Read Mundani Ebùlù 8 Bible Online

Ebùlù 8 - Mundani bible

Ebùlù 8

¹Ngule ànəê yu ba shua ane èngà̧ waa la wu nê, ba bɔ àtsəa bèntsìà mèpɨ̧̀ Mbɔ̧ɔ̧mà mbɨ̀Ꞌɨ̀ è waa tà tseke a ègwet àtɨ̧a kèfɔ̧̀ a ègwet àbâ àbualu̧ a Mbɔ̧ɔ̧mà àtsəa ngɔ̀ŋ la.

²Tàà fàꞋà mbɨ̀Ꞌɨ̀ àtsəa bèntsìà mèpɨ̧̀ àdziꞋa ntsèm a Mbɔ̧ɔ̧mà, è wù ngule àdziꞋa bɔɔ nguꞋta Mbɔ̧ɔ̧mà, Tǎt wa Mbɔ̧ɔ̧mà zìambɔŋ vəèəè ka wu wɔ̀bȩ̂ tà vəèəè la.

³Bɔɔ̀ ngɨ̀ bɔ̀ me zi wòt ègème ane àtsəa bèntsìà mèpɨ̧̀ Mbɔ̧ɔ̧mà, bɔ wua nkɨà mbɨ̀Ꞌɨ̀ taa me ŋa èghɨ, mè nkɨ̧̀ɨ̧̀ma banyà̧ ŋǎ abua Mbɔ̧ɔ̧mà. Ale, a li mbɔ̀ŋ nê àya nè àtsəa bèntsìà mèpɨ̧̀ Mbɔ̧ɔ̧mà à bɔ àghɨa ko tàa ŋa abua Mbɔ̧ɔ̧mà la mɨ̧̂.

⁴Tà li ngɨ̀ ale ngu a sitsǎꞋ, ko betsiꞋa tà kà bê ngu ntsìà mèpɨ̧̀, nkàà nê, bòt e yàŋe wu bɔ̀ɔ ŋǎ èghɨ abua Mbɔ̧ɔ̧mà mbɨ̀Ꞌɨ̀ mbɨ̧te Bèjuê tèa nkɨà la.

⁵ÀfàꞋ yu bèntsìà mèpɨ̧̀ Mbɔ̧ɔ̧mà ba àa ngɨ̀à la, wu àfəa àghɨa à wu a ègwet la. Àa mbɨ̀Ꞌɨ̀ a li ngu ane Musì la. È li ngu àfɨꞋa tàa nkɨ e ghɨ̀ àdziꞋa ntsèm yu a èbem lob Mbɔ̧ɔ̧mà la, Mbɔ̧ɔ̧mà səèŋkè àtû̧ atò nê, “Ye nê, à ghɨ̌ àghɨ àgème wuê mbɨ̀Ꞌɨ̀ e ndi nyɨ̀Ꞌte awê a ègwet èbȩ la.”

⁶Ka mbɨ̀Ꞌɨ̀ ndɨ àa la, àfaꞋa Mbɔ̧ɔ̧mà ŋa abua Yesò Klistò la a taꞋa tsè àyɔb, wuê mbɨ̀Ꞌɨ̀ mènkàꞋa kèkweelè mu Yesò tɨ̧ɨ̧ a kètsìà adù̧ la è tsě e me nyǎꞋ la. MènkàꞋa màà wu adù̧ ngule èghɨ ntsɔ̧̀ bu bɔbȩ àa li bɔ bùà la.

⁷MènkàꞋa Kèkweelè mbì maa li ngɨ̀ ale ngu ko èghɨ àghɨ àgème mbɨ̀Ꞌɨ̀ Mbɔ̧ɔ̧mà kɨa la ko tà li tà kà tsi ngɨ̀ è me ko tsa.

⁸Ale, Mbɔ̧ɔ̧mà li ndze nê, bɔ bakà kuꞋ a màngɨa àghɨ mbɨ̀Ꞌɨ̀ ye kɨa la ale, tà nê, “Naa li ngu àfɨ̀Ꞌ àko e ngɨ̀ mènkàꞋa kèkweelè fi mɔ̧, ba bòt àndǎ̧ Izəèlȩê, nè bòt àndǎ̧ Judà.

⁹MènkàꞋa Kèkweelè Fi màa ka li wu mbɨꞋɨ̀ mènkàꞋa kèkweelè mu e ndi ngɨ̀ nè bètǎt nyaꞋ bɔb, àfɨꞋa e ndi mbà̧aã àbu ayɔb ndzə a èbem àlaꞋ a Ejìb la a. Mmɔ̌ Tǎt wɨ̧ Mbɔ̧ɔ̧mà e ngua shua nê, bɔ lè kaꞋa ghɨ̂ mbɨ̀Ꞌɨ̀ ba tò ba e li nɔ̀ŋè la, ale e ntsì àbu am ane yɔb.

¹⁰Eyaa wu mènkàꞋa kèkweelè mu màa ghɨ̀ ba bòt Izəèlȩê la. Mmɔ̌ Tǎt wɨ̧ Mbɔ̧ɔ̧mà e ngua shua nê, àfɨꞋa mbɔŋ aa li nkùꞋ, e ndzì mbɨ̧ taã a ètsə bɔb, mè ndzì tua a mèntɨ̧ɨ̧ mɔb. Maa li wu Mbɔ̧ɔ̧mà wɔb, bɔɔ wu bòt bɔ̧.

¹¹Wòt kǒ ane yɔb ka li wu nyɨꞋtà wanyɨ vi a, wòt kà meè ngu li eshu abua wanyɨ vi nê, tà ko a Mbɔ̧ɔ̧mà. Aa ale nkàà nê, bɔɔ li enɨ am bàgème ane Mbɔ̧ɔ̧mà wɔb, e bùꞋu ane e we tèchɨɨle ane yɔb, e gha wu ane bɔɔjuŋ.

¹²Maa nga eku tèsȩ tɔb ane mènəè bɔ fà̧à̧tè la, mè ngwaꞋa mènəè kàbɔ̀ŋ mɔb.”

¹³Mbɔ̧ɔ̧mà me làꞋa ànəa mènkàꞋa kèkweelè fi ale, ngɨ̀ me mbì mu è tsìꞋi àku. Bɔ̀ɔ ngɨ̀ bɔ̀ baka tsi ngua mbà̧à̧ta àghɨ, tè à tsìꞋa ndènà lène bɔ ko nê, bɔ bele elèène ànəa yùà.