Read Mundani Tȩtɔ̀s 1 Bible Online

Tȩtɔ̀s 1 - Mundani bible

Tȩtɔ̀s 1

¹Letà Pɔ̂l, wɔ̀fàꞋ Mbɔ̧ɔ̧mà, nè wantu̧ Yesò Klistò. Mbɔ̧ɔ̧mà li ndȩ̀ atò nê nè tà tɨŋe bòt bu ye làà la, ndɨ bɔ̀ɔ nèète zì mèntɨ̧ɨ̧ mɔb ane zi, e mě ko mènəè nkûŋ mu nàa nyɨ̀Ꞌta ndɨ betsiꞋa ba tsekè tè a bɔ a Mbɔ̧ɔ̧mà la,

²e mě zǐ ntɨ̀ yɔb ane Mbɔ̧ɔ̧mà mbɨ̀Ꞌɨ̀ taa ghɨ̌ bɔɔ bɔ mèmpème kàlìà. Ngɔ̀ŋ li me laꞋ nê yeà mbùꞋà, Mbɔ̧ɔ̧mà wu tàa ka fɨ̀te la yaŋe kàꞋà àwa mèmpème màa.

³Àfɨ̀Ꞌ a li nkùꞋ, Mbɔ̧ɔ̧mà ghɨ̀ bɔ tsɔ̀tè èngǎ̧ tò, ngɨ̀ bòt e ko àghɨ yu tà li nkàꞋ la. Wu Mbɔ̧ɔ̧mà, Mpemnà wa tà li ndzì ntu̧ yaa a tèkitebu taã nê è me tsɔ̀tè la.

⁴E shɨa letà waa abua Tȩtɔ̀s, ngule waã am, ba tò e zì mèntɨ̧ɨ̧ ma ane wòt wemɔ̀Ꞌ la. Maà shù̧ù̧ta Tǎt wa Mbɔ̧ɔ̧mà bɔ̂ Yesò Klistò Mpemnà wa nê bɔ̀ me nyɨꞋte awê a ntsɔ̧̀ wɔb, mè ngɨ̀ à bɔ àlàŋkè a èntɨ̧ɨ̧ wê.

⁵E ndi sà awê a Klît nê à taŋke mènəè mu è li mbèle kà ba taŋkè la, mè ngà a èpfəè nɨ̧ ègème, ndzì bɔɔjuŋ àtsəa bòt Yesò mbɨ̀Ꞌɨ̀ e ndi shu awê la.

⁶Ko nê, wòt tà wu àtsəa bòt Yesò la, bakà bɔ ndɨ tàa me ghɨ̀ mènəè bòt àa me fèèle atò la. Tà bɔ ndɨ tàa bɔ wuê àvi wemɔ̀Ꞌ la, bɔ̧ tò mè ngu bòt bɔ zì mèntɨ̧ɨ̧ mɔb ane Yesò la. Bɔ̀ ka me ghɨ̀ mènəè mbɨ̀Ꞌɨ̀ nyaãtebàꞋ, bɔ̀ ka me ghɨ̀ àtsəa kekweelè.

⁷Ndɨ̀ wu tà wu àtsəa bòt Yesò fàꞋà àfàꞋa Mbɔ̧ɔ̧mà la, tà ka me ghɨ̀ mènəè bòt àa me fèèle atò la, tà ka mbɔ̌ ètsəê kàbɔ̀ŋ, tà ka me ghèmtè, tà ka me nu mèlùꞋ nyaŋ, tà ka me kɨ èbet, tà ka me zǐ èntɨ̧ɨ̧ vi ane èkab nyaŋ.

⁸Ka ŋut e bɔ ndɨ tàa wu wòt tàa nkòa èsèà bègɨ̧̀ a lob zi la, mè ngu wòt tàa nkɔ̀ŋkà wuê àghɨa àa mbɔ̀ la. Ngu wòt tàa mbà̧aã èntɨ̧ɨ̧ vi ka ngɨ̀à mènəè, mènəè tò mè ntɨ̧ɨ̧ ndɨŋndɨ̀ŋ la. Tà bɔ ndɨ tàa wu ngule wòt Mbɔ̧ɔ̧mà, e mě me ghɨ̌ mènəè mbɨ̀Ꞌɨ̀ wòt tà ko èdziꞋ la.

⁹Ŋut bɔ ndɨ tàa nèète ebaãaã èngǎ̧ nkûŋ waa ba nyɨ̀Ꞌta la. Tà ghɨ̀ anè, ko taa ko enyɨꞋte bòt ko èngà̧ wu è wû nkûŋ la, e mě ghɨ̌ aa pùùla ayaã nê bòt bu bɔ̀ɔ ntù̧a èngà̧ waa la wu bòt mèfà̧.

¹⁰Bòt ko nyaŋ aà və bɔ̀ɔ ŋàa àtsə àsaa, bɔ̀ ka bê ngùa ndzəèa ànəê, mè me nɨ mèngǎ̧ àkû èfɨ̀ta bòt ko la. Bɔɔ̀ ndzea àya nyaŋ ane Bèjuê bu ayɔɔ yɔb bɔ̀ɔ ŋwèèlà shua wuê nê bɔ naŋe wòt ka tà wu wòt Mbɔ̧ɔ̧mà la.

¹¹Bòt bu àtsəa bòt Yesò la e bɔ̂ ndɨ bɔ̀ɔ ghɨ̌ bèŋût aa kate mètsəê mɔb la, nkàà nê bɔɔ̀ ngèèba ntsòkà lobte bòt, nyɨ̀Ꞌta awɔb mènəè bɔ ghɨ bɔ̀ ka wu nyɨꞋte la. Bɔɔ̀ nyɨ̀Ꞌta mènəè maa anè ngua nkɨà wuê èkab, ale nko nê bɔ loà mèkù mɔb.

¹²Ka wuê ngule wòt Klît wɔb kǒ, è wu wòt àghɨ yeakwì la li nê, “Bòt Klîtan e taꞋa wua fɨ̀ta, ngɨ̀à kàbɔ̀ŋ mbɨ̀Ꞌɨ̀ nyà̧tebàꞋ, nkùa èlɔŋ, mè nkɔ̀ŋkà wuê èghɨjɨ.”

¹³Ànəê yaa tà li shu la a bɔ̂ ngu nkûŋ. Mbɨ̀Ꞌɨ̀ aa anè la, à bɔ ndɨ àa taꞋa ŋȩte awɔb mbɨ̀Ꞌɨ̀ bɔɔ me nèèta nkùŋà alu̧ Mbɔ̧ɔ̧mà la.

¹⁴Ŋȩte awɔb mbɨ̀Ꞌɨ̀ bɔ yute tèlete àku tu Bèjuê àa ntsàà la. Ŋȩte awɔb nê, bɔ̀ ka tsi nkùŋè mbɨ̧ tu bòt bɔ tu̧u̧ mènəè mu è wû nkûŋ la e tsite la.

¹⁵Wòt bɔ èntɨ̧ɨ̧ kefə, ko àghɨ àgème aa me fəə àghɨ atò. Ka è wu bòt bu kà mèntɨ̧ɨ̧ mɔb wua fəèa, bɔ̀ ka meè mbɨ̧̀ɨ̧̀ne mènəè Mbɔ̧ɔ̧mà la, ko àghɨa ko àà fəə abua yɔb la a ntsě. Bɔɔ̀ ndzìa nkwàꞋtà wuê mènəè kàbɔ̀ŋ, tè bɔ̀ ka tsi ngua nkòa nê, àghɨa ko wu ntsɔ̧̀ kò kàbɔ̀ŋ leꞋ.

¹⁶Bɔ̀ɔ ngɨ̀ bɔ me shu nê, bɔ ko a Mbɔ̧ɔ̧mà ka èghɨ bɔ̀ɔ ngɨ̀à la e me nyɨꞋte nê bɔ bakà ko atò. Bèŋût e bê ngɨ̀ àtsəa kekweelè nge, mènəè mɔb mè mbɨ̀ɨ̀ nenkèm, tè ntsɔ̧̀ kà tsi ngu ane yɔb.