Read Mundani 2 Tɔ̀màtià 4 Bible Online

2 Tɔ̀màtià 4 - Mundani bible

2 Tɔ̀màtià 4

¹TsiꞋ è neeta shu awê ànəê yaa a mbì Mbɔ̧ɔ̧mà bɔ̂ Yesò Klistò wu tàa li mě ekɨꞋɨ tseke a ègwet atɨ̧ kèfɔ̧̀ vi, esaꞋa bòt, èbe be pfəꞋte la, nè èbe be bele yû̧ la.

²Maa shu awê nê, tsɔte Ntu̧ Ntsɔ̧̀ yu, nèètè èsènte yùà, kò àfɨ̀Ꞌ aà və, kò a ntsě leꞋ, ko mâ shu awê nê, bòt e ghɨ a kàbɔ̀ŋ, à ŋȩ̀te awɔb. Shu awɔb mɨ̧̂ nê, bɔ̀ sà mènəè kàbɔ̀ŋ mɔb, mè ndɔ̀ktè ètsə bɔb nê, bɔ̀ me ghɨ̌ mènəè ntsɔ̧̀. Me bɔɔle awê àfɨ̀Ꞌ àgème nyɨ̀Ꞌta awɔb.

³Ko nê àfɨ̀Ꞌ àko aa nkɨ̀Ꞌa kà bòt e wu tsi me yute bòt bu bɔ̀ɔ ndàꞋà mènəè nkûŋ la. Bɔɔ li egha ambo ndɨ bɔ̀ɔ nkɨa wuê àghɨa mèntɨ̧ɨ̧ mɔb nàa nkɨà la, etsiꞋi me nɨ wuê bènyɨꞋtà bu bɔ̀ɔ me shu awɔb èghɨ ètû̧ bɔb aa ntèa nkɨ ezə la, e bɔ̂ me kwèꞋnè àwɔb nɨa ngà nè mbì.

⁴Bɔɔ li tuu̧ eyute mènəè mu è wû me nkûŋ la, etsiꞋi me yute wuê tèlete àku.

⁵È wu awê, ko me baabe awê àfɨ̀Ꞌ àgème, nkìà ngoꞋ. Baãaã àfàꞋ ayê mbɨ̀Ꞌɨ̀ wòt màntsɔta Ntu̧ Ntsɔ̧̀ Yesò, mè me nɨ àfàꞋ ayê ngà wuê nè mbì mbɨ̀Ꞌɨ̀ ngule wɔ̀fàꞋ Mbɔ̧ɔ̧mà.

⁶È me wu am, ko eyaa wu àfɨꞋa màa sǎ ngɔ̀ŋ yaa la. AfɨꞋa bɔ̀ɔ bùŋe am ane ànəa Mbɔ̧ɔ̧mà la a kuêꞋ.

⁷Mâ nù èbet ntsɔ̧̀, mâ lùùlà tê mpàâ, [1]

⁸E bùꞋu àfɨ̀Ꞌ yaa, Mbɔ̧ɔ̧mà è nɔ̀ŋe àbȩ̀ am a ègwet ndɨ̀ wu màa ngɨ̀à àghɨa tàa nkɨà la. Tǎt wa Yesò wu èsaꞋa tò àa ndɨŋndɨ̀ŋ la, naa li e ŋa àbȩ̀ yaa abua am ane àli yu tàa li e mě ekɨꞋɨ la. Taa li e ŋa fɔ̀ɔ̀le abua bòt bu bàgème bɔ̀ɔ ndâ nchɨ̀Ꞌà mè nkɔ̀ŋkà e ye ndɨ tàa mě kɨꞋɨ la.

⁹NyɔꞋta nkɨ̀Ꞌɨ̂ nkwène ane yaã kwàla.

¹⁰Demàs è zì èntɨ̧ɨ̧ vi ane èghɨ ngɔ̀ŋ yaa tè ngwaꞋ am ngà àvi a Tèsàlonikà. Klesèns è ghà a Gàlashìà, Tȩtɔ̀s è ghà a Dàmatìà.

¹¹Wu ndàꞋà Luêk tà tsìꞋì ba tò a si ŋàa la. Nɨ a Mak, bɨ tò è kɨꞋɨ nɔ̂, nkàà nê taa tɨŋe am ane àfàꞋ yaa.

¹²È wu a Tȩ̀kɨkùs, ko e ndi ntu̧ atò a Efesɔ̀s.

¹³Aa me kɨꞋɨ, à nɨ taꞋa ndǐ a ègwet yaã yu e ndi ntɔɔ abua Kapùs a Tloas la. Nɨ fɔ̀ɔ̀le èkatè bɔ̧ bu mɨ̧̂. Ko mbɨ̀Ꞌɨ̀ à lèènè èbu bɔ ghɨ ane gùb nyà̧ la.

¹⁴Àlèkzandà, talà̧ li ndâ ngɨ̀ am àbɨꞋte ànəê. Mbɔ̧ɔ̧mà naa li etsɔꞋɔ àfàꞋ atò ane àghɨa tà ghɨ̀ la.

¹⁵Me ko mbɨ̀Ꞌɨ̀ tà ghɨ ane yê mɨ̧̂, nkàà nê tà li tà kà bê ngùa nkɨ̌ eyute mèngà̧ mu ba nyɨꞋtà la.

¹⁶È li ngua ngò̧ mbì yu bɔ saꞋa am la, wòt kǒ ka kɨꞋɨ etɨ̧ɨ̧ akwene yaã. Waa waa li ndùùlà am. Maà shù̧ù̧ta nê Mbɔ̧ɔ̧mà e lèène ànəa ngaa bɔ li ngɨ̀ la.

¹⁷Ka Mbɔ̧ɔ̧mà li ngu nè nà̧, ŋa am mètàŋ, e nɨŋ ntsɔ̀tè Ntu̧ Ntsɔ̧̀ yu ègème tè bòt kà wu Bèjuê bàgème e zə. Mbɔ̧ɔ̧mà li ntɨ̀ŋe ngɨ̀ e mpem èvə mbɨ̀Ꞌɨ̀ wòt bɔ fàa tò a ètsəê sambàŋ la.

¹⁸Mâ ko nê, Mbɔ̧ɔ̧mà wu naa tsì am a èbem èghɨ kàbɔ̀ŋ ègème, e mě mbaabe am tè maa ghǎ enyi a èbem kèfɔ̧̀ tò a ègwet. TsiꞋ mèngùꞋte wu abua tò àfɨ̀Ꞌ àgème! Àmèn.

¹⁹TsàꞋte a Plìsilà bɔ̂ Àkwilà, nè bòt lob Ònesìfolùs ŋa abua am.

²⁰Èlastùs li ntèꞋà a Kɔlìn, e saame a Tɨ̀lòfimùs a Miletùs ngu nê tà li ngua ngò̧ò̧nà.

²¹NyɔꞋta nkɨ̀Ꞌɨ̂ abàꞋ ŋaa ka àfɨ̀Ꞌ yu èdziꞋ è naa fià nyaŋ la à buꞋa. Yùbùlùs bɔ̂ Pudèns nè Lȩnɔ̀s, nè Klɔdìàs e tsàꞋtè àwê. Bɔnyɨ ba ko bu bàgème e tsàꞋtè àwê mɨ̧̂.

²²Maà shù̧ù̧ta Mbɔ̧ɔ̧mà nê tà wu ne nè, mè me nyɨꞋte a ntsɔ̧̀ vi abua yɨ̧ bɨ̀agème.