Read Mundani Ebùlù 6 Bible Online

Ebùlù 6 - Mundani bible

Ebùlù 6

¹Bà me ghɨ èghɨ bu e kùꞋu abua bòt bu bɔ tsə ane mènəè Yesò la. Bà ka ntèꞋà wuê ane ànəa èghɨ leyu bu bɔ li mbɨ̀ nyɨ̀Ꞌte awa ane ànəa Yesò Klistò la. Bà ka tsi me làꞋà wuê mènəè mbì mu nàà shua nê bòt è waꞋa mènəè mu nàa ngɨ̀à bɔ tsiꞋi èpfəꞋte bòt a mbì Mbɔ̧ɔ̧mà la. Bà ka tsi me làꞋà wuê ndɨ wòt nàa zǐ èntɨ̧ɨ̧ vi ane Mbɔ̧ɔ̧mà la.

²Bà ka tsi mè me làꞋa wuê ànəa balu̧ a màndzia èbem èdzî nè ànəa mànɔŋa èbu àtsəa bòt Mbɔ̧ɔ̧mà. Bà ka tsi me làꞋà wuê ndɨ bèmpfəà àa li yu̧u̧me la. Bà ka mè me làꞋa wuê ndɨ Mbɔ̧ɔ̧mà nàa li saꞋa bòt la.

³Mbɔ̧ɔ̧mà bɨ̧̀ɨ̧̀na ko baa sà mènəè maa me ghà wuê nè mbì.

⁴Bòt bu bɔ sa èngǎ̧ Mbɔ̧ɔ̧mà la, bɔ̀ɔ ghɨ̀ na ka ekubte e mě kɨꞋɨ abua tò à? Bɔ li ngua ngȩ̀ȩ̀na a èbem èkaꞋà Mbɔ̧ɔ̧mà. Bɔ li njùte èghab wu àa ndzəa a ègwet la, mè mbɔ̌ Fo Kèfə mbɨ̀Ꞌɨ̀ bòt ko.

⁵Bɔ li nko nê ànəa Mbɔ̧ɔ̧mà shu la aa mbɔ̀, mè ndzè mètàŋ mu nàa wu àfɨ̀Ꞌ yu Mbɔ̧ɔ̧mà nàa me bà̧aã ngɔ̀ŋ fi la.

⁶Bɔ tsìà mèntɨ̧ɨ̧ mɔb ane Yesò ko aa taꞋa kweele bɔɔ mě zì mèntɨ̧ɨ̧ mɔb ane tò, nkàà nê a wu mbɨ̀Ꞌɨ̀ bɔ wua mè ngù̧ù̧ta Yesò waã Mbɔ̧ɔ̧mà a mbɨ̧̀ mbasa, mè ŋa àtsəa kɔꞋɔ abua tò a kètsìà banɔ̧̀.

⁷Mbɨ̀ŋ nàa me lu ane si, si mbɔŋ me ghɨ̌ èghɨ e tsəa ntɨ̀ŋa bòt bu bɔ liꞋi la, Mbɔ̧ɔ̧mà me lɔ̀ɔ̀le si mbɔŋ.

⁸Ka è wu nê, èghɨ ntsəa adù̧ la tsiꞋi njiŋtsə bɔ̂ mèfəèꞋ ko si mbɔŋ tsiꞋi àku, ntsìꞋi è ye betsiꞋa Mbɔ̧ɔ̧mà tsò̧ a me lìa bɔ tò̧ la.

⁹Ngule bèshu̧ bɔ̧, ba batè ndàꞋ anè ale, ka mbɔ̂ nga ane ànəa yɨ̧ ndâ nko nê bɨa nga egha ane alu̧ ntsɔ̧̀ wu Mbɔ̧ɔ̧mà nàa ghɨ̌ bɨa bɔ mèmpème la.

¹⁰Mbɔ̧ɔ̧mà nàà kà saꞋa ànəê kàbɔ̀ŋ. BetsiꞋa tà kà leene èfàꞋ bɨ̧, nè èkɔŋ wu bɨ nyɨꞋtè nkàà tò la. Bɨ li ngua ntɨ̀ŋa bɔnyɨ bɨ̧ bɔ̀ɔ nkùŋa a Mbɔ̧ɔ̧mà la, mè mbèla ngɨ̀à wuê a èlɨ mbɔŋ.

¹¹Baa nkɨà nê, wòt ègème ane yɨ̧ baãaã wuê a èlɨ̀ waa tè ngà ndìà, mbɨ̀Ꞌɨ̀ ebɔ àghɨa tà kuule èntɨ̧ɨ̧ vi me chɨ̀Ꞌɨ la.

¹²Baà kà kɨ laꞋnê bɨ̀ wu bòt àlȩ̀ȩ̀tè, ka baa nkɨà nê bɨ̀ wu mbɨꞋɨ̀ bòt bu bɔ li ndzì mèntɨ̧ɨ̧ mɔb ane Mbɔ̧ɔ̧mà, mè nchɨ̀Ꞌ tè mbɔ̀ àghɨa Mbɔ̧ɔ̧mà kàꞋà wɔb la.

¹³È li ngu àfɨꞋa Mbɔ̧ɔ̧mà ghɨ̀ mènkàꞋa mi abua Abàlàghâm la, wòt kà wu tà tsèa Mbɔ̧ɔ̧mà wu taa nɨ èlen tò zǐ nkà̧ la, ale tà zì nkà̧ ane zi zìambɔŋ.

¹⁴Tà li nê, “Ane nkûŋ, maa lɔ̀ɔ̀lè àwê, e ghɨ̌ àndà̧ yê aa yaãaã.”

¹⁵Ale, Abàlàghâm kùùle èntɨ̧ɨ̧ nchɨ̀Ꞌ tè ngɨ̀ mbɔ̀ àghɨa Mbɔ̧ɔ̧mà li nkàꞋ atò la.

¹⁶Wòt nàa ngɨ̀ tà me zǐ nkà̧, tà nɨ̀ èlen wòt tà tsè atò la ka nɨŋ ndzì, tà zì ale bɔ ko nê, bɔ tsia ànəa mbɔŋ, tè ndòo àyɔ̀ŋ àgème a kètsìà bòt.

¹⁷Mbɔ̧ɔ̧mà li me kɨ e ghɨ̌ bòt bu bɔ li mbɔ̌ ndɨ bɔ̀ɔ bɔ àghɨa tà li nkàꞋ la, aa la ko nê tà ka lɔ̀Ꞌ àlia ekubte èntɨ̧ɨ̧ vi a, tà zǐ nkà̧ nɨŋ sèntè ànəê yu ye kàꞋà la.

¹⁸Èghɨ aa bebe betsiꞋa è ka kubtè la, Mbɔ̧ɔ̧mà kà mê ngu elàꞋà mèfà̧ adù̧ la. Ale, bàa wu ba ghǎ abua Mbɔ̧ɔ̧mà mbɨ̀Ꞌɨ̀ epeme la, e lâ nko nê, baa bɔ àghɨ yu ba nɔ̀ŋe ntɨ̀ ya me chɨ̀Ꞌɨ nê Mbɔ̧ɔ̧mà nɔ̀ŋe abua ya la.

¹⁹Ba bɔ ntɨ̀ yaa, è wuê mbɨꞋɨ̀ àlɨ̀Ꞌa èntɨ̧ɨ̧ ya la. Ba lâ nko nê, betsiꞋa àghɨ à ka baãaãtè yùà. Wu ntɨ̀ mbɔŋ nàa ghɨ̌ baa fəèꞋə ndǐ yu bɔ tsoŋa a èbem lob nɨ̧ Mbɔ̧ɔ̧mà a Jèlusalèm a ègwet la, enyi egha tê wu àdziꞋa ntsèm a Mbɔ̧ɔ̧mà la.

²⁰Yesò ghǎ a èbèm və a mbì, nkàà àwa. Tà ghǎ abàꞋ və ale, ntsìꞋi taꞋà ntsìà mèpɨ̧̀ Mbɔ̧ɔ̧mà ane àlia nè àlia mbɨ̀Ꞌɨ̀ Mèkizedèk li ngu la.