Read Mundani Jimsì 3 Bible Online

Jimsì 3 - Mundani bible

Jimsì 3

¹Bɔnyɨ bɔ̧, ko mbɨ̀Ꞌɨ̀ waa waa ane yɨ̧ me kɨ ewu nyɨꞋtà nkàà nê, bɔɔ li saꞋa awa wu bà wu bènyɨꞋtà la te tsě ndɨ bɔ̀ɔ saꞋa bòt ko la.

²Bàa gème aà fà̧à̧tà mènəè. Ale, wòt me làꞋa mbakà wua fà̧à̧tà mènəè, tà ko nê, mènəè mi ègème lâ nkùꞋ, ye mè ngu ko ebaabe mbɨ̧̀ ènyit zi ègème.

³Nàa ngɨ̀ è wu àfɨꞋa wòt zì afȩ a ètsə loà mbɨ̀Ꞌɨ̀ ghɨ̌ naa me zə atò la, tà fiile ko enɨ atò enɨ eghǎ àdziꞋa ye kɔ̀ŋkè la.

⁴Bɨ̀ ye ndɨ taꞋà ànkànuꞋ àa la mɨ̧̂. Aa ngɨ̀ a batè ntaꞋa wua fǎ tè àfeme àkekweelè ka a me pàa yùà a ghȩ̀ȩ̀nà, mbɔ̂ awa atɨ̧̀ɨ̧̀na kǒ nàa ngèbta a èten la, bɔ̂ fiile ko eŋwèèlè yùà tè aa ghǎ àbâ wòt màsəa wu kɨa la.

⁵Eyaa bê ngu wuê ndɨ èlɨ̧ wɔ̀bȩ̂ àa la mɨ̧̂. E taꞋa wua nkòa mbɔ̂ betsiꞋa e koê èŋwèèle atò ta làꞋà taꞋà mèngà̧. Bɨ̀ ye ndɨ awa àdziꞋ èwet nàa ngɨ̀ è tò̧ èbàꞋ e faŋ nge la.

⁶Èlɨ̧ aa mbɨ̀Ꞌɨ̀ èwet. E wu àdziꞋa ènyit yaa ko, mbɔ̂ ŋèꞋa kàbɔ̀ŋ wu a ngɔ̀ŋ ŋaa la me sàŋe wua a mbɨ̧̀ ènyit ya. Àa ngɨ̀ e tsəꞋtè èwet betsiꞋa e tò̧ò̧ mènəè ma a ngɔ̀ŋ ŋaa la. Èwet waa ane èlɨ̧ la mbɔŋ la e dzəa adzìꞋa èwet Satàn.

⁷BetsiꞋa wɔ̀bȩ̂ ko njùu tèwuute banyaãbàꞋ tègème, bɔ̂ banɨ̧̀, nè nyaãtedzì nè basə, è wù àghɨa tà ghɨ̀ te ndɔ̀Ꞌ la.

⁸Ka betsiꞋa wɔ̀bȩ̂ ka ko njû èlɨ̧ li. Èlɨ̧ aa ale ngu kwàꞋ àghɨa kàbɔ̀ŋ. E kweele àtsə ngè tè betsiꞋa e bùŋè fɔ̀ɔ̀le wɔ̀bȩ̂.

⁹Baà nɨa lùà nɨa ŋǎ mèngùꞋte abua Tǎt wa Mbɔ̧ɔ̧mà, mè nɨa lùà ntsɔ̧̀a bòt bu Mbɔ̧ɔ̧mà ghɨa wɔb mbɨ̀Ꞌɨ̀ zia la.

¹⁰Èlɔ̂t bɔ̂ kèntsɔ̧̀ɔ̧̀mè aà ndzəèà wuê a èbem ètsəê wemɔꞋ. Bɔnyɨ bɔ̧, a ghɨ à ka wu ewu ale.

¹¹BetsiꞋa mèleb ntsɔ̧̀ bɔ̂ àbɨꞋta mèleb e fɔtè ndzə a èbem èləꞋə adzì wemɔꞋ?

¹²Bɔnyɨ bɔ̧, ndɨ̀ wu betsiꞋa àyɨt yeamɔꞋ à ka fɔtè nkɔ̀ɔ̀le àgu̧u̧me nè bèanchakàlù̧ la, è bê ngu wuê ndɨ betsiꞋa mèleb ntsɔ̧̀ kà dzə a èbem àbɨꞋte adzì la.

¹³Wòt wu ane yɨ̧ tà bɔ èyì mè me nèèta nkoa mènəè la, ŋut wu nyɨꞋte ane mèntsèke ntsɔ̧̀ mi, nè èfaꞋa ntsɔ̧̀ tò tàa nɨ̀a èyì mbɔŋ mbɔ̀ɔ̀la avi fàꞋà la.

¹⁴Ka wòt me ghòꞋne bòt a èntɨ̧ɨ̧ vi nyaŋ mè nge ane èghoꞋ, tà ka me ŋeꞋe tèkwȩ ti ègwet ndàꞋà àfɨte ane ànəa è wû nkûŋ la.

¹⁵Èwuu èyì waa è ka dzə abua Mbɔ̧ɔ̧mà, e dzə a sitsǎꞋ, Fo Mbɔ̧ɔ̧mà kà meè ngu adù̧. E dzə abua Satàn.

¹⁶Aa ale nkàà nê, ghòꞋnà nè èghoꞋ àa ngɨ̀ è wu adzìꞋ, bòt e tsiꞋi me tseke a mètsəê tsa tsa, èwuu èbɨꞋte ènəê ègème e mè ngu abot.

¹⁷Ka èyì wu e dzəâ abua Mbɔ̧ɔ̧mà la wu ndâ èyì. Wòt tà bɔ èyì mbɔŋ la è bɨ̂ ngu wòt tàa ka zi àbu àzi a èbem mènəè kàbɔ̀ŋ la, mbɔ̂ me ghɨ̌ àlàŋkè, me bɔɔle avi, njùtâ ànəa bòt ko tsa àa shua la, ntaꞋa wua nkua tèsȩ, mè me ghɨ̀ mènəè ntsɔ̧̀, tà kà wua mbà̧à̧ta bòt ndȩ̀à mèsi, tà kà meè ngua fɨ̀tâ.

¹⁸Bòt bu bɔ̀ɔ ngɨ̀à àlàŋkè la àa ngɨ̀ bɔ̀ liꞋi àghɨ ane àlàŋkè mbɔŋ, bɔ fuꞋa ntsɔ̧̀.