Read Mundani Ebùlù 12 Bible Online

Ebùlù 12 - Mundani bible

Ebùlù 12

¹È me wu awa ko ba bɔ taꞋà ènɔ̧̂ bòt baa bɔ li ndzì mèntɨ̧ɨ̧ mɔb ane Mbɔ̧ɔ̧mà la, bɔ ghaale awa ndzi a kètsìà la. Ale, bɨ̀ tsiꞋ bà waꞋ àghɨ àgème àa nkèla wa nê bà ka ngɨ̀ àghɨa ba wu e ghɨ̀ la, mè ngwàꞋà mènəè kàbɔ̀ŋ mu è kuule awa la. Bà kuule mèntɨ̧ɨ̧ ma ndùùlà àlùùlà yu ba bɔ ndɨ bàa lùùla àyùà la.

²Bà neeta ntsìte àghɨ aya ane Yesò wu tà wu mèmbùꞋu nè mèndìa ànəê yu ba zǐ èntɨ̧ɨ̧ wa adù̧ la. Tà li nga ambo mèngùꞋte mu nchɨꞋa tò la, nkùùle èntɨ̧ɨ̧ vi mpfə a mbɨ̧̀ mbasa kà bɔ àtsəa kɔꞋɔ. Tà wu àfɨ̀Ꞌ yaa àbâ àbualu̧ àtɨ̧a kèfɔ̧̀ Mbɔ̧ɔ̧mà tà tseke la.

³Bɨ̀ ye ànəa a li ndze atò la. Bòt kàbɔ̀ŋ e li ngɨ̧ɨ̧ne atò, ka tà bɔ̂ nkùùle wuê èntɨ̧ɨ̧ vi. È wu ale, bɨ̀ambɔŋ è ka nkaã ntsì mèntɨ̧ɨ̧ mɨ̧ ane Mbɔ̧ɔ̧mà.

⁴Èbet wu bɨ̀a ntsèka nùà ane ànəa mènəè kàbɔ̀ŋ la e bakà ziꞋ nga te wu àdziꞋa àlo̧ wòt kǒ àa chɨ̧ɨ̧te a si la.

⁵Bɨ lèènè mèngà̧ mu Àkata Mbɔ̧ɔ̧mà àa shua nɨa ndɔ̀ktà mèntɨ̧ɨ̧ mɨ̧, ntɔ awɨ̧ nê bɨ wu bɔ̧ la à? Àkata mbɔŋ aa shua nê, “Waã am, Mbɔ̧ɔ̧mà me baãaãte àwê ane èbu kekweelè nkàà mènəè à fà̧à̧tè la, à ka ngwàa ànəa mbɔŋ. À mè fà̧à̧ ànəê tà me ŋȩ awê, èntɨ̧ɨ̧ wê è ka fi ane tò.

⁶Aa ale nkàà nê, waã ègème Mbɔ̧ɔ̧mà nàa mbà̧à̧te atò ane èbu kekweelè la wu we tàa nkɔ̀ŋkà la, è we tàa shu̧a atò la wu we tà nɨ atò mbɨ̀Ꞌɨ̀ waã vi la.”

⁷Wòt me ye ngoꞋ tà kuule èntɨ̧ɨ̧ vi, nkàà nê ngoꞋ mbɔŋ wua nyɨ̀Ꞌta nê, Mbɔ̧ɔ̧mà wua mbà̧à̧te ŋut mbɨ̀Ꞌɨ̀ waã vi. Waã kǒ nàà və kà tǎt tò wua mbà̧à̧te atò ane èbu kekweelè?

⁸Mbɔ̧ɔ̧mà bakà wua mbà̧à̧te awɨ̧ ane èbu kekweelè mbɨ̀Ꞌɨ̀ tàa mbà̧à̧ta bɔ̧ bi la, bɨ ko nê bɨ ntsě bɔ̧ tò, bɨ wu mbɨ̀Ꞌɨ̀ bɔ̧ mèdùùbè.

⁹Enɨ ghà ne mbì, ba li mbɔ̀ bètǎt ba a sitsǎꞋ ŋàa bɔ̀ɔ mbà̧à̧te awa ane èbu kekweelè la, ba bɔ̂ me zə wuê awɔb. A wu ewu anè, bà ka ghɨ ane Tǎt wa Mbɔ̧ɔ̧mà wu ègwet la tè ntsè, mbɨ̀Ꞌɨ̀ ebɔ mèmpème?

¹⁰Bètǎt ba mbɔŋ e li ngua mbà̧à̧te awa ane èbu kekweelè mbɨ̀Ꞌɨ̀ bɔ kɔ̀ŋkè la. Ka Mbɔ̧ɔ̧mà nàa ngɨ̀ tà me baãaãte awa èlɨ mbɔŋ, tà wua nkɨà mbɨ̀Ꞌɨ̀ baa wu ane ntsɔ̧̀, etsiꞋi mbɨꞋɨ̀ tòà.

¹¹Bɔ̀ɔ ngɨ̀ bɔ̀ me baãaãte wòt ane èbu kekweelè à ka wua mbɔ̀ ŋut àfɨꞋa mbɔŋ, a me saa tò, ka àfɨ̀Ꞌ à tseke tê à me wu, bòt bu bɔ baãaãte awɔb èlɨ mbɔŋ la e bɔ àbȩ̀ àlàŋkè, me ghɨ̀ àghɨa Mbɔ̧ɔ̧mà nàa nkɨꞋa la.

¹²Mbɨ̀Ꞌɨ̀ àa ale la, mèntɨ̧ɨ̧ mɨ̧ ka fi ane ànəê yaa.

¹³Bɨ̀ ŋwètè èka bɨ̧ a si ntsɔ̧̀ mbɨ̀Ꞌɨ̀ èka mbɔŋ e loŋ bɨ debte a si. Ka bɨ̀ bɔ me kweele.

¹⁴Bɨ nyɔta ndze nê bɨà ntsèke ane àlàŋkè nè waa waa, mè me tseke mbɨ̀Ꞌɨ̀ bòt mènəè ntsɔ̧̀ nkàà nê, wòt bakà wua ngɨ̀à ale, tà kà ye a Mbɔ̧ɔ̧mà.

¹⁵Bɨ̀ me ko awɨ̧ mbɨ̀Ꞌɨ̀ ka bɨ tsì èntɨ̧ɨ̧ wɨ̧ ane Mbɔ̧ɔ̧mà wu tàa nyɨ̀Ꞌta èkɔŋ vi ane ya la. Bɨ̀ mèe me ko awɨ̧ mbɨ̀Ꞌɨ̀ ka wòt kǒ ane yɨ̧ liꞋa kàbɔ̀ŋ mbɨ̀Ꞌɨ̀ afəèꞋ nàa ndìà la, è koꞋ ntsòkè bòt ko.

¹⁶Bɨ̀ me ko awɨ̧ mbɨ̀Ꞌɨ̀ ka wòt kǒ ane yɨ̧ me jɨ ngò̧ò̧tètsə, kò ntsìà èntɨ̧ɨ̧ vi ane mènəè Mbɔ̧ɔ̧mà leꞋ. Wòt ghɨ̀ ale, ko taa tsiꞋi mbɨ̀Ꞌɨ̀ Esaɔ̀ wu tà li ŋà àdziꞋa zi mbɨ̀Ꞌɨ̀ waã mbì abua wanyɨ vi ambo apfəèꞋ èghɨjɨ la.

¹⁷Bɨ ko ndɨ àfɨꞋa li me wu tà nê ye kɨa tǎt vi naa fà̧à̧te àvi, tǎt tò tu̧ la. Tà li mbàte ngua ndɨ̀à nè mèsi nkɨà nê tà fà̧à̧te avi, ka èlu̧ è ka tsi ngu, nkàà nê tà li tà kà tsi ngu ko ekubte àghɨa tà ghɨ̀ la.

¹⁸Bɨ bakà kɨꞋɨ te dzəâ a mbɨ̧̀ àghɨ ako betsiꞋa bɨ baãaãtè mbɨ̀Ꞌɨ̀ èbȩ Sinȩ̀ lu bòt Izəèlȩê e li nkɨ̀Ꞌɨ̂ a mbɨ̧̀ e me koole la. Ndzěm nè kèbìꞋà li ngu abot, àfeme àkekweelè a me tsě,

¹⁹èsɔndɨk e làꞋ, bɔ zə àtɔŋ Mbɔ̧ɔ̧mà. Bòt mbɔŋ e zə ànəa tà shu la, shù̧ù̧te nê, bɔɔ kà tsi nkɨ ezə ànəê.

²⁰A li ngu ale nkàà nê, bɔ li bɔ̀ ka wu ko ekaabe èntɨ̧ɨ̧ wɔb ezə ànəa Mbɔ̧ɔ̧mà shu la, nê, “Wɔ̀bȩ̂, eghǎ dzəâ ka wuê ane anyà̧bàꞋ è bà̧à̧ta èbȩ làà, bɔ temte atò ane àti mbùŋè.”

²¹ÀdziꞋa mbɔŋ a li ntàꞋà wua nkwèèla, tè Musì nê, “Mâ bɔa tê ènyit yaã e tsiꞋa mbènta bente.”

²²Ka bɨ kɨꞋɨ tê ntsìꞋi a mbɨ̧̀ èbȩ lu bɔ̀ɔ ntɔ nê Zayɔ̀n la, è wu àpfəèà nɨ̧ a Mbɔ̧ɔ̧mà yû̧ la. Eyaa wu Jèlusalèm wu a ègwet, nè bɔntu̧ Mbɔ̧ɔ̧mà bu kà pà̧ bɔ bù̧ù̧te ane mèngùꞋte la.

²³Bɨ kɨꞋɨ àdziꞋa bòt bu bɔ̀ wu mbɨꞋɨ̀ bɔ̧ mbì Mbɔ̧ɔ̧mà bɔ shɨ tèlen tɔb a ègwet la, e bù̧ù̧tè la. Bɨ kɨꞋɨ abua Mbɔ̧ɔ̧mà wu tàa saꞋa wòt ègème la, mè nkɨ̀Ꞌɨ̂ abua bòt mbì bu bɔ li ngu bòt ntsɔ̧̀, Mbɔ̧ɔ̧mà ghɨ̀ àwɔb bɔ tsiꞋi àghɨa tàa nkɨà nê bɔ̀ wu yùà la.

²⁴Bɨ kɨꞋɨ abua Yesò wu tà tɨ̧ɨ̧ a kètsìà ka ngɨ̀ Mbɔ̧ɔ̧mà ghɨ̀ mènkàꞋa kèkweelè fi mi la. Wu tòà wu àlo̧ atò yu bɔ li mìì la a tɨ̧ɨ̧ ane ànəa èghɨ ntsɔ̧̀ tè tsè àyea Abèl la.

²⁵Bɨ̀ ko mbɨ̀Ꞌɨ̀ ka bɨ tu̧u̧ eyute wòt wu ndàꞋà la. Bòt bu bɔ li ntù̧u̧ eyute wòt wu a sitsǎꞋ tà li ndàꞋà èngǎ̧ Mbɔ̧ɔ̧mà la e li bɔ̀ ka ko ndùùlà. A wu wu anè ane bòt baà, ko bàa wu ba tu̧u̧ eyute wòt wu tà dzə a ègwet la è ka li ko elùùlà a.

²⁶Àtɔŋ atò a li nyìꞋì sitsǎꞋ àfɨꞋa mbɔŋ, ka àfɨ̀Ꞌ yaa tà kâꞋ nê, “E mbele mèe nyiꞋi sitsǎꞋ, ka è nka wuê tsi nyìꞋì wuê sitsǎꞋ yùà, yùà. Maà nga enyìꞋì fɔ̀ɔ̀lè ne ègwet.”

²⁷Èngà̧ waa nê, “E mbele mèe” la, e wua shua nê, bɔɔ̀ nga enyiꞋi èghɨ bu Mbɔ̧ɔ̧mà ghɨ̀ la etsǐ, mbɨ̀Ꞌɨ̀ tsiꞋi etɔɔ wuê è bu kà bɔ wu ko enyiꞋi la.

²⁸Ndɨ̀ wu Mbɔ̧ɔ̧mà ŋa awa àdziꞋ a èbem kèfɔ̧̀ vi wu kà bɔ wu ko enyiꞋi la, bɨ̀ tsiꞋ bà me ŋa kènuke abua Mbɔ̧ɔ̧mà, ngùꞋtà tò mè mbɔ̀ɔ atò ane ndɨ àa bɔ̌ atò la.

²⁹Nkàà nê, Mbɔ̧ɔ̧mà wa wu ngule èwet àa shɨ̀à èghɨ la.