Read Mundani Ebùlù 2 Bible Online

Ebùlù 2 - Mundani bible

Ebùlù 2

¹MbɨꞋɨ àa nè la, ba neeta mbà̧à̧ mènəè nkûŋ mu ba zə la ntsɔ̧̀, mbɨ̀Ꞌɨ̀ ka àghɨa ko a ghɨ̀ ba sà mùà.

²Èngà̧ wu bɔntu̧ Mbɔ̧ɔ̧mà e li ndàꞋ tê àfɨꞋa Musì la, e li ndâ ngua nkwèèla tè wòt ègème tà tu̧u̧ e ghɨ̀ àghɨa e shua la bɔ ngoꞋ è kuꞋu ane àghɨa tà ghɨ̀ la.

³Ba wu anè ntù̧u̧ ebɨ̧ɨ̧ne ngɨŋa mèmpème màa Mbɔ̧ɔ̧mà ŋa abua ya àfɨ̀Ꞌ yaa la, ko àghɨa ko bàa ko e ghɨ̀ tê lùùla ngoꞋ mbɔŋ la a ntsě. Wu Tè Yesò ka tà li mbɨ̀ shu bòt ànəa mèmpème màa la. Bòt bɔ li ndzə ndɨ tà làꞋa la, e nyɨꞋte abua ya nê wu nkûŋ.

⁴Mbɔ̧ɔ̧mà zìambɔŋ nɨ èlȩê, nè ngɨŋa mènəè, nè tèwuute ènəê kà ye fɨ̀Ꞌ nɨŋ nyɨ̀Ꞌte nê ànəa ngaa wu nkûŋ mɨ̧̂, ndɔ̀Ꞌ mè ngàbtè èghɨ Fo Kèfə nàa ŋǎ la abua bòt. Mbɔ̧ɔ̧mà wu nàà ŋǎ èghɨ bàa abua bòt mbɨ̀Ꞌɨ̀ tà kɔ̀ŋkè la.

⁵Mbɔ̧ɔ̧mà li tà kà laꞋnê ngɔ̀ŋ fi yu nga ekɨꞋɨ la naa wu a èten bɔntu̧ bi. Ngɔ̀ŋ yaa wu mèntsèke fi mu bà wua ndàꞋà ànəa mùà la.

⁶Ka Àkata Mbɔ̧ɔ̧mà a tsiꞋi shu àdzìꞋa ko nê, “Mbɔ̧ɔ̧mà, wɔ̀bȩ̂ wu gha tè à me mɨ̀ɨ̀ta tò à? Waã Wòt mè ngu gha tè à bɔ àfɨ̀Ꞌ atò à?

⁷A shuke atò a si ane àtem àfɨ̀Ꞌ àko tè ntsè bɔntu̧ bê, àfɨ̀Ꞌ a tsekè me wu à ghɨ̀ tà bɔ̀ ènɨ̧ tè waa waa me ŋa kènuke abua tò.

⁸Mbɔ̂ ndzi èghɨ ègème a èten tò.” Mbɔ̧ɔ̧mà li me zǐ àghɨ àgème a èten tò ale, tà kà tɔɔ ayea ko a si. Ka baa àfɨ̀Ꞌ yaa bà ka wua ndzea nê àghɨ àgème a tsiꞋi a èten wɔ̀bȩ̂.

⁹Mbɔ̂ baa ndzèa Yesò wu Mbɔ̧ɔ̧mà li shùke atò a si ane àtem àfɨ̀Ꞌ àko tè ntsè bɔntu̧ bi la. Tà bɔ ènɨ̧ àfɨ̀Ꞌ yaa bɔ mè ŋa kènuke abua tò nkàà èlɨ tà li ndze ngoꞋ mpfə la. Mbɔ̧ɔ̧mà li nkɔ̀ŋkè bòt ngɨ̀ Yesò pfə ambo waa waa.

¹⁰Mbɔ̧ɔ̧mà wu wòt tà li ngɨ̀ ka àghɨ àgème a wu la, mè ngua ngɨ̀à èghɨ mbɔŋ ègème abua zi. Tà li ngua nkɨà nê bòt nyaŋ è wu bɔ̧ bi mbɨ̀Ꞌɨ̀ èghɨ bɔɔ bɔ ènɨ̧. A li mbɔ̀ŋ nê tà ghɨa wòt wu tàa ghɨ bòt aa bɔ mèmpème la ye ngoꞋ mbɨ̀Ꞌɨ̀ ewu àghɨa tà bɔ ndɨ tàa wu yùà la.

¹¹Tàa shùà mènəè kàbɔ̀ŋ bòt. Tòà wa bɔ̂ bòt bu bɔ shùù mènəè kàbɔ̀ŋ mɔb la e bɔ a tǎt wɔb wemɔ̀Ꞌ. Ale, eyaa wu àghɨa a ghɨ̂ ka Yesò kà wua mbɔ̌ àtsəa kɔꞋɔ a màntɔ awɔb ane bɔnyɨ bi la.

¹²Tà laꞋnê, “Mbɔ̧ɔ̧mà, maa nga elàꞋa ànəa yê abua bɔnyɨ bɔ̧. Emě shu ndɨ à ghe la àdzìꞋa bɔ bù̧ù̧te ane èlen lê la.”

¹³Tà mê nê, “Maa zì am nènkèm a tèkitebu Mbɔ̧ɔ̧mà.” Mè nê, “Ye am ba bɔ̧ bu Mbɔ̧ɔ̧mà ŋa abua am la.”

¹⁴Ndɨ̀ wu bòt baa tàa ntɔ awɔb nê bɔ̧ la è wu bɔbȩ la, Yesò zìambɔŋ li ntsìꞋi wɔ̀bȩ̂ mbɨ̀Ꞌɨ̀ bɔ̀ɔ̀ba. Tà li ngɨ̀ ale mbɨ̀Ꞌɨ̀ etsòke wòt wu mètàŋ tò nàa ngɨ̀à bòt e pfəꞋtà la. Ŋut wu Satàn.

¹⁵Yesò li nɨ̀ àyaa ngɨ̀ bòt e pem èvə. Bòt baa e li ngua mbɔ̀ɔ èvə tè ntsìꞋi mbɨ̀Ꞌɨ̀ èbùꞋ a èten lùà àfɨ̀Ꞌ àgème.

¹⁶Wu nkûŋ nê tà li tà kà kɨꞋɨ etɨŋe bɔntu̧ Mbɔ̧ɔ̧mà, tà li nkɨ̀Ꞌɨ̂ etɨŋe bòt àndǎ̧ Abàlàghâm.

¹⁷Ale, tà li mbɔ̌ ndɨ tàa wu mbɨ̀Ꞌɨ̀ bɔnyɨ bi ane balu̧ bàgème la, etsiꞋi àtsəa bèntsìà mèpɨ̧̀ Mbɔ̧ɔ̧mà tàa nkua tèsȩte bòt mè mbà̧aã àfàꞋa Mbɔ̧ɔ̧mà yu tàa fàꞋà la ntsɔ̧̀, ngɨ̀à Mbɔ̧ɔ̧mà wàꞋa bèkàbɔ̀ŋ bòt la.

¹⁸Taa ko tɨŋe bòt bu bɔ̀ɔ mbɔ̌ àkɨ̀kè la, nkàà nê tà lè lɔꞋ ndzě ngoꞋ àfɨꞋa tà li mbɔ̌ àkɨ̀kè la.