Read Mundani Tȩtɔ̀s 2 Bible Online

Tȩtɔ̀s 2 - Mundani bible

Tȩtɔ̀s 2

¹È me wu awê, ko mâ laꞋnê, me nyɨꞋte bòt wuê mènəè mu è wù mènəè Mbɔ̧ɔ̧mà mu è wû nkûŋ la.

²Shu abua mbà̧te juŋ nê, bɔ̀ me yu ane mènəè mɔb, nɨ̀a èyì ka ngɨ̀à mènəè, mè mbà̧aã mèntɨ̧ɨ̧ mɔb ka ngɨ̀à mùà. Bɔ̀ mě me nèèta ndzìà mèntɨ̧ɨ̧ mɔb ane Mbɔ̧ɔ̧mà, nèètà nkɔ̀ŋkà bòt, mè nkìà ngoꞋtsə.

³Shu abua bèzi juŋ mɨ̧̂ nê, bɔ̀ me ghɨ̀ mènəè mɔb wuê mbɨ̀Ꞌɨ̀ Mbɔ̧ɔ̧mà nàa nkɨ̀a la. Bɔ̀ ka me tsòkè tèlente bòt, kò ngu èbaala mèlùꞋ leꞋ. Bɔ bɔ ndɨ bɔ̀ɔ me nyɨꞋte mènəè ntsɔ̧̀ la,

⁴mbɨ̀Ꞌɨ̀ elɔ̀ke bèzi techɨɨle bɔɔ ko ndɨ bɔ̀ɔ me kɔ̀ŋkè bèlu̧ bɔb nè bɔ̧ bɔb la.

⁵Bɔ̀ nyɨꞋte bèzi techɨɨle baa ndɨ̀ bɔ̀ɔ me koa mbà̧aã mèntɨ̧ɨ̧ mɔb ka ngɨ̀à mènəè la, mbààba ènyit yɔb, nko ndɨ bɔ̀ɔ me mbà̧aã lob tɔb ntsɔ̧̀, ngɨa ntsɔ̧̀ abua bòt, mè ndzəa bèlu̧ bɔb la. Bɔ̀ me ghɨ̀ anè mbɨ̀Ꞌɨ̀ wòt kǒ làꞋa kàbɔ̀ŋ adù̧ èngǎ̧ Mbɔ̧ɔ̧mà.

⁶Shu abua mbà̧te techɨɨle mɨ̧̂ nê, bɔ̀ me baãaã mèntɨ̧ɨ̧ mɔb ka ngɨ̀à mènəè.

⁷Àwɔ̀ mbɔŋ, à me ghɨ̀ wuê mènəè ntsɔ̧̀ ane èfàꞋa bê ègème, nɨ̀a nyɨ̀Ꞌta èkaꞋà abua bòt ko. À me nyɨꞋte ànəê, à bê ndzì àtsə nyɨ̀Ꞌte nè èntɨ̧ɨ̧ wê wemɔꞋ.

⁸LàꞋà wuê mèngǎ̧ ntsɔ̧̀ ane ndɨ betsiꞋa wòt kà koê ndaꞋa kàbɔ̀ŋ adù̧ la, mbɨ̀Ꞌɨ̀ ètsə bɔmbù̧ bê aa kɔꞋɔ ndɨ̀ wu bɔ̀ baka ye ànəa kàbɔ̀ŋ elàꞋa adù̧ ya la.

⁹È me wu èbùꞋ, ko shu abua yɔb nê bɔ̀ me zə bètǎt bɔb, mè ngɨ̀à mènəè nàa bɔ̀ awɔb la ane mènəè ègème. Bɔ̀ ka mvəèəè ànəê a ètsəê bètǎt bɔb,

¹⁰bɔ̀ ka ntsɔ̌ àghɨ abua yɔb. Bɔ̀ nyɨꞋte wuê nê, bɔ wu bòt ntsɔ̧̀, mè ngu bòt betsiꞋa wòt lɨ̀Ꞌ àvi ane yɔb la. Mènəè mɔb ègème wua mbɔ̀ èlɨ̀ waa, ko bòt aa me kɔ̀ŋkè mènəè mu ba nyɨ̀Ꞌta ane Mbɔ̧ɔ̧mà wu tà wu Mpemnà wa la.

¹¹Bòt è ghɨ̌ a èlɨ̀ waa nkàà nê Mbɔ̧ɔ̧mà è nèètè nyɨ̀Ꞌte a ntsɔ̧̀ vi abua waa waa mbɨ̀Ꞌɨ̀ baa peme.

¹²Ntsɔ̧̀ mbɔŋ nàà nyɨ̀Ꞌta nê, bà sà mènəè mu kà wua mbɔ̀ atò la a si, mè ntsì mèntɨ̧ɨ̧ ma ane èbɨꞋte èghɨ ngɔ̀ŋ yaa. Mbɔ̂ bà me baãaã mèntɨ̧ɨ̧ ma ka ngɨ̀à èghɨ, ngɨ̀à mènəè ma tɨ̧a ndɨŋndɨ̀ŋ, mè ngɨ̀à wuê è me nàa mbɔ̀ abua Mbɔ̧ɔ̧mà la mbɨ̀Ꞌɨ̀ bà wu a ngɔ̀ŋ ŋaa la.

¹³Mbɨ̀Ꞌɨ̀ baa ngɨ̀à ale la, bà me zì wuê ntɨ̀ ya nchɨ̀Ꞌà wuê ngule àli yu bàa li eye ènɨ̧ ngɨŋa Mbɔ̧ɔ̧mà, Yesò Klistò Mpemnà wa la.

¹⁴Tà li ŋà àtsəa zi mbɨ̀Ꞌɨ̀ enɨ echùꞋù ètsə ba ane mènəè kàbɔ̀ŋ ma, e mě ghɨ̌ baa tsiꞋi bòt tò bɔ bɔ mèntɨ̧ɨ̧ kèfə, baa ndzìà àtsə ngɨ̀à wuê mènəè ntsɔ̧̀ la.

¹⁵NyɨꞋte mènəè maa abua bòt. Nɨ nkȩ yê me zì mèntɨ̧ɨ̧ bòt mè nyɨꞋte bòt mènəè bɔ fà̧à̧tè la. Ko mbɨ̀Ꞌɨ̀ à sàŋ wòt kǒ tà me waa awê.