Read Mundani Fȩlemùn 1 Bible Online

Fȩlemùn 1 - Mundani bible

Fȩlemùn 1

¹Letà Pɔ̂l, wòt tèfȩ ane ànəa Yesò Klistò, bɔ̂ Tɔ̀màtià wanyɨ wa, Abua Fȩlemùn ngule shu̧ ya ba tò àa fàꞋà nɔ̂ la.

²Ba shɨa fɔ̀ɔ̀le abua wanyɨ waa waàvi wu è wu Afìà bɔ̂ Achipùs wu ba tò ba àa fɔ̀ta nua ane ànəa Yesò la, nè bòt chɔsì bu bɔ̀ɔ mbu̧u̧te a lob tò la.

³Nê, Tǎt waa Mbɔ̧ɔ̧mà bɔ̂ Yesò Klistò Lefɨ̀Ꞌ è me nyɨꞋte a ntsɔ̧̀ wɔb abua yɨ̧ mè ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

⁴Màa ngɨ̀ e me tsàꞋte Mbɔ̧ɔ̧mà am àfɨ̀Ꞌ àgème, è ku̧u̧te awê, e ŋa mènkɔ̀ŋke abua tò.

⁵Màa ngɨ̀ e ngua ngɨ ale nkàà nê, mâ zə ndɨ àa nkɔ̀ŋkà bòt Mbɔ̧ɔ̧mà bàgème la, mè ndzə ndɨ à zi èntɨ̧ɨ̧ wê ane Yesò Lefɨ̀Ꞌ la.

⁶Maà ntsàꞋtà nê, mbɨ̀Ꞌɨ̀ àa nèètà ndàꞋà ànəa èntɨ̧ɨ̧ wu à zi ane Yesò la abua bòt la, àà nga enèète ko àghɨa ntsɔ̧̀ àgème èntɨ̧ɨ̧ wu à zi ane Yesò Klistò la, e ghɨ ba bɔŋ la.

⁷Wanɔ̧, èkɔŋ wu à bɔŋ ane bòt Mbɔ̧ɔ̧mà la e taꞋa lɔ̀kte èntɨ̧ɨ̧ am, mè ngɨ̀ e ntaꞋa bɔ mèngùꞋte, nkàà nê à ghɨ mèntɨ̧ɨ̧ bòt Mbɔ̧ɔ̧mà me bɔ̌.

⁸Mbɨ̀Ꞌɨ̀ àa nè la, mâ batè ngu ko eŋwèèle awê mbɨ̀Ꞌɨ̀ wanyɨ wè ane Yesò Klistò aa ghɨ̀ àghɨa à bɔ̂ ndɨ àa ghɨ̀ la,

⁹ka e ngu anè ntsìꞋa shù̧ù̧te awê shù̧ù̧te nè èkɔŋ. Mmɔ̌ Pɔ̂l, maà ngɨ̀à àyaa anè mbɨ̀Ꞌɨ̀ wòt tà tɨ̧ɨ̧ ane èlen Yesò mbɔ̂ ngu àfɨ̀Ꞌ yaa fȩ ane ànəa tò la.

¹⁰E ngua shù̧ù̧te awê ane ànəa waã am Ònesìmùs wu mâ tsiꞋi tǎt tò ane Yesò mbɨ̀Ꞌɨ̀ e ngu a tèfȩ anè la.

¹¹Tà lɔ̀Ꞌ ngu àghɨ aku abua yê, ka nè àfɨ̀Ꞌ yaa, tà lâ ntsìꞋi wòt betsiꞋa tà tɨ̀ŋe awê mè ntɨŋe am la.

¹²E ngua anè mvəèà tò wu tà tsiꞋi kwàꞋ èntɨ̧ɨ̧ am la abua yê.

¹³È wu nè nà̧ ko mâ kɔ̀ŋkè nê tà tseke ba tò àdziꞋ yaa e ngu a tèfȩ ane ànəa Ntu̧ Ntsɔ̧̀ la, me tɨŋe am mbɨ̀Ꞌɨ̀ àwɔ̀ mbɔŋ à wu etɨŋe la.

¹⁴Ka maa kà kɨ ghɨ̌ kà à bɨ̧̀ɨ̧̀ne mbɨ̀Ꞌɨ̀ à me ghɨa ntsɔ̧̀ a tsiꞋi fəə ngaa mbɨ̀Ꞌɨ̀ bɔ ŋwèèlè awê ŋwèèle, à wuê ghɨ̀ wuê mbɨ̀Ꞌɨ̀ èntɨ̧ɨ̧ wê e kɔ̀ŋkè la.

¹⁵Ateko Ònesìmùs wu li me lùùlà awê ane àfɨ̀Ꞌ àko ale ngu mbɨ̀Ꞌɨ̀ tà kua akwèn tà kɨꞋɨ, tà tsìꞋi tèꞋà teꞋa.

¹⁶Taa àfɨ̀Ꞌ yaa anè tà kà ntsi ngu wuê àbùꞋ, tà bɔ̀ tê ntsè àbùꞋ. Tà tsiꞋi ngule wanyɨ wa ane Yesò. Tà wu ngule wòt abua am, mè ngu ewu ngule wòt abua yê, te etsě fɔɔle ndɨ tàa abua am la, ndɨ̀ wu bɨ tò e wu bòt Yesò tà mè ngu wòt lob yê la.

¹⁷À yea nê ba nè e wu bɔfàꞋ Mbɔ̧ɔ̧mà, à nɨ atò mbɨ̀Ꞌɨ̀ ndɨ nàà ngu mmɔ̌ ko à nɨ am la.

¹⁸È wu nê tà fǎ̧ ànəê abua yê, kò mbɔ̌ njû yè leꞋ, à zi ane èlen laã ko maa tsə.

¹⁹Mmɔ̌ Pɔ̂l ka mâ nɨ àbu am mmɔ̌ mbɔŋ nɨŋ shɨ àdziꞋ yaa la nê, “Maa tsə.” E ndàꞋà anè ngu nê e mbakà tsi mbɔ̌ ndɨ màa mèe ku̧u̧te awê nê, è kà wu mmɔ̌ ko ka wuê àwɔ̀ mbɔŋ à te ntsě la.

²⁰Wanɔ̧, tɨŋe am ane èlen Tǎt wa. Ghɨa èntɨ̧ɨ̧ am è me bɔ̌ mbɨ̀Ꞌɨ̀ wanyɨ wè ane Yesò Klistò.

²¹Maà shɨa letà waa anè mbê ndâ nko nê aa ghɨ mbɨ̀Ꞌɨ̀ e nkɨà la, ateko ebɔ ghɨ̀ te tsě ale.

²²Mbɨ̀Ꞌɨ̀ àà ngɨ̀à ale la, à ye nê à nèètè àtsəalob abua am nkàà nê, mâ ko nê Mbɔ̧ɔ̧mà nàà nga ezə ndɨ bɨ dɨa abua tò la e ghɨ̌ maa dzəâ a tèfȩ ekɨꞋɨ kwene ane yɨ̧.

²³Èpaflàs wu ba tò è wu a tèfȩ ane ànəa Yesò Klistò la laꞋ nê è ntsàꞋtè àwɨ̧.

²⁴Mak bɔ̂ Àlistakùs nè Demàs, nè Luêk wu ba tò ba àa fàꞋà nɔ̂ la e tsaꞋtè mɨ̧̂.

²⁵Maà ntsàꞋtà nê Yesò Klistò Lefɨ̀Ꞌ me nyɨꞋte a ntsɔ̧̀ vi abua yɨ̧ mè ngu nè nɨ̧̀ bɨ̀agème.