀ me laꞋ nê bɔɔ̀ saꞋa bèŋût, bɔ yaŋe ebɨ̀ɨ eye mènəè kàbɔ̀ŋ mɔb. È wu bòt ko, a ghɨ̀ a nyɨꞋtè nê, bɔ̀ saꞋa awɔb, mbàŋè àwɔb ka ndzè mènəè kàbɔ̀ŋ mɔb.

²⁵Wu wuê a èlɨ mbɔŋ bòt e taꞋa wua ndzàŋà ndzèa mènəè ntsɔ̧̀ wòt la. È màà ngu wuê mènəè ntsɔ̧̀ mu è lò̧ò̧tè la, ko betsiꞋa è kà tseke ka mpùùla ayaã.