Read Mundani Ebùlù 7 Bible Online

Ebùlù 7 - Mundani bible

Ebùlù 7

¹Mèkizedèk waa li ngu fɔ̧̀ Salèm, mè ngu ntsìà mèpɨ̧̀ Mbɔ̧ɔ̧mà Àtsèàngɔ̀ŋ. Tà li mbù̧ a Abàlàghâm nkua a èbet tà li bùŋè bèfɔ̧̀ la, fà̧à̧te atò.

²Abàlàghâm li ngàbtè èghɨ ègème tà nɨa èbet wu la ane èdzìꞋ èghem, ŋǎ àdziꞋ yeamɔꞋ abua tò. Lə mbì èlen Mèkizedèk wu, “Fɔ̧̀ tàa ngɨa àghɨa Mbɔ̧ɔ̧mà nàa nkɨa la” mè nga ane èlɨ̀ wu tà lè wu fɔ̧̀ Salèm la, lə èlen tò mè ngu “Fɔ̧̀ tàa ngɨa àlàŋkè la.”

³Mèkizedèk waa li tà kà bɔ a tàt, tà kà bɔ nyɨ̌, bɔ̀ ka meè nko ka wuê bètǎt nyaꞋ tò. Bɔ bakà ko àlia bɔ li mbi atò la, bɔ̀ ka ko àyea tà li mpfə la. Tàà mbɨ̀Ꞌɨ̀ Waã Mbɔ̧ɔ̧mà. Tà wu ntsìà mèpɨ̧̀ Mbɔ̧ɔ̧mà ane àlia nè àlia.

⁴Bɨ̀ chɨɨme ndzě ndɨ tà li nge la! Abàlàghâm wu tà li ngu tǎt mbì wa la li ngàbtè èghɨ tà nɨa èbet la ane èdzìꞋ èghem ŋǎ àdziꞋ yeamɔꞋ abua tò.

⁵Mbɨ̧ Mbɔ̧ɔ̧mà li nê, wòt ègème ane bòt Izəèlȩê me ghàbtè èghɨ tà fùꞋù la ane èdzìꞋ èghem, ŋǎ àdziꞋ yeamɔꞋ abua bòt àndǎ̧ Levì bu bɔ̀ wu bèntsìà mèpɨ̧̀ Mbɔ̧ɔ̧mà la. Bòt baa e li mbatè ngu bɔnyɨ bɔb mè ngu bòt àndǎ̧ Abàlàghâm, ka mbɔ̂ mbɔ ndɨ bɔ̀ɔ me ŋa èghɨ bàa abua bòt àndǎ̧ Levì bu la.

⁶Ka mbê waa tà li tà kà wu wòt àndǎ̧ Levì mbɔŋ la, li nɨ àdziꞋ yeamɔꞋ ane èghɨ bu Abàlàghâm li ngàbtè ane èdzìꞋ èghem la. Tà nɨ ale mbɔ̂ fà̧à̧te Abàlàghâm wu Mbɔ̧ɔ̧mà li nkàꞋ nê yea lɔ̀ɔ̀le atò la.

⁷È ntse ànəa ko bɔ̀ɔ mèe me màkè la, nê wòt tàa faãaãta bòt la è tsě wòt wu bɔ fà̧à̧te atò la.

⁸A ghǎ ane àbâ àko bòt bɔɔ̀ mpfəèꞋta la ka bɔ me nɨ àdziꞋ yeamɔꞋ ane èghɨ bu bɔ ghàbte ane èdzìꞋ èghem la, nga ane ayea ko èghɨ mbɔŋ tsiꞋi me nɨ wòt tà wu yû̧ la.

⁹BetsiꞋa wòt shu nê Abàlàghâm li ŋà àdziꞋa àghɨ ya yeamɔꞋ ale, a wu nê Levì wu bòt àndǎ̧ atò e li ngua nɨa àdziꞋ yeamɔꞋ la e ŋa mɨ̧̂,

¹⁰nkàà nê Mèkizedèk li me kwene ane Abàlàghâm ale, Abàlàghâm bela ka nga ebi bòt bu bɔ̀ɔ li lɔ̀Ꞌɔ ebi a Levì wu la.

¹¹Mbɔ̧ɔ̧mà li ŋa mbɨ̧tsə abua bòt Izəèlȩê ane ndɨ tèa nkùꞋu ane àfaꞋa tà ŋa abua bèntsìà mèpɨ̧̀ Mbɔ̧ɔ̧mà bu be dzə a èbem àndǎ̧ Levì la. Ale, àfaꞋa bèntsìà mèpɨ̧̀ Mbɔ̧ɔ̧mà bu bɔ dzə àndǎ̧ Levì la a li ngɨ̀ ale ngu ko e ghɨ̌ bòt aa wu mbɨ̀Ꞌɨ̀ bɔ wuê ewu la a mbì Mbɔ̧ɔ̧mà, ko Mbɔ̧ɔ̧mà li tà kà tsi ntsàà ntsìà mèpɨ̧̀ ko tsa, tà wù mbɨꞋɨ̀ Mèkizedèk kà wu mbɨꞋɨ̀ Alɔ̀n la.

¹²Ale, bɔ̀ɔ ngɨ̀ bɔ̀ kubte bèntsìà mèpɨ̧̀, bɔ mè nkùbte mbɨ̧tsə mɨ̧̂.

¹³Wòt wu bɔ làꞋà ànəa tò la, li dzəè a èbem àndǎ̧ ko tsa, kà wòt kǒ ane àndǎ̧ mbɔŋ li mè wu ntsìà mèpɨ̧̀ Mbɔ̧ɔ̧mà.

¹⁴Waa waa lâ nko nê, Lefɨ̀Ꞌ wa li ndzə a èbem àndǎ̧ Judà, è wu àndǎ̧ Musì li me làꞋa ànəa bèntsìà mèpɨ̧̀ Mbɔ̧ɔ̧mà ale tà kà taꞋà èlen àndǎ̧ mbɔŋ la.

¹⁵Baà pàa nkoê nkûŋ yu ane ànəê bèntsìà mèpɨ̧̀ ba la ndɨ̀ wu ntsìà mèpɨ̧̀ Mbɔ̧ɔ̧mà ko tàa mbɨꞋɨ̀ Mèkizedèk la è mê ndɔꞋ a si la.

¹⁶Tà me wu ntsìà mèpɨ̧̀ Mbɔ̧ɔ̧mà ale, è kà wu mbɨ̧ nàà ndàꞋà ànəa àndǎ̧ ntsìà mèpɨ̧̀ la ka è ghɨ̂ tà wu ale la. Wu mètàŋ mèmpème mu kà wu li lìa tà bɔ la, ka è ghɨ̀ atò ane ntsìà mèpɨ̧̀ Mbɔ̧ɔ̧mà la.

¹⁷Àkata Mbɔ̧ɔ̧mà a laꞋnê, “À wu ntsìà mèpɨ̧̀ Mbɔ̧ɔ̧mà ane àlia nè àlia, mbɨ̀Ꞌɨ̀ Mèkizedèk li ngu la.”

¹⁸Ale, mbɨ̧ nyaꞋ yu bakà tsi mbɔ̀ mètàŋ nkàà nê è li ngua njùà, è kà wua fàꞋà.

¹⁹Ngu nê mbɨ̧ Musì li è kà wu ko ghɨ àghɨa a lâ nkùꞋ la. Ba bɔ ntɨ̀ è wu ye ntsɔ̧̀ la àfɨ̀Ꞌ yaa. Wu yùà yu ka nàa nɨa wa nkɨ̀Ꞌa a ngèt Mbɔ̧ɔ̧mà la.

²⁰Mbɔ̧ɔ̧mà li mè ndzì nkà̧ ane ànəa mbɔŋ. Bɔ li me ghɨ̀ bòt ko ane bèntsìà mèpɨ̧̀ Mbɔ̧ɔ̧mà ale tà kà zi nkà̧ ane ànəê ayɔb.

²¹Ka è me wu a Yesò, ko tà li me wu ntsìà mèpɨ̧̀ ale, Mbɔ̧ɔ̧mà zì nkà̧ àfɨꞋa tà li shu abua tò nê, “Lefɨ̀Ꞌ Mbɔ̧ɔ̧mà è zǐ nkà̧, tè tà kà wu tsi ekubte ànəa tà shu la, nê, ‘A wu ntsìà mèpɨ̧̀ ane àlia nè àlia.’ ”

²²Nkà̧ yaa ghɨ̂ Yesò tsiꞋi wòt tà tɨ̧ɨ̧ a mbì, ngɨ̀ mènkàꞋa kèkweelè Mbɔ̧ɔ̧mà mu è wu me ntsɔ̧̀ la.

²³Bèntsìà mèpɨ̧̀ Mbɔ̧ɔ̧mà nyaꞋ bu be li ngua ndzà̧aã, nkàà nê èvə e li ngua nɨa wɔb, wòt kà wua ntsèka àtsəa àfaꞋa mbɔŋ ane àfɨ̀Ꞌ à seè.

²⁴Ka ndɨ̀ wu Yesò ka li lɔ̀Ꞌɔ pfə la a, betsiꞋa wòt tsa ka li ndɔ̀Ꞌ nɨ̀ àdziꞋa tò mbɨ̀Ꞌɨ̀ ntsìà mèpɨ̧̀.

²⁵Ale, betsiꞋa Yesò ko ngɨ̀ bòt bu tà ghɨ̂ bɔ kɨꞋɨ abua Mbɔ̧ɔ̧mà la, e peme nènkèm nkàà nê, tàà ntsèka ndɨ̀à ànəa yɔb a mbì Mbɔ̧ɔ̧mà àli àgème.

²⁶Èwuu àtsəa bèntsìà mèpɨ̧̀ Mbɔ̧ɔ̧mà yaa a kùꞋu abua ya. Tà wu wòt tà tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la, àghɨ à ka wu ane tò betsiꞋa wòt feele atò adù̧ la, tà kà wua ngɨa kàbɔ̀ŋ. Mbɔ̧ɔ̧mà è tsì atò ayɔɔ bòt kàbɔ̀ŋ, mè nɨ atò nkɔꞋ ngà tè ntsè tègwetsə.

²⁷Tà bakà tsi mbɔ̌ ndɨ tàa mèe me kɨ̧ɨ̧me banyà̧ àli àgème ŋǎ abua Mbɔ̧ɔ̧mà ane mènəè kàbɔ̀ŋ mi nè è me bòt ko mbɨ̀Ꞌɨ̀ ètsə bèntsìà mèpɨ̧̀ Mbɔ̧ɔ̧mà ko bu e li ngua ngɨ̀à la. Tà li mbê ngɨ̀ àyaa ngò̧ yemɔ̀Ꞌ àfɨ̀Ꞌ yu tà li ŋà àtsəa zi la.

²⁸Mbɨ̧ Musì li ngua ntsia bòt kà kùꞋ ane ètsə bèntsìà mèpɨ̧̀ Mbɔ̧ɔ̧mà, ka mènkàꞋa Mbɔ̧ɔ̧mà mu è li ntsìꞋi e kɨꞋɨ akwene mbɨ̧ nè nkà̧ adù̧ la, li ngɨ̀ Waã tò wu tà kùꞋù la ane àtsəa bèntsìà mèpɨ̧̀ Mbɔ̧ɔ̧mà ane àlia nè àlia.