Read Mundani Ebùlù 5 Bible Online

Ebùlù 5 - Mundani bible

Ebùlù 5

¹Mbɔ̧ɔ̧mà nàa ngɨ̀ tà lȩ̂ wòt ayɔɔ bòt, bɔ̀ zia tò ane àtsəa bèntsìà mèpɨ̧̀, bɔ wua nkɨà taa me fàꞋa abua Mbɔ̧ɔ̧mà ane èlen bòt ngaa, ŋǎ èghɨ mè nkɨ̧̀ɨ̧̀ma banyà̧ ŋǎ abua Mbɔ̧ɔ̧mà mbɨ̀Ꞌɨ̀ e ghɨ̌ taa waꞋa bèkàbɔ̀ŋ bɔb.

²Taa ko bɔɔla vi etɨŋe bòt bu bɔ̀ɔ fà̧à̧tà mènəè nkàà nê bɔ baka ko la, ndɨ̀ wu tàa njùa àzi ane balu̧ nyaŋ la.

³Ndɨ̀ wu tàa njùa àzi mɨ̧̂ la, tà bɔ ndɨ tàa me kɨ̧ɨ̧me banyà̧ ŋǎ abua Mbɔ̧ɔ̧mà mbɨ̀Ꞌɨ̀ taa waꞋa a kàbɔ̀ŋ tò mɨ̧̂ la.

⁴Ba ko mɨ̧̂ nê wòt nàà kà kukte àvi zìambɔŋ e ghɨ̀ avi ane àtsəa bèntsìà mèpɨ̧̀ Mbɔ̧ɔ̧mà. Wu Mbɔ̧ɔ̧mà ka tàa ŋǎ èlen ngaa abua wòt wuê mbɨ̀Ꞌɨ̀ tà li ŋǎ abua Alɔ̀n la.

⁵Wu wuê a èlɨ mbɔŋ Yesò Klistò li tà kà kukte àvi zìambɔŋ, e ghɨ̀ àvi ane àtsəa bèntsìà mèpɨ̧̀ Mbɔ̧ɔ̧mà la. Wu Mbɔ̧ɔ̧mà ka tà li shu abua tò nê, “À wu Waã am; E ntsiꞋi Tǎt wè laane.”

⁶Mbɔ̧ɔ̧mà mê shu àdzìꞋa ko a èbem àkatè àzi, nê, “À wu ntsìà mèpɨ̧̀ Mbɔ̧ɔ̧mà ane àlia nè àlia, mbɨ̀Ꞌɨ̀ Mèkizedèk li ngu la.”

⁷È li ngu àfɨꞋa Yesò wu a sitsǎꞋ ŋàa la, tà me ŋȩ nè mèsi ntsàꞋta Mbɔ̧ɔ̧mà nè èntɨ̧ɨ̧ vi ègème shua mènəè abua tò wu betsiꞋa tà ko ngɨ̀ tè Yesò wu tseke kà pfə la. Mbɔ̧ɔ̧mà li njùte ànəa tà dɨ̀à shua la ndɨ̀ wu Yesò li ngua mbɔ̀ɔ̀le avi ndzəa tò la.

⁸Tà li mbàte ngu Waã Mbɔ̧ɔ̧mà ale, ka ngoꞋ yu tà li ndze la ghɨ̀ tà lànê me zəa Tǎt vi.

⁹ÀfɨꞋa Mbɔ̧ɔ̧mà li ndzèa tò tà kùꞋ la, tà ghɨ̀ tà tsìꞋi èlu̧ mèmpème kàlìà abua bòt bu bɔ̀ɔ ndzəèa tò la.

¹⁰Mbɔ̧ɔ̧mà mè ntsia tò ane àtsəa bèntsìà mèpɨ̧̀ wuê mbɨ̀Ꞌɨ̀ Mèkizedèk li ngu la.

¹¹Ba taꞋa bɔ mèngǎ̧ bàa làꞋa ane ànəê yaa la, ka è me kweele awa ndɨ bàa ghaꞋte shu la, nkàà nê ànəê aà kà yàŋè nyi àtsəa yɨ̧.

¹²Bɨ ghɨ̂ mbɔ̌ ndɨ nàa me wu àfɨ̀Ꞌ yaa bɨa tsiꞋi bènyɨꞋtà la, ka wòt kǒ bɔ ndɨ̀ tàa mèe enyɨꞋte awɨ̧ èghɨ leyu bu wòt bɔ ndɨ tàa bɨ̌ ko ane èngǎ̧ Mbɔ̧ɔ̧mà la. Bɨ bele mbɨ̀Ꞌɨ̀ bòt bɔ̀ɔ me nyɔŋe awɔb la, bɨ bakà zìꞋ nkùꞋ bòt bɔ̀ɔ me jɨ èghɨjɨ kekweelè la.

¹³Wòt ègème tàa nyɔ̌ èbɨ̧ la bele watèchɨɨle kà zìꞋ neete eko àghɨa Mbɔ̧ɔ̧mà nàa nkɨà la.

¹⁴Wu ndàꞋ bòt bɔ tsə la ka bɔ̀ɔ njɨ̀a èghɨjɨ kekweelè la. Bòt ngaa wu bòt bɔ ghɨ̀ mènəè tè èyì e nyi àtsəa yɔb ndɨ bɔ̀ɔ ko a ntsɔ̧̀ nè kàbɔ̀ŋ la.