Read Mundani Ebùlù 13 Bible Online

Ebùlù 13 - Mundani bible

Ebùlù 13

¹Bɨ̀ me kɔ̀ŋkè bɔnyɨ bɨ̧ bu è wu bòt Yesò la nɨa ngà wuê nè mbì.

²Bɨ̀ ka ndeene a màndia bègɨ̧̀, nkàà nê bòt ko e li mbèla ngɨa a èlɨ mbɔŋ ndì bɔntu̧ Mbɔ̧ɔ̧mà kà koê.

³Bɨ̀ me ku̧u̧te bòt bu bɔ̀ wu a tèfȩ la, mbɨ̀Ꞌɨ̀ bɨ wu a fȩ bɨ tò ba, mè nkù̧ù̧ta bòt bu bɔ̀ɔ ngɨ̧̀ɨ̧̀nà wɔb la nkàà nê wu ànəa betsiꞋa a ye awɨ̧ la mɨ̧̂.

⁴Wòt ègème me nɨ èyɔꞋɔ mbɨ̀Ꞌɨ̀ ànəa ntsɔ̧̀. Mbâ̧ kò àvi leꞋ ka mpàꞋte àbɨ̧ nè wòt tsa, nkàà nè Mbɔ̧ɔ̧mà naa li saꞋa bòt bu bɔ̀ɔ mpàꞋta bòt kà yɔꞋɔ awɔb la, nè bòt bu bɔ̀ɔ njɨ̀a àbȩ la.

⁵Bɨ̀ ka ndzì èntɨ̧ɨ̧ wɨ̧ nyaŋ ane ànəa èkab. Àghɨa wòt bɔ la à kùꞋa abua tò, nkàà nê, Mbɔ̧ɔ̧mà zìambɔŋ laꞋnê, “È nka waꞋa awɨ̧ a, è nka wu elèènè àwɨ̧.”

⁶Ale, betsiꞋa waa waa ane ya shu ka bɔ̀a nê, “Mbɔ̧ɔ̧mà ka tàa ntɨ̀ŋa am la, betsiꞋa è nka bɔà. Àghɨ yu betsiꞋa wɔ̀bȩ̂ ghɨ ane yaã la wu ghàà?”

⁷Bɨ̀ ku̧u̧te ànəa bòt bu bɔ li ngu àtsəa yɨ̧ la, ye bu bɔ li ndàꞋ èngǎ̧ Mbɔ̧ɔ̧mà abua yɨ̧ la. Bɨ̀ kwàꞋte ndɨ bɔ li ngua ntsèka tè ndɨ pfə la, ndzì èntɨ̧ɨ̧ wɨ̧ ane Mbɔ̧ɔ̧mà mbɨ̀Ꞌɨ̀ bɔ li ndzì è wɔb la.

⁸Yesò Klistò nàà kà kùbtê. Tà bele wuê àghɨa tà li ndɔ̀Ꞌ ngu la àfɨ̀Ꞌ yaa, mè ngu ewu yùà ane àlia nè àlia.

⁹Bɨ̀ me ko mbɨ̀Ꞌɨ̀ bɔ nɨ mèngǎ̧ è kubte ane Ntu̧ Ntsɔ̧̀ Mbɔ̧ɔ̧mà la ntsòkè ètsə bɨ̧. Aà mbɔ̀ nê tsiꞋ è wu ntsɔ̧̀ Mbɔ̧ɔ̧mà wu tàa nyɨ̀Ꞌta abua ya la ka nàa ntɨ̀ŋa ngɨ̀à mèntɨ̧ɨ̧ ma kweelà la. È ka ngu mbɨ̧tsə ane ànəa èghɨjɨ kà wua ntɨ̀ŋa bòt bu bɔ̀ɔ nɔ̀ŋà mbɨ̧te mbɔŋ la.

¹⁰Ba bɔ àdziꞋa màŋa èghɨ abua Mbɔ̧ɔ̧mà, è wu àdziꞋa bòt bu bɔ̀ɔ faꞋa a èbem àyò a mbɔŋ la è bakà kuꞋu e be bɔ̀ɔ jɨ àghɨa a dzə a èbèm la.

¹¹Àtsəa bèntsìà mèpɨ̧̀ àa ngɨ̀ tà ŋèꞋê àlo̧ banyà̧ nɨŋ nga àdziꞋa ntsèm a mbì a Mbɔ̧ɔ̧mà, ŋà mbɨ̀Ꞌɨ̀ àghɨa èpɨ̧̀ ane mènəè kàbɔ̀ŋ bòt. È me wu èpfəꞋte banyà̧ mbɔŋ, bɔ nɨŋ ndzə àdziꞋa bòt àa ntsèka la ka ntò̧.

¹²Yesò li ndzě ngoꞋ nàbȩ̂ mɨ̧̂, a èlɨ mbɔŋ, mpfə mbɨ̀Ꞌɨ̀ enɨ àlo̧ azi e ghɨ̌ bɔɔ tsiꞋi mbɨ̀Ꞌɨ̀ zìa.

¹³Ale, bɨ̀ ghɨa bà dzə a èbem àpfəè nga àbȩ nkwene ane tò, mbɔ̀ àtsəa kɔꞋɔ, mbɨ̀Ꞌɨ̀ tà li mbɔŋ la.

¹⁴Bà ghɨ̀ ale, nkàà nê ba bakà bɔ àlaꞋ ako a sitsǎꞋ ŋàa àa li ewu aya ane àlia nè àlia la, ba wua nchɨ̀Ꞌà àpfəè yu nga ekɨꞋɨ la.

¹⁵Ale, bɨ̀ tsiꞋ bà me nɨ èlen Yesò ŋǎ mèngùꞋte abua Mbɔ̧ɔ̧mà àfɨ̀Ꞌ àgème. Eyaa wu èwuu àghɨa betsiꞋa ba ko ŋa abua Mbɔ̧ɔ̧mà la. Èghɨ bàa ŋǎ abua Mbɔ̧ɔ̧mà la wu mèngǎ̧ mu bàa ndàꞋà nɨa shua nê tà wu Tǎt wa la.

¹⁶Bɨ̀ ka ntsèke kà wua ngɨa ntsɔ̧̀ mè ngàbtà èghɨ bɨ bɔ la, nkàà nê, Mbɔ̧ɔ̧mà nàà nkɔ̀ŋkà èwuu èghɨ mbɔŋ.

¹⁷Bɨ̀ me zə bòt bu bɔ̀ wu àtsəa yɨ̧ la, ngɨ̀à àghɨa bɔ̀ɔ shua la. Bɔɔ̀ mbààba awɨ̧ àfɨ̀Ꞌ àgème kà yètè nkàà nê, bɔɔ li shu a Mbɔ̧ɔ̧mà ndɨ bɔ ghɨ àfàꞋ àyɔb la. Bɨ me zə awɔb ko bɔɔ me ghɨ àfàꞋ àyɔb nè mèngùꞋte, mbə bɨ̀ baka wua ndzəa wɔb, ko bɔɔ me fàꞋa èntɨ̧ɨ̧ wɔb è ka wua mbɔ̀, àyea mbɔŋ à ka wuê etɨŋe awɨ̧.

¹⁸Bɨ̀ me tsàꞋte a Mbɔ̧ɔ̧mà àtsəa ya. Mèntɨ̧ɨ̧ ma nàà kà feele awa nê ba fâ̧ ànəê. Ba nkɨa e ghɨ̀ àghɨa a kùꞋù la àfɨ̀Ꞌ àgème.

¹⁹Mâ lâ shù̧ù̧te awɨ̧ nè èntɨ̧ɨ̧ am ègème nê, bɨ̀ tsaꞋta mbɨ̀Ꞌɨ̀ Mbɔ̧ɔ̧mà naa ghɨ̀ maa mèe yaŋe kɨꞋɨ ekwene ane yɨ̧.

²⁰TsiꞋ Mbɔ̧ɔ̧mà àlàŋkè wu, tà li njù̧ù̧ma Yesò Lefɨ̀Ꞌ, TaꞋà Mbaabà njɨ̀tsə la, è tsě ane àlo̧ a mènkàꞋa kèkweelè mu kà wu èli lìa la,

²¹ŋà àwɨ̧ àghɨa ntsɔ̧̀ àgème mbɨ̀Ꞌɨ̀ bɨa me ghɨ̀ àghɨa tàa nkɨà la. TsiꞋ tà tsě ane Yesò ngɨ̀ àghɨa àa mbɔ̂ atò la. MèngùꞋte wu abua tò ane àlia nè àlia! Àmèn.

²²Bɔnyɨ bɔ̧, bɨ̀ yute èngà̧ waa e nɨa nkɨ̀ɨ̀ta wɨ̧ la ntsɔ̧̀. Letà waa mâ shɨ abua yɨ̧ la wu kètem àkatè.

²³Bɨ̀ ko nê bɔ tsɔꞋɔ wanyɨ wa Tɔ̀màtià wu tàà wu a tèfȩ la tè sàŋ. Tà yàŋà nkɨ̀Ꞌa ko wu ba tò nga ekɨꞋɨ ye awɨ̧ la.

²⁴Bɨ̀ tsàꞋte bòt bu bɔ̀ wu àtsəa yɨ̧ la bàgème, mè nè bòt Mbɔ̧ɔ̧mà bàgème. Bɔnyɨ baa bu a Itàlì la aà ntsàꞋtè awɨ̧.

²⁵Maà ntsàꞋtà nê Mbɔ̧ɔ̧mà nyɨꞋte a ntsɔ̧̀ vi abua yɨ̧ bɨ̀agème. Àmèn.