Read Mundani Ebùlù 4 Bible Online

Ebùlù 4 - Mundani bible

Ebùlù 4

¹Ndɨ̀ wu Mbɔ̧ɔ̧mà bakà kùbte mènkàꞋa mi nê baa li ekɨꞋɨ àdziꞋa yea ghɨ̌ baa yètè la, bɨ̀ me ko awɨ̧ mbɨ̀Ꞌɨ̀ ka wòt kǒ ane yɨ̧ bela ngɨ̀à tà kà tsi nkùꞋù è we tàa nyi àdziꞋa mbɔŋ la.

²Ba li ndzəâ Ntu̧ Ntsɔ̧̀ Mbɔ̧ɔ̧mà wuê mbɨ̀Ꞌɨ̀ bɔ li ndzə la, ka ndzə ale èngǎ̧ mbɔŋ è ka ghɨ a ntsɔ̧̀ ko ane yɔb nkàà nê, bɔ li bɔ̀ ka bɨ̧ɨ̧nè a mèntɨ̧ɨ̧ mɔb nê Mbɔ̧ɔ̧mà naa ghɨ̀ mbɨꞋɨ̀ tà shu la.

³Bàa wu ba bɨ̧ɨ̧ne èngǎ̧ Mbɔ̧ɔ̧mà la aa nyia àdziꞋa mbɔŋ ndzètà wù mbɨ̀Ꞌɨ̀ Mbɔ̧ɔ̧mà shu la nê, “E ndi ntsǒ tê ndzì nkà̧ nê, ‘Bɔ̀ ka lɔ̀Ꞌ àlia ekɨꞋɨ àdziꞋa màa ghɨ̌ bɔɔ yètè la a!’ ” Tà li me làꞋà àyaa ale mbɔ̂ ndzaŋe taŋke àfàꞋ àzi te àfɨꞋa ngɔ̀ŋ li mbùꞋ la.

⁴Àkata Mbɔ̧ɔ̧mà a làꞋà ànəa àli yu è wu èli besà̧à̧mbe ane nkàb la adzìꞋa ko nê, “Mbɔ̧ɔ̧mà li fàꞋ àfàꞋ àzi àgème, è me wu ane àli yu è wu èlibȩ besà̧à̧mbe ane nkàb la tà yètè.”

⁵Tà li mè shu a èbem àdziꞋa àkata mbì yu nê, “Bɔ̀ ka lɔ̀Ꞌ àlia ekɨꞋɨ àdziꞋa màa ghɨ̌ bɔɔ yètè la a.”

⁶Bòt bu bɔ li mbɨ̀ ndzəâ Ntu̧ Ntsɔ̧̀ Mbɔ̧ɔ̧mà la, e li bɔ̀ ka nyi àdziꞋa tàa ghɨ̌ bɔɔ yètè la, nkàà nê bɔ li ntù̧u̧ eyute ànəa tà shu la. A li mbàte ngu ale, ka bòt ko e bɔ̂ ngu bɔ̀ɔ nyi taa ghɨ̌ bɔɔ yètè la.

⁷Ale, Mbɔ̧ɔ̧mà mê nɔ̀ŋè àli ako me tɔ nê “Laane”. MèngùꞋebȩ ko li ntaꞋa tsě, tà ghɨ̀ Dàbid làꞋ mèngà̧ maa ba tɔ a èbem Àkata Mbɔ̧ɔ̧mà tè ndɔ̀Ꞌ la nê, “Bɨ zə ànəa Mbɔ̧ɔ̧mà shu la laane, bɨ̀ ka ngɨ̀ mèntɨ̧ɨ̧ mɨ̧ me kweele.”

⁸Joshùà li ngɨ̀ ale ngɨ̀ bɔ yètè a èlɨ̀ wu Mbɔ̧ɔ̧mà li nkàꞋ nê yea ghɨ̀ la, ko Mbɔ̧ɔ̧mà li tà meè ndàꞋ ànəa àli ako tsa.

⁹Ale, bòt Mbɔ̧ɔ̧mà e bèla mbɔ̌ àliapfəèa àko bɔ̀ɔ yètè la, mbɨ̀Ꞌɨ̀ Mbɔ̧ɔ̧mà li fàꞋ è me wu ane èlibȩ besà̧à̧mbe tà yètè la.

¹⁰Wòt gème tà nyi àdzìꞋa màndzeta yaa mbɨ̀Ꞌɨ̀ Mbɔ̧ɔ̧mà li nkàꞋ la, è paa àfàꞋ àzi tè me yète mbɨ̀Ꞌɨ̀ Mbɔ̧ɔ̧mà li ndzètè ane àzi la.

¹¹Ale, bà nyɔ̀Ꞌtà ndze nê ba nyi àdzìꞋ yu Mbɔ̧ɔ̧mà nàa ghɨ̌ baa yètè la. Bà ka mbɨ̧̀ɨ̧̀ne wòt kǒ ane ya tseke kà nyi mbɨ̀Ꞌɨ̀ bɔ li nkwèèle àtsə bɔ̀ kà kǒ nyi la.

¹²Èngǎ̧ Mbɔ̧ɔ̧mà e wu èyu̧ mè mbɔ̀ mètàŋ. E tɔɔ te ntsè nyi èbà bebe. Aà sɔ̀ɔ̀bà tè ngà ndzə àdziꞋa àlɨ̀ŋka wɔ̀bȩ̂ nè fo tò à wu abot la, mè sɔ̀ɔ̀bà tè ngà ngu a èbem èkwȩ bɔ̂ mbɔ̀ɔ̀latsə. Aa ngɨ̀à Mbɔ̧ɔ̧mà ko àghɨa wòt nàa mɨ̀ɨ̀tà la nè àyea tàa nkɨ e ghɨ̀ la.

¹³Àghɨa ko a ntsě betsiꞋa a lò̧ò̧tè a mbì Mbɔ̧ɔ̧mà la. Tàà ndzea àghɨ àgème a ngɔ̀ŋ ŋaa mbɨ̀Ꞌɨ̀ àa la, è mè ngu abua tò bàa li làꞋà ànəê àghɨ àgème bàa ngɨ̀à la.

¹⁴Yesò Waã Mbɔ̧ɔ̧mà wu àtsəa bèntsìà mèpɨ̧̀ a Mbɔ̧ɔ̧mà àya, tà kɔꞋ ngà tè ntsè ègwet la. È wu ale, bà baãaã ànəa mèntɨ̧ɨ̧ ma mu ba zi ane Yesò la ntsɔ̧̀ me nɨa ngà nè mbì.

¹⁵Àtsəa bèntsìà mèpɨ̧̀ a Mbɔ̧ɔ̧mà yaa ntsě èwuu wòt wu betsiꞋa tà kà ko nkù tèsȩ ta ane mènəè mu bàa njùa adù̧ la. Ka, tà wu wòt bɔ li nkɨke atò ane balu̧ bàgème wuê mbɨ̀Ꞌɨ̀ bàa, ka tà kà ghɨa kàbɔ̀ŋ la.

¹⁶È wu ale, bà ka mbɔ̀a a mà nkɨꞋa a mbì Mbɔ̧ɔ̧mà wu tàa nyɨ̀Ꞌta ntsɔ̧̀ vi abua bòt la. Bà kɨꞋɨ mbɨ̀Ꞌɨ̀ taa ku tèsȩ ta, enyɨꞋte èkɔŋ vi ane ya, e mě tɨŋe awa.