Read Mundani Ebùlù 10 Bible Online

Ebùlù 10 - Mundani bible

Ebùlù 10

¹Mbɨ̧ Musì ndâ ntsě ngule èghɨ ntsɔ̧̀ bu nga ekɨꞋɨ la, wu wuê àfəa èghɨ mbɔŋ. Mbɨ̀Ꞌɨ̀ àa ale la, banyà̧ bu bòt e li ngua nɨa nkɨ̀Ꞌa a ngo̧ a ngò̧ èngùꞋebȩ ègème nkɨ̧̀ɨ̧̀ma mbɨ̀Ꞌɨ̀ mbɨ̧tsə tèa nkɨà la be li be ka lâ ngua ngɨ̀à bòt e wua àghɨa bɔ bɔ ndɨ bɔ̀ɔ wu yùà la a mbì Mbɔ̧ɔ̧mà.

²Bòt bu bɔ li ngua ngùꞋta Mbɔ̧ɔ̧mà la, e li me wu ale pème ane kàbɔ̀ŋ wɔb, ko mèntɨ̧ɨ̧ mɔb nàa ka tsi fèèlè àwɔb ane ànəa kàbɔ̀ŋ. Ko bɔ̀ɔ kà tsi nkɨ̧̀ɨ̧̀me banyà̧.

³Mbɨ̀Ꞌɨ̀ àa anè la, a wu nê, banyà̧ ba bɔ li ngua nkɨ̧̀ɨ̧̀ma èngùꞋ ègème la be li ngua ngɨ̀à bòt e ku̧u̧tà nê bɔɔ ngɨa kàbɔ̀ŋ.

⁴Nkàà nê, àlo̧ mpɔ̀ŋtsə nè àyea dzətsə aa kà ghɨ̀ Mbɔ̧ɔ̧mà waꞋa mènəè kàbɔ̀ŋ bòt.

⁵Ale, Yesò Klistò li me kɨꞋɨ a sitsǎꞋ ale shu abua Mbɔ̧ɔ̧mà nê, “Èntɨ̧ɨ̧ wê e ntsě ane banyà̧ bu bòt àa nkɨ̧̀ɨ̧̀ma la, nè èghɨ bu bòt àa ŋǎ abua yê la, mbɔ̂ à ghɨ̂ e mbɔ mbɨ̧̀ ènyit màa ŋa la.

⁶Ànəa banyà̧ bu bɔ̀ɔ ntò̧ la, fɔɔle nè è bu bɔ̀ɔ nkɨ̧̀ɨ̧̀ma mbɨ̀Ꞌɨ̀ e ghɨ̌ aa waꞋa bèkàbɔ̀ŋ bòt la à ka mê ngua mbɔ̀ àwê.

⁷Ale e nê, ‘Mbɔ̧ɔ̧mà, ye am e wu, mâ kɨꞋɨ e ghɨ̀ àghɨa àa nkɨà la, wuê mbɨ̀Ꞌɨ̀ bɔ shɨ a èbem mbɨ̧ tê ane èlen laã la.’ ”

⁸Yesò Klistò li mbɨ̀ shu abua Mbɔ̧ɔ̧mà nê, “Èntɨ̧ɨ̧ wê e ntsě ane banyà̧ bu bɔ̀ɔ nkɨ̧̀ɨ̧̀ma la, nè èghɨ bu bòt àa ŋǎ abua yê la, nè banyà̧ bu bɔ̀ɔ ntò̧à ŋǎ abua yê la, ndɔ̀Ꞌ nè èbu bɔ̀ɔ nkɨ̧̀ɨ̧̀ma mbɨ̀Ꞌɨ̀ e ghɨ̌ aa waꞋa bèkàbɔ̀ŋ bòt la. Èghɨ baa aà kà bɔ awê.” Tà li mbɔ̂ me shu ale, bɔ wua ŋa mbɨ̀Ꞌɨ̀ mbɨ̧ è shu la.

⁹Yesò mè nê, “Mbɔ̧ɔ̧mà, ye am e wu, mâ kɨꞋɨ e ghɨ̀ àghɨa àa nkɨà la.” Ale, Mbɔ̧ɔ̧mà tsɔꞋɔ mènkàꞋa mbì mu mbɨ̀Ꞌɨ̀ ezǐ me Yesò Klistò abot.

¹⁰Ndɨ̀ wu Yesò Klistò li nkɨ̀Ꞌɨ̂ ŋà àtsəa zi ngò̧ yemɔ̀Ꞌ mbɨ̀Ꞌɨ̀ Mbɔ̧ɔ̧mà kɨa la, ba tsiꞋi mbɨ̀Ꞌɨ̀ bòt kà ghɨa kàbɔ̀ŋ.

¹¹Ntsìà mèpɨ̧̀ Mbɔ̧ɔ̧mà ègème li ngua ngɨ̀à àfàꞋ àzi àli àgème, nkɨ̧̀ɨ̧̀ma banyà̧ ŋǎ abua Mbɔ̧ɔ̧mà a ngo̧ a ngò̧, ka banyà̧ mbɔŋ bè ka wua nkoà ngɨ̀à Mbɔ̧ɔ̧mà waꞋa bèkàbɔ̀ŋ bòt.

¹²Ka Yesò Klistò li ŋà àtsəa zi ngò̧ yemɔ̀Ꞌ, ane mènəè kàbɔ̀ŋ bòt, a bê nkùꞋ ale ane àlia nè àlia, mbɔ̂ ngà ntsèke àbâ àbualu̧ a Mbɔ̧ɔ̧mà.

¹³È bùꞋu àfɨꞋa mbɔŋ me ghà ne mbì, tà wua nchɨ̀Ꞌà àfɨꞋa Mbɔ̧ɔ̧mà nàa ghɨ̌ taa tsite èka bi a ègwet bɔmbù̧ bi la.

¹⁴Tà ŋà àtsəa zi ngò̧ yemɔ̀Ꞌ ale, ngɨ̀ bòt bu Mbɔ̧ɔ̧mà shùù mènəè kàbɔ̀ŋ mɔb la e tsiꞋi àghɨa bɔ wu ewu yùà la ane àlia nè àlia.

¹⁵Fo Kèfə shua wa mènəè maa mɨ̧̂. Tà bɨ̀ nê,

¹⁶“Eyaa wu mènkàꞋa kèkweelè mu màa nga e ghɨ̀ ba bòt Izəèlȩê la, mbɨ̀Ꞌɨ̀ Mbɔ̧ɔ̧mà shu la. ÀfɨꞋa mbɔŋ aa li nkùꞋ, e ndzì mbɨ̧ taã a mèntɨ̧ɨ̧ mɔb, mè shɨ tùà a ètsə bɔb.”

¹⁷Tà mè nê, “È ka tsi ku̧u̧te mènəè kàbɔ̀ŋ mɔb bɔ̂ èbɨꞋte ènəê bɔb a.”

¹⁸Mbɔ̧ɔ̧mà nàa ngɨ̀ tà waꞋa mènəè kàbɔ̀ŋ bòt, bɔ̀ ka tsi mbɔ̌ ndɨ bɔ̀ɔ mèe me kɨ̧ɨ̧me banyà̧ ŋǎ ambo mènəè kàbɔ̀ŋ bòt la.

¹⁹Bɔnyɨ bɔ̧, ale betsiꞋa ba ko nyi àdziꞋa ntsèm a mbì a Mbɔ̧ɔ̧mà kà bɔ̀a nkàà àlo̧ a Yesò.

²⁰Tà ghaꞋa èlu̧ fi abua ya, è wù èlu̧ mèmpème la. Tà sà̧à̧ taꞋà ndǐ yu, a lob Mbɔ̧ɔ̧mà è kaba àdziꞋa ntsèm a mbì a Mbɔ̧ɔ̧mà la. Tà ghɨ̀ àyaa ane mbɨ̧̀ ènyit zi.

²¹Ba bɔ taꞋà ntsìà mèpɨ̧̀ tà wu àtsəa lob Mbɔ̧ɔ̧mà la.

²²Ale, bà ghǎ ndàꞋà a ngèt Mbɔ̧ɔ̧mà nè èntɨ̧ɨ̧ kèfə kà màkè ànəê àko ane èngǎ̧ tò. Bà gha a ngèt tò nè mèntɨ̧ɨ̧ bɔ shùù è fə tê è kà tsi ngua fèèlà wa nê ba wu bòt kàbɔ̀ŋ la, mè nkɨ̀Ꞌɨ̂ nè mbɨ̧te ènyit tèa mbɨꞋɨ̀ è te bɔ shùù ne mèleb ntsɔ̧̀ la.

²³Bɨ̀ ghɨa bà neeta nɔ̀ŋè ntɨ̀ ya adù̧ àghɨ yu bàa ndàꞋà ànəa yùà la ntsɔ̧̀, nkàà nê Mbɔ̧ɔ̧mà nàa nkàꞋà ànəê tè tà ghɨ̀.

²⁴Bà bɔ èntɨ̧ɨ̧ ane bɔnyɨ ba, me tɨŋe awɔb nyɨ̀Ꞌta èkɔŋ, ngɨ̀a ntsɔ̧̀ ane yɔb.

²⁵Bà ka me tseke ka wua mbù̧ù̧tà mbɨ̀Ꞌɨ̀ bòt ko àa ngɨ̀à la. Bɨ̀ ghɨa bà me lɔ̀ktè mèntɨ̧ɨ̧ bɔnyɨ ba tè ntsè ndɨ bàa ndzìà ngɨ̀à la, ndɨ̀ wu bàa ndzèa nê, Àlia Mbɔ̧ɔ̧mà aà nkɨ̀Ꞌa la.

²⁶Ba ko nkûŋ tè ndɔ̀Ꞌ, mbɔ̂ mè me ghɨ̀ wuê a kàbɔ̀ŋ, ko àghɨa ko a te ntsě bɔ̀ɔ mèe kɨ̧ɨ̧me ane mènəè kàbɔ̀ŋ ma la.

²⁷Àghɨa bàa tsiꞋi me chɨ̀Ꞌɨ̀ ne kèbɔɔ la wu èsaꞋa Mbɔ̧ɔ̧mà, nè èwet kekweelè wu àa nga etô̧ bɔmbù̧ Mbɔ̧ɔ̧mà la.

²⁸Wòt li nguê tàa ngɨ̀ tà bəꞋə mbɨ̧ Musì, tè bòt babe kò batat leꞋ, è làꞋà nê bɔ ye, bɔ mbuŋe a ŋut kà ku tèsȩ.

²⁹Tè a wu ewu anè ane bòt baa, ko bɨ mɨɨtè nê, àa wu na ane wòt wu tà waa Waã Mbɔ̧ɔ̧mà la à? Àa wu na nè wòt wa tà nɨ̀ àlo̧ yu bɔ nɨŋ ngɨ̀ mènkàꞋa kèkweelè mu è shùa kàbɔ̀ŋ tò la, mbɨ̀Ꞌɨ̀ è ntsě àghɨ, mè ndaꞋa kàbɔ̀ŋ adù̧ Fo Mbɔ̧ɔ̧mà yu nàa nyɨ̀Ꞌta a ntsɔ̧̀ Mbɔ̧ɔ̧mà la à? Bɨ̀ la nkwàꞋtè èwuu ngoꞋ ŋut wu nàa eye la!

³⁰Ba ko wòt wu tà li nê, “E ngu wòt màa vəèəè èsiꞋ la, maà nga vəèəè àghɨa bɔ ghɨ̀ la.” Ŋut li mè nê, “Mbɔ̧ɔ̧mà naa saꞋa bòt bi.”

³¹Wu ànəa àwèntè abua wòt taa kwene a tèkitebu Mbɔ̧ɔ̧mà yu̧.

³²Bɨ̀ ku̧u̧te èli mbì bu bɨ li mbɨ̀ nko nê èngǎ̧ Mbɔ̧ɔ̧mà wu nkûŋ la. Bɨ li ntàꞋa ye ngoꞋ ka bɨ̀ ka tsi mèntɨ̧ɨ̧ mɨ̧ ane Mbɔ̧ɔ̧mà.

³³Bɔ li ngua ntsɔ̧̀ɔ̧̀tà wɨ̧ àfɨ̀Ꞌ àko ayɔɔ banɔ̧̀, è wu àfɨ̀Ꞌ àko bɨ me kɔ̀ŋke e tɨ̧ɨ̧ a mbɨ̧̀ bòt bu bɔ li ngua ngɨ̧̀ɨ̧̀nà wɔb a èlɨ waa la.

³⁴Bɨ li ndzě ngoꞋ nè bòt bu bɔ zì àwɔb a tèfȩ la, bɔ mè fà èghɨ bɨ̧ ègème, ka àyea ngaa à ka ye awɨ̧, bɨ me wùꞋtè wuê awɨ̧ nkàà nê, bɨ li nko nê bɨ bela mbɔ̌ ngule èghɨ ntsɔ̧̀ bu Mbɔ̧ɔ̧mà li nkàꞋ la, è wù èghɨ àa tèꞋa ane àlia nè àlia la.

³⁵Ale, bɨ̀ ka ntsì èntɨ̧ɨ̧ wɨ̧ nkàà nê, bɨa nga bɔ taꞋà àbȩ̀.

³⁶Bɨ bɔ ndɨ bɨ̀a kuule èntɨ̧ɨ̧ wɨ̧ mbɨ̀Ꞌɨ̀ ghɨ̀ àghɨa Mbɔ̧ɔ̧mà nàa nkɨà la, ebɔ àbȩ̀ yu tà kàꞋà la.

³⁷Àkata Mbɔ̧ɔ̧mà a laꞋnê, “AdzìꞋ naa me wù̧ù̧ne, wòt wu nga ekɨꞋɨ la naa kɨꞋɨ, tà ka tsòke àfɨ̀Ꞌ a.

³⁸Mbɔ̂ bòt bɔ̧ bu bɔ̀ɔ ngɨ̀à mènəè ndɨŋndɨ̀ŋ la aa peme nkàà èntɨ̧ɨ̧ wu bɔ zi ane yaã la. Ka wòt tà tsǐ èntɨ̧ɨ̧ vi ane yaã la, ba tò è ka tsi wu ane ntsɔ̧̀ a.”

³⁹Ba ntsě èwuu bòt bu bɔ̀ɔ ntsìà èntɨ̧ɨ̧ wɔb ane Mbɔ̧ɔ̧mà ndema la. Ka ba wu èwuu bòt bu bɔ̀ɔ ndzìà mèntɨ̧ɨ̧ mɔb ane Mbɔ̧ɔ̧mà mbɔ̌ mèmpème la.