Read Mundani Ebùlù 9 Bible Online

Ebùlù 9 - Mundani bible

Ebùlù 9

¹È màà ngu wuê mènkàꞋa kèkweelè mbì mu ko è li mbɔ̀ balu̧ bɔ̀ɔ nɨa ka ntsàꞋta Mbɔ̧ɔ̧mà la, me mbɔ̂ àdziꞋ a sitsǎꞋ bɔ̀ɔ ntsàꞋta Mbɔ̧ɔ̧mà abot la.

²Bɔ li mvəè àyò àko, mbɔ̂ nga a èbem àtsəa mbì yu bɔ̀ɔ ntɔ nê àdziꞋa ntsèm a Mbɔ̧ɔ̧mà la, ngɨ̀ àghɨa bɔ̀ɔ ntsia èkaꞋà a ègwet la, nè èkɔꞋ mè nè bled wu bɔ tɔ èlen Mbɔ̧ɔ̧mà adù̧ la.

³Àyea ko nè àtsə a èbem àyò a mbɔŋ a li ngu akwen taꞋà ndǐ kwèn yu bɔ tsoŋa la, bɔ me tɔ nê, àdziꞋa ntsèm a mbì a Mbɔ̧ɔ̧mà.

⁴Bɔ li mbɔ̧̂ àdziꞋ a èbèm ndɔ̀ɔ̀be ane goêl me tò̧ èghɨ ko àa nəèꞋa mbɔ̀ la ŋa abua Mbɔ̧ɔ̧mà. Èkɔb mènkàꞋa kèkweelè Mbɔ̧ɔ̧mà mu bɔ lɔɔbe èbâ ègème ane goêl la e li ngu a èbèm mɨ̧̂. Bɔ li ndzì kětsəè bɔ ghɨ ane goêl la a èbèm. Èghɨjɨ bu bɔ̀ɔ ntɔ nê manà la e li ngu a èbem kětsəè fa. Ambàŋ Alɔ̀n wu tèfəꞋtsə te li ntùùte adù̧ la, nè tèbaate àti tu bɔ li shɨ̀ mènkàꞋa kèkweelè Mbɔ̧ɔ̧mà mu adù̧ la e li ngu a èbèm èkɔb mbɔŋ mɨ̧̂.

⁵Banyà̧ ko bèa nyɨ̀Ꞌta nê ènɨ̧ Mbɔ̧ɔ̧mà aa bòt la e li ngu a kɔ̧̀ èkɔb wu mbɔ̂ sà̧à̧mè tèbaabè tɔb nkàbte àdziꞋ yu Mbɔ̧ɔ̧mà nàa ngwaꞋà bèkàbɔ̀ŋ bòt la. Ba baka bɔ àfɨ̀Ꞌ a bàa yaatè mènəè maa ègème àfɨ̀Ꞌ yaa e làꞋa la.

⁶Bɔ li ngu bɔ̀ɔ ngɨ̀ bɔ̀ taŋke èghɨ bàa tè bɔ paa, bèntsìà mèpɨ̧̀ Mbɔ̧ɔ̧mà e me nyi àtsəa mbì àyò yu àlia àgème fàꞋà àfàꞋ àyɔb.

⁷È bɔ è wu àtsəa kwèn yu, ndàꞋ wòt tà me nyi a èbèm la wu àtsəa bèntsìà mèpɨ̧̀ Mbɔ̧ɔ̧mà. Tàa ngɨ̀ tà me nyi wuê ngò̧ yemɔ̀Ꞌ ane èngùꞋebȩ. Tàa ngɨ̀ tà me nyi tà nɨ àlo̧ tàa ŋa abua Mbɔ̧ɔ̧mà ane àtsəa zi, nè àyea banɔ̧̀ ane mènəè kàbɔ̀ŋ bɔ ghɨ ka ko la.

⁸Fo Kèfə wua nɨa èghɨ bàa nyɨ̀Ꞌta wa nê alu̧ a mànga àdziꞋa ntsèm a mbì a Mbɔ̧ɔ̧mà yu bakà zìꞋ ngàꞋa mbɨ̀Ꞌɨ̀ àyò yu à bele la.

⁹Èghɨ baa ègème e nyɨꞋta àlȩê àfɨ̀Ꞌ yaa bà wu adù̧ la. E wua nyɨ̀Ꞌta nê èghɨ bu bɔ̂ banyà̧ baa bɔ wua nkɨ̧̀ɨ̧̀ma ŋǎ abua Mbɔ̧ɔ̧mà la e li è ka koê ngɨ̀ wòt ngùꞋtà Mbɔ̧ɔ̧mà la nàà wu mbɨ̀Ꞌɨ̀ tà wu ewu la, tè èntɨ̧ɨ̧ tò aa bakà tsi fèèlè atò.

¹⁰Èghɨ mbɔŋ e wu wuê ane èghɨjɨ nè èghɨ bɔ̀ɔ nu la, nè balu̧ bòt àa nɨa shùà ènyit mbɨ̀Ꞌɨ̀ lèsɔ̀t la. Èghɨ baa wu mbɨ̧te nàbȩ̂ tèa me fàꞋà te egha wu àfɨꞋa Mbɔ̧ɔ̧mà nàa ghɨ̌ àghɨa àgème aa tsiꞋi ayea fi la.

¹¹Ka Yesò Klistò li nkɨ̀Ꞌɨ̂ mbɨ̀Ꞌɨ̀ wòt tà wu àtsəa bèntsìà mèpɨ̧̀ Mbɔ̧ɔ̧mà ane èghɨ ntsɔ̧̀ bu adzìꞋ yaa la. Àyò yu tàa faꞋa a èbèm la wu àyea a ghe mè ndâ ngu wu mbɨ̀Ꞌɨ̀ a wu ewu la. Àyò mbɔŋ ka ghɨa wɔ̀bȩ̂, è kà mèe ngu àghɨa bɔ ghɨ̀ mbɨꞋɨ̀ bɔ ghɨ̀ èghɨ ko a sitsǎꞋ la.

¹²Yesò li nyi a èbem àyò ya ngò̧ yemɔ̀Ꞌ, ntsè nga a èbem àdziꞋa ntsèm a mbì a Mbɔ̧ɔ̧mà yu. Tà li tà kà nɨ àlo̧ a dzətsə nè mpɔ̀ŋtsə ka nɨ enyi. Tà li ŋà àlo̧ azi zìambɔŋ, nɨŋ ngɨ̀ ba bɔ mèmpème nàa li ewu ane àlia nè àlia la.

¹³Bɔ̀ɔ ngɨ̀ bɔ nɨ àlo̧ dzətsə nè àyea mpɔ̀ŋtsə fɔ̀te nè muttsə te dzəa ane waã mpɔ̀ŋ bɔ tò̧ la, nchɨ̧̀ɨ̧̀te shùù bòt bu bɔ̀ baka kùꞋ e mbì Mbɔ̧ɔ̧mà la, ngɨ̀ bɔ fəə nkàà nê bɔ shùù a kàbɔ̀ŋ wu ane yɔb la.

¹⁴Tè a wu ewu anè, ko àlo̧ Yesò Klistò à ka faꞋa te tsè ale a? Fo Mbɔ̧ɔ̧mà àlia nè àlia li ngɨ̀ tà ŋà àtsəa zi mbɨ̀Ꞌɨ̀ nkɔ̀Ꞌ èpɨ̧̀ kà ye àlɔꞋ, mbɨ̀Ꞌɨ̀ enɨ àlo̧ azi e shùù mèntɨ̧ɨ̧ ma ane èghɨ bàa kà nɔŋe lə la, mbɨ̀Ꞌɨ̀ baa me ghɨ̀ àghɨa Mbɔ̧ɔ̧mà yû̧ nàa nkɨà nê bà me ghɨ̀ la.

¹⁵Ale, Yesò wu wòt tà tɨ̧ɨ̧ a kètsìà ka ngɨ̀ Mbɔ̧ɔ̧mà ghɨ̀ mènkàꞋa kèkweelè fi, mbɨ̀Ꞌɨ̀ bòt bu bɔ̀ tsiꞋi e be Mbɔ̧ɔ̧mà la, aa ye a ntsɔ̧̀ Mbɔ̧ɔ̧mà ane àlia nè àlia, mbɨ̀Ꞌɨ̀ tà kàꞋà la. BetsiꞋa àyaa a wu ale nkàà nê, Yesò Klistò li ŋà àtsəa zi mbɨ̀Ꞌɨ̀ e ghɨ̌ bòt aa peme ane mènəè kàbɔ̀ŋ mu bɔ li ngua ngɨ̀a àfɨꞋa bɔ li mbèle a èten mènkàꞋa kèkweelè mu Mbɔ̧ɔ̧mà li ngɨ a mbì la.

¹⁶Wòt nàa ngɨ̀ tà tɨɨ èpfəè li, wòt ka baãaãtè àghɨa tò tè tà ghɨ̀ mpfə.

¹⁷Wòt nàa ngɨ̀ tà tɨɨ èpfəè li, tà bakà pfə, bɔ̀ ka ghabtè èghɨ tò. Ka tà pfə, bɔ ghɨ̀ mbɨ̀Ꞌɨ̀ tà li shu la.

¹⁸Eyaa wu lə yu bɔ li nɨ̀ àlo̧ ka mbà̧à̧ mènkàꞋa kèkweelè mbì mu Mbɔ̧ɔ̧mà li ngɨ̀ la.

¹⁹Musì li tà ghɨ̀ tà shu ànəa àgème mbɨ̧te mènkàꞋa kèkweelè mu bòt e bɔ ndɨ bɔ̀ɔ me nɔ̀ŋè la, abua bòt bu bàgème, tà nɨ̀ àlo̧ mpɔ̀ŋtsə nè àyea dzətsə fȩ̀ȩ̀tè nè mèleb, mbɔ̂ nɨ èntaãaã ayɨ̌t kǒ bɔ̀ɔ ntɔ ane Isɔ̀b bɔ tsela àdziꞋa ndǐ a mèmbaŋ àtsə la, me nɨa nchɨꞋa adù̧ miita ane àkatè mbɨ̧ tu nè bòt mbɔŋ bàgème.

²⁰Tà ghɨ̀ tà me ghɨ̀ ale, tà me shu nê, “Àlo̧ yaa wu àghɨa Mbɔ̧ɔ̧mà nɨŋ nkùùle mènkàꞋa kèkweelè mi bɔ̂ bòt bi nê bɔ̀ me ghɨ̀ mbɨꞋɨ̀ bɔ̂ tò ba e nɔ̀ŋè la.”

²¹Tà ghɨ̀ ale, tà nɨ àlo̧ yu mii ane àyò wu, nè èghɨ bu a lob Mbɔ̧ɔ̧mà bɔ̀ɔ nɨa ngùꞋtà tò la wuê a èlɨ mbɔŋ.

²²Ane nkûŋ, mbɨ̧tsə te nyɨꞋtè nê bɔɔ nɨa àlo̧ ka nɨa ngɨ̀à èghɨ nyaŋ e kuꞋa a mbì Mbɔ̧ɔ̧mà, tè àlo̧ a bakà chɨ̧ɨ̧te a si Mbɔ̧ɔ̧mà kà waꞋa mènəè kàbɔ̀ŋ bòt.

²³A li mbɔ̀ŋ nê bɔ̀ nɨ àlo̧ èghɨ bàa shùù èghɨ bu è wù àfəa bu a ègwet la è fə. Aà nyɨ̀Ꞌta nê bɔ̀ nɨ àlo̧ èghɨ e tsè baa la ka nɨŋ shùù èghɨ bu a ègwet la.

²⁴Yesò Klistò li tà kà nyi àtsəalob ntsèm a Mbɔ̧ɔ̧mà yu wɔ̀bȩ̂ è ghɨ̂, a fəə ngule a yu a ègwet la. Tà li nkɔꞋ ngà a ègwet, àdziꞋa tà wu a mbì Mbɔ̧ɔ̧mà àfɨ̀Ꞌ yaa ambo ya la.

²⁵Tà li tà ka bɔ ndɨ tàa me ŋà àtsəa zi a ngo̧ a ngò̧, mbɨ̀Ꞌɨ̀ àtsəa bèntsìà mèpɨ̧̀ Mbɔ̧ɔ̧mà a li ngua nyia nkɨ̧̀ɨ̧̀ma banyà̧ èngùꞋ ègème nyia a èbem àtsəalob ntsèm a mbì a Mbɔ̧ɔ̧mà nè àlo̧ kà wu azi la.

²⁶Tà li me wu ale ngɨ̀ ale, ko tà li mbɔ̌ ndɨ tàa ye ngoꞋ a ngo̧ a ngò̧ ebuꞋu àfɨ̀Ꞌ yu Mbɔ̧ɔ̧mà li ngɨ̀ ngɔ̀ŋ la. Ka mbɨ̀Ꞌɨ̀ àa la, tà bê nkɨ̀Ꞌɨ̂ ngò̧ yemɔ̀Ꞌ, àfɨ̀Ꞌ yaa ngɔ̀ŋ tsìꞋa ndìà lìa la, ŋà àtsəa zi mbɨ̀Ꞌɨ̀ eyòò mènəè kàbɔ̀ŋ mu bòt àa ngɨ̀à la.

²⁷Waa waa bɔ ndɨ tàa pfə ngò̧ yemɔ̀Ꞌ, e me lɔ̀Ꞌɔ Mbɔ̧ɔ̧mà naa saꞋa atò la.

²⁸Yesò Klistò zìambɔŋ li ŋà àtsəa zi ngò̧ yemɔ̀Ꞌ mɨ̧̂ nɨŋ shùù mènəè kàbɔ̀ŋ bòt nyaŋ. Tàa mèe ekɨꞋɨ a ngo̧ kwèn, mbɔ̂ ngu kɨꞋɨ ale, tà kà tsi ngua nkɨ̀Ꞌa e ghɨ̌ Mbɔ̧ɔ̧mà naa waꞋa mènəè kàbɔ̀ŋ bòt, tà tsìꞋa nkɨ̀Ꞌa e ghɨ̌ bòt bu bɔ̀ɔ nchɨ̀Ꞌà atò la aa peme.